Palavulu jabala shi pindjidu
15
*Se nna nguë ma tesu ku nna pekadölö tudu bi toja Djisu pa ineñ tëndë fala dëli,
LUK 15.1-10
2 se amea sai se nna fariseo ku nna meeth dalë ska lo Djisu mali,
ja faa:
«Masebu sai ja zhunta ku nna pekadölö se ëli ja kumu ku ineñ».
3 Tadashi se Djisu jonta ineñ palavulu sai:
4 «¿Kë namsëdji shi,
ku sa ku uan sentu jabala,
se uan ineñ ja pëndë,
ëli na ja lega deshi novu ku novu pë dantu jamian sölö sölö,
se ëli ja jua i shi pëndë iai ba toja ku ëli ja dajonta ku i shi ua?
5 Se ta ëli ja dajonta ku ëli,
se ëli ja ligui ëli pë liba joso dëli ku liguilia,
6 se ta ëli ja da jadji,
se ëli ja zhunta nna jamada dëli ku nna djividjili dëli tudu,
se ëli ja faa ineñ:
“Namsëdji bi pa djogo ku liguilia se sa ku amu iai,
pakë amu tan bë jabala amu shi bi pëndë iai”.
7 Amu faa namsëdji amea sai se ten ske të liguilia liba dösë,
dajantu uan pekadölö ku tan vla ku ope tashi,
mashi ku deshi novu ku novu nna nguë dëtu ku na ja fë ineñ fata pa ineñ tan ja be ku ope tashif.
Palavulu djiëlu pindjidu
8 »Ja mazhna fa uan naamain se sa ku uan deshi djiëlu,
se ta ëli ja pëndë unian.
¿Ëli na ja sëndë lapanta,
se ëli bali jadji se ëli ja jua ku sinchidu ba toja öshi ëli ja dajonta ku ëli ua?
9 Se ta ëli ja bë,
se ëli ja zhunta nna minga dëli ku nna djividjili dëli,
se ëli ja faa ineñ:
“Namsëdji bi pa liguilia ku amu,
pakë amu tan bë djiëlu shi amu bi pëndë iai”.
10 Amu faa namsëdji,
se sa amea shime ku Nashiolo ku nna anzhu dëli ja sa ku liguilia dajantu uan pekadölö ku tan vla ku ope tashi».
Palavulu mina pindjidu
11 Se Djisu ten jonta ineñ jö sai:
«Uan pai se sa ku nna mina dösu,
LUK 15.11-32
12 se nguë shi kichi faa pai dëli:
“Pai,
da amu pachi gagavu bo shi ske sa dji amu”.
Tadashi se pai dëneñ pachi gagavu dëli ku ineñ dödösu.
13 »Ta pasa zhugan ponodu djia,
se mina shi kichi zhunta jö ineñ shi sa ja dëli tudu se ëli ba vadji utu tela löndji;
ala se ëli bibe uan vida fëiu se ëli pëndë gagavu dëli.
14 Se ta ëli të tudu të jaba piepie,
se uan fomu ngandji da tela sai,
se ëli jomesa ja të faku ku dishamentu.
15 Se amea sai se ëli ba jua tabaia ku uan masebu tela sai,
ku se manda ëli ba matu matu dëli pa ëli ba ja fë lazhan ögö pöjö dëli.
16 Se faku shi bi sa ku ëli iai se ëli bi ja dishia pa ëli ja shia chipa dëli ku kumu shi ögö pöjö bi ska kumu,
mandji se zhugan nguë na bi ja da ëlif.
17 »Se jabamentu se ëli sa fa ja mazhna,
se ëli faa:
“¡Jantu nna tabaiadölö jadji pai amu sa ku kumu ku ja sovezha ineñ,
se amu sa iai ja mölë da faku!
18 Amu tan ske vla jadji pai amu pa amu faa ëli:
‘Pai amu,
amu fë pekadu tëjantu ku ösë ku tëjantu ku bo.
19 Amu na tan mësë pa ja sama amu mina bof,
fë ku amu jö shime ku bo ja fë ku uan nna tabaiadölö bo’”.
20 »Se amea sai se ëli ten lanta se ëli vla jadji pai dëli.
Ontolo ëli bi sa löndji ta pai dëli ba ku öiö ba bë ëli;
se ëli të dölö dëli.
Se ëli jölë ba toja ëli,
se ëli ablasa ëli se ëli da ëli beso.
21 Se mina dëli faa ëli:
“Pai amu,
amu fë pekadu tëjantu ku ösë ku tëjantu ku bo,
se amu na tan mësë pa ja sama amu mina bof”.
22 »Mandji se pai da nna shividölö dëli odji:
“¡Dandjian!
Namsëdji ma bobolonda lanlan shi gavu mashi bi pa bishi ëli.
Pa ten pë ëli uan neli dëdöma ku ja mëtëpope pë ëli ope.
23 Namsëdji ma mina kau shi gödö mashi bi,
pa kote pa fë uan bankëtë.
24 Pakë mina amu sai bi sa mölidu,
mandji se öseshi se ëli tan lanta bi vida,
ëli bi sa pindjidu,
mandji se no tan dajonta ku ëli”.
Se amea sai se ineñ ten jomesa fesa.
25 »Se ten bi sa öshi,
mina shi ngandji bi sa matu,
se ta ëli bi ku ëli iaba lome jadji,
se ëli tëndë fala tömbölö ku baia.
26 Tadashi se ëli sama uan nna shividölö se ëli pongota ëli kë ja ska shiga.
27 Se shividölö faa ëli:
“Sa fa namain bo se tan bi,
se pai bo manda pa mata mina kau shi gödö mashi pakë ëli tan vlame ma mina dëli gavu ku savadu”.
28 »Mandji se masebu shi ngandji bë mali se ëli na bi ngongo lantelaf.
Se amea sai se pai dëli së bi luga ëli pa ëli lantela.
29 Mandji se ëli kundji pai dëli:
“¡Uan sapa anu se amu ska shivi bo,
ja tëndë odji bo djia tudu,
se zhugan djia se bo na sa da amu ñi uan mina jabala pa amu fë fesa ku nna jamada amu ie zhaf!
30 Mandji se öseshi se bi mina bo sai,
ku pëndë gagavu bo tudu ku naamain dölöluia,
se bo manda pa mata mina kau shi ngandji mashi dajantu dëli”.