Djisu kula uan masebu
14
Uan djia se Djisu ba jadji uan jasa jasa nna fariseo ba kumu.
Bi sa uan djasubudu,
se amea sai se nna fariseo bi sa ala ja supeta Djisu.
LUK 14.1-24
2 Ala,
deenchi Djisu bi sa ku uan masebu ku bi ska danchi ope ku öma dëli tudu bi sa fumadu.
3 Se Djisu pongota nna meeth dalë ku nna fariseo:
«¿Sa legadu pa kula ö pa na kula nguë uan djasubuduf?».
4 Mandji se ineñ na bla böjöf.
Tadashi se Djisu ma masebu sai se kula ëli se lega ëli pa ëli bai dëli.
5 *Se ëli tan faa ineñ:
«¿Kë nguë dantu namsëdji,
shi mina dëli ö kau dëli ja pono da uan jobo daua,
ku na ske chila ëli öshi öshimef,
benga zha pa sa uan djasubudu?».
6 Se ineñ na bi paadji kundji ëli zhugan jaf.
Nna nguë bankëtë jazha
7 Se ta Djisu bë amea shi nna nguë ineñ shi a sama ba jazha tudu bi ska ma jamian ineñ shi gagavu pa ineñ tusan.
Dajantu shi se ëli jonta ineñ palavulu sai:
8 «Ta uan nguë ja sama namsëdji ba uan fesa jazha,
bo na ja tusan jamian shi dondolof,
pa na sa fa ala sa ku uan dondolo mashi ku bof ai.
9 Pakë ja sa shi,
nguë shi sama namsëdji dödösu tudu bi jazha iai ja paadji faa bo:
“Da masebu se jamian bo”.
Tadashi se sa öshi bo ku govan ska tusan jabamentu jamian.
10 »Mandji se,
ta a ja sama bo ba uan fesa,
ja sa gavu pa bo tusan jabamentu jamian,
valadji pa ta nguë shi sama bo ba fesa ai ja bi,
pa ëli ja faa bo:
“Jamada,
pasa bi deenchi mashi,
pa bo tusan jamian shi dondolo mashi”.
Se sa öshi bo ske të ondolo shi bo mësë deenchi nna nguë ineñ shi tusan ku bo sa liba mezha.
11 *Pakë ja sa nguë shi ja këlëdöguë dëli,
a ske ja fë pa ëli ja da masu,
se nguë shi ja sa masu se a ske ja lanta ëli ba liba».
12 Tadashi se Djisu faa masebu se sama ëli ba jadji dëli kumu iai:
«Ta bo ja sama nguë ba jadji bo ba kumu solo ö kumu tetadji,
bo na ja sama nna jamada bof,
ñi nna namain bof,
ñi nna zhenchi bof,
ñi nna djividjili bo ineñ shi sa likuf;
pakë ineñ ten ske sama bo ba kumu,
se sa amea shi ineñ ske da bo pagu bo bebezha.
13 Mandji se ta bo ja da uan bankëtë,
bo ja sama nna puvili,
nna ojogo ku nna nguë sebu.
14 Tadashi se bo ske sa ku liguilia,
pakë benga zha pa ineñ na ske paadji da bo paguf,
mandji se bo ske të pagu ta nna nguë dëtu ineñ shi tudu mölë bebezha tudu tan ske lanta bi vida».
Palavulu uan bankëtë ngandji
15 Se ta uan nna nguë ineñ shi bi sa mezha tëndë jö sai se ëli faa Djisu:
«¡Besa ske sa ku nna nguë ineñ shi ske kumu dantu bankëtë gövöndölö Nashiolo!».
16 Se ëli kundji ëli:
«Uan masebu se fë vadu uan bankëtë ngandji,
se ëli manda sama uan sapa pöjödölö.
17 Ta da ola bankëtë se ëli manda shividölö dëli pa ba faa nna nguë ineñ shi a sa sama bi bankëtë ia:
“Namsëdji bi,
pakë ja tudu sa vadu pë bebezha”.
18 Mandji se ineñ tudu,
naga ja faa ineñ na paadji bef.
Se nguë shi pimëlu faa ëli:
“Ontolo se amu jaba ku kumpa uan dasu matu se ta pa amu ba ua.
Amu pindji pa bo pada amu”.
19 Se utu faa:
“Öseshi öseshi se amu kumpa kau shinku,
se amu ska puva ineñ.
Amu pindji pa bo pada amu”.
20 Se utu masebu se faa:
“Öseshi öseshi se amu jazha ku miela amu,
dajantu shi se amu na fo bif”.
21 »Se shividölö tan bi toja shiölö dëli se ëli da ëli lazhan jö ineñ shi ineñ tudu fala.
Tadashi se mëtë shiölö pashian se ëli manda shividölö dëli:
“Bai dandjian mete döluia ku ölöluia palea,
pa ma nna puvili bi iai,
ku nna nguë ineñ sa ku uan basu,
ku nna nguë sebu ku nna ojogo”.
22 Se shividölö faa ëli:
“Shiöla,
amu fë amea shi bo manda amu,
mandji se ontolo të jamian”.
23 Tadashi se shiölö faa shividölö:
“Bai jamangandji ku lome ögö ögö tudu pa bo fë ineñ afoshi pa ineñ lantela,
valadji pa shia jadji amu.
24 Amu faa namsëdji fa zhugan nna nguë ineñ shi amu sama pimëlu iai na ske kumu bankëtë amuf”».
Amea jö shi kuta pa lë Djisu
25 Uan möi pöjödölö se bi ska lë Djisu,
se ëli vla öiö se ëli faa ineñ:
LUK 14.25-35
26 *«Shi uan nguë ja bi toja amu se ëli na ja nozho pai dëli ku main dëli,
ku miela dëli ku nna mina dëli,
ku nna namain napai dëli ku nna namain naamain dëli,
ba toja ku maian vida dëli,
ëli na ske paadji sa balë amuf.
27 *Se nguë shi na ja gaga kusu dëli pa ëli lë amuf,
ëli na paadji sa balë amuf.
28 »Se shi uan namsëdji ja ngongo fë uan mina jadji van pa ja ludjila ja tudu,
¿na sa fa ëli ja tusan pimëlu se ëli ja fë kuenta pa ëli sëbë jantu ske kuta ëli,
valadji pa ëli ba sëbë shime ëli të djiëlu pa ëli paadji jabafa?
29 Shi ëli ja ta fundamentu moso pa ëli na paadji jabaf,
nna nguë ineñ shi ske ja bë ëli ske ja jomesa ja li ëli,
30 se ineñ ske ja faa:
“Masebu sai se jomesa ja fë uan jadji se ëli na paadji jabaf”.
31 »Ö shi uan alë ja ska pezha ku utu alë,
¿na sa fa pimëlu ëli ske tusan pa ëli fë kuenta shi ku uan deshi milidji sodadji ëli ske paadji ta mdjadu deenchi nguë shi ëli ske pezha ku ëli ku vinta milidji sodadji ua?
32 Se shi ëli na ja paadjif,
öshi ontolo alë se ja sa löndji,
se ëli ja manda nna nguë ma nova pa ba pindji ëli amea shi ineñ ja fo da padji.
33 Se ten sa amea shime,
ja sa nguë shi dantu namsëdji ku na ja naga gagavu dëli tuduf,
ëli na ske paadji sa balë amuf.