Lega pekadu bo shina bo ske mölë
13
Dantu tempu sai se zhugan nna nguë ku bi ba ala se ineñ da Djisu lazhan kë amea shi Pilatu bi chila zhugan nna nguë loso Galilea vida folo ta ineñ bi ska da saklifisu dëneñ,
se sangui dëneñ zhunta ku dji limaia ineñ shi a bi ska ma fë saklifisu da Nashiolo.
LUK 13.1-21
2 Se Djisu kundji ineñ:
«¿Namsëdji ska mazhna fa nna napai Galilea ineñ sai se bi sa pekadölö mashi ku utu nna napai?
3 ¡Amu faa namsëdji na!
Se ten sa amea shime,
namsëdji tudu ten ske mölë,
shi na ja sa fa namsëdji tan vla ku ope tashif.
4 ¿Ö namsëdji ja mazhna fa uan deshi ku ötu pöjödölö ineñ shi ku tudu mölë basu mina jadji van pa ja ludjila Siloe ku kë da liba dëneñ iai;
ineñ se bi sa ku kupa mashi ku nna nguë ineñ shi tudu bi ska ta Jerusalen?
5 ¡Amu faa namsëdji na!
Se ten sa amea shime,
namsëdji tudu ten ske mölë,
shina ja sa fa namsëdji tan vla ku ope tashif».
Palavulu öpa abada shi na ja palif ai
6 Tadashi se Djisu jonta ineñ palavulu sai:
«Uan masebu se sa ku uan öpa abada shimadu pë matu uva dëli,
mandji se ta ëli ba jua fuluta abada sai,
se ëli na toja zhugan ponoduf.
7 Se ëli faa ku nguë shi bi ska fë lazhan matu uva:
“Ja pia,
sa tëishi anu ku amu ja bi ope döpa se bi jua abada,
se amu na ja bë zhugan ponoduf.
¡Duba folo!
¿Ja fë fata pa ëli sa san matu sai?”.
8 »Se nguë shi ja fë lazhan matu faa ëli:
“Shiöla,
lega ëli uan anu vida mashi ua,
valadji pa amu da loga pa amu fë lazhan dëli ua.
9 Jativie deenchi mashi ëli ja da fuluta,
shina,
bo ja duba folo”».
Djisu kula uan mooso djasubudu
10 Uan djasubudu,
se Djisu bi ska shina nguë kuzhu dantu uan jadji Nashian nna judio,
11 se ala bi sa ku uan mooso ku dajantu uan spitu fëiu se ëli bi ska danchi fo deshi danu ku ötu.
Ëli bi sa ku uan taba lömba ku na bi ska lega pa ëli tan mdjadu zhugan limedji shif.
12 Ta Djisu bë ëli,
se sama ëli se faa ëli:
«Mooso sai,
bo sa legadu fo danchi bo».
13 Se öshi öshime,
se ëli pë öma liba dëli,
se öshi öshi se mooso se tan deta se jomesa ja alaba Nashiolo.
14 Se nguë shi sa jasa jasa jadji Nashian nna judio bë mali pakë Djisu kula uan pöjödölö uan djasubudu.
Se fë ëli faa nna nguë:
«Ja të sëshi djia pa ja paadji tabaia,
ta pa namsëdji ja bi uan djia ineñ sai pa bi kula namsëdji,
ku pa na sa djasubuduf».
15 Se Shiölö kundji ëli:
«¡Nna sochi!
¿Na sa fa namsëdji tudu ja sota kau ku javalu kutu ineñ shi sa ku namsëdji djasubudu tudu ua,
se namsëdji ja chila ineñ fo jadji nna limaia tabaia valadji pa ëli ja bëbë aua ua?
16 Mandji se mooso sai,
ku sa mina Abraam,
se Satanas bi mala ëli ku danchi se pë san fo uan deshi danu ku ötu,
¿sa fa a na ja paadji chila guian se fo ëli djasubudufa?».
17 Ta ëli faa shi,
se nna namigu dëli tudu ma govan,
mandji se pövu tudu bi sa ku liguilia dajantu ja ngangandji ineñ shi ku ëli bi ska fë iai.
Shimenchi mostasa
18 Se Djisu tan faa ineñ:
«¿A kë ja ku ja sa fidu shimafan gövöndölö Nashiolo?
¿Kë ja amu ja fo faa sa shimafan?
19 Sa fidu uan shimenchi mostasa ku uan masebu shimian pë dantu nguintali dëli.
Se këësë se ja vla uan ope döpa se nna paatu dösë ja fë jadji dëneñ pë manga manga dëli».
Levadura
20 Se Djisu tan vlame faa:
«¿Kë ja amu ja paadji ma pa sa shimafan gövöndölö Nashiolo?
21 Sa shimafan levadura shi ku uan mooso ja ma ku ja zhunta ku uan sapa tulugu,
ba toja ku tulugu sai ja vla fumadu».
Lesa poto
22 Ta Djisu bi ska vadji Jerusalen se ëli pasa palea palea ku loso loso ja shina nguë kuzhu.
LUK 13.22-35
—Shiöla,
¿ske sa zhugan ponodu nguë moso se ske sava?
Se Djisu faa ëli:
24 —Ta pa namsëdji fë foshi pa namsëdji lantela amea lesa poto.
Pakë amu faa namsëdji fa uan sapa nguë se ske ngongo lantela se ineñ na ske paadjif.
25 Se öshi moso ku shiölö jadji ske lanta se ëli ske sua poto,
se namsëdji fo öluia se ske jomesa ja jöjö poto ja faa:
“Shiöla,
bla da no”.
Mandji se ëli ske kundji namsëdji:
“Amu na sëbë kë jamian shi namsëdji sa nguë dëlif”.
26 Tadashi se namsëdji ske jomesa ja faa:
“No kumu se no bëbë ku bo,
se bo shina no kuzhu mete döluia”.
27 Mandji se ëli ske faa namsëdji:
“Amu tan ska vlame faa fa amu na sëbë kë jamian shi namsëdji sa nguë dëlif.
¡Panta fo amu,
namsëdji tudu sa nna nguë fë ja fëfëiu!”.
28 **»Se ala se ske sa ku fala sula ku kumu denchi ta namsëdji ske bë Abraam,
Isaak ku Jakob ku nna pantafala tudu dantu gövöndölö Nashiolo,
se a ske jölë namsëdji ba öluia.
29 Se ske bi bi nna nguë pachi bosai ku dji libai,
ku basu ku liba.
Se ineñ tudu ske tusan dantu fesa bankëtë gövöndölö Nashiolo.
30 *Sa fa,
sa nna nguë jabamentu se ske sa nna nguë pimëlu,
se nna pimëlu ske sa jabamentu.
Djisu ska sula da Jerusalen
31 Se ola shime se zhugan nna fariseo iabi ope Djisu se ineñ faa ëli:
—Së fo iai,
pa bo ba utu jamian,
pakë Erodes ngongo chila bo vida folo.
32 Se Djisu kundji ineñ:
—Namsëdji ja bai pa faa jösölö djiga kichi sai:
“Ja pia,
ödjai ku amaian ontolo amu ske ja chila damono folo ku ja kula nna nguë,
se ta ske da tëishi djia se amu ske jaba ku jö shi ku amu bi fë”.
33 Mandji se ta pa ontolo amu ska be deenchi ödjai,
amaian ku anta amaian,
pakë na paadji sa pa uan pantafala Nashian na mölë dantu Jerusalenf.
34 »¡Jerusalen,
Jerusalen,
bo ku ja chila nna pantafala vida folo ku se ten ja da nna nguë ineñ shi a ja da bi da bo iai ku budu!
¡Jantu ope amu ja ngongo zhunta nna mina bo,
amea shi ngañia ja zhunta nna mina ngañia dëli pë basu azha dëli,
mandji se bo na bi ja ngongof!
35 Ja pia,
a ske lega jadji namsëdji sölö sölö.
Mandji se amu ske faa namsëdji fa a na tan ske vlame bë amuf,
ba toja ta ske da tempu pa namsëdji faa:
“¡Besa ja sa ku nguë shi ja bi a namu Shiölö!”.