Na ja sa shimafan nna fariseof
12
*Dantu tempu se me,
se milidji milidji pöjödölö tudu bi zhunta ba toja ku uan nguë ja pope utu nguë,
se Djisu jomesa ja faa ku nna balë dëli pimëlu:
«Namsëdji ja sa vatu ku levadura nna fariseo,
ku se sa sochi dëneñ.
LUK 12.1-31
2 *Na të zhugan ja jöndjidu ku a na ja paadji sëbëf,
ñi zhugan ja jöndjidu ku a na ske bi bi jönsëf.
3 Dajantu shi,
jö ineñ shi namsëdji ja faa dantu jamian kulu,
a ske ja tëndë dantu jamian fögö djidjidu;
se jö ineñ shi namsëdji ja faa dantu jochian ku poto suadu,
a ske ja pegua fo van dötë dötë jadji.
Ta pa Nashian moso se a ja mendu
4 »Se ku namsëdji,
nna jamada amu,
amu faa namsëdji pa na ja mendu nna nguë ineñ shi ja mata öguëf,
mandji zha se ineñ na tan ske paadji fë zhugan ja mashif.
5 Mandji se amu ske msa namsëdji nguë shi ta pa namsëdji ja mendu.
Namsëdji ja mendu nguë shi paadji chila namsëdji vida folo,
ku ten ja të pödë pa zhuga namsëdji ba onfenu.
Shiën,
amu sugula namsëdji fa,
pa ja mendu nguë sai.
6 »¿A na ja vëndë bichili shinku da djiëlu dösu ua?
Mandji se Nashian na ja kësë zhugan ineñf.
7 Se sa jö shi ten ja shiga namsëdji:
ba toja jabelu jasa namsëdji tudu sa jontadu.
Namsëdji na ja menduf,
pakë namsëdji se shivi mashi ku uan sapa bichili.
Na ja të govan Djisuf
8 »Amu faa namsëdji fa ja sa nguë shi ja jönsë amu deenchi nna pöjödölö,
se Mina Napai Dösë ten ske jönsë ëli deenchi nna anzhu Nashiolo.
9 Mandji se nguë shi na ten ja jönsë amu deenchi nna pöjödölöf,
a na ten ske jönsë ëli deenchi nna anzhu Nashianf.
10 *Ja sa nguë shi ja faa uan fala zhogoveadu tëjantu ku Mina Napai Dösë,
Nashian ske pada ëli.
Mandji se nguë shi ja faa fala zhogoveadu tëjantu ku Spitu Santu,
Nashian na ske pada ëlif.
11 *»Ta a ja ma namsëdji ba jadji Nashian nna judio,
deenchi nna jasa jasa pövu ku nna gövöndölö,
namsëdji na ja sa tave jö shi namsëdji ske faaf ö pa namsëdji paadji msa fa namsëdji na fë zhugan ja fëiuf.
12 Pakë dantu tempu sai se Spitu Santu ske shina namsëdji ola shime jö ineñ shi ske ta pa namsëdji kundji».
Uan liku danadu
13 Dantu möi pöjödölö sai se uan nguë faa ëli:
—Meetha,
faa namain amu pa ëli pachi gagavu pai no ku amu.
14 Se Djisu faa ëli:
—Masebu ua,
¿a kë nguë pë amu pa sa jues ö pachidölö namsëdji?
15 Se ëli tan faa ineñ:
«¡Ja ska pinchidu!
Na ja ska leva kuzhuf;
pakë vida pöjödölö na ja sa dajantu gagavu batanchi shi ja sa ku bof».
16 Tadashi se ëli da ineñ lazhan palavulu sai:
«Matu uan masebu liku bi pali uan sapa pali döpa batanchi.
17 Se ëli mazhna ku döguë dëli:
“¿A kë ja amu ske fë?
Amu na tan të jamian shi pa amu gada pali döpa amu tudu pëf”.
18 Se jabamentu se ëli faa:
“Amu sëbë jö shi amu ske fë:
amu ske të jadji gada tulugu amu tudu të lolo,
pa amu tan fë utu ngangandji mashi,
jamian shi amu ske paadji gada tulugu amu ku gagavu amu tudu pë.
19 Se amu ske faa:
‘Alma ia,
bo sa ku möi ja gagavu se gadadu ba toja uan sapa danu.
Djiskansa,
kumu,
bëbë ku pa djogo vida’”.
20 »Mandji se Nashian faa ëli:
“¡Danadu!
Nöchi sai se a ske bi pindji vida bo.
¿Kë nguë ske mdja ku jö ineñ se bo gada gada ie tudu?”.
21 »Se sa amea shi ja shiga ku nguë shi ja gada gada gagavu da öguë dëli,
anta pa ëli sa liku deenchi Nashiolo».
Shina ja tëjantu ku djiëlu ku gagavu
22 Zha se ëli faa nna balë dëli:
«Dajantu shi se amu faa namsëdji:
Pa na ja sa tave vida namsëdjif,
kë ja namsëdji ske kumu;
ñi da öguë namsëdjif,
kë ja a ske bishif.
23 Vida sai se mashi ku kumu,
se öguë se mashi ku bitidu.
24 Ja mazhna nna paatu petu,
ineñ na ja shimian ñi lanja kumu,
ñi jadji gada tuluguf,
mandji se Nashian ja da ineñ kumu.
¿Se namsëdji na se shivi mashi ku nna paatu ua?
25 ¿Kë nguë dantu namsëdji,
ku benga zha pa ëli ja sa ku tave monchi;
ëli paadji tan ia uan ola pë liba vida dëli?
26 Se öshi namsëdji na ja paadji fë uan mina ja shimafan jö sef,
¿jama fë namsëdji tan ja sa tave da utu kuzhu?
27 »Ja pia floli floli mematu,
amea shi ineñ ja këësë.
Ineñ na ja tabaiafa ñi jözhëf.
Mandji se amu faa namsëdji ñi alë Salomon,
ku gloria dëli tudu,
na ja bishi shimafan zhugan ineñf.
28 Se shi amea sai se Nashian ja bishi alba ineñ se ödjai sa mematu ku amaian ku a ja lanja pa ta pë fugan,
¿ëli na ske fë monchi mashi ku namsëdjifa,
nna nguë sa ku fi jonfa ua?
29 »Dajantu shi na ja sa tavef,
jö shi ku namsëdji ske kumufa,
ku kë ja namsëdji ske bëbëf,
ku pa na ja sa tave jaf.
30 Pakë dantu mundu nna nguë ineñ shi na ja këlë Nashianf ja ska jua jö ineñ sai,
mandji se Pai ja sëbë jö ineñ shi fë namsëdji fata.
31 Pa amea patadu,
namsëdji ja ska jua gövöndölö Nashiolo,
zha se a ske ia jö ineñ se pë liba da namsëdji.
Gavu gadadu pë ösë
32 »Namsëdji na ja ska menduf,
mina ögö jabala amu,
pakë vintadji Pai sa pa ëli da namsëdji gövöndölö dëli.
LUK 12.32-59
33 »Vëndë gagavu namsëdji pa namsëdji ja da nna puvili.
Pa namsëdji ten jua bondëlë ineñ shi ku na ja bagaf;
pa namsëdji ja gada gagavu ineñ shi na ja jabaf tudu pë ösë,
jamian shi na të futadölö ñi bisu pata na ja të fea feaf.
34 Pakë jamian shi gagavu namsëdji ja sa,
ala se sa jamian shi kusan namsëdji ten ske sa.
Nna shividölö ja gada pa Meeth dëneñ tan bi
35 *»Pa namsëdji ja sa vadu pë,
ku bitidu bishidu gavu ku fögö djidjidu.
36 *Pa namsëdji ja sa shimafan nna shividölö ku ja ska gada pa shiölö dëneñ tan vlame bi fo uan bankëtë jazha,
valadji pa ineñ bla poto da ëli dandjian ta ëli ja bi ku ëli ja jöjö poto.
37 Besa se ske sa ku nna shividölö ineñ shi ta shiölö dëneñ tan ja vlame bi ku ja toja ineñ ku öiö betu ja gada ëli.
Anta vedadji se amu faa namsëdji shiölö ske bishi bitidu gavu,
se ëli ske fë pa nna shividölö dëli tusan mezha,
se tuludöguë ëli ske sa fa ja shivi ineñ.
38 Shiën,
besa se ske sa ku nna shividölö ineñ se ku öshi shiölö dëneñ ske bi ku ske dajonta ku ineñ sa vadu pë,
benga zha pa ëli bi mete nöchi ö mazhugadu.
39 *»Mandji pa namsëdji sa suguladu da jö sai:
Shi uan shiölö jadji ja së ola öshi futadölö ske bi bi,
ëli ske sa öiö betu,
valadji pa ëli na lega pa ëli lantela jadji dëli afoshif.
40 Ta pa namsëdji ten ja sa vadu pë,
pakë Mina Napai Dösë tan ske bi ola shi ku namsëdji na ska mazhnaf».
Nna shividölö fëiu
41 Tadashi se Pudul pongota Djisu:
—Shiöla,
¿bo ska faa palavulu se da no moso,
ö da nguë tudu?
42 Se Shiölö kundji ëli:
—¿Kë jamian a ja bë uan mötölö jonfadu ku tëndëmentu ku se shiölö dëli ja lega ëli pa ëli sa jasa nna shividölö tudu valadji pa ëli ja pachi ineñ kumu ta ja da tempu dëneñ?
43 Besa se ske sa ku shividölö shi ku ta shiölö dëli tan ja vlame bi,
ku ja dajonta ku ëli ja kumpli sulvisu dëli.
44 Anta vedadji se amu faa namsëdji fa ëli ske pë ëli liba gagavu dëli tudu.
45 Mandji se shi shividölö sai ske ja faa dantu kusan dëli:
“Shiölö amu ska tada pa ëli bi”,
se ëli ja jomesa ja da shividölö naamain ku napai ku kuzhu,
ja kumu ku ja bëbë ku ja beda.
46 Se djia shi ku shividölö se na ske ja gadafa ku ola shi ëli na ske ja mazhnaf,
se shiölö tan ske vlame bi.
Se ëli ske da ëli jatigu ödu ödu se ëli ske kondena ëli jamian shime ku nna nguë ineñ shi na ja këlëf.
47 »Se shividölö shi ku ja jönsë vintadji shiölö dëli,
mandji se ëli na ja sa vadu pë pa ëli kumplif,
a ske da ëli ku uan sapa kuzhu.
48 Mandji se shividölö shi na ja jönsë ëlif se ëli ja fë uan kuzhu ku ëli ja mësë jatigu a ske da ëli ku uan fi kuzhu.
Se nguë shi a ja da ëli monchi,
a ten ske pindji ëli monchi mashi;
se nguë shi a ten ja jonfa ëli monchi,
se a ten ske pindji ëli monchi mashi.
Djisu ja pë nna balë dëli vatu
49 »Amu bi pa amu bi ta fögö pë mundu,
¡kë amea shi amu ja ngongo pa fögö sai ska dëdë bebezha!
50 *Mandji se ta pa amu pasa uan bachizha ödu,
se ¡jantu mavida amu ske ma ba toja pa kumpli!
51 ¿Namsëdji mazhna fa amu bi pa amu ma padji bi tela?
Amu faa namsëdji:
Na,
shina amu bi të baga fë uachi uachi.
52 Pakë fo öseshi be deenchi se nna nguë shinku dantu uan jadji ske sa pachidu fë uachi,
ineñ tëishi ske ja pezha tëjantu ku nna nguë dösu,
se nna nguë dösu ske ja pezha tëjantu ku nna nguë tëishi.
53 “Uan pai ske ja pezha ku mina dëli
se mina ske ja pezha ku pai dëli;
uan main ske ja pezha ku mina naamain dëli
se mina naamain ske ja pezha ku main dëli;
se sogolo ske pezha ku moso mina dëli
se moso mina ske ja pezha ku sogolo dëli”.
Shinali tempu
54 Zha se Djisu tan vlame faa ku möi pöjödölö:
«Ta namsëdji ja pia benda dëtu ku a ja bë ösë ku uan növu,
öshi öshi se namsëdji ja faa:
“Aua ske sëbë”,
se ten ja shiga amea sai.
55 Se ta ja föfö oventu fo bosai,
se namsëdji ja faa:
“Ske fë kenchi”,
se ten ja shiga amea sai.
56 ¡Nna sochi!
Namsëdji paadji jönsë san tela ku ösë pa namsëdji së tempu shi ske fë.
¿Jama fë namsëdji na ja paadji jönsë tempu sef?
57 »¿Jama fë tuludöguë namsëdji me na ja juzhga jö shi sa dëtuf?
58 Ta uan nguë ja ska ma bo ba deenchi nna jasa jasa pövu ja sa gavu pa bo ja da padji ku ëli anta pa namsëdji ba da deenchi jues,
pakë bo na ja fë shif,
se jues ske ma bo ba da nna guada se ineñ ske mëtë bo pë djili.
59 Se amu faa bo fa bo na ske së fo alaf,
ba toja pa bo da pagu jabamentu djiëlu shi kichi mashi».