Djisu ska shina nguë amea shi a ja lezha
11
Uan djia se Djisu bi sa uan jamian ja lezha,
se ta ëli lezha jaba se uan nguë dantu nna balë dëli faa ëli:
—Shiöla,
shina no lezha,
amea shi Zhuan shina nna balë dëli iai.
LUK 11.1-28
2 Se ëli faa ineñ:
—Ta namsëdji ja ska lezha,
ja ska faa:
Pai no,
ku sa ösë,
pa namu bo ja sa santu.
Pa gövöndölö bo bi.
Pa vintadji bo se kumpli
shimafan liba dösë
ku a shime san tela.*+
3 Da no djia tudu ampan no dödjai.
4 Pada no pekadu no tudu,
pakë no ten ja pada nna nguë ineñ shi ja tuva no tudu.
Na lega pa no pono da tentasanf,
shina pa bo fë pa no sa legadu fo mali.*+
5 A shime Djisu ten faa ineñ:
«Ja ska mazhna fa,
uan namsëdji sa ku uan jamada,
se mete nöchi se ëli bi se ëli faa bo:
“Jamada,
peta amu ampan tëishi,
6 pakë uan jamada amu ku fo vadji bi jadji amu öseshi,
se amu na të zhugan ja pa amu da ëlif”.
7 Se nguë shi sa dantu ja kundji ëli:
“Na tan fonta amuf.
Poto amu sa suadu bebezha,
se amu ku nna mina amu tudu sa tovesadu.
Amu na paadji lanta pa amu bi da bo zhugan jaf”.
8 Amu faa namsëdji fa,
benga zha pa ëli na bi ske lanta pa ëli bi da ëli ampan dajantu ku ëli sa jamada dëlif,
ëli bi ske lanta dajantu fonta dëli se ëli ske da ëli jö ineñ fë ëli fata tudu.
9 »Se fë amu faa namsëdji:
Ja pindji se a ske ja da namsëdji;
ja ska jua se namsëdji ske ja bë;
ja sama se a ske ja bla da namsëdji.
10 Pakë nguë shi ja pindji tudu,
ske ja ma;
se nguë shi ja jua,
se ske ja bë;
se nguë shi ja sama,
se a ja bla da ëli.
11 »¿Kë pai dantu namsëdji,
shi mina dëli ja pindji ëli*+ ampan se ëli ja da ëli uan budu?
¿ö shi uan pishi mandji ku ëli ja da ëli uan jobolomatu?
12 ¿Ö shi ëli ja pindji uan ovu,
se ëli ske da ëli uan sentumatu?
13 Se shi namsëdji,
ku sa nna nguë fëfëiu,
ja sëbë da nna mina namsëdji ja gagavu,
¿jantu mashi ku Pai shi sa ösë na ske da nna nguë ineñ shi ja pindji ëli Spitu Santuf?».
Djisu ku Satanas
14 Se Djisu bi ska chila uan damono ku na bi ja faa falaf.
Ta damono se së fo masebu sai,
se ëli tan faa fala,
se nguë tudu gua ku böjö betu.
15 *Mandji se zhugan nguë bi ska faa:
«Nguë sai na ja chila nna damonof shina ku amea pödë Belsebu,
ku se sa mina dalë nna damono».
16 *Se utu nguë,
valadji pa ineñ puva ëli se ineñ bi ska pindji ëli uan shinali fo ösë.
17 Mandji se Djisu bi jönsë mazhnamentu dëneñ,
se ëli faa ineñ:
«Gövöndölö tudu ku ja sa pachidu tëjantu ku tuludöguë dëli me,
ske fea fea;
se jadji shi ja sa pachidu tëjantu ku tuludöguë dëli me,
ske lolo.
18 Se shi Satanas ten ja chila Satanas folo ba öluia,
ëli ja sa pachidu ku tuludöguë dëli me.
¿Kë amea shi gövöndölö dëli ske paadji ta mdjadu?
Amu pongota namsëdji pakë namsëdji faa amu ja chila damono amea pödë Belsebu.
19 Mandji se shi amu ja chila nna damono amea Belsebu,
¿ku kë amea kë nguë nna balë namsëdji ten ska ma chila?
Dajantu shi se ineñ ske sa jues liba namsëdji.
20 Mandji se shi amu ten ja ska chila nna damono amea dëdöma Nashiolo,
tadashi gövöndölö Nashian bi toja namsëdji bebezha.
21 Ta uan masebu ödu ku sa ku pingada gavu pa ëli ludja jadji dalë dëli,
gagavu dëli tudu ja sa suguladu.
22 Mandji se ta ja bi uan masebu ödu mashi ku ëli ja pezha ku ëli ku ja ngana ëli se ëli ja chila ëli pingada ineñ shi ëli bi ska jonfa iai fo öma dëli,
se ja pachi ja futadu sai.
23 *»Nguë shi na ja sa pachi amuf,
ëli ja sa tëjantu ku amu;
se nguë shi ku amu na ja totolof,
ëli ja të panta panta.
Spitu fëiu shi tan ja vlame bi
24 »Ta uan spitu fëiu ja së fo uan pöjödölö,
ëli ja bai ja ndanda jamian ineñ shi seku seku ja jua uan jamian pa ëli paadji djiskansa,
se ëli na ja bëf.
Tadashi se ëli ja faa:
“Amu tan ske vlame ba jadji amu jamian shi ku amu bi së folo”.
25 Ta ëli ja da,
se ëli ja toja balidu ku jözhidu pë.
26 Tadashi se ëli ja bai se ëli ja ma utu spitu seta fëfëiu mashi ku ëli,
se ineñ ja lantela se ineñ ja bibe ala.
Se jabamentu vida masebu sai tan ja fëiu mashi ku fo jomesadu».
Liguilia shi ngandji mashi
27 Se öshi Djisu bi ska faa jö ineñ sai,
se uan mooso dantu möi pöjödölö ineñ se lanta falagochi ba van,
se faa ëli:
«¡Besa se ske sa ku main shi ku bi pali bo ku bi da bo mama!».
28 Mandji se Djisu kundji ëli:
«¡Liguilia shi ngandji mashi,
se ja sa ku nna nguë ineñ shi ja tëndë Fa Nashiolo ku fë jö shi ëli fala!».
Shinali Jonas
29 *Se uan möi pöjödölö se bi ska be ja zhunta pë ope Djisu,
se ëli jomesa ja faa ineñ:
«Zhenchi sai sa nna nguë malvadu.
Se ineñ ska jua uan shinali ja ngangandji,
mandji se a na ske da ineñ utu shinali mashi ku dji Jonasf.
LUK 11.29-36
30 Pakë amea shi Jonas bi sa shinali da nna nguë ninive,
se ten ske sa amea shi Mina Napai Dösë ske sa da zhenchi sai.
31 »Se main dalë Bosai ske bi lanta dantu djia juisio pa kondena zhenchi sai;
pakë ëli bi fo jabamentu tela valadji pa ëli bi tëndë tëndëmentu alë Salomon,
se iai namsëdji sa ku uan nguë ngandji mashi ku alë Salomon.
32 A shime nna pöjödölö Ninive ten ske lanta djia juisio,
ta a ske juzhga zhenchi sai pa kondena ineñ,
pakë ineñ tëndë pegua Jonas se ineñ tan vla ku ope tashi,
se iai namsëdji sa ku uan nguë ngandji mashi ku Jonas.
Lapanta döguë
33 *»Zhugan nguë na ja jöndë uan fögö sindjidufa,
ñi basu kachabachef,
shina liba öpa jandjia,
valadji pa nna nguë ineñ shi ja lantela ja bë fögö djidjidu.
34 »Lapanta döguë se sa öiö,
dajantu shi,
shi öiö bo ja sa gavu,
öguë bo tudu ske sa shia fögö djidjidu,
mandji se shi i ja sa fëiu,
a shime öguë bo tudu ten ja sa dantu jamian kulu.
35 Ja ska pinchidu pa fögö djidjidu shi sa ku bo iai na ja vla fë jamian kuluf.
36 Mandji se shi öguë bo tudu ja ska dëdë ku fögö,
ku na ja sa ku zhugan fi jamian kulu shif,
jamian bo tudu ske ja sa djidjidu ku fögö,
shimafan ta uan lapanta ja dëdë ku fögö djidjidu dëli pë bo».
Djisu ska faa nna fariseo ku nna nguë tëndëmentu dalë kuzhu
37 Ta Djisu chama faa fala jaba,
se uan fariseo faa ëli pa ëli ba jadji dëli ba kumu,
se ta ëli lantela jadji sai se ëli tusan liba mezha.
LUK 11.37-54
38 Mandji se fariseo sai gua ku böjö betu öshi ëli bë fa Djisu na ska kumpli ku kutumu laba öma pimëlu zha pa ëli ba kumuf.
39 Mandji se Shiölö faa ëli:
«Se öseshi,
namsëdji nna fariseo ja limpa benda döluia jalashi ku dji patu,
mandji se benda dantu namsëdji ja sa shia ja futa futadu ku ja fëfëiu.
40 ¡Nna danadu ua!
¿Namsëdji na sëbë fa nguë shi mindji benda döluia se ten mindji benda dantufa?
41 Ja da nna puvili ja gavu ku jö shi ja sa dantu mashi,
se amea sai se ja tudu ske ja sa limpi da namsëdji.
42 »¡Puvili namsëdji,
nna fariseo!,
pakë namsëdji ja da uan deshi pachi menta,
ku dji ruda ku klase fadöpa dantu nguintali tudu,
mandji se namsëdji ja kësë djustishi ku ngongo Nashiolo.
Ske ta pa namsëdji ja fë jö ineñ sai shinke namsëdji ja chama fë ineñ shiki.
43 »¡Puvili namsëdji,
nna fariseo!,
ku ja ngongo tusan jamian dondolo dantu jadji Nashian nna judio,
ku pa ja da namsëdji manten mete döluia.
44 ¡Puvili namsëdji!,
namsëdji ja sa fidu spitula ku a na ja bëf,
ku nna pöjödölö ja ska pope liba shinke a ja sëbë».
45 Se uan nguë dantu nna meeth dalë kundji ëli:
—Meetha,
ta bo ja faa ja amea sai bo ten ja ska suta no.
46 Se Djisu kundji ëli:
—¡Puvili a shime namsëdji,
nna meeth dalë!
Ku ja ligui jalga pë liba utu nguë,
mandji ku ñi ku uan dëdöma namsëdji na ja fala pa ja zhuda ineñf.
47 ¡Puvili namsëdji!,
ku ja fë spitula ngangandji da nna pantafala ineñ shi ku paipai namsëdji chila ineñ vida folo iai.
48 Dajantu shi se a ja da lazhan fa namsëdji ja bë gavu fidu jö ineñ shi nna paipai namsëdji fë iai;
pakë anta vedadji se ineñ chila nna pantafala vida folo,
se namsëdji fë spitula da ineñ.
49 Dajantu shi,
se Nashian dantu tëndëmentu dëli se faa:
“Amu ske manda nna pantafala ku nna apostol bai,
se dantu dëneñ se ineñ se a ske chila zhugan ineñ vida folo se a ske pëtëpë zhugan ineñ”.
50 »Dajantu shi,
se zhenchi sai a ske pindji ineñ kuenta sangui nna pantafala ineñ shi ku ineñ jölë tudu fo jomesadu mundu,
51 fo sangui Abel ba toja sangui pantafala Sakarias,
ku a chila ëli vida folo metadji datali saklifisu ku jadji Nashiolo.
Shiën,
anta vedadji se amu faa jö ineñ se tudu a ske pindji zhenchi sai kuenta.
52 »¡Puvili namsëdji,
nna meeth dalë!,
pakë namsëdji ja chila sevu tëndëmentu folo,
se namsëdji me na ja lantelafa ñi na ja lega pa utu nguë ten lantelaf.