Djisu manda nna balë dëli deshi seta ku dösu
10
Ta jö ineñ se shiga jaba,
se Shiölö ma utu deshi seta ku dösu nna balë,
valadji pa ëli da ineñ be dösu ku dösu deenchi dëli ba loso loso ku jamian ineñ shi ëli bi mazhna pa ëli bai iai.
LUK 10.1-24
2 *Se ëli faa ineñ:
«Anta vedadji,
jö shi pa totolo sa monchi,
mandji se nna tabaiadölö na ja na ja dagolif.
Dajantu shi namsëdji ja ska luga Shiölö jö shi ta pa totolo valadji pa ëli manda nna tabaiadölö ba matu dëli.
3 *¡Namsëdji bai!
Amu ska da namsëdji bai shimafan nna mina jabala metadji nna jösölö djiga.
4 Namsëdji na ja ma bondëlë djiëluf,
ñi bondëlë vadjif,
ñi ja mëtëpopef;
ñi namsëdji na ja da zhugan nguë manten jamangandjif.
5 »Ta namsëdji ja lantela dantu uan jadji,
namsëdji ja da nguë jadji sai manten pimëlu,
ja faa:
“Padji ja sa ku jadji sai”.
6 Se shi ala ja të uan nguë padji,
se padji sai ske sa liba dëli;
se shi na ja shif,
se padji tan ske vla ba toja namsëdji.
7 *Se namsëdji ja mdja jadji sai,
se namsëdji ja kumu ku bëbë ja sa jö shi ja sa ku ineñ iai,
pakë tabaiadölö ja mësë pagu tabaia dëli.
Na ja ska nda jadji jadjif.
8 »Ta namsëdji ja lantela dantu uan loso se a ja ma namsëdji gavu,
ja kumu jö ineñ shi a ja shivi namsëdji.
9 Ja kula nna nguë ineñ shi ska danchi ala pa namsëdji ten faa ineñ:
“Gövöndölö Nashian sa peetu ku namsëdji bebezha”.
10 *Mandji se ta namsëdji ja lantela dantu uan loso ku a na ja ma namsëdjif,
ja së ba mete döluia pa namsëdji ja faa:
11 “*Ba toja opo loso namsëdji,
ku paka pë ope ope no,
no ja sugudji tëjantu ku namsëdji.
Mandji pa namsëdji ja sëbë jö sai,
fa gövöndölö Nashian sa peetu bebezha”.
12 *Se amu faa namsëdji,
djia juisio jatigu Sodoma ske sa levu mashi ku dji loso sai.
Nna nguë loso loso ineñ shi na tan vla Nashianf
13 »¡Puvili bo,
loso Korasin!
¡Puvili bo,
loso Betsaida!,
pakë shi ja pa sa ja a bi bi fë dantu Tiro ku Sidon fidu ja ngangandji ineñ shi a fë metadji namsëdji iai,
bi ske sa tempu löngö ku namsëdji tan vla ku ope tashi ku uan sapa dödö.
14 Mandji se djia juisio jatigu Tiro ku Sidon ske sa levu mashi ku dji namsëdji.
15 Se bo,
Kapernaum,
¿bo këlë fa a ske lanta bo ba toja ösë?
Na,
shina bo ska dësë ba toja Ades.
16 *»Nguë shi ja tëndë namsëdji,
se ten ja tëndë amu;
se nguë shi ja naga namsëdji,
ten ja naga amu;
se nguë shi ja naga amu,
ten ska naga nguë shi da amu bi».
Djisu ku nna balë dëli sa ku liguilia
17 Se ta nna balë dëli deshi seta ku dösu tan vlame bi,
se ineñ ku liguilia faa:
—¡Shiöla,
ba toja nna damono tudu ja tëndë no ku namu bo!
18 Tadashi se Djisu faa ineñ:
—Amu bë amea shi Satanas bi ska pono fo ösë shimafan uan lali.
19 Amu da namsëdji pödë amea shi pa namsëdji fo pope jobolomatu ku sentumatu,
vlame amu ten da namsëdji pödë pa ten ja ngana pödë shi ja fo namigu,
se zhugan ja na ske fë namsëdji malif.
20 Mandji se,
pa namsëdji na ja të liguilia pakë nna spitu fëfëiu ska tëndë namsëdjif,
shina pa ja sa ku liguilia dajantu namu namsëdji sa skividu pë liba dösë.
21 Se dantu ola shime,
se Djisu bi sa shia ku liguilia fo Spitu Santu,
se ëli faa:
«Amu ja alaba bo,
Pai,
Shiölö liba dösë ku dji tela,
pakë bo na lega pa nna sëbëdölö ku nna nguë sëbë kuzhu jönsë jö ineñ sef,
se bo msa nna nguë shipë shipë.
Shiën,
Pai,
pakë se bi sa vintadji gavu bo.
22 *»Ja tudu sa ja Pai amu da amu.
Se zhugan nguë na jönsë kë nguë sa Minaf,
shina Pai,
se zhugan nguë na jönsë kë nguë sa Paif,
shina Mina ku nguë shi ku Mina ja ngongo msa ëli».
23 Se ëli vla öiö da nna balë dëli,
se ëli faa ineñ apachi:
«Besa se ske sa ku öiö namsëdji da jö ineñ se namsëdji ska bë.
24 Pakë amu faa namsëdji fa uan sapa nna pantafala ku nna alë se bi ngongo pa ineñ bë jö ineñ se namsëdji ska bë iai,
mandji se ineñ na bi bëf;
pa ineñ tëndë jö ineñ se namsëdji ska tëndë iai,
mandji se ineñ na bi tëndëf».
Palavulu Samaritano shi gavu
25 *Se uan meeth dalë se lanta pa ëli ba faa ku Djisu valadji pa ëli ten puva ëli,
se ëli pongota ëli jö sai:
—Meetha,
¿kë ja amu ja fo fë pa amu të vida chindadji?
LUK 10.25-42
26 Se ëli ten pongota ëli:
—¿A kë ja sa skividu dantu lavulu dalë?
¿Kë amea shi bo ja lëë?
27 Se nguë sai kundji ëli,
se faa:
—“Se bo ske ngongo ku Shiölö shi sa Nashian bo ku kusan bo tudu,
ku alma bo,
ku foshi bo tudu,
ku miolo bo tudu;
ku pusumu bo shimafan tuludöguë bo”.
28 Se Djisu faa ëli:
—Bo kundji gavu,
fë jö sai se bo ske bibe.
29 Mandji se ëli bi ngongo jua pa ëli se sa ku dëtu,
se ëli tan pongota Djisu:
—¿A kë nguë sa pusumu amu?
30 Se Djisu kundji ëli se da ëli lazhan soia sai:
—Uan masebu se ska bai fo Jerusalen ja Jeriko,
se jamangandji se ëli pono da öma nna futadölö.
Se ineñ futa ëli ja dëli tudu,
se ineñ da ëli pajada,
se ineñ chila ëli bitidu,
zha se ineñ lega ëli mëmë mölidu.
31 »Se ten fë se pasa jamangandji shime,
uan padjil,
ta ba ku öiö ba bë ëli se ëli sata jamangandji ba benda sala,
se ëli be dëli.
32 Se amea sai se ten ba da jamian shime,
uan levita,
ta ba ku öiö ba bë ëli,
se ëli ten sata jamangandji se ëli ten bai dëli.
33 »Mandji se ta uan masebu ku sa nguë samaria,
ku bi ska vadji se ta ëli ba da jamian shi masebu se bi sa,
se ta ëli bë ëli,
se ëli të dölö dëli.
34 Se ëli iaba ope dëli,
se ëli kula ëli fida dëli ku zhëitë ku vian,
se ëli ligui ëli pë liba limaia dëli,
se ëli ma ëli ba uan jadji loma nguë se ëli fë lazhan dëli.
35 Se ta da amaian shi,
se ëli da shiölö jadji loma nguë djiëlu tabaia dösu djia,
se ëli faa ëli:
“Fë lazhan dëli da amu,
se ja sa jö ineñ shi bo tan ja da ëli iai,
amu ske da bo pagu bo tan amu tan ske vlame bi”.
36 ¿Kë nguë dantu nna nguë tëishi ineñ se,
ku bo këlë fa se msa fa ëli sa pusumu masebu se pono da öma nna futadölö iai?
37 Se meeth dalë kundji ëli:
—Nguë shi të dölö dëli.
Se Djisu faa ëli:
—Bai pa bo ten fë jö shime.
Marta ku Malia
38 *Se öshi Djisu ku nna balë dëli bi ska be jamangandji se ëli lantela dantu uan loso,
se uan mooso ku a ja sama Marta ma ëli ba jadji dëli.
39 Se Marta bi sa ku uan namain ku a ja sama Malia,
se Malia bi tusan ope Shiölö valadji pa ëli tëndë jö ineñ shi ëli bi ska fala.
40 Mandji se Marta ku bi sa ku uan sapa tave pa ëli fë,
se ëli iaba jamian Djisu se ëli faa ëli:
—Shiöla,
¿bo na sa tave pa namain amu lega amu moso pë ku sapa tabaia ineñ sefa?
¡Faa ëli pa ëli zhuda amu!
41 Mandji se Shiölö kundji ëli: