Djisu manda nna balë dëli deshi ku dösu
9
Se Djisu sama nna balë deshi ku dösu dëli se ëli da ineñ odji ku pödë liba nna damono tudu ku pa ineñ ten ja kula danchi danchi.
LUK 9.1-27
2 Tadashi se ëli manda ineñ ba pegua tëjantu ku gövöndölö Nashiolo,
ku pa ineñ kula nna nguë ska danchi.
3 Se ëli faa ineñ:
«Namsëdji na ma zhugan ja bai ku namsëdji jamangandjif,
ñi budanf,
ñi bondëlëfa,
ñi ampanfa,
ñi djiëlufa,
ñi jaminzha dösuf.
4 Ja sa jadji shi namsëdji ja lantela,
namsëdji ja mdja ala ba toja ta namsëdji tan ja së fo jamian sai.
5 **Se shi a na ten ja ma namsëdji loso sef,
namsëdji ja së fo ala,
ja sugudji opo fo ope namsëdji,
valadji pa jö se ja da lazhan gavu tëjantu ku ineñ».
6 Se amea sai se ineñ bai,
fo pachi loso loso tudu ja pegua evanjelio se ineñ ten ja ska kula nguë.
Erodes na sëbë nguë sa Djisuf
7 *Se alë Erodes shi se bi sa gövöndölö shi fë jatulu bi tëndë jö ineñ shi bi ska shiga ala tudu,
se ëli na bi sëbë ja pa ëli mazhnaf,
pakë zhugan nguë bi ska faa fa Zhuan tan lanta fo dantu nna nguë mölidu,
8 se utu nguë bi ska faa:
pantafala Elias se së ku supichi;
se utu nguë bi ska faa zhugan uan pantafala ineñ shi antigu se tan lanta.
9 Mandji se Erodes faa:
«Nguë sai sa Zhuan,
nguë shi amu pota gochi iai;
¿kë nguë se sa nguë sai,
öseshi,
ku amu ska tëndë lazhan ineñ sai?».
Se ëli bi ngongo jönsë ëli.
Djisu da uan möi pöjödölö kumu
10 Ta nna apostol tan vlame bi,
se ineñ da ëli lazhan jö ineñ shi ku ineñ fë tudu.
Se ëli ma ineñ be ku ëli,
se ineñ së ba uan loso ku a ja sama Betsaida.
11 Mandji se ta pövu ba tëndë se ineñ lë ineñ,
se ëli ma ineñ tudu,
se ëli bi ska faa ineñ ja tëjantu ku gövöndölö Nashiolo,
se ëli ten kula nna nguë ineñ shi bi ska fë fata pa kula ineñ.
12 Ta bi ska da tetadji se nna deshi ku dösu iaba lome dëli se ineñ faa ëli:
—Faa nguë tudu pa ineñ bai,
valadji pa ineñ fo ba jua jamian pa ineñ pasa nöchi ku pa ineñ ten kumu dantu loso loso ku matu ineñ sai,
pakë iai sa dantu uan jamian sölö sölö.
13 Se ëli faa ineñ:
—Tuludöguë namsëdji me da ineñ kumu.
Se ineñ kundji ëli:
—No na të zhugan ja mashi ku ampan shinku ku pishi dösuf,
shi na ja sa pa no ba kumpa kumu da nna nguë ineñ se tuduf,
14 pakë ala bi sa ku vala milidji shinku napai.
Mandji se ëli faa nna balë dëli:
—Namsëdji fë pa ineñ tudu tusan pachi fë uachi uachi deshi shinku unian unian.
15 Se amea sai se ineñ ten fë,
se ineñ tudu ten tusan.
16 Tadashi se Djisu ma ampan shinku ineñ se ku pishi dösu ineñ sai,
se ëli vla öiö da ösë,
se ëli da besa,
zha se ëli pachi se ëli da nna balë dëli valadji pa ineñ pë deenchi möi pöjödölö ineñ sai.
17 Se ineñ tudu kumu,
se ineñ shia chipa.
Se ineñ totolo ineñ shi sovezha iai uan deshi ku dösu ojali.
Pudul faa Djisu se sa Kilitu
18 Se bi shiga ta Djisu bi sa ëli moso apachi ja lezha,
se nna balë dëli bi sa ala ku ëli,
se ëli pongota ineñ,
ja faa ineñ:
—¿Kë nguë nna pövu faa sa amu?
19 *Se ineñ kundji ëli:
—Zhugan nguë ska faa bo sa Zhuan Bachita,
se utu nguë ja faa bo sa Elias,
se utu nguë ja faa uan nna pantafala ineñ shi tompu tompu ku tan lanta bi vida.
20 *Se ëli faa ineñ:
—A namsëdji,
¿kë nguë namsëdji ja faa sa amu?
Se Pudul kundji ëli:
—Bo se sa Kilitu Nashiolo.
Djisu faa ëli ske padësë pa ëli mölë
21 Mandji se ëli da ineñ odji ja manda pa ineñ na da zhugan ponodu nguë lazhanf.
22 Se ëli faa ineñ fa ske fë fata pa Mina Napai Dösë padësë monchi,
se nna jasa jasa pövu,
ku nna jasa jasa padjil ku nna meeth dalë ske naga ëli.
Se ëli ske mölë,
ta ja da tëishi djia se ëli tan ske lanta.
23 *Zha se ëli faa nguë tudu:
«Shi uan nguë ja ngongo bi lë amu pa ëli sa balë amu,
ta pa ëli naga tuludöguë dëli,
pa ëli gaga kusu dëli djia tudu,
pa ëli lë amu.
24 *Pakë nguë shi ja ngongo sava vida dëli,
ëli ske pëndë vida dëli;
mandji se nguë shi ja pëndë vida dajantu amu,
ske sava vida dëli.
25 ¿A kë ja ku ja shivi pa uan pöjödölö ngana mundu nguintëlu nguintëlu mandji pa ëli pëndë ö ëli ja të tuludöguë dëli me të fea fea?
26 Pakë ja sa nguë shi ja të govan amu ku nova amu,
a shime Mina Napai Dösë ten ske të govan dëli ta ëli tan ske vlame bi ku gloria Pai dëli ku dji nna anzhu santu santu.
27 Mandji,
anta vedadji se amu faa namsëdji,
sa ku zhugan namsëdji ineñ se sa plesteñi öseshi iai ku na ske bë mölë shinke ineñ bë gövöndölö Nashianf».
Djisu ku Moises ku Elias së ku supichi
28 Ta da vala ötu djia jamian shi ku ëli faa ineñ fala ineñ sai,
se Djisu ma Pudul,
Zhuan ku Sanchagu,
se ineñ subili ba uan iki ba lezha.
LUK 9.28-56
29 Se öshi,
ëli bi ska lezha,
se fesan dëli tuka,
se bitidu dëli vla banku ja chila blin.
30 Ja pia,
se napai dösu së ëli ku supichi ja da lazhan,
se bi sa Moises ku Elias.
31 Ineñ tudu bi sa ku fesan dëneñ kubidu ku gloria,
se ineñ bi ska da lazhan amea shi ëli bi ske lega mundu sai,
ku jö shi ëli bi ska Jerusalen ba kumpli.
32 Se benga zha pa Pudul ku nna jamada dëli bi sa gogodu ku djuni,
mandji se ta ineñ joda fo djuni,
se ineñ bë gloria Djisu ku napai dösu ineñ shi ku ëli bi sa ala iai.
33 Ta nna nguë ineñ sai bi ska safa fo Djisu,
se Pudul faa ëli:
«Meetha,
¡ske sa gavu pa no mdja iai!
No paadji fë limada tëishi:
uan da bo,
uan da Moises,
ku uan me da Elias».
34 Se öshi ontolo ineñ ska faa fala,
se bi uan növu se kubili ineñ,
se amea sai se mendu ma ineñ.
35 **Tadashi se bi uan falagochi fo dantu növu sai ku ska faa:
«Nguë sai se sa Mina amu,
nguë shi ku amu se ma.
¡Namsëdji tëndë ëli!».
36 Ta ineñ tëndë falagochi sai jaba,
se Djisu moso se bi mdja ala.
Mandji se ineñ jaböjö,
se dantu tempu sai se ineñ na da zhugan nguë lazhan jö ineñ shi ineñ bi bë ief.
Djisu kula uan namasebu ku sa ku spitu fëiu
37 Ta da amaian shi,
ta ineñ dësë fo iki,
se uan sapa möi pöjödölö se së bi toja ineñ.
38 Se uan masebu dantu möi pöjödölö ineñ sai faa ëli ku foshi:
—Meetha,
amu luga bo,
pa bo fë lazhan mina amu,
pakë ëli se sa ponodu i shi moso sa ku amu.
39 Se uan spitu fëiu ja fala ëli ku foshi,
se öshi öshi se ëli ja jomesa ja ta kidëlë,
a shime se ten ja sugudji ëli ku foshi se ja fë pa ëli ja chila kumba kumba fo böjö dëli.
Ta ja ska tomenta ëli,
apudjimidu se tan ja lega ëli.
40 Se amu luga nna balë bo pa ineñ chila fo ëli,
mandji se ineñ na paadjif.
41 Se Djisu kundji:
—¡Ö nna zhenchi masan masan ku na ja këlëf!
¿Ba toja kë djia shi amu ske ta pa amu sa ku namsëdji?
Ma mina bo bi iai.
42 Ta namasebu se bi ska iaba ope dëli,
se damono sai tan ligui ëli da san ku foshi.
Mandji se Djisu lonja öiö da spitu fëiu sai,
se ëli kula namasebu sai se ëli tan da ëli pai dëli.
43 Se nguë tudu gua ku böjö betu da pödë ngandji Nashiolo.
Djisu tan ska faa goleme ëli ske mölë
Se öshi ontolo nguë tudu bi ska leva jö ineñ shi Djisu ska fë,
se ëli faa nna balë dëli:
44 «Namsëdji folapë pa tëndë jö shi amu ske faa namsëdji:
A ske vëndë Mina Napai Dösë da nna pöjödölö».
45 Mandji se ineñ na tëndë jö shi ëli ngongo faa ineñ ku jö sef.
Pakë ontolo a na bi sa bla tëndëmentu dëneñ valadji pa ineñ tëndë fala sef;
se ineñ bi ska mendu pa ineñ pongota ëli.
Kë nguë se sa ngandji mashi
46 *Tadashi se dantu nna balë jomesa ja të uan pufia dantu ineñ me kë nguë ske sa ngandji mashi.
47 Se Djisu ku bi sëbë dantu mazhnamentu kusan dëneñ,
se ëli ma uan namina se ëli pë lome dëli.
48 *Se ëli faa ineñ:
«Nguë shi ja ma mina sai ku namu amu,
nguë sai se ma amu,
se nguë shi ja ma amu,
se ten ja ma nguë shi da amu bi.
Pakë nguë shi se ja kichi mashi dantu namsëdji tudu,
nguë sai se sa ngandji mashi».
Nna nguë ineñ shi sa pachi Djisu
49 Tadashi se Zhuan faa ëli:
—Meetha,
no bë uan nguë ku ja chila damono folo nguë ku namu bo,
se no na lega ëlif pakë ëli na sa nna nguë nof.
50 Se Djisu faa ëli:
—Namsëdji na panta ëlif.
Pakë nguë shi na ja fë ja fëiu tëjantu ku namsëdjif,
ëli ja fë gavu ku namsëdji.
Djisu lonja öiö da Sanchagu ku Zhuan
51 Ta bi ska da tempu shi pa Djisu subili ba ösë,
se ëli ma añimu pa ëli ba Jerusalen.
52 Se ëli manda zhugan nguë pa ma nova ba deenchi,
se ineñ ba uan loso Samaria pa ineñ ba jözhë jamian pë,
53 mandji se nna nguë dala na ma ineñf,
pakë ineñ bi sëbë fa nna nguë ineñ sai bi ska be Jerusalen.
54 Ta nna balë dëli Sanchagu ku Zhuan bë jö sai,
se ineñ pongota ëli:
«Shiöla,
¿bo ngongo pa no da odji pa fögö pono fo ösë pa jaba ku ineñ,
amea shi Elias fë?».*+
55 Mandji se Djisu vla öiö da ineñ se lonja öiö da ineñ.
56 Zha se ineñ tan ba utu loso.
Amea shi kuta pa lë Djisu
57 Ta ineñ ska be jamangandji se uan nguë faa Djisu:
—Amu ske lë bo ja sa jamian shi bo ja bai iai.
LUK 9.57-62
58 Se Djisu faa ëli:
—Nna jösölö djiga kichi kichi të iöjö lapa ku ineñ ja bibe se nna paatu ja të jadji bichili dëneñ,
mandji se Mina Napai Dösë na të ñi uan jamian pa ëli pë ja jasa dëlif.
59 Se ëli faa utu nguë:
—Lë amu.
Mandji se ëli faa ëli:
—Shiöla,
lega amu pimëlu pa amu ba ntela pai amu.
60 Se Djisu faa ëli:
—Lega pa nna nguë mölidu se ja ntela mochi dëneñ,
mandji se bo,
bai pa bo ba panta nova gövöndölö Nashiolo.
61 Se utu nguë faa ëli:
—Shiöla,
amu ngongo lë bo,
mandji pimëlu amu ngongo pa bo lega amu pa amu ba ta öiö dantu jadji amu.
62 Se Djisu kundji ëli:
—Zhugan nguë ku ja pia tashi,
ta ëli tan ja pë öma liba jö shi a ja ma va san dalea pa shimian kuzhu ëli na shivi pa ëli tabaia da gövöndölö Nashianf.