Naamain ineñ shi bi ska shivi Djisu
8
Ta jö se pasa,
se Djisu bi ja bai ja pasa dantu loso loso ku palea palea tudu,
ja pegua ku ja da evanjelio gövöndölö Nashiolo.
Se nna balë deshi ku dösu bi ska be ku ëli,
LUK 8.1-21
2 *ku a shime zhugan nna naamain ku ëli bi chila spitu fëfëiu fo ineñ,
se ëli ten kula ineñ danchi dëneñ tudu.
Malia,
ku a ten ja sama ëli Magdalena,
ku damono seta bi së fo ëli,
3 ku Zhana,
ku se bi sa miela Kuzha,
ku bi sa mötölö Erodes;
Susana ku zhugan sapa utu naamain mashi ku bi ja zhuda ku gagavu dëneñ.
Palavulu tabaiadölö
4 Se uan sapa möi pöjödölö zhunta,
se bi sa nna nguë së fo palea palea tudu bi bë ëli,
se ëli jonta ineñ palavulu sai:
5 «Uan shimadölö se së ba shimian shimenchi dëli.
Se ta ëli shimian ja jaba,
se uan pachi shimenchi pono da lome jamangandji,
se a pope,
se nna bichili dösë bi se kumu.
6 Se utu pachi pono da dantu budu budu,
se ta labenta,
se tudu tan soja pakë na bi të sëlëmaf.
7 Se utu pachi pono da dantu pian pian,
ta labenta zhuntadu ku ineñ,
se ineñ mölë.
8 Mandji se utu pachi pono da san dalea matu gavu,
se tudu labenta,
se këësë,
se da uan sapa pali döpa,
ba toja uan sentu da unian».
Zha se ëli faa ineñ ku uan falagochi atu:
«Nguë shi ja të olea,
pa ëli ja tëndë».
9 Se nna balë dëli pongota ëli kë sinchidu sa ku palavulu sai.
10 Se ëli faa ineñ:
«Pakë ku namsëdji a ja lega pa namsëdji ja jönsë kumi ja gövöndölö Nashiolo;
mandji se da utu nguë ja sa amea palavulu;
valadji pa:
“Se benga zha pa ineñ ja ska bë ku öiö,
ineñ na ja bë jaf,
se benga zha pa ineñ ja tëndë ku olea,
ineñ na ja tëndë jaf”.
11 »Jö sai se sinchidu palavulu sai:
Shimenchi se sa Fa Nashiolo.
12 Se ineñ shi pono da jamangandji,
sa nna nguë ineñ shi tëndë fala,
mandji zha se ja bi djiabu se ja chila fo kusan dëneñ,
valadji pa ineñ na këlëfa,
ku pa ineñ na ja ten savaf.
13 Se ineñ shi pono da liba budu budu se ja sa nna nguë ineñ shi ta ja tëndë fala se ineñ ja ma ku liguilia,
mandji se ineñ na ja ta leezhaf,
se ineñ ja këlë dantu uan tempu,
mandji se ta ja bi tempu ödu puva se ineñ ja pono.
14 Se ineñ shi pono da dantu pian pian,
ineñ sa ineñ shi ja tëndë,
mandji se ta ineñ ja ska bai,
se tave vida ku gagavu ku liguilia vida,
se ineñ na ja da fulutaf.
15 Mandji se ineñ ku se a ja shimian pë san dalea matu gavu,
se ja sa nna nguë ineñ shi tëndë fala ku kusan dondolo ku gavu,
se ineñ ja gada fala ineñ se ineñ tëndë,
se ineñ ja da fuluta ku pashiensa.
Palavulu lapanta
16 *»Zhugan nguë ku ja sëndë uan fögö pa ja kubili ku uan mamuda,
ñi ëli na ja pë basu uan jaamaf,
shina ëli ja pë liba öpa jandjia valadji pa nna nguë ineñ shi ja lantela ja bë fögö djidjidu.
17 *Na të zhugan ja jöndjidu ku a na ja sëbëf,
ñi zhugan ja jöndjidu ku a na ske bi bi jönsëf.
18 *»Dajantu shi,
pinchidu amea shi bo ska tëndë,
pakë nguë shi ja të,
se a tan ske da ëli mashi,
mandji se nguë shi na tëf,
ba toja ineñ shi ku ëli tan ja këlë fa ëli të a tan ske chila fo ëli».
Main Djisu ku nna namain dëli
19 Tadashi se main Djisu ku nna namain dëli bi pa ineñ bi ua ëli,
mandji se ineñ na bi paadji bë ëlif,
pakë bi të uan möi pöjödölö.
20 Se uan nguë da ëli lazhan:
—Main bo ku nna namain bo sa öluia se ineñ ngongo bë bo.
21 Mandji se ëli kundji ineñ:
—Main amu ku nna namain amu sa nna nguë ineñ shi ja tëndë Fa Nashiolo ku ineñ ten ja fë.
Djisu manja tavada
22 Uan djia se Djisu lantela dantu uan batelu ku nna balë dëli,
se ëli faa ineñ:
«No sata omali ba benda sala».
Se ineñ ten bai.
LUK 8.22-39
23 Mandji se ta ineñ ska laama ja bai,
se eli ma djuni.
Se sota uan tavada ödu liba domali sai,
se amea sai se batelu ten jomesa ja fundu se ineñ bi sa pepe mölë.
24 Tadashi se ineñ ba toja ëli se ineñ lanta ëli,
se ineñ faa ëli:
«¡Meetha,
Meetha,
no la ja mölë!».
Ta ëli lanta,
se ëli lonja öiö da oventu ku pukulu domali,
se ineñ manja,
se ja tudu da masu.
25 Se ëli faa ineñ:
«¿Kë jama jonfa namsëdji sa?».
Mandji se ineñ,
ku mendu ku böjö betu,
se ineñ ja faa uan nguë ku utu nguë:
«¿Kë nguë sa nguë sai,
ku ba toja oventu ku aua ëli ja da odji,
se tudu ja tëndë ëli?».
Djisu chila uan möi spitu fëfëiu fo uan masebu
26 Se Djisu ku nna balë dëli jonla benda sala bodo domali Galilea,
jamian shi loso loso nna nguë gerasa ja ta.
27 Ta Djisu dësë ba san tela,
se bi toja ëli uan masebu ku sa nguë tela sai ku bi sa ku damono.
Bi sa uan tempu löngö ku ëli na tan bi ja bishi bitiduf,
ñi ëli na ten bi ja ta dantu uan jadjif,
shina dantu spitula.
28 Ta ëli ba bë Djisu se ëli ta uan fala kidëlë se ëli dajözhöiö pë ope dëli.
Tadashi se ëli faa ku falagochi atu:
«¿Kë i shi sa dji amu ku bo,
Djisu,
Mina Nashian shi Atu mashi?
Amu luga bo pa bo na tan tomenta amuf».
29 Pakë Djisu bi manda pa spitu fëiu sai së fo masebu sai,
pakë fo uan tempu löngö se ineñ bi sa shiölö döguë masebu sai,
se a bi ska mala ëli ku guian.
Mandji se uan sapa ope se ëli ja të guian tudu të pota,
se damono sai ja ma ëli jölë ba dantu uan jamian sölö sölö.
30 Se Djisu pongota ëli:
—¿Jama a ja sama bo?
Se ëli kundji:
—A ja sama amu Möi.
Ëli faa shi pakë uan sapa damono se bi bi lantela dantu döguë dëli.
31 Se ineñ se bi ska pindji Djisu uan sapa ope pa na manda ineñ ba jamian fundu shi ku a na ja bë basuf.
32 Lome dala bi sa ku uan ögö ku uan sapa pöjö ku bi sa van iki ja kumu,
se ineñ luga ëli pa ëli lega ineñ lantela dantu pöjö ineñ sai.
Se ëli lega ineñ.
33 Se,
ta nna damono ineñ se tudu së fo masebu sai se ineñ lantela dantu pöjö ineñ sai,
se ineñ jomesa ja jölë be basu ba toja ku ögö pono fo bonjo ba omali se ineñ mölë.
34 Se nna nguë ineñ shi bi ska fë lazhan pöjö ineñ sai ta ineñ bë jö shi shiga se ineñ tudu jölë,
se ineñ ja bai ja da nna nguë palea ku nna nguë matu lazhan.
35 Ta ineñ së ba ua jö shi shiga,
se ineñ ba toja Djisu,
se ineñ dajonta ku masebu shi ku nna damono bi së fo ëli iai,
ja tusan ope Djisu,
bishidu ku miolo dëli sentadu,
se mendu ma ineñ.
36 Se nna nguë ineñ shi bë,
da ineñ lazhan,
amea shi a kula masebu shi bi sa ku spitu fëiu iai.
37 Tadashi se nna nguë pachi loso loso Gerasa luga ëli pa ëli së fo jamian dëneñ,
pakë ineñ ba mendu monchi.
Se amea sai se ëli lantela dantu batelu pa ëli tan bai.
38 Se masebu se ku damono së fo ëli iai luga Djisu pa ëli lega pa ëli be ku ëli.
Mandji se Djisu faa ëli pa ëli mdja ala,
ja faa ëli:
39 «Tan vla jadji namsëdji pa bo da ineñ lazhan jö shi Nashian fë da bo».
Se masebu se ëli ten bai se ëli ten ta lözhölö öluia da nna nguë loso loso ineñ sai ja ngangandji ineñ shi Djisu bi fë da ëli.
Mina naamain Jairo ku uan mooso ku bi ska danchi
40 Ta Djisu tan vlame bi,
se möi pöjödölö ineñ sai ma ëli ku liguilia,
pakë ineñ tudu bi ska gada ëli.
LUK 8.40-56
41 Ja pia,
se ten bi uan masebu ku a ja sama ëli Jairo,
ku bi sa jasa jasa jadji Nashian nna judio,
se ëli dajözhöiö pë ope Djisu,
ja luga ëli pa ëli ba jadji dëli,
42 pakë ponodu mina naamain dëli ku sa ku deshi danu ku dösu,
se bi ska mölë.
Se öshi Djisu bi ska bai,
se möi pöjödölö bi ska peta peta pë ëli.
43 Mandji se uan mooso ku amea deshi danu ku dösu ku ëli bi ska padësë ku sangui bukadu,
se ëli da nna babëlu pagu ku jö ineñ shi bi sa ku ëli tudu,
mandji se zhugan ineñ na bi paadji kula ëlif.
44 Se ëli iaba tashi Djisu se ëli fala bodo panu dëli,
se öshi öshi se sangui bukadu dëli ten pota.
45 Tadashi se Djisu pongota:
«¿Kë nguë fala amu?».
Se ta nguë tudu bi ska naga fa ineñ na fala ëlif,
se Pudul faa:
—Meetha,
möi pöjödölö ska peta peta pë bo se a ska fala fala bo.
46 Mandji se Djisu faa:
—Uan nguë fala amu,
pakë amu jönsë fa pödë së fo amu.
47 Tadashi se mooso sai bë fa ëli na tan bi paadji jöndëf,
se ëli bi ja timbla,
se ëli dajözhöiö ope dëli.
Se ëli da lazhan deenchi nguë tudu jö shi fë ku ëli fala ëli,
ku kë amea shi ëli pasala kula öshi öshi.
48 Se ëli faa ëli:
«Mina amu,
jonfa bo se kula bo.
Bai ku padji».
49 Ontolo Djisu bi ska faa fala,
moso se bi zhugan nguë fo jadji jasa jasa jadji Nashian nna judio,
ja faa:
«Mina naamain bo sa san mölidu.
Na tan fë fata pa bo fonta Meethf».
50 Mandji se ta Djisu tëndë ineñ,
se ëli kundji ëli:
«Na menduf,
këlë moso,
se ëli ske sa kuladu».
51 Se ta ëli ba da jadji Jairo,
se ëli na lega zhugan nguë lantela ku ëlif,
shina Pudul,
Sanchagu,
Zhuan ku pai ku main mina naamain sai.
52 Se nna nguë tudu bi sa ala ja sula ja të dölö mina naamain sai.
Se Djisu faa ineñ:
«Namsëdji chama sula,
ëli na sa möliduf,
shina ëli sa djunidu».
53 Tadashi se ineñ sa fa ja li ëli,
pakë ineñ sëbë fa ëli sa mölidu.
54 Mandji se Djisu fala öma dëli se faa ëli:
«¡Mina miela sai,
lanta!».
55 Se ëli tan ngaia vida se öshi öshime se ëli lanta.
Se Djisu manda pa da ëli ja pa ëli kumu.
56 Se nna pai dëli tudu gua ku böjö betu,
mandji se Djisu da ineñ odji pa ineñ na jonta zhugan nguë jö shi shiga alaf.