Djisu kula shividölö uan feshali roma
7
Ta Djisu chama faa ku nna pövu jaba,
se ëli tan lantela ba loso Kapernaum.
LUK 7.1-10
2 Se ala bi sa ku uan feshali sodadji roma ku bi sa ku uan shividölö,
ku ëli bi ngongo ku ëli monchi,
se ëli bi ska danchi fëiu ku ëli bi sa pepe mölë.
3 Ta feshali se tëndë nova tëjantu ku Djisu,
se ëli manda zhugan nna jasa jasa pövu nna judio pa ba pindji ëli pa ëli bi kula shividölö dëli.
4 Se ta ineñ ten ba toja Djisu,
se ineñ luga ëli monchi:
«Masebu se mësë pa bo zhuda dëli,
5 pakë ëli ngongo ku tela no,
se ëli fë uan jadji Nashian nna judio da no».
6 Tadashi se Djisu ten bai ku ineñ.
Ta a sa peetu ola jadji feshali sodadji roma sai,
se ëli manda zhugan nna jamada dëli bi faa ëli:
«Shiöla,
na fë fata pa bo fonta öguë bof,
pakë amu na mësë pa bo lantela bi dantu jadji amuf.
7 Se fë ku ñi na ten bi mësë pa amu ba deenchi bof.
Mandji pa bo faa uan fala,
se shividölö amu ske kula.
8 Pakë amu ten sa uan masebu ku sa pidu basu odji,
se amu ten të sodadji basu pödë amu.
Se amu ja faa nguë sai:
“Bai”,
se ëli ja bai,
se amu ja faa utu nguë:
“Bi”,
se ëli ja bi.
Se ta amu ten ja faa uan sëlëva amu:
“Fë jö sai”,
se ëli ja fë».
9 Se ta ëli tëndë jö sai,
se Djisu gua ku böjö betu da ëli.
Se ëli tan vla öiö da nna möi pöjödölö ineñ shi bi ska lë ëli ai,
se ëli faa ineñ:
«Amu faa namsëdji,
ñi ba toja dantu Israel amu na sa bë uan jonfa ngandji shi ie zhaf».
10 Se ta nna jamada feshali tan vla jadji se ineñ toja shividölö se bi sa kuladu bebezha.
Djisu tan fë pa mina uan mainviva tan bi vida
11 Se ta pasa a uan tempu se Djisu,
vla uan loso ku a ja sama Nain,
se nna balë dëli ku uan sapa möi pöjödölö bi ska be ku ëli.
LUK 7.11-35
12 Ta Djisu bi ska da böjö poto loso sai,
se ëli bë a bi ska ntela uan mochi,
ku se bi sa ponodu mina uan mainviva.
Se uan sapa nna nguë loso se bi ska be ku ëli.
13 Ta Shiölö bë mainviva se,
se ëli të dölö dëli se ëli faa ëli:
«Na tan sulaf».
14 Tadashi se ëli iaba ope dëli se ëli fala alka mochi.
Se nna nguë ineñ shi bi ska gaga iai ten da fë ku ope.
Se Djisu faa:
«Masebu ua,
¡amu da bo odji pa bo lanta!».
15 Se nguë bi sa mölidu iai ten fë ku öguë se ëli jomesa ja faa fala,
se Djisu tan da ëli main dëli.
16 Se mendu ma nguë tudu se ineñ jomesa ja alaba Nashiolo,
ja faa:
«Dantu no se a bi lanta uan pantafala ngandji».
Se ineñ tan bi ska faa:
«Nashian la bi zhuda pövu dëli».
17 Se monova tëjantu ku Djisu sa fa ja panta panta fo pachi Judea tudu ku pachi loso loso ineñ shi sa peetu tudu.
Djisu ku Zhuan Bachita
18 Nna balë Zhuan Bachita da ëli lazhan amea jö ineñ shi Djisu ska fë tudu.
Se Zhuan sama nna balë dëli dösu,
19 se ëli manda ineñ ba da Shiölö pa ineñ pongota ëli:
«¿Bo se sa nguë shi ta pa bi iai,
ö ta pa no tan gada utu nguë?».
20 Ta ineñ ten ba da lome dëli,
se ineñ ten faa ëli:
«Zhuan Bachita manda no pa no bi pongota bo:
“¿Bo se sa nguë shi bi ske ta pa tan bi iai,
ö ta pa no tan gada utu nguë?”».
21 Se ten sa ola shime ku Djisu bi ska kula uan sapa dji nguë ku tudu bi ska danchi,
ku nna nguë ku ten bi sa ku spitu fëfëiu,
se ëli ten kula uan sapa nna sebu.
22 Zha se ëli kundji ineñ:
«Namsëdji bai pa namsëdji da Zhuan lazhan jö ineñ shi namsëdji ska bë ku namsëdji ska tëndë:
Nna nguë sebu ska bë kuzhu,
nna ojogo ska nda,
nna nguë ineñ shi sa ku lepla sa kuladu,
nna nguë ku sa ku olea tapadu ska tëndë kuzhu,
nna mochi tan ska lanta bi vida,
se a ska pegua nova gavu da nna puvili.
23 Besa se ja sa ku nguë shi na ja da topu dajantu amuf».
24 Ta nna shividölö Zhuan tan bai,
se Djisu jomesa ja faa nna moi pöjödölö ineñ sai ja tëjantu ku Zhuan:
«¿A kë ja namsëdji së ba jua dantu jamian sölö sölö?
¿Uan ope anjana ku oventu ja sugudji?
25 Shi na,
¿ja namsëdji së ba ua?
¿Uan pöjödölö bishidu ku bitidu lanlan?
Ja pia,
nna nguë ineñ shi ja bishi bitidu fumözhö fumözhö se ineñ ja bibe uan vida lanlan ja ta dantu jadji dalë.
26 Tadashi,
¿a kë ja namsëdji së ba ua?
¿Uan pantafala?
Shiën,
amu faa namsëdji,
ëli sa mashi ku uan pantafala.
27 Nguë sai se sa nguë shi dantu Fa Nashiolo sa skividu fa:
“Amu ske manda nguë shi pa ma nova amu bai deenchi jala bo,
ku ëli se ske fë vadu jamangandji bo pë deenchi bo”.
28 »Amu faa namsëdji fa fo dantu nna nguë ineñ shi a pali fo naamain,
na sa të zhugan nguë ngandji mashi ku Zhuanf,
mandji se nguë shi kichi mashi dantu gövöndölö Nashiolo se ja sa ngandji mashi ku ëli».
29 *Se ta nna pövu tudu,
ku a shime nna nguë ma tesu tudu ba tëndë.
Se ineñ këlë fa jamangandji Nashian bi sa dëtu,
se Zhuan bachizha ineñ tudu.
30 Mandji se nna fariseo ku nna meeth dalë na lega pa Zhuan bachizha ineñf,
ja naga jö shi Nashian bi ngongo fë tëjantu ku ineñ.
31 Se ëli faa:
«Tadashi,
¿kë amea shi a paadji bë nna pöjödölö zhenchi sai?
¿Ineñ ja sa fidu shimafan nna kë nguë?
32 Ineñ ja sa fidu nna mina napai ku ja tusan mete döluia ja ta kidëlë uan nguë da utu nguë,
ja faa:
“No da fala pitu,
se namsëdji na baiaf.
No janta da nna nguë mölidu,
se namsëdji na sulaf”.
33 »Pakë bi Zhuan Bachita,
ku ëli na ja kumu ampanf,
ñi bëbë vianf,
se namsëdji ja faa:
“Ëli sa ku damono”.
34 Se bi Mina Napai Dösë,
ku ja kumu,
ku ja bëbë,
se namsëdji ja faa:
“Nguë sai sa uan fochi ku bëbëdölö vian,
jamada nna nguë ma tesu ku nna pekadölö”.
35 Mandji se tëndëmentu ja msa dëtu amea nna nguë ineñ shi ja lë ëli».
Djisu pada uan mooso pekadölö
36 Uan fariseo pindji Djisu pa ëli ba jadji dëli ba kumu.
Se Djisu ten ba jadji fariseo sai se ëli ten tusan ku ëli liba mezha.
LUK 7.36-50
37 *Tadashi se uan mooso ku ja ta loso sai ku bi sa pekadölö.
Se ta ëli tëndë fa Djisu sa jadji fariseo se ja kumu,
se ëli ma uan mina galafa alabastro ku bi sa ku adjimiolo.
38 Se ëli bi sa tashi dëli lome dope dëli,
se ëli bi ska sula,
se ëli jomesa ja mian ope dëli ku adöiö dëli,
se ëli soja ku jabelu dëli ja da ëli beso ope dëli,
se ëli bi ska bolo ëli ku adjimiolo.
39 Se ta fariseo se bi ma Djisu ba jadji dëli iai,
bë jö sai se ëli faa ku öguë dëli:
«Shi masebu sai ja sa pantafala shishizhu,
ëli bi ske sëbë pöjödölö se ska fala ëli iai.
Ëli bi ske sëbë kë nguë sa klase mooso sai:
uan pekadölö».
40 Tadashi se Djisu faa fariseo se:
—Shiman,
amu të uan ja pa amu faa bo.
Se ëli kundji ëli:
—Faa amu,
Meeth.
41 Se Djisu tan vlame faa ëli:
—Nna napai dösu ku bi peta uan masebu nongosu djiëlu.
Uan ineñ bi fala ëli sentu shinku djiëlu denario,
se nguë shiki bi fala ëli deshi shinku moso.
42 Se ta zhugan ineñ na bi të djiëlu pa ineñ da ëli pagu deuda sef,
se ëli pada ineñ dödösu.
¿Kë nguë dantu napai dösu ineñ sai ske ngongo ku masebu se mashi?
43 Se Shiman kundji ëli:
—Amu ja mazhna fa masebu shi ku ëli pada mashi iai.
Se Djisu faa ëli:
—Bo juzhga gavu.
44 Tadashi,
se Djisu vla öiö pia mooso sai se ëli faa Shiman:
—¿Bo ja bë mooso sai?
Ta amu lantela jadji bo,
bo na da amu aua pa amu laba opef,
mandji se ëli mian ope amu ku adöiö dëli,
se ëli soja ku jabelu dëli.
45 Bo na da amu besof,
mandji se ëli na chama da ope amu beso fo öshi amu lantela jadji bo ief.
46 Bo na bolo jasa amu ku zhëitëf,
mandji se ëli bolo ope amu ku adjimiolo.
47 Se fë ku amu faa bo jö sai:
shi mooso sai ja të ngongo monchi,
pakë a pada ëli sapa pekadu dëli tudu.
Mandji se nguë shi a ja pada uan fi kuzhu,
ëli ten ske ja msa ngongo uan fi kuzhu.
48 Tadashi se Djisu faa mooso sai:
«Pekadu bo tudu sa padadu».
49 Se utu nna nguë ineñ shi tudu ten bi sa ala,
jomesa ja faa ku ineñ ineñ me:
«¿Kë nguë sa nguë sai ku ba toja ku ëli ja pada pekadu tudu?».
50 Se Djisu faa mooso sai:
«Jonfa bo se sava bo;
be ku padji».