Shiölö djasubudu
6
Uan djasubudu,
se ta Djisu bi ska pasa dantu matu shimadu tulugu.
Se nna balë dëli sa fa ja lanja ope jambabu tulugu se ineñ ja fega ku öma,
se ineñ ja kumu.
LUK 6.1-16
—¿Jama fë namsëdji ska fë uan ja ku a na ja lega pa fë uan djasubuduf?
3 Se Djisu kundji ineñ:
—¿Namsëdji na lëë jö shi alë David fë ta ëli ku nna jamada dëli fë ta ineñ bi sa ku faku ua?
4 Se ëli lantela dantu jadji Nashiolo,
se ëli ma ampan santu se ëli kumu se ëli da nna jamada dëli.
Ja ku a na ja lega pa ëli kumuf,
shina nna padjil moso.
5 Se ëli tan faa ineñ:
—Mina Napai Dösë se sa Shiölö liba djasubudu.
Djisu kula uan masebu djasubudu
6 Utu djasubudu se Djisu tan lantela dantu jadji Nashian nna judio,
se ëli jomesa ja shina nguë kuzhu.
Se ala bi sa ku uan masebu ku bi të öma dëtu dëli danadu.
7 Se nna meeth dalë ku nna fariseo bi ska pia ëli pa ineñ bë i shi ëli ske kula masebu se djasubudu,
valadji pa ineñ paadji të ja tëjantu ku ëli.
8 Mandji se amea shi ku ëli bi jönsë mazhnamentu dëneñ,
se ëli faa masebu se sa ku öma danadu iai:
«Lanta pa bo ta mdjadu metadji nguë tudu».
Se ëli ten lanta se ëli ten ta mdjadu.
9 Tadashi se Djisu faa ineñ:
«Amu ske pongota namsëdji uan kuzhu:
¿Ja sa legadu pa paadji fë ja gavu ö ja fëiu uan djasubudu?
¿Sava uan vida ö chila uan vida folo?».
10 Se ta ëli pia nna nguë ineñ se tudu,
se ëli faa masebu sai:
«Tezha öma bo».
Se ëli ten fë amea sai,
se öma dëli ten vla kuladu.
11 Mandji se mëtë ineñ tudu pashian se ineñ sa fa ja jua jö ineñ shime kë ja ineñ ja paadji fë tëjantu ku Djisu.
Djisu ska sama nna deshi ku dösu balë dëli
12 Dantu uan djia ineñ sai,
se Djisu subili ba uan iki ba lezha,
se ëli ma nöchi se tudu ja lezha da Nashiolo.
13 Ta pamasedu bla,
se ëli sama nna balë dëli,
se ëli ma dantu ineñ uan deshi ku dösu,
se ëli ten sama ineñ apostol:
14 Shiman,
nguë shi ku ëli ten pë ëli namu ja sama Pudul,
namain dëli Andëlë,
Sanchagu,
Zhuan,
Filipa,
Bartolome,
15 Matë,
Tomashi,
Sanchagu mina Alfeo,
Shiman nguë shi a bi ja sama Selote,
16 Judas mina Sanchagu,
Judas Iskariote,
ku se bi sa nguë vëndë nguë.
Besa ku djisgalasa
17 Se Djisu dësë ku nna balë dëli fo van iki se ineñ ba uan jamian pele.
Se ëli zhunta uan sapa möi pöjödölö ku tudu së fo Judea,
fo Jerusalen ku fo bodo bodo domali Tiro ku Sidon.
LUK 6.17-36
18 Ineñ tudu bi pa ineñ tëndë fala dëli ku pa ëli ten kula ineñ danchi ineñ shi sa ku ineñ tudu.
Nna nguë ineñ shi bi sa ku spitu fëfëiu tudu,
ten bi vla legadu.
19 Se nguë tudu bi ska ngongo fala ëli,
pakë pödë bi ska së fo ëli se ja kula nguë tudu.
20 Se Djisu pia nna balë dëli tudu se ëli faa ineñ:
«Besa ja sa ku namsëdji nna puvili,
pakë gövöndölö Nashian sa ja namsëdji.
21 Besa ja sa ku namsëdji ineñ shi sa ku faku öseshi,
pakë namsëdji ske të kumu batanchi.
Besa ja sa ku namsëdji ineñ shi ska sula öseshi,
pakë namsëdji ske ja li.
22 *»Besa ja sa ku namsëdji ta nna pöjödölö ja ska kë namsëdji mali,
ku a ja safa namsëdji,
ku a ja suta namsëdji ku a nozho namu namsëdji shimafan ja fëiu dajantu Mina Napai Dösë.
23 *¡Namsëdji ja të liguilia!
¡Namsëdji ja sa ku liguilia monchi,
pakë uan taba ja ngandji se ska gada namsëdji ösë!,
pakë amea sai se nna paipai dëneñ fë ku nna pantafala.
24 Mandji se puvili namsëdji nna liku,
pakë namsëdji bi ma kusan fiadu bebezha.
25 Puvili da namsëdji ineñ shi të kumi öseshi,
pakë namsëdji ske sa ku faku.
Puvili da namsëdji ineñ se ska li öseshi iai,
pakë namsëdji ske ja ska sula ta ske bi djisgalasa.
26 Puvili da namsëdji ineñ shi nguë tudu ja da gavu da namsëdji iai,
pakë amea sai se nna pai dëneñ fë ku nna pantafala fanchila.
Ngongo ku nna namigu
27 »Mandji se namsëdji ineñ shi ja tëndë fala amu,
amu ja faa namsëdji;
ja ngongo ku nna namigu namsëdji;
ja fë gavu ku nna nguë ineñ shi ja ska nozho namsëdji,
28 ja da nna nguë ineñ shi ja ta namsëdji masan besa,
ja lezha da nna nguë ineñ shi ja suta namsëdji.
29 Shi uan nguë ja da bo ku uan butada ogomu,
bo tan ja vla utu benda da ëli.
Shi uan nguë ja chila bo bobolonda,
na ja naga ëli jaminzhaf.
30 Ja sa nguë shi pindji bo tudu,
bo ja da ëli;
se shi nguë shi ja ma jö shi sa ja bo,
bo na ja pindji ëli pa ëli tan vlame da bof.
31 *Se amea shi namsëdji ja ngongo pa utu nguë ja fë ku namsëdji,
se sa amea shime ku namsëdji ten ja fë ku ineñ.
32 »Pakë shi namsëdji ja ngongo ku nna nguë ineñ shi ja ngongo ku namsëdji moso,
¿kë ja namsëdji ja ngana?
A shime nna pekadölö ten ja ngongo ku nna nguë ineñ shi ja ngongo ku ineñ.
33 Se shi namsëdji ja fë ja gavu ku nna nguë ineñ shi ja fë namsëdji ja gavu,
¿kë ja namsëdji ja ngana?
Pakë nna pekadölö ten ja fë jö ineñ shime.
34 Shi namsëdji ja da ja petadu nna nguë ineñ shi ten ske ja fo da namsëdji,
¿kë ja namsëdji ja ngana?
A shime nna pekadölö ten ja peta ineñ ineñ me kuzhu,
ja gada pa ineñ tan ja ma utu mashi fo utu ineñ.
35 »Namsëdji ja ngongo ku nna namigu namsëdji,
ja fë ineñ gavu,
ja peta ineñ shinke bo ska gada zhugan ja fo ëli.
Se amea sai se namsëdji ske të taba ja ngandji mashi.
Se namsëdji ske sa nna mina Nashian shi Atu mashi,
pakë ëli ja fë gavu ku nna nguë ineñ shi ku na ja da nguë dezhupagaf ku nna nguë fëfëiu.
36 Pa namsëdji ja të mindjikodji,
amea shi ku Pai namsëdji ten ja të mindjikodji.
Na juzhga utu nguëf
37 »Na ja ska juzhga nguëf,
se a na ten ske juzhga namsëdjif;
na ja ska kondena nguëf,
se a na ten ske kondena namsëdjif;
ja pada nguë,
se ten ske ja pada namsëdji.
LUK 6.37-49
38 Ja da nguë kuzhu,
se a ten ske ja da namsëdji:
mindjida gavu,
petadu ku shia gola gola da namsëdji.
Pakë ku mindjida shi namsëdji ja mindji utu nguë,
se a tan ske ja mindji namsëdji».
39 *A shime se ëli ten jonta ineñ uan palavulu:
«¿Sa fa pa uan nguë sebu paadji ma utu sebu bai?
¿Ineñ dödösu na ske pono da uan jobo ua?
40 *Zhugan balë na ja sa supiölö meeth dëlif,
mandji ta ëli ja shina ja jaba,
ëli ja paadji sa shimafan meeth dëli.
41 »¿Se jama fë bo ja pia ope jambabu shi sa dantu öiö namain bo,
se bo na ja bë tuludöpa shi sa dantu maian öiö bof?
42 ¿A jama fë bo ske paadji faa namain bo:
“Namain amu ia,
lega amu pa amu chila bo ope jambabu se sa öiö bo iai”,
adjimese se bo na ska chila tuludöpa shi sa dantu öiö bofa?
Sochi,
ja chila tuludöpa fo öiö bo pimëlu,
zha pa bo bë jamian limpi zha pa bo fo chila ope jambabu shi sa dantu öiö namain bo.
Uan öpa ku pali döpa dëli
43 »Zhugan ope döpa gavu na ja da fuluta fëfëiuf,
ñi ope döpa fëiu ku ja da fuluta gagavuf.
44 *Ope döpa tudu a ja jönsë dajantu tuludöguë fuluta dëli,
pakë a na ja paadji totolo abada fo öpa pian pianf ñi uva fo alba sarsaf.
45 *Nguë shi ja sa nguë gavu,
fo gavu dëli ku sa gadadu dantu kusan se ëli ja chila ja gagavu,
mandji se nguë shi ja sa nguë fëiu,
fo kusan fëiu dëli se ëli a chila ja fëfëiu,
pakë fo jö shi ku ja sa batanchi dantu kusan se böjö ja fala.
Napai dösu ku ska fë jadji
46 »¿Ja fë namsëdji ja sama amu,
“Shiöla,
Shiöla”,
se namsëdji na ja fë jö shi amu ja faaf?
47 Nna nguë ineñ shi tudu ku ja bi toja amu,
ku ja tëndë fala amu se ëli ja fë,
amu ske msa namsëdji kë nguë ëli sa shimafan.
48 Ja sa shimafan uan pöjödölö ku ta ëli ja ska fë uan jadji,
se ëli ja jobo san ba fundu,
se ëli fë fundamentu pë liba jasada.
Se ta aua ja laga,
se lubela ja ligui da jadji se ku foshi,
mandji se ëli na ja sugudjif,
pakë a bi fë ëli gavu.
49 Mandji se nguë shi ja tëndë ku na ja fëf,
ja sa fidu uan pöjödölö ku fë jadji dëli pë liba san dalea,
shin fundamentu.
Se ta lubela ja ligui da jadji se ku foshi,
se öshi öshi se ja lolo,
se jadji sala ja fea fea amea fëiu».