Djisu ska sama nna pimëlu balë
5
*Uan djia se Djisu bi sa mdjadu lome domali Jenesaret,
se nguë tudu bi sa zhuntadu pë ope dëli valadji pa ineñ tëndë nova Nashiolo.
LUK 5.1-16
2 Tadashi se ta ëli bë batelu dösu ineñ shi bi sa bodo domali,
ku nna piskadölö bi lega pë ala,
ta ineñ bi ska limpa alëdë dëneñ.
3 Se Djisu lantela dantu batelu shi ku bi sa dji Shiman,
se ëli pindji ëli pa ëli da safa batelu se fo bodo bodo san tela uan fi kuzhu.
Zha se ëli tusan dantu batelu sai se ëli jomesa ja shina nguë kuzhu.
4 Ta ëli chama shina nguë ja jaba se ëli faa Shiman:
—Laama batelu se ba lagu jamian shi fundu mashi pa namsëdji ta alëdë pa piska.
5 *Se Shiman kundji ëli:
—Meetha,
nöchi se tudu no bi ska fë tabaia ödu sai se no na mata zhugan pishif.
Mandji se,
amu ske ta alëdë amea fala bo.
6 *Se ineñ ten fë amea sai se ineñ totolo uan sapa pishi ku tuvëdji alëdë dëneñ bi ske labenta.
7 Se sa öshi ineñ fë nna jamada dëneñ shi bi sa utu batelu iai shinali valadji pa ineñ bi zhuda ineñ.
Se ineñ bi se ineñ shia batelu dëneñ dödösu ku uan sapa pishi ku tuvëdji ineñ bi ska fundu.
8 Ta Shiman Pudul bë jö ineñ se pasa iai,
se ëli dajözhöiö deenchi Djisu se ëli faa ëli:
—¡Panta fo deenchi amu,
Shiölö,
pakë amu sa uan pekadölö!
9 Ëli faa shi pakë ëli ku nna nguë ineñ shi ku ëli bi sa dantu batelu iai mendu bi ma ineñ dajantu sapa pishi ineñ shi ineñ mata iai.
10 Nna jamada Shiman bi sa Sanchagu ku Zhuan,
nna mina Sebedeo.
Mandji se Djisu faa Shiman:
«Na menduf,
fo öseshi se bo ske sa piskadölö nna pöjödölö».
11 Se ineñ laama batelu tudu ba san tela,
se ineñ lega ja tudu pë se ineñ lë ëli.
Djisu kula uan masebu ku sa ku lepla
12 Uan djia,
ta Djisu bi ba da uan loso,
se uan masebu ku öguë dëli bi sa kubidu ku lepla iaba ope Djisu,
se ëli dajözhöiö ku jala dëli san ja luga ëli:
—Shiöla,
shi bo ja ngongo,
bo paadji limpa amu.
13 Se ëli tezha öma se fala ëli,
se faa ëli:
—Shiën,
amu ngongo,
¡vla limpadu!
Se öshi öshime se ëli chila lepla sai fo ëli.
14 Se ëli faa ëli ku odji:
«Bo na ja da zhugan nguë lazhanf;
shina bai pa bo msa padjil öguë bo,
pa bo da ja gavu shi ku alë Moises manda pa ja da tëjantu ku limpa öguë,
valadji pa sa lazhan gavu da ineñ».
15 Mandji se monova tëjantu ku Djisu bi ska be ja panta panta mashi,
amea shi ku uan möi pöjödölö bi ska zhunta valadji pa ba tëndë ëli ku valadji pa ëli ten kula ineñ danchi dëneñ.
16 Mandji se uan sapa vëdji se Djisu ja dantu uan jamian sölö sölö valadji pa ëli ja lezha.
Djisu kula uan masebu ku sa ojogo
17 Uan djia ku Djisu bi ska shina nguë kuzhu,
se nna fariseo ku meeth dalë ten bi sa ala ja tusan ope dëli ja tëndë ëli,
ineñ tudu bi bi fo loso loso Galilea,
Judea ku Jerusalen.
Se pödë Shiölö bi sa ku ëli valadji pa ëli kula nna nguë ineñ shi bi sa ku danchi.
LUK 5.17-39
18 Se bi shiga fa zhugan napai ku bi ska gaga uan masebu ojogo liba uan maka.
Se ineñ jua amea shi pa ineñ ma ëli ba dantu valadji pa ineñ ba pë ëli deenchi dëli.
19 Mandji se ineñ na bi paadjif dajantu uan möi pöjödölö.
Se amea sai se ineñ subili ëli ba liba jadji,
se ineñ ta ëli fo uan bagadu van dötë.
Se ineñ ta ëli ba basu ku maka,
se ineñ pë ëli metadji nna nguë tudu,
deenchi Djisu.
20 Se ta ëli bë jonfa shi sa ku ineñ,
se ëli faa ojogo sai:
«Jamada,
pekadu bo tudu sa padadu».
21 Tadashi se nna meeth dalë ku nna fariseo ku jomesa ja mazhna,
ja pongota:
«¿Kë nguë sa nguë se ku ska faa fala zhogoveadu?
¿Kë nguë paadji pada pekadu,
shina Nashian moso?».
22 Mandji se Djisu bi sëbë mazhnamentu dëneñ,
se ëli pongota ineñ:
«¿Jama fë namsëdji ja ska mazhna amea sai dantu kusan namsëdji?
23 ¿Kë ja sa levu mashi,
pa faa:
“Pekadu bo tudu sa padadu” ö pa faa:
“Lanta,
pa bo nda”?
24 Mandji se valadji pa namsëdji sëbë fa Mina Napai Dösë të pödë liba tela sai valadji pa ëli pada pekadu tudu».
Tadashi se ëli faa masebu ojogo se:
«Bo se amu ska faa ku ëli,
lanta,
ma maka bo,
ku pa bo ba jadji bo».
25 Se öshi öshi se masebu se ku bi sa ojogo ai ta mdjadu deenchi nguë tudu.
Se ëli ligui maka shi ku ëli bi sa tovesadu pë liba ia,
se ëli ba jadji dëli ja alaba Nashiolo.
26 Se nguë tudu gua ku böjö betu ja alaba Nashiolo.
Se ineñ tudu bi sa ku mendu ngandji,
bi ska faa:
«¡Ödjai no bë ja fumözhö fumözhö!».
Djisu ska sama Levi
27 Ta da uan vëdji se Djisu së fo jadji sai se ëli bë uan nguë ma tesu ku a ja sama ëli Levi,
ku ëli bi ska tusan liba uan banku ja ma tesu.
Se ëli faa ëli:
«Lë amu».
28 Se Levi lanta se lega ja tudu pë se lë ëli.
29 Se Levi fë uan bankëtë ngandji dantu jadji dëli;
se uan sapa nguë ma tesu ku utu nguë ku ten bi sa liba mezha ku ineñ.
30 *Mandji se nna fariseo ku nna meeth dalë bi ska lo nna balë dëli mali.
Ja faa ineñ:
«¿Jama fë namsëdji ja kumu ku ja bëbë ku nna nguë ma tesu ku nna pekadölö?».
31 Se Djisu kundji ineñ:
«Nna nguë ineñ shi ja sa lizhu na ja fë ineñ fata babëluf,
shina nna nguë ineñ shi ja ska danchi.
32 Amu na bi pa amu bi sama nna nguë dëtuf,
shina a nna pekadölö,
valadji pa ineñ tan vla ku ope tashi».
Pongota tëjantu ku zhedu böjö
33 Se zhugan ineñ faa Djisu:
—Nna balë Zhuan Bachita ja ta shin chila zhedu böjö uan sapa vëdji ku ska lezha libadë libadë,
ku a shime nna fariseo.
Mandji se nna dji bo ja ska bai ja kumu ja bëbë.
34 Se Djisu kundji ineñ:
—¿Sa fa nna nguë ineñ shi sa ku pai jazhadu paadji ta ku zhedu böjö öshi ontolo ëli sa ku ineñf?
35 Mandji se ske da djia shi a ske ma pai jazhadu bai,
se djia sai se ineñ ske ta ku zhedu böjö.
36 Se ëli tan vlame jonta ineñ uan palavulu:
«Zhugan nguë na ja pota dasu panu novu pa ta menda bitidu veiuf.
Pakë shi a ja fë amea sai,
a ske të bitidu shi novu të baga,
se menda shi novu na ske sa fumözhö ku panu shi veiuf.
37 »Ñi zhugan nguë na ten ja ta vian novu pë dantu mataku peli veiuf,
pakë vian novu ja fë se peli ja labenta,
se vian ja buka se peli ten ja dana.
38 Dajantu shi se ta pa vian novu pa ja ta pë mataku peli novu.
39 Se zhugan nguë ku ja bëbë vian shi veiu na tan ja ngongo bëbë vian shi novuf,
pakë ëli ja faa:
“Vian shi veiu se ja sa gavu mashi”».