Tentasan Djisu
4
Se Djisu,
ku bi shia Spitu Santu,
se ta ëli tan së fo lubela Jordan,
ku pödë Spitu Santu se ma ëli ba dantu uan jamian sölö sölö.
LUK 4.1-30
2 Se ëli bi sa ala dantu deshi jatulu djia se djiabu fë ëli tentasan.
Dantu tempu sai se ëli na kumu zhugan jaf,
ta pasa tempu sai se ëli sinchi faku.
3 Se tadashi se djiabu faa ëli:
—Shi bo ja sa Mina Nashiolo,
faa budu sai pa ëli vla fë ampan.
4 Se Djisu kundji ëli:
—¡Na!
Sa skividu:
“Nna pöjödölö na ske ja bibe da ampan mosof”.
5 Zha se djiabu ma ëli ba liba,
se ëli msa ëli dantu uan tempu nna gövöndölö mundu tudu.
6 Se djiabu faa ëli:
—Amu ske da bo pödë tudu ku gloria dëneñ,
pakë tudu sa ja a bi da amu,
se amu ja da nguë shi ja da amu vintadji.
7 Shi bo ja dajözhöiö pa bo adola amu,
tudu ske sa ja bo.
8 Se Djisu kundji ëli:
—Sa skividu:
“Bo ske ja adola Shiölö ku sa Nashian bo,
se bo ske ja shivi ëli moso”.
9 Se ëli ma ëli ba Jerusalen,
ba ponto shi atu mashi liba jadji Nashiolo,
se ëli faa ëli:
“Ëli ske da nna anzhu dëli odji pa ineñ fë lazhan bo.
11 Se ineñ ske gaga bo ku öma dëneñ,
valadji pa bo na da topu ope bo ku buduf”.
12 Se Djisu kundji,
se faa ëli:
—A ja faa:
“Bo na ja puva Shiölö ku sa Nashian bof”.
13 Se ta djiabu bi jaba ku tentasan tudu,
se ëli da safa fo ëli ba toja utu fölöshö.
Djisu jomesa tabaia dëli
14 Se Djisu tan vlame ba Galilea ku pödë Spitu,
se monova dëli panta panta loso loso ineñ shi sa pachi dala tudu.
15 Se ëli bi ska shina nguë kuzhu dantu jadji Nashian nna judio dëneñ,
se nguë tudu bi ska alaba ëli.
16 Se ëli ba Nasaret,
loso shi ëli kia,
se uan djasubudu se ëli lantela dantu jadji Nashian nna judio,
amea kutumu dëli.
Se ëli lanta pa ëli lëë,
17 se a da ëli lavulu pantafala Nashian shi a ja sama Isaias.
Se ta ëli bla se ëli dajonta ku uan jamian ku sa skividu:
18 «Spitu Shiölö sa liba amu,
pakë ëli ma amu valadji pa amu pegua nova gavu da nna puvili.
Ëli manda amu pa amu faa nna nguë shi sa djili faa ineñ sa legadu,
pa amu da nna sebu vita,
pa amu fë pa nna nguë ineñ shi sa basu dji nguë sa legadu,
19 pa amu ten pegua fa se sa anu föböli Shiölö».
20 Zha se Djisu sua lavulu,
se ëli da shividölö zha se ëli tusan.
Se nna nguë ineñ shi sa dantu jadji Nashian nna judio tudu tanja öiö pë ëli.
21 Se ëli jomesa ja faa fala,
ja faa ineñ:
«Ödjai se kumpli Fa Nashiolo deenchi namsëdji».
22 Se nguë tudu bi ska da lazhan tëjantu ku ëli,
ku böjö betu da fala gagavu ku galasa shi ku bi ska së fo böjö dëli,
se ineñ bi ska pongota:
«¿Nguë sai na se sa mina Sandzhe ua?».
23 Se Djisu kundji ineñ:
«Amu sëbë fa namsëdji ske faa amu palavulu shi:
“Babëlu ia,
kula öguë bo”.
Ten fë tela bo,
jö ineñ shi no tëndë fa bo fë Kapernaum iai.
24 *Anta vedadji se amu faa namsëdji:
Zhugan pantafala a na sa da ëli aen dantu tuludöguë tela dëli ie zhaf.
25 »Anta vedadji se amu faa namsëdji fa tempu Elias bi të uan sapa mainviva dantu Israel,
djia shi ösë bi sua tëishi anu ku mëiu iai,
ku bi të taba fomu liba tela tudu iai.
26 Mandji se a na manda Elias ba jadji zhugan ineñf.
Shina dji uan mainviva loso Sarepta,
lome loso loso palea Sidon.
27 A shime ten bi të dantu Israel uan sapa nguë ku danchi lepla tempu pantafala Eliseo,
mandji se ëli na kula zhugan ineñ shif,
shina Naaman,
ku bi sa nguë siria».
28 Ta nna nguë ineñ shi sa dantu jadji Nashian nna judio tëndë jö ineñ se,
se mëtë tudu pashian.
29 Se ineñ lanta se ineñ jölë Djisu fo loso sai se ineñ ma ëli ba uan van iki jamian shi a fë loso se pë,
pa ineñ zhuga ëli ba bonjo.
30 Mandji se Djisu pasa metadji dëneñ se ëli bai.
Masebu ku sa spitu fëiu
31 Se Djisu fo Kapernaum,
uan loso Galilea,
se djasubudu se ëli bi ska shina nguë kuzhu.
LUK 4.31-44
32 *Se nguë tudu gua ku böjö betu amea shi ëli bi ska shina ineñ kuzhu,
pakë ëli bi ska faa ku ineñ ku pödë.
33 Se dantu jadji Nashian nna judio bi sa ala uan masebu ku bi sa ku uan spitu damono fëfëiu,
se ëli jomesa ja faa ku falagochi atu:
34 —¡Aa!
¿Ja fë bo ska lantela dantu metadji no,
Djisu Nasaret?
¿Bo bi të no të fea fea?
No sëbë fa bo se sa Santu Nashiolo.
35 Se Djisu lonja öiö da ëli,
se faa ëli:
—¡Jaböjö!
¡Së folo masebu sai!
Tadashi se damono se ligui masebu se da san metadji dëneñ,
se ëli së fo ëli shinke ëli tan fë ëli zhugan duadu.
36 Se nguë tudu mdja ku böjö betu,
se ineñ bi ska të pufia ku ineñ ineñ me,
ja faa:
«¿Kë klase fala ineñ se sa?
Ku odji ku pödë se ëli ja da spitu fëfëiu ineñ sai,
se ineñ ja së folo».
37 Se a bi ska da monova gavu dëli jamian loso loso ineñ se tudu.
Djisu kula sogolo Pudul
38 Ta Djisu së fo jadji Nashian nna judio,
se ëli lantela jadji Shiman,
se ëli toja sogolo dëli ku bi sa ku uan fibil ödu.
Se a luga Djisu pa ëli zhuda ëli.
39 Se ëli iaba lome dëli se ëli lonja öiö da fibil sai,
se fibil se lega ëli.
Se ëli lanta se öshi öshime se ëli jomesa ja shivi ineñ.
Djisu kula uan sapa nguë ska danchi
40 Ta solo bi ska daua,
se nna nguë ineñ shi tudu bi sa ku uan nguë ska danchi ku klase danchi tudu se a ma ineñ ba da eli,
se ëli pë öma liba dëneñ unian unian,
se ëli kula ineñ.
41 Se damono bi ska së fo uan sapa ineñ,
ja ta kidëlë ja faa:
«¡Bo se sa Mina Nashiolo!».
Mandji se ëli bi ska lonja öiö da ineñ,
se ëli na bi ska lega pa ineñ ja faa falaf,
pakë ineñ bi sëbë fa ëli se sa Kilitu.
Djisu ska da nova gavu
42 Ta pamasedu bla,
se Djisu së fo loso sai se ëli ba dantu uan jamian sölö sölö,
se möi pöjödölö bi ska jua ëli,
se ta ineñ ba da jamian shi ku ëli bi sa,
se ineñ na bi ska lega ëli pa ëli së fo alaf.
43 Mandji se ëli faa ineñ:
«Ten ja fë fata pa amu ten ma evanjelio gövöndölö Nashiolo ba utu palea palea,
pakë dajantu jö sai se a da amu bi».
44 Se ëli ska bai ja pegua dantu jadji jadji Nashian nna judio dëneñ.