2 Se sa tempu shi Anas ku Kaifas ten bi sa jasa jasa padjil,

se uan nova Nashian bi da Zhuan mina Sakarias ta ëli bi sa dantu uan jamian sölö sölö.

3 Se ëli bi ska bai jamian shi bi sa lome lubela Jordan,

se ëli bi ska pegua bachizha pa tan vla ku ope tashi valadji pa pada pekadu tudu.

4 Amea shi sa skividu dantu lavulu ku fala ineñ shi pantafala Isaias:

7 ^*Se uan möi pöjödölö bi ske toja Zhuan valadji pa ëli bachizha ineñ,

se ëli faa ineñ:

—¡Zhenchi nna jobolomatu!

¿Kë nguë faa namsëdji fa namsëdji bi ske paadji jölë da jatigu shi ska iabi iai?

8 ^*Ta pa namsëdji ja da fuluta pa ja msa fa namsëdji tan vla ku ope tashi fo pekadu namsëdji.

Na ja ska jomesa mazhna dantu döguë namsëdji fa,

“No të Abraam shimafan pai”,

pakë amu faa namsëdji fa Nashian paadji mindji nna mina da Abraam ba toja fo basu budu budu ineñ sai.

9 ^*Se mashi,

öseshi se matin sa pidu leezha ope döpa bebezha;

dajantu shi,

se ope döpa shi na ja da fuluta gagavuf a ske duba ëli se a ske ta ëli ba fögö.

10 Tadashi se zhugan nna nguë ineñ shi bi sa dantu moi pöjödölö ineñ se pongota Zhuan:

—¿Tadashi a kë ja ta pa no fë?

11 Se Zhuan kundji ineñ:

—Nguë shi ja të jaminzha dösu ta pa ëli da nguë shi na të zhuganf unian.

Nguë shi ja të kumu ta pa ëli ten da nguë shi na të zhugan ja pa ëli kumuf.

12 ^*A shime zhugan nna nguë ineñ shi ja ma tesu,

ten bi bi toja Zhuan pa ëli ten bachizha ineñ.

Se ineñ pongota ëli:

—Meetha,

¿kë ja ta pa no fë?

13 Se ëli kundji ineñ:

—Na tan ja ma mashi ku jö shi ta pa ja maf.

14 Se zhugan nna sodadji ten pongota ëli:

—A no,

¿kë ja ta pa no fë?

Se Zhuan kundji ineñ:

—Na tan fë nguë afoshi pa ja da namsëdji djiëluf.

Na tan mucha da nguëf dajantu ku a na da namsëdji djiëluf.

Pa namsëdji sa ku liguilia da pagu namsëdji.

15 Se nna pövu bi ska gada uan ja ngandji pa shiga ineñ,

se fë ku nguë tudu bi ska pongota dantu kusan dëneñ fa Zhuan se ja fo sa Kilitu.

16 Se Zhuan kundji nguë tudu,

ja faa:

«Amu ska bachizha namsëdji ku aua,

mandji se uan nguë ku të pödë mashi ku amu ska bi.

Uan nguë ku amu na se sa nguë shi pa sota jodo ja mëtëpope dëlif.

Se ëli ske bachizha namsëdji ku Spitu Santu ku fögö.

17 Ëli sa ku öpa öma dëli,

valadji pa ëli ja limpa ope jambabu fo tulugu.

Pa ëli ja totolo tulugu pë jadji gada tulugu dëli;

mandji se ëli ske ja ta ope jambabu ba uan fögö ku na ja paka zhugan djiaf».

18 Se Zhuan bi ska luga da pövu ku jö ineñ sai ku utu fala mashi ja da ineñ nova gavu.

19 ^*Mandji se ta Zhuan faa alë Erodes shi se bi sa gövöndölö shi fë jatulu ja fëfëiu ineñ shi ku ëli ska fë,

tëjantu ku ëli ba jazha ku sogolo dëli Erodias ku bi sa miela namain dëli.

Se ëli tan faa Erodes da utu ja fëfëiu ineñ shi ku ëli tan bi fë iai.

20 Tadashi se Erodes tan fë i shi fëiu mashi:

Se ëli sua Zhuan pë djili.

21 Zha se öshi Zhuan bi ska bachizha pövu tudu,

se a ten bachizha Djisu.

Se öshi ëli bi ska lezha,

se ösë bla.

22 ^*Se Spitu Santu shimafan öguë dji uan löla dësë bi liba dëli.

Tadashi se fo ösë se a tëndë uan falagochi ku bi ska faa:

«Bo se sa Mina ngongodu amu,

pakë bo se ja fë amu të liguilia».

23 Ta Djisu bi jomesa sulvisu shi ku ëli bi fë iai,

ëli bi sa ku amea chirinta danu.

Ëli bi sa,

amea shi a bi ska mazhna,

mina Sandzhe,