2 Se a skëvë namu nguë tudu fo tempu shi Sirenio se bi sa gövöndölö Siria.

3 Se amea sai se nguë tudu bi ska skëvë namu dëneñ,

fo loso ineñ shi ineñ sa nguë dëneñ.

4 Dajantu shi se Sandzhe subili fo loso Nasaret,

ku sa pachi loso loso Galilea ba loso Belen,

ku ja ta Judea,

pakë ëli sa nguë zhenchi alë David.

5 Valadji pa ëli ba skëvë namu dëli ku dji Malia,

miela dëli ku bi sa pañia.

6 Se öshi ontolo ineñ bi sa Belen,

se da tempu pali dëli.

7 Se ëli pali mina pimëlu dëli,

se ëli boshia ku panu se ëli tovesa ëli pë dantu jö shi ku a ja pë kumu da limaia,^*+

pakë na bi të jamian pa ineñ sa dantu jadji loma nguëf.

8 Bi sa ku zhugan nna ludjadölö jabala ku bi sa,

jamian Belen ja ludja ögö jabala dëneñ nöchi shi ska ta öluia.

9 Se uan anzhu Nashian së ineñ ku supichi.

Se gloria Shiölö ja chila blin se dëdë pë ineñ,

se mendu ma ineñ.

10 Mandji se anzhu se faa ineñ:

«Namsëdji na menduf,

pakë amu bi ku nova gavu,

ku sa nova liguilia ku ske sa da pövu tudu.

11 Ödjai dantu palea alë David,

se a pali nguë shi sa Savadölö namsëdji.

¡Ëli se sa Kilitu,

ku ëli se sa Shiölö!

12 Jö sai se ske shivi shimafan shinali:

Namsëdji ske dajonta ku uan mina mongo mongo boshadu ku panu,

ku a pë ëli tovesadu dantu jö shi ku a ja pë kumu da limaia».

13 Öshime se së ku supichi fo ösë uan sapa anzhu,

se ineñ tudu ska da ilö Nashian ja ska faa:

15 Ta nna anzhu ineñ se tan vlame ba ösë,

se nna ludjadölö jabala ineñ se faa ku ineñ ineñ me:

«No bai,

pa no ba Belen,

pa no ba ua jö shi shiga ala ku Shiölö ngongo lega no sëbë».

16 Tadashi se ineñ bë dandjian,

se ineñ dajonta ku Malia ku Sandzhe,

ku mina tovesadu pë dantu jö shi ku a ja pë kumu da limaia.

17 Ta ineñ bë ëli,

se ineñ sa fa jonta jö ineñ shi anzhu faa ineñ tëjantu nna mina sai.

18 Se nna nguë ineñ shi tëndë ineñ tudu,

këlë ineñ ku böjö betu da jö ineñ shi nna ludjadölö bi ska fala.

19 Mandji se Malia bi ska gada jö ineñ se tudu pë dantu kusan dëli ja mazhna amea jö ineñ sai.

20 Se nna ludjadölö jabala tan vlame bai ja da Nashian gloria ku ilö dajantu jö ineñ shi ineñ tëndë ku ineñ bë iai,

amea shi ku a ten bi faa ineñ iai.

21 ^*Ta da djia shi fë ötu djia jamian shi a pali ëli se a kuta ëli napai dëli,

se pë ëli namu ja sama Djisu,

namu shi anzhu bi faa Malia anta pa ëli bi pëndë mëdji iai.

22 Ta ten kumpli tempu shi pa Malia ku Sandzhe limpa amea shi alë Moises manda,

se ineñ ma mina ba Jerusalen ba msa Shiölö.

23 Ineñ fë amea sai pakë dantu alë Shiölö sa skividu:

«Pimëlu mina napai tudu ske ja sa santu da Shiölö».

24 A shime ineñ ten bai valadji pa ineñ ba fë saklifisu amea shi ku alë Shiölö ja faa:

«mina löla dösu ö mina löla ngola dösu».

25 Dantu tempu se,

bi të uan pai Jerusalen ku a ja sama ëli Shiman.

Masebu se bi sa uan masebu dëtu deenchi Nashiolo ku ja da ëli ondolo ku ja këlë fala dëli,

se ëli bi ska gada tempu shi Nashian bi ske fia kusan Israel,

se Spitu Santu bi sa ku ëli.

26 Spitu Santu bi msa ëli kuzhu,

fa ëli na bi ske mölëf shinke ëli bë Kilitu shi Shiölö bi ske da bif.

27 Se Spitu Santu ma ëli ba jadji Nashiolo.

Ta nna pai Djisu ma ëli ba jadji Nashiolo pa ineñ ba kumpli ku jö shi alë Moises ja fala.

28 Se Shiman ligui ëli pë baasu dëli,

se ëli da Nashian besa ja faa:

33 Se pai ku main mina sai bi gua ku böjö betu da jö ineñ shi a bi ska faa tëjantu ku ëli.

34 Tadashi se Shiman da ineñ besa se faa Malia main Djisu:

«Ja pia,

namina se bi pa fë pa uan sapa dji nguë dantu Israel tan lanta pa utu nguë tan pono.

Se ëli ten ske sa uan shinali ku uan sapa dji nguë tudu se ja naga,

35 dajantu jö sai se a ske jönsë mazhnamentu uan sapa kusan.

Se tëjantu ku bo,

uan jatana ske pasa tuludöguë alma bo».

36 Ten bi sa ala a shime uan pantafala naamain,

ku a ja sama ëli Ana,

mina Fanuel,

ku sa zhenchi Aser,

ëli bi sa main veiu ku uan sapa danu,

pakë ëli bi sa jazhadu fo ta ëli bi sa mashivin se ëli bi bibe ku medu dëli seta anu.

37 Mandji se fo deshi danu ötu ku jatulu ku ëli bi sa mainviva.

Se ola tudu se ëli ja sa dantu jadji Nashiolo ja lezha da Nashiolo ja shivi ëli nöchi ku djia,

shin chila zhedu böjö.

38 Se Ana iaba ope Sandzhe ku Malia,

se ëli jomesa ja da Nashian dezhupaga ku ten ja faa ja tëjantu ku mina.

Se ëli ten sa fa ja jonta nna nguë ineñ shi ska gada savasan fo dantu Jerusalen.

39 ^*Ta ineñ kumpli ku jö shi alë Shiölö faa pa ineñ fë jaba,

se ineñ tan vla ba Galilea,

ba loso dëneñ Nasaret.

40 Se mina se bi ska këësë se ëli bi ska vla ödu,

se ëli bi ska shia ku tëndëmentu,

se galasa Nashian bi sa liba dëli.

41 Sandzhe ku Malia ineñ bi ja subili anu tudu ba Jerusalen pa ineñ ja fë fesa Paskua.

42 Se ta Djisu të uan deshi danu ku dösu se ëli ku ineñ ten ba fesa amea shi bi sa kutumu dëneñ.

43 Ta fesa jaba se Sandzhe ku Malia tan vlame ba Nasaret,

mandji se Djisu namasebu,

mdja Jerusalen shinke pai dëli ku main dëli sëbë.

44 Se ineñ,

ku bi pë fa Djisu bi ska bai dantu nna möi pövu,

se ineñ ten nda jamangandji uan djia ntëlu,

ta ineñ ba jua ëli dantu nna pusumu ku nna jönshidu,

45 mandji se ineñ na bë ëlif.

Tadashi se ineñ tan vla Jerusalen ba jua ëli.

46 Ta pasa tëishi djia se ineñ dajonta ku ëli dantu jadji Nashiolo,

tusan metadji nna meeth dalë,

ja tëndë ineñ ku ja pongota ineñ kuzhu.

47 Se nna nguë ineñ shi bi ska tëndë ëli tudu,

bi ska gua ku böjö betu,

amea shi ëli bi ska kundji ineñ ku tëndëmentu.

48 Ta pai dëli ku main dëli ba bë ëli,

se ineñ gua ku böjö betu.

Se main dëli faa ëli:

—Mina amu ia,

¿jama fë bo fë no jö sai?

Pai bo ku amu tudu bi ska jua bo ku kusan jabadu.

49 Se Djisu pongota ineñ:

—¿Ja fë namsëdji ska jua amu?

¿Namsëdji na sëbë fa ta pa amu sa dantu jadji Pai amufa?

50 Mandji se ineñ na tëndë jö shi ku ëli bi ska faa ineñf.

51 Tadashi se ëli ku ineñ tan vla Nasaret,

se ëli bi ja tëndë ineñ.

Se main dëli bi ska gada jö ineñ se tudu pë kusan dëli.

52 Se Djisu bi ska këësë ku tëndëmentu ku ja këësë atu,

ku galasa Nashiolo ku dji nna nguë tudu.