EVANJELIO KU
SAN LUKAS
SKËVË
Ja a da ba da Teofilo
1
Pakë uan sapa nguë se bi ngongo skëvë soia amea jö ineñ shi kumpli dantu no,
LUK 1.1-25
2 amea shi ineñ bi shina no jö ineñ shi fo jomesadu ku ineñ bë ku öiö dëneñ,
ku shividölö evanjelio.
3 Se fë,
a shime amu,
ö pai shiölö Teofilo,
jö ineñ shi amu ten jua öiö ku tëndëmentu fo jomesadu,
se fë amu mazhna pa amu ten skëvë da bo ku uan odji gavu mashi,
4 valadji pa bo paadji jönsë vedadji jö ineñ shi a shina bo tudu.
Uan anzhu ska da lazhan amea nashimentu Zhuan Bachita
5 Bi sa tempu shi ku Erodes se bi sa alë Judea,
se uan padjil,
ku a ja sama Sakarias ku bi sa uachi padjil Abias,
se miela dëli ku bi sa minadjimina padjil Aaron se a bi ska sama ëli Zhëbëlu.
6 Ineñ dödösu bi sa nna nguë dëtu deenchi Nashiolo,
ja nda shin zhugan fata,
pakë ineñ bi ska tëndë mandamentu ku odji Shiölö tudu.
7 Mandji se ineñ na bi të nna minaf pakë Zhëbëlu na bi ja palif.
Vlame se ineñ dödösu bi sa pai veiu bebezha.
8 Mandji se uan djia ku nna nguë uachi padjil Sakarias se bi ta pa ineñ se fë sulvisu deenchi Nashiolo.
9 Amea kutumu nna padjil tudu bi ta pa ma uan ineñ pa paadji lantela dantu dantu jadji Shiölö valadji pa ba kama insienso.
Se suleta pono da Sakarias pa ëli se ba kama insienso deenchi datali.
10 Se pövu tudu bi sa öluia ja lezha öshi ëli bi ska kama insienso.
11 Moso se uan anzhu Shiölö së Sakarias ku supichi mdjadu benda dëtu datali shi a ja kama insienso.
12 Se ta Sakarias ba ku öiö ba bë anzhu Nashian se,
se fë ëli danadu se mendu ma ëli.
13 Mandji se anzhu se faa ëli:
—¡Na menduf,
Sakarias!
Nashian tëndë lezha bo tudu.
Se miela bo Zhëbëlu ske pali uan mina napai,
se bo ske pë ëli namu ja sama Zhuan.
14 Se bo ske sinchi gavu ku liguilia monchi,
se uan sapa nguë ten ske të liguilia tëjantu ku nashimentu dëli.
15 Pakë mina bo ske sa uan nguë ngandji deenchi Shiölö.
Se ëli na ske ja bëbë vianfa ñi aldenchif,
se Spitu Santu ske sa ku ëli fo anta pa pali ëli.
16 Se ëli ske fë pa uan sapa nna mina Israel tan ja vla Shiölö Nashian dëneñ.
17 Se ëli ske bai pimëlu deenchi Shiölö,
ku spitu ku pödë shi ten bi sa ku pantafala Elias,
valadji pa ëli fë pa kusan nna pai tudu tan vla nna mina dëneñ.
Se ëli ten ske fë pa nna nguë fëfëiu tan ba tëndë tëndëmentu nna nguë dëtu.
Pa amea sai pë tan fë vadu uan pövu gavu valadji pa tan ma Shiölö ta ëli ja bi.
18 Se Sakarias pongota anzhu se:
—¿Jama jö se ske paadji fë?
Pakë amu sa pai veiu bebezha,
se miela amu ten sa main veiu bebezha.
19 Se anzhu se kundji ëli:
—Amu se sa Gabriel Se amu ja ta deenchi Nashiolo,
se ëli manda amu pa amu bi faa ku bo,
pa amu ten ma nova gavu se bi da bo.
20 Mandji se amea se bo na këlë fala amuf ai,
bo na tan ske faa falaf,
ba toja pa jö ineñ se tudu kumpli ta ske da tempu dëli iai.
21 Se öshi jö ineñ se tudu ska shiga,
se pövu ineñ shi bi sa öluia ja gada Sakarias,
tudu jomesa ja pongota ja fë ku ëli ska tada dantu jadji Nashian nna judio shi.
22 Mandji se ta Sakarias së bi öluia.
Se ëli na bi paadji faa ku ineñf,
se da ineñ ötëndë fa ëli bë uan ja ngandji dantu jadji Nashian nna judio.
23 Ta ëli kumpli ku sulvisu dëli jaba,
se ëli tan vla jadji dëli.
24 Ta pasa uan fi tempu,
se miela dëli Zhëbëlu të pañia,
se ëli na tan së fo jadji dëlif fo shinku mëdji,
ja mazhna fa:
25 «Se sa amea shi Shiölö fë ku amu dantu djia ineñ shi ku ëli msa gavu dëli ku amu ta ëli chila govan fo amu deenchi nna utu nguë».
Uan anzhu ska da lazhan amea nashimentu Djisu
26 Djia shi Zhëbëlu bi sa ku sëshi mëdji pañia,
se Nashian manda anzhu shi a ja sama Gabriel ba uan loso Galilea,
ku a ja sama Nasaret.
LUK 1.26-56
27 *Se Nashian manda ëli ba toja uan nna mina miela vidjin ku bi ske jazha ku Sandzhe,
ku sa nguë jadji alë David.
Se namu vidjin sai a bi ja sama ëli Malia.
28 Se anzhu se lantela jamian shi ku ëli bi sa,
se faa ëli:
«¡Amu da bo manten,
bo sa ku föböli ngandji fo Nashiolo!
Se Shiölö sa ku bo».*+
29 Se Malia na sëbë ja pa ëli mazhna amea nova ineñ sef,
se ëli bi pongota kë sinchidu sa ku manten sai.
30 Se anzhu faa ëli:
—Na menduf,
Malia,
Nashian da bo föböli dëli.
31 *Bo ske të pañia se bo ske pali uan mina napai,
se bo ske pë ëli namu ja sama Djisu.
32 Ëli ske sa uan nguë ngandji,
se ëli ske sa Mina Nashian shi Atu mashi.
Se Shiölö Nashian ske fë pa ëli sa alë,
amea shi paipai dëli David ten bi sa.
33 Se ëli ske sa alë liba tela Jakob ola tudu.
Se ëli ske sa gövöndölö pövu Israel pa sempele se gövöndölö dëli na ske të jabamentuf.
34 Se Malia pongota anzhu:
—¿Jama jö sai ske paadji fë?
Shi amu na jönsë napaif.
35 Se anzhu kundji ëli:
—Spitu Santu ske bi liba bo,
se pödë Nashian shi Atu mashi ske kubili bo ku sombolo dëli.
Se fë ku mina shi ku bo ske pali iai ske sa santu.
Se a ske ja sama ëli Mina Nashiolo.
36 A shime namain bo Zhëbëlu ten sa pañia uan mina napai,
öseshi ku ëli sa ku anu tezhadu bebezha iai.
Nguë shi nguë tudu bi ska faa na ske pali minaf ai sa ku pañia sëishi mëdji.
37 Pakë na të zhugan ja ku Nashian na paadji fëf.
38 Tadashi se Malia faa:
—Amu sa shividölö Shiölö.
Pa jö ineñ se tudu fë amea se bo faa iai.
Se ku jö sai,
se anzhu se tan bai.
Malia ba ua Zhëbëlu
39 Dantu zhugan ponodu djia,
se Malia lanta se bai dandjian uan palea ku ja ta van iki Judea.
40 Se ëli lantela dantu jadji Sakarias se ëli da Zhëbëlu manten.
41 Ta Zhëbëlu tëndë manten Malia,
se mina shi sa dantu chipa dëli iai buli.
Tadashi se Spitu Santu shia Zhëbëlu.
42 Se ëli faa ku falagochi atu:
—¡Nashian da bo besa mashi ku naamain tudu.
Se Nashian ten da mina se bo ske pali ëli besa!
43 Mandji,
¿se ja fë Nashian da amu ondolo ngandji sai,
pa main Shiölö amu bi bë amu?
44 Pakë i shi moso ku amu tëndë manten bo,
se mina shi sa dantu chipa amu iai buli da liguilia.
45 ¡Shiölö ske da bo besa pakë bo këlë fa jö ineñ shi ëli plomëtë bo tudu ske kumpli!
Malia ska alaba Nashiolo
46 Tadashi se Malia faa:
—Alma amu ska da lazhan amea shi Shiölö amu ngandji.
47 Se spitu amu sa ku liguilia da Nashian shi sa Savadölö amu,
48 pakë ëli pë öiö dëli liba puvili amu,
shividölö dëli.
Ja pia,
fo öseshi nna zhenchi zhenchi tudu ske ja sama amu,
Nashian da amu uan besa patadu.
49 Pakë Nguë shi të pödë mashi
fë ja ngangandji da amu.
¡Namu dëli se sa santu!
50 Se ëli të mindjikodji ku zhenchi zhenchi dëli
ku nna nguë ineñ shi ja da ëli ondolo.
51 Se ëli fë ja ngangandji ku baasu dëli,
se ëli të mazhnamentu kusan nna subebu tudu të panta panta.
52 Se ëli chila nna alë tudu fo liba töli dëneñ,
se ëli pë nna nguë shipë shipë liba.
53 Se ëli shia ku ja gagavu nna nguë ineñ shi sa ku faku,
se ëli jölë nna liku bai ku öma dödji.
54 Se ëli zhuda pövu Israel shividölö dëli,
se ëli ja lambela mindjikodji dëli.
55 Amea shi ku bi ëli plomëtë,
pai no Abraam ku nna minadjimina dëli tudu pa sempele.
56 Se Malia mdja ku Zhëbëlu tëishi mëdji,
zha se ëli tan vla jadji dëli.
A pali Zhuan Bachita
57 Ta da tempu shi ta pa Zhëbëlu pali,
se ëli pali uan mina napai.
LUK 1.57-80
58 Se ta nna djividjili dëli ku nna nguë dëli tëndë fa Shiölö msa ineñ mindjikodji ngandji dëli,
se nguë tudu sinchi liguilia ku ineñ.
59 Ta da ötu djia,
se ineñ be ku mina valadji pa ba kuta mina napai dëli,
se ineñ bi ngongo pë ëli namu pai dëli,
Sakarias.
60 Mandji se main dëli kundji ineñ se faa:
—¡Na!
A ske ja sama ëli Zhuan.
61 Se ineñ faa ëli:
—¿A kë ja fë?
Na të zhugan nguë dantu zhenchi namsëdji a ja sama ku namu sef.
62 Tadashi se a ten pongota pai dëli ku shinali kë amea ëli ngongo pa ja sama mina dëli.
63 Se ëli pindji uan gachi taaba,
se ëli skëvë pë:
«Zhuan se sa namu dëli».
Se nguë tudu gua ku böjö betu.
64 Se öshi öshime se böjö dëli bla,
se lunga dëli sota se ëli tan jomesa ja faa fala ja alaba Nashiolo.
65 Se mendu ma nna djividjili dëli tudu,
se loso loso ineñ shi sa van iki Judea tudu ja da lazhan jö ineñ se shiga ala iai.
66 Se nna nguë ineñ shi ja tëndë nova se tudu ja faa dantu kusan dëneñ:
«¿Kë nguë ske sa mina sai,
ta ëli ske këësë?».
Pakë öma Shiölö bi ska fë lazhan dëli.
Sakarias ska alaba Nashiolo
67 Tadashi se Spitu Santu bi liba Sakarias,
pai mina,
se faa uan fala pantafala,
ja faa:
68 «¡Besa ja sa ku Shiölö,
Nashian Israel,
pakë ëli bi pa ëli bi sava pövu dëli!
69 Se ëli da uan Savadölö ku pödë bi da no,
ku sa nguë jadji alë David,
ku sa shividölö dëli.
70 Amea shi ku ëli bi plomëtë ineñ fo jomesadu amea böjö nna pantafala santu santu dëli.
71 Ku ske sava no fo nna namigu no,
ku ten fo öma nna nguë ineñ shi sa ku no ku pashian.
72 Pa ëli ten msa mindjikodji dëli ku nna paipai no,
ku pa ëli ten lambela bechi santu dëli.
73 Fo julamentu shi ëli fë ku paipai no Abraam:
74 Ëli bi faa ëli ske sava no fo pödë nna namigu no,
pa no na tan mendu valadji pa no ja shivi ëlif,
75 ku uan vida santu ku djustishi
ku pa no ja bibe deenchi dëli djia no tudu.
76 Se bo,
mina amu,
a ske ja sama bo:
Pantafala Nashian shi Atu mashi,
pakë bo ske be deenchi Shiölö valadji pa bo ba fë vadu jamangandji da ëli.
77 Pa bo ten msa pövu dëli savasan,
pakë Nashian pada ineñ pekadu dëneñ tudu.
78 Pakë Nashian no,
dantu mindjikodji ngandji dëli,
se fo liba se ëli ja ma solo ku uan djia novu bi da no,
bi da no shimafan ta solo ja së uan djia novu.
79 Pa da fögö djidjidu bi da nna nguë ineñ shi ska bibe dantu jamian kulu,
ku dantu sombolo mölë,
valadji pa msa ope no jamangandji dji padji».
80 Se mina se bi ska këësë se ëli bi ska vla ödu dantu spitu,
se ëli bi ska bibe dantu jamian sölö sölö ba toja djia shi ku ëli msa pövu Israel tudu öguë dëli.