Evanjelio Lukas ja jomesa ku lazhan shi ku ëli bi ska da uan jamada dëli, ku a ja sama ëli Teofilo, valadji pa nguë sai ba jönsë «vedadji» gavu tëjantu ku Djisu (1:1-4). Benga zha pa Lukas ja zhunta fala ku Matë ku Marko uan sapa fidu ja tëjantu ku vida Djisu, a shime ëli ten ja msa utu ja shishizhu dantu evanjelio dëli.

Lukas ja da no lazhan mashi ku Matë ja tëjantu ku nashimentu Djisu (kapitulo 1 ku 2), ku se ëli ten ja zhunta msa amea shime nashimentu Zhuan Bachita. Lukas ja msa fa Djisu, a shime Adan, ëli ten bi sa mina Nashiolo (3:38), benga zha pa nguë tudu bi ska këlë fa ëli bi sa mina Sandzhe (3:23).

Dantu evanjelio sai të zhugan shina ja Djisu ku a ja msa dantu ie moso. Dantu ineñ ja msa zhampulu uan pai ku sa ku ngongo (15:11-32), dji mindjikodji uan nguë utu tela patadu (10:25-37). Lukas ja msa fa Nashian ten ja ngongo ku nna nguë utu tela patadu, se uan sapa vëdji nna nguë tela patadu se ja sa nna nguë ku ja da dezhupaga mashi (17:11-18).

Uan ja ngandji sa fa Lukas ja ma uan pachi ngandji dantu evanjelio dëli valadji pa ëli faa tëjantu ku vadji Djisu ba Jerusalen (9:51–19:27). Da Lukas, vida Djisu ja msa amea shi ëli ja ska nda ja subili iki ja be liba, shimafan ja fo jomesadu se ëli ja ska subili ba iki shi ku a ske da ëli pë kusu (23:33). Mandji se ëli ten ja fë nguë bë fa ëli se ngongo ba Jerusalen pakë tempu pa ëli subili ba ösë bi sa peetu bebezha (9:51). Se sa amea shi ku Lukas ja jaba evanjelio dëli: ta a ja da Djisu pë kusu, se ëli mölë se ëli ten lanta bi vida, se a ja ma ëli ba ösë (24:51).