Djisu tan lanta bi vida
16
Ta pasa djasubudu,
se Malia Magdalena,
Malia main Sanchagu,
Salome,
se ineñ kumpa adjimiolo valadji pa ineñ ba bolo ëli.
2 Se pamasedu kulu kulu,
pimëlu djia sumanu,
se ineñ ba spitula,
öshi solo bi së bebezha.
3 Mandji se ineñ bi ska faa ku ineñ ineñ me:
—¿Kë nguë ske vla budu se fo böjö poto spitula da no?
4 Mandji,
se ta ineñ ba pia,
se ineñ toja a vla budu sai folo,
ku bi sa uan taba budu ngandji.
5 Se ta ineñ lantela dantu spitula,
se ineñ bë uan mashivin bishidu ku uan bobolonda banku löngö se ëli bi ska tusan benda dëtu,
se ineñ sombela.
6 Se ëli faa ineñ:
—Namsëdji na sombelaf.
Namsëdji ska jua Djisu Nasaret,
nguë shi a bi da pë kusu iai.
Se a lanta ëli bi vida;
ëli na sa ief;
namsëdji bi ua jamian shi a bi pë ëli iai.
7 *Mandji se namsëdji bai,
pa namsëdji faa nna balë dëli,
ku Pudul,
fa ëli la deenchi namsëdji ja be Galilea.
Se ala se namsëdji ske bë ëli,
amea shi ëli bi faa namsëdji iai.
8 Se ineñ së fo spitula ku jölë,
pakë ineñ bi ska timbla da mendu;
se ineñ na faa zhugan nguë zhugan jaf,
pakë ineñ bi ska mendu.
Djisu së zhugan nguë ku supichi
9 Ta Djisu tan bi lanta bi vida,
pamasedu pimëlu djia sumanu,
se ëli së Malia Magdalena ku supichi,
nguë shi ëli bi chila damono seta ineñ shiki folo pimëlu iai.
10 Se ëli bai se ëli ba da nna nguë ineñ shi bi sa ku ëli iai lazhan,
se ëli dajonta ku ineñ tudu modoia ja sula.
11 Mandji se ta ineñ ba tëndë fa ëli sa vivu se ëli bë ëli,
se ineñ na këlë ëlif.
12 Ta jö ineñ se tudu pasa,
se Djisu ten së ineñ dösu ku supichi amea patadu,
ku ineñ bi ska nda ja bai jamangandji ja matu.
13 Se ineñ bai se ineñ ba da utu nna nguë ineñ shi bi sa ala lazhan;
mandji se ineñ na ten këlë ineñf.
Djisu ska da nna balë dëli uan mandatu
14 Ta da jabamentu se Djisu ten së nna balë deshi ku unian ku supichi ta ineñ bi ska kumu.
Se ëli faa ineñ kuzhu dajantu fi jonfa shi sa ku ineñ ku da kusan ödu dëneñ;
pakë ineñ na ten këlë nna nguë ineñ shi bë ëli ta ëli tan lanta bi vidaf.
15 *Se ëli faa ineñ:
“Namsëdji ba mundu nguintëlu nguintëlu pa namsëdji pegua nova gavu da nna nguë tudu.
16 Se nguë shi ja këlë ku a ja bachizha ëli ske të savasan,
mandji se ja sa nguë shi na ja këlëfa,
se ske sa kondenadu.
17 Se shinali ineñ se ske ja lë nna nguë ineñ shi ja këlë:
Ku namu amu se ineñ ske ja chila damono fo nguë,
se ineñ ske ja faa utu fala pata patadu;
18 se ineñ ske ja fala jobolomatu ku öma dëneñ;
se benga pa ineñ ja bëbë ja ku ja chila nguë vida folo,
na ske ja fë ineñ zhugan malif,
se ineñ ske ja pë öma dëneñ liba nna nguë ska danchi,
se nna nguë ineñ sai ske ja kula”.
Djisu subili ba ösë