Djisu sa deenchi Pilatu
15
Ta i shi moso ku pamasedu bla,
se nna jasa jasa padjil ku nna jasa jasa pövu ku nna meeth dalë ku nna nguë Zhunta shi Ngandji tudu.
Se ineñ ma Djisu maladu,
se ineñ ma ëli ba da Pilatu.
2 Se Pilatu pongota ëli:
—¿Bo se sa Alë nna judio?
Se ëli kundji:
—Bo se fala.
Crucifixión y resurrección de Jesús (Marcos 15.1–16.7)
—¿Bo na ske kundji zhugan jafa?
Ja pia sapa jö ineñ shi ineñ ska mucha da bo ia.
5 Mandji se Djisu na kundji ëlif,
se amea sai se Pilatu mdja ku böjö betu.
A kondena Djisu pa ëli mölë
6 Dantu djia fesa se a ja sota uan djilima da ineñ,
ja sa nguë shi ineñ ja pindji iai.
7 Se bi të uan masebu ku a ja sama Barabas,
ku bi sa djili,
ku nna jamada dëli,
dajantu ku ineñ bi lanta uan pedji ngandji ku ineñ bi chila nguë vida folo dantu pedji sai.
8 Se ta möi pöjödölö bi,
se ineñ jomesa ja pindji ëli pa ëli tan fë amea jö shi ëli bi ja fë da ineñ olatuvëdji iai.
9 Se Pilatu kundji ineñ:
—¿Namsëdji ngongo pa amu sota Alë nna judio?
10 Pakë bi ska da ëli ötëndë fa nna jasa jasa padjil ma Djisu bi da ëli dajantu ku ineñ bi sa ku pashian dëli.
11 Mandji se nna jasa jasa padjil bi ska lanta pövu valadji pa sota Barabas da ineñ gavu mashi.
12 Se Pilatu kundji ineñ,
se tan vlame faa ineñ:
—¿A kë ja namsëdji ngongo pa amu fë ku nguë se namsëdji ja sama Alë nna judio iai?
13 Se ineñ tan ta kidëlë:
—¡Da ëli pë kusu!
14 Se Pilatu pongota ineñ:
—¿Pakë?
¿Kë ja fëiu shi ku ëli fë?
Mandji se ineñ tan ja ta kidëlë mashi:
—¡Da ëli pë kusu!
15 Tadashi se Pilatu,
ku ëli bi ngongo sa gavu ku pövu,
se ëli sota Barabas da ineñ;
mandji se ëli manda pa da Djisu ku valasöchi,
se ëli da ineñ ëli valadji pa ineñ da ëli pë kusu.
16 Tadashi se nna sodadji ma ëli ba dantu jamian ta öluia dantu jadji dalë (ku a ja sama pretorio) se a zhunta nna sodadji tudu.
17 Se ineñ bishi ëli uan taba bobolonda böbö kulu,
se ineñ ten fë uan jölöiö pian pian se ineñ pë liba jasa dëli.
18 Tadashi se ineñ jomesa ja da ëli manten ja ta kidëlë:
—¡Ilö,
Alë nna judio!
19 Se ineñ sa fa ja da ëli ku öpa anjana jasa,
ja ta aböjö pë ëli,
se ineñ ja dajözhöiö deenchi dëli ja ska da ëli ondolo.
20 Ta ineñ li ëli jaba,
se ineñ chila ëli bobolonda böbö kulu sai,
se ineñ tan bishi ëli bitidu dëli,
se ineñ ma ëli bai,
valadji pa ba da ëli pë kusu.
A da Djisu pë kusu
21 *Se uan masebu ku sa nguë loso loso Sirene ku a ja sama ëli Shiman,
ku se sa pai Alejandro ku Rufo,
ku bi ska së fo matu dëli.
Se ta ëli ska pasa ala se a fë ëli afoshi pa ëli gaga kusu.
22 Se a ma Djisu ba uan jamian ku a ja sama Golgota,
(ku a ja faa:
«Jamian Oso Jasa»).
23 Se ineñ da ëli pa ëli bëbë vian zhuntadu ku mirra,
mandji se ëli na bëbëf.
24 Se ta ineñ da ëli pë kusu,
se ineñ pachi bitidu dëli,
ja jua suleta liba dëli valadji pa ineñ bë jö shi ske të unian unian nguë.
25 Ta a da ëli pë kusu bi sa la novu pamasedu.
26 Se ineñ da uan ja pë liba van kusu dëli ku sa skividu ku ja da lazhan jö shi fë ku kondena ëli:
«Alë nna judio».
27 Ku ëli ten bi sa dadu pë kusu nna futadölö dösu,
uan nguë benda dëtu se nguë shiki benda skedji.
28 Se amea sai se kumpli Fa Nashiolo jamian shi sa skividu:
Se a jonta ëli dantu nna nguë fëfëiu.*+
29 *Se nna nguë ineñ shi bi ska pasa ala ja sugudji jasa ja faa fala zhogoveadu tëjantu ku ëli:
—¡Ua!
Bo,
ku ja të jadji Nashiolo të lolo ku tan ja vlame fë dantu tëishi djia,
30 ¡sava tuludöguë bo me ku pa bo dësë fo van kusu!
31 Se ten sa amea shime ku nna jasa jasa padjil ten bi ska li ëli ku nna meeth dalë.
Ja faa:
«Ëli sava utu nguë mandji se ëli na paadji sava tuludöguë dëlif.
32 ¡Pa Kilitu sai,
Alë Israel,
ten dësë öseshi fo van kusu,
valadji pa no bë pa no këlë!».
Se ba toja nna nguë ineñ shi ku bi sa dadu pë kusu ku ëli iai ten bi ska suta ëli.
Djisu mölë
33 Se fo solomedjian ba toja tetadji se liba tela tudu vla kulu kulu.
34 Amea la tëishi tadji,
se Djisu ta kidëlë ku falagochi atu:
«Eloi,
Eloi,
¿lama sabaktani?,
(ku sa ku sinchidu:
“Nashian amu,
Nashian amu,
¿jama fë bo lega amu moso pë?”)».
35 Ta ineñ tëndë ëli,
se zhugan nna nguë ineñ bi sa peetu ala,
bi faa:
—Ja pia,
ëli ska sama pantafala Elias.
36 Tadashi se uan nguë jölë,
se ma uan sapu ku viniligui,
se ëli mala pë uan öpa anjana se ëli da ëli valadji pa ëli bëbë,
ja faa:
—Namsëdji lega ëli pë,
pa no bë i shi Elias ske bi dësë ëli.
37 Tadashi se Djisu ta uan fala kidëlë,
se ëli lanja alma.
38 Se panu dantu jadji Nashiolo baga fë dösu fo liba bi basu.
39 Se feshali nna sodadji roma,
ku bi sa deenchi Djisu,
ta ëli tëndë kidëlë ku ëli lanja alma,
se ëli faa:
—¡Anta vedadji masebu sai se bi sa Mina Nashiolo!
40 *A shime ala ten bi sa ku zhugan nna naamain ku bi ska pia fo löndji;
dantu ineñ bi sa ku Malia Magdalena,
Malia main Sanchagu shi kichi ku dji Sandzhe,
ku Salome.
41 Nna naamain ineñ se bi ja lë ëli se ineñ bi ska shivi ëli;
djia shi ku ëli bi sa Galilea iai.
A shime ala ten bi sa ku sa uan sapa ineñ ku bi subili ku ëli ba Jerusalen.
A da Djisu spitula
42 Ta nöchi kubili,
ku se ten bi sa djia shi a ja fë vadu basupa djia djiskansa.
43 Se Sandzhe,
ku sa nguë arimatea ku ten bi sa uan nguë pachi dondolo dantu Zhunta shi Ngandji,
ku a shime ten bi ska gada djia shi gövöndölö Nashiolo ske bi,
se ëli lantela amea tividu se ëli ba bë Pilatu,
se ëli pindji ëli mochi Djisu.
44 Se Pilatu gua ku böjö betu ta ëli tëndë lazhan fa ëli mölë bebezha,
se ëli manda pa sama feshali nna sodadji roma bi,
se ëli pongota ëli i shi ëli sa mölidu bebezha.
45 Se ta feshali da ëli lazhan jaba,
se ëli da Sandzhe mochi dëli.
46 Tadashi se Sandzhe kumpa uan sabana,
se a da ëli bi basu,
se ëli boshia ëli ku sabana,
se a pë ëli dantu uan spitula ku bi sa jobodu pë uan lapa;
se ëli tapa böjö poto ku uan taba budu.
47 Se Malia Magdalena ku Malia main Sandzhe,
ineñ bi ska pia jamian shi ku a ska pë ëli.