Uan mooso buka adjimiolo pë liba jasa Djisu
14
Dantu dösu djia se bi ske sa Paskua,
fesa Ampan shin levadura;
se nna jasa jasa padjil ku nna meeth dalë bi ska jua amea shi pa ineñ të ëli ja da fanchila ku pa ineñ ten chila ëli vida folo.
2 Se ineñ bi ska faa:
—Pa na sa dantu djia fesaf,
valadji pa pövu na fë kesaf.
3 *Djisu bi ba loso Betania,
jadji Shiman,
nguë shi ku a ja sama ëli nguë bi sa ku lepla.
Se ta ineñ bi ska tusan liba mezha,
se bi uan mooso ku uan mina galafa alabastro ku bi sa ku uan adjimiolo nardo shishizhu ku ja kuta monchi.
Se ëli të galafa se të kabela,
se ëli buka adjimiolo sai pë liba jasa dëli.
4 Se bi mëtë zhugan ineñ pashian dantu dëneñ,
se ineñ faa:
—¿Jama fë a ska zhuga adjimiolo se patanta?
5 Pakë a bi paadji vëndë adjimiolo se da pagu djiëlu uan anu tabaia,*+
valadji pa zhuda nna puvilif.
Se ineñ bi ska lo mooso se mali.
6 Mandji se Djisu faa ineñ:
—Namsëdji lega ëli;
¿ja fë namsëdji ska fonta ëli?
Ëli fë uan fidu ja fumözhö ku amu.
7 Pakë olatuvëdji shi namsëdji ske ja të nna puvili dantu namsëdji,
se namsëdji ske ja fë ineñ ja gavu öshi namsëdji ja paadji,
mandji se namsëdji na ske sa ku amu olatuvëdjif.
8 Pakë ta ëli bi bolo öguë amu,
ëli ja fë amu vadu da spitula.
9 Anta vedadji se amu faa namsëdji fa ja sa jamian shi mundu se ku a ske ja pegua evanjelio,
a ske ja da lazhan jö shi ëli fë,
dajantu pa ja lambela ëli.
Judas vëndë Djisu
10 Se Judas Iskariote,
ku se sa uan nna deshi ku dösu,
se ëli bai pa ëli ba bë nna jasa jasa padjil valadji pa ëli ba vëndë Djisu.
11 Se ta ineñ ba tëndë ëli,
se fë gavu da ineñ,
se ineñ plomëtë pa ineñ da ëli djiëlu.
Se fo öshi se Judas bi ska jua fölöshö jamian shi pa ëli ba vëndë ëli.
Bankëtë Shiölö
12 Pimëlu djia fesa Ampan shin levadura,
ku a ten ja fë saklifisu jabala Paskua,
se nna balë dëli pongota ëli:
«¿Kë jamian bo ngongo pa no ba fë vadu valadji pa no kumu Paskua?».
La última cena (Marcos 14.12-26)
13 Tadashi se ëli manda nna balë dëli dösu,
se ëli faa ineñ:
«Namsëdji ba palea,
se namsëdji ske dajonta ku uan masebu ku ska gaga uan polon daua ngandji,
se namsëdji ja lë ëli,
14 se jamian shi ku ëli ja lantela,
se namsëdji ja faa shiölö jadji:
“Meeth ska pongota:
‘¿Kë jamian jochian shi amu ske paadji kumu Paskua ku nna balë amu sa?’”.
15 Se ëli ske msa namsëdji uan jochian ngandji van liba jadji,
ku sa vadu pë bebezha.
Namsëdji ja va ala pë da no».
16 Se nna balë ten së ba öluia se ineñ lantela dantu palea,
se ineñ ten dajonta ku amea shi Djisu bi faa ineñ tudu.
Se ineñ ten fë vadu kumu Paskua.
17 Ta nöchi kubili,
se Djisu ku nna deshi ku dösu ba da ala.
18 Se ta ineñ sa liba mezha,
ja kumu,
se Djisu faa:
—Anta vedadji se amu faa namsëdji,
fa uan namsëdji ku ëli ska kumu ku amu,
ëli ske vëndë amu.
19 Se ineñ vla modoia,
ja pongota ineñ ineñ me:
—¿Jativie ske sa amu?
20 Se Djisu kundji ineñ:
—Ëli sa dantu uan nna deshi ku dösu ineñ sai,
nguë se ska mala ampan dëli ku amu dantu uan patu.
21 Anta vedadji se Mina Napai Dösë ske bai,
amea shi sa skividu tëjantu ku ëli.
¡Mandji puvili da nguë shi ske vëndë ëli!
Bi ske sa gavu da masebu sai mashi pa a na bi pali ëlif.
22 Se öshi ontolo ineñ bi ska kumu,
se Djisu ma ampan se ëli da dezhupaga.
Zha se ëli pachi se ëli da ineñ,
ja faa ineñ:
—Namsëdji ma,
jö sai se sa öguë amu.
23 Zha se ëli ma uan pukulu,
se ta ëli da dezhupaga,
se ëli da ineñ;
se ineñ tudu bëbë.
24 Se ëli faa ineñ:
—Se jö sai se sa sangui amu da bechi shi novu,
ku se a jölë da uan sapa dji nguë.
25 Anta vedadji se amu faa namsëdji amu na tan ske bëbë fuluta pali döpa uvaf,
ba toja djia shi amu tan ske vlame bëbë dantu gövöndölö Nashiolo.
Djisu ska da lazhan fa Pudul ske naga ëli
—Namsëdji tudu ske chama jonfa amu.
Amea shi sa skividu:
“Amu ske da ludjadölö jabala ku kuzhu,
se nna jabala ske panta panta”.
28 *Mandji se ta amu tan ja lanta bi vida,
se amu tan ske bai deenchi namsëdji ba Galilea.
29 Se Pudul faa ëli:
—Benga pa nguë tudu lega bo pë,
amu na ske lega bof.
30 Se Djisu kundji ëli:
—Anta vedadji se amu sugula bo fa nöchi se me,
anta pa galu ngañia janta ope shi ja fë dösu,
se bo ske naga amu ope tëishi.
31 Mandji se ëli ku foshi mashi tan vlame faa ëli:
—Benga pa amu ske mölë ku bo,
amu na ske naga bof.
Se a shime ineñ tudu bi ska faa jö shime.
Djisu sa Jetsemani ja lezha
32 Zha se ineñ ba uan jamian ku a ja sama Jetsemani.
Se Djisu faa nna balë dëli:
—Namsëdji tusan iai,
öshi ku amu ska lezha.
Jesús es arrestado e interrogado (Marcos 14.32-72)
33 Se ëli ma Pudul,
ku Sanchagu ku Zhuan,
se ëli jomesa ja sinchi modoia ku mendu.
34 Se ëli faa ineñ:
—Amu ska sinchi alma amu ku uan modoia ngandji ba toja mölë.
Namsëdji mdja iai pa namsëdji sa vatu.
35 Se ëli bai uan fi kuzhu deenchi mashi,
se ëli tovesa pë san,
se ëli jomesa ja lezha fa,
shi ja paadji sa,
pa ëli na pasa ola salaf.
36 Se ëli bi ska faa:
«Abba,
Pai,
ja tudu bo paadji fë.
Bo na ja lega amu bëbë pukulu ja manga sef;
mandji pa na sa dishia amuf,
shina jö shi bo ja dishia».
37 Zha se ëli tan vlame ba jamian shi nna balë dëli bi sa se ëli dajonta ku ineñ tudu ska djuni.
Se ëli faa Pudul:
«Shiman,
¿bo ska djuni ia?
¿Bo na paadji sa öiö betu ñi uan ponodu olafa?
38 Namsëdji sa vatu ku pa lezha,
valadji pa namsëdji na pono da tentasanf.
Pakë anta vedadji spitu ja sa plesteñi mandji se jañi döguë ja sa levu».
39 Se ëli tan vlame bai,
se ëli lezha ja faa jö ineñ shime.
40 Se ta ëli tan vlame bi,
se ëli dajonta ku nna balë dëli tan ska djuni me,
pakë öiö dëneñ bi sa shia ku djuni.
Se ëli na bi sëbë jö shi pa ëli faa ineñf.
41 Ta ëli tan vlame bi i shi fë tëishi,
se ëli faa ineñ:
«¿Ontolo namsëdji ska djuni ja djiskansa?
Da dagoli zha,
tempu da zha.
Ja pia,
a la ja vëndë Mina Napai Dösë da nna pekadölö.
42 ¡Namsëdji lanta!
¡No bai!
Ja pia,
¡nguë shi ske vëndë amu la ja bi!».
A bi të Djisu
43 Ontolo Djisu bi ska faa fala,
ja pia,
se bi Judas,
uan ineñ dantu nna deshi ku dösu.
Se bi ska bai ku ëli uan sapa möi pöjödölö ku jatana ku öpa,
ku nna jasa jasa padjil,
ku nna meeth dalë ku nna jasa jasa pövu se manda ineñ bai.
44 Se nguë shi bi ske vëndë ëli iai,
bi da ineñ uan shinali,
ja faa ineñ:
«Nguë shi amu ja da uan beso,
nguë sai se sa nguë shi,
se a ja të ëli se namsëdji ja ëli bai suguladu gavu».
45 Se i shi moso ku ëli bi,
se ëli iaba lome Djisu,
se ëli faa ëli:
«¡Rabi!»,
se ëli da ëli uan beso.
46 Tadashi se ineñ ta öma ba ëli,
se ineñ të ëli.
47 Mandji se uan nna nguë ineñ shi bi sa ala chila uan jatana se pota uan nna shividölö jasa jasa padjil uan olea.
48 Se Djisu faa ineñ:
«¿Sa fa amu sa uan futadölö,
valadji pa namsëdji bi të amu ku jatana ku budan?
49 *Djia tudu amu bi sa dantu namsëdji ja shina nguë kuzhu dantu jadji Nashiolo,
se zhugan djia se namsëdji na të amuf.
Mandji se jö ineñ se tudu ska shiga valadji pa Fa Nashian kumpli».
50 Tadashi se nna balë tudu lega ëli moso pë,
se ineñ jölë.
51 Mandji se uan nna mashivin ku bi ska lë ëli,
kubidu öguë dëli ku panu.
Se a ten të ëli,
52 mandji se ëli lega panu se ëli jölë gödödji.
Djisu sa deenchi Zhunta shi Ngandji
53 Se a ma Djisu ba deenchi jasa jasa padjil,
zha se a zhunta nna jasa padjil ku nna jasa jasa pövu ku nna meeth dalë.
54 Se Pudul bi ska lë ëli fo löndji löndji ba toja dantu mete balandia jadji jasa jasa padjil,
se ëli mdja ala tusan pë ku nna guada jadji Nashiolo,
ja kenta fögö lome dëneñ.
55 Se nna jasa jasa padjil ku nna nguë Zhunta shi Ngandji bi ska jua uan lazhan fanchila tëjantu ku Djisu,
valadji pa ineñ paadji kondena ëli pa chila ëli vida folo,
mandji se ineñ na bi ska bëf.
56 Pakë benga pa uan sapa dji nguë bi ska da lazhan fanchila tëjantu ku ëli,
mandji se lazhan dëneñ na bi ska faa jö shimef.
57 Tadashi se lanta mdjadu zhugan ineñ ja da lazhan fanchila tëjantu ku ëli ja faa:
58 *—No tëndë ëli faa:
Amu ske të jadji Nashiolo sai a fë ku öma iai të lolo,
se dantu tëishi djia pa amu tan fë uan ku a na ja fë ku ömaf.
59 Mandji se benga zha pa sa shi ineñ na bi ska faa jö shimef.
60 Se ta jasa jasa padjil lanta mdjadu metadji nguë tudu,
se ëli pongota Djisu:
—¿Bo na ja kundji zhugan jafa?
¿Kë jö ineñ se a ska faa ku tëjantu ku bo iai?
61 Mandji se ëli bi jaböjö se ëli na faa zhugan jaf.
Se jasa jasa padjil tan vlame tan pongota ëli,
se faa ëli:
—¿Bo se sa Kilitu,
Mina Nguë shi sa ku besa?
62 Se Djisu faa ëli:
—Amu se sa.
Se namsëdji ske bë Mina Napai Dösë ska tusan benda dëtu nguë shi sa Pödë Tudu,
ja ska bi fo liba növu növu dösë.
63 Tadashi se jasa jasa padjil të jaminzha dëli të baga baga,
se ëli faa:
—¿Kë ja tan fë fata pa no tan jua uan nguë mashi pa tan bi faa uan kuzhu?
64 Namsëdji tudu tëndë gavu amea shi ëli faa fala zhogoveadu tëjantu ku Nashiolo.
¿Kë ja namsëdji bë?
Se ineñ tudu ku uan fala soso ja faa ëli sa ku kupa se ëli mësë pa ëli mölë.
65 Se zhugan nguë jomesa ja ta aböjö pë ëli,
ja tapa ëli öiö ja da ëli ku doki.
Ja li ëli:
«¡Pantafala ua!».
Se nna guada ten bi ska da ëli ku butada.
Pudul naga Djisu
66 Se öshi Pudul bi sa basu,
mete balandia jadji,
se uan namina miela shividölö jasa jasa padjil iabi ala;
67 se ta ba ku öiö ba bë Pudul ku ten bi sa ala ja kenta lome fögö,
se ëli pia ëli gavu,
se faa ëli:
—Bo ten bi ska be ku Djisu,
nguë shi sa nguë nasaret iai.
68 Se Pudul naga ëli,
ja faa ëli:
—Amu na jönsë ëlif,
ñi amu na sëbë jö shi bo ska faaf.
Se ëli ma ja se ëli ba öluia,
se ëli mdja böjö poto.
Se sa öshi galu ngañia janta.
69 Se ta namina miela shividölö se tan vlame bë ëli,
se ëli jomesa ja faa nna nguë ineñ shi tudu bi sa ala iai:
—Nguë sai sa uan nguë dëneñ.
70 Mandji se ëli tan vlame naga.
Uan fi ja deenchi mashi,
se nna nguë ineñ shi bi sa ala iai tan vlame faa Pudul:
—Anta vedadji bo sa uan nguë dëneñ,
pakë bo ten sa nguë galilea.
71 Tadashi se Pudul sa fa ja ta masan,
ku ja jula:
—¡Amu na jönsë masebu se namsëdji ska faa ief!
72 Se öshi öshime se galu ngañia janta ope shi fë dösu.
Tadashi se Pudul lambela fa Djisu bi bi faa ëli:
“Anta ja fë pa galu ngañia janta ope dösu,
bo ske naga amu ope tëishi”.
Se ëli mazhna jö sai se ëli jomesa ja sula.