Djisu ska da lazhan amea shi a ske të jadji Nashian të lolo
13
Ta Djisu së fo dantu jadji Nashian,
se uan nna balë dëli faa ëli:
—Meetha,
¡bo ska bë budu budu ineñ se ku jadji ngandji ineñ sai!
2 Se Djisu kundji ëli:
—¿Bo ska bë taba taba jadji ineñ sai?
Na tan ske mdja budu pë liba buduf,
ku a na ske të lolof.
Shinali anta pa da jabamentu
3 Tadji mashi,
se Djisu bi tusan iki Olivos,
ku sa deenchi jadji Nashiolo.
Se Pudul,
ku Sanchagu,
Zhuan ku Andëlë se ineñ pongota ëli apachi:
4 —Da no lazhan,
¿kë djia jö ineñ se ske shiga?
¿Se kë shinali tudu ske sa fa ja tudu sa puluntu pa kumpli?
5 Se Djisu kundji ineñ:
—Namsëdji ja pinchidu pa zhugan nguë na ja ngaña namsëdjif.
6 Pakë ske bi uan sapa nguë ku namu amu,
ja faa:
“Amu se sa Kilitu”.
Se ineñ ske ngaña uan sapa dji nguë.
7 Se ta namsëdji ja tëndë ja tëjantu ku guela guela,
ku monova ku ja të ku guela guela iai,
namsëdji na ja kabela kusanf.
Pakë ske fë fata pa jö ineñ se tudu shiga,
mandji ontolo na ske sa da jabamentuf.
8 Pakë se ske ja lanta tela ku utu tela,
se gövöndölö ske ja lanta ku utu gövöndölö;
se san ske ja vlamëtë jamian tudu;
se ske të fomu.
Se jö ineñ tudu,
se ske jomesadu duadu.
9 *»Namsëdji ja ska pinchidu öguë namsëdji,
pakë ineñ ske ma namsëdji ba deenchi zhunta nna jasa jasa pövu se a ske da namsëdji ku valasöchi dantu jadji Nashian nna judio.
Se deenchi nna gövöndölö ku nna alë se a ske ma namsëdji bai dajantu amu,
pa amea sai se namsëdji ske paadji da lazhan gavu amu deenchi dëneñ.
10 Mandji pimëlu ske fë fata pa pegua evanjelio da tela tela tudu.
11 Mandji se ta a ja të namsëdji,
namsëdji na ja sa tave da jö ineñ shi namsëdji ske faaf,
shina jö shi a ja da pa namsëdji faa ola shime,
se namsëdji ja fala.
Pakë na sa namsëdji se ska faa falaf,
shina Spitu Santu.
12 »Uan namain ske ja ma namain dëli ba da mölë,
se pai ske ja da mina dëli.
Se nna mina ske vla subebu ku pai dëneñ se ineñ ske ja chila ineñ vida folo.
13 *Se mundu nguintëlu nguintëlu se ske ja të pashian namsëdji dajantu namu amu,
mandji se nguë shi ske mdja dëtu ba toja jabamentu,
se ske sava.
14 »Mandji se ta namsëdji ja bë “ja nozho nozhodu fëfëiu” dantu jamian shi na ta pa ja saf (nguë shi ja lëë,
pa ëli tëndë),
tadashi se nna nguë ineñ shi ja ta Judea,
pa ineñ ja jölë ba jöndë pë van iki.
15 *Nguë shi ja sa van dötë jadji,
pa ëli na ja dësëf,
ñi pa ëli na ja lantela ba ma zhugan ja fo jadji dëlif.
16 Se nguë shi ja sa dantu matu,
pa ëli na tan ja bi ku tashi pa ëli bi ma bobolonda dëlif.
17 ¡Puvili nna naamain ineñ shi ske sa pañia ö ku ska da nna mina mama djia ineñ sa ala!
18 Namsëdji ja ska lezha,
pa na shiga tendauaf,
19 *pakë ske sa tempu mavida ku na sa të ie zhaf fo jomesadu djia shi Nashian mindji mundu bi toja öseshi,
ñi na tan ske vlame tëf.
20 Se shi Shiölö na ja kuta tempu sef,
zhugan nguë na bi ske savaf;
mandji se dajantu nna nguë ineñ shi ku ëli se ma,
se ëli kuta tempu sai.
21 »Tadashi shi uan nguë ja faa namsëdji:
“Namsëdji pia,
Kilitu sa iai” ö,
“Pia,
ëli sa ala”,
na ja këlë ineñf.
22 Pakë ske lanta zhugan kilitu fanchila ku pantafala fanchila,
se ineñ ske fë shinali ku ja ngangandji,
valadji pa ineñ ja fë nguë danadu,
shi ja paadji fë,
ba toja nna nguë ineñ shi ku ëli se ma.
23 Namsëdji ja ska pinchidu;
amu bi faa namsëdji bebezha.
24 *»Mandji se dantu tempu sai,
ta ku ske shiga mavida ngandji sai bebezha,
“se solo ske vla kulu,
se önuian ske chama dëdë,
25 *se ntëla ntëla ske pono fo ösë,
se pödë pödë ineñ shi dösë tudu ske ja sugudji”.
26 »*Tadashi se namsëdji ske bë Mina Napai Dösë ja bi fo liba növu ku pödë ngandji ku gloria.
27 Se ëli ske da nna anzhu dëli bi,
se ineñ ske zhunta nna nguë ineñ shi ku ëli se ma,
fo ponto oventu jatulu jatulu,
fo uan ponto tela ba toja uan ponto dösë.
28 »Namsëdji shina ja fo öpa abada.
Ta namsëdji ja bë manga dëli ska vla mongo mongo,
se ska labenta fadöpa;
se namsëdji ja sëbë fa goleme ske da jalima.
29 Se ten sa amea shime ku ta namsëdji ja bë jö ineñ sai,
namsëdji ja sëbë fa tempu sai sa peetu,
sa lome böjö poto.
30 Anta vedadji se amu faa namsëdji,
zhenchi sai na ske pasaf anta pa jö ineñ sai tudu shiga.
31 Se ösë ku tela tudu ske pasa,
mandji se fala amu jabötu na ske pasaf.
32 *»Mandji se tëjantu ku djia sai ku tempu shi ske sa,
zhugan nguë na sëbëf,
ñi nna anzhu dösë,
ñi tuludöguë Mina,
shina Pai moso se sëbë.
33 Namsëdji ja ska pinchidu ku pa namsëdji ja sa vatu,
ja lezha,*+
pakë namsëdji na sëbë djia shi tempu se ske daf.
34 *»Ta pa namsëdji sa shimafan soia uan masebu ku ta bi ska vadji tela löndji,
se ëli lega jadji dëli se ëli da nna shividölö pödë.
Se ëli da nguë tudu sulvisu dëneñ,
se ëli manda ludjadölö poto pa ludjila ineñ.
35 Ta pa namsëdji sa vatu,
pakë namsëdji na sëbë tempu shi shiölö jadji ska bif;
shi ëli ske bi nöchi kubidu,
mete nöchi;
öshi galu ngañia ja janta ö pamasedu bladuf,
36 pa na sa fa ëli tan bi öshi öshi se ëli ja dajonta ku namsëdji ja djunif.
37 Jö se amu ska faa namsëdji iai,
se amu ja faa nguë tudu:
¡Namsëdji ja sa öiö betu!