Palavulu nna tabaiadölö fëfëiu
12
Tadashi se Djisu jomesa ja faa ku ineñ amea palavulu:
«Uan masebu se shimian uan matu uva.
Se ëli fë uan ögö pë,
se ëli jobo uan jamian valadji pa ëli ja fë vian se ëli ten fë uan mina jadji van pa ja ludjila ja tudu.
Zha se ëli da zhugan nna tabaiadölö matu dëli zha,
se ëli ba vadji.
2 Se ta da tempu totolo uva,
se ëli manda uan shividölö dëli pa ba pindji nna tabaiadölö matu uva pachi fuluta shi sa dji dëli.
3 Mandji se nna tabaiadölö matu fala shividölö sai se ineñ da ëli pajada,
zha se ineñ tan manda ëli be ku tashi ku öma dödji.
4 Tadashi se shiölö matu tan manda utu shividölö bai,
mandji se nguë sai se ineñ da ku budu jasa se ineñ suta ëli.
5 Se ëli tan manda uan utu shividölö bai,
se nguë sai se a chila ëli vida folo.
Zha se ëli tan manda utu shividölö mashi bai;
se utu ineñ a da pajada,
se utu se ineñ chila ineñ vida folo.
6 Ontolo ëli bi sa ku unian:
tuludöguë mina dëli,
mina ngongo dëli.
Se jabamentu se ëli ten da ëli bai,
ja faa:
“Mina amu se ineñ ske da ëli ondolo”.
7 »Mandji se nna tabaiadölö matu faa ku ineñ ineñ me:
“Nguë sai se ske mdja ku gagavu tudu,
namsëdji bi,
pa no chila ëli vida folo,
se gagavu tudu ske sa ja no”.
8 Se amea sai se ineñ fala ëli,
se ineñ chila ëli vida folo,
zha se ineñ zhuga öguë dëli fo dantu matu uva.
9 »¿Kë ja shiölö matu se ske fë?
Ëli tan ske vlame bi,
se ëli ske chila nna tabaiadölö ineñ sai vida folo,
se ëli ske da matu uva sai utu dji nguë.
10 ¿Namsëdji na bi lëë dantu Fa Nashianf:
“Budu shi nna nguë fë jadji zhuga ta iai,
se ba vla fë jasa budu.
11 Jö sai se sa tabaia Shiölö,
se na ja lega no ku böjö betu ua”?».
12 Se ba da ineñ ötëndë fa palavulu sai sa ja tëjantu ku ineñ.
Se ineñ bi ska jua amea shi pa ineñ të ëli.
Mandji se ineñ bi ska mendu möi pöjödölö;
se ineñ lega ëli pë se ineñ bai.
Pagu tesu da Sesar
13 Se ineñ manda zhugan nna fariseo ku pachidu nna nguë alë Erodes ba da Djisu,
valadji pa ineñ fë ëli pono da lasu ku fala dëli me.
14 Se ta ineñ ba da ala se ineñ faa ëli:
—Meetha,
no sëbë fa bo sa uan masebu ku ja da vedadji.
Se bo na ja sa tave zhugan nguëf pakë bo na ja pia benda döluiaf,
shina ku vedadji se bo ja shina nguë ja vedadji jamangandji Nashiolo.
¿Sa legadu pa no da pagu tesu Sesar ö na?
15 Mandji se Djisu,
ku se jönsë sochi dëneñ,
se faa ineñ:
—¿Jama fë namsëdji ska pë amu lasu?
Ma uan djiëlu roma bi da amu,
valadji pa amu bë.
16 Se ineñ ma ba da ëli,
se Djisu faa ineñ:
—¿Kë nguë të fesan ku namu shi sa skividu?
Se ineñ kundji ëli:
—Dji Sesar.
17 Se Djisu faa ineñ:
—Namsëdji da Sesar jö shi sa ja Sesar,
pa namsëdji da Nashian jö shi sa ja Nashiolo.
Se ineñ tudu gua ku böjö betu da ëli.
Tavadji tëjantu ku tan lanta fo mölë
18 *Tadashi se bi toja Djisu nna saduseo,
ku ja ska faa nna nguë mölë bebezha na tan ske lanta bi vidaf,
se ineñ pongota ëli:
19 —Meetha,
Moises skëvë da no ja faa shi namain uan nguë ja mölë se ëli ja lega miela dëli mandji se ëli na ja lega ëli ku nna minaf,
pa namain dëli jazha ku mainviva,
pa ëli lanta minadjimina da namain dëli.
20 Bi të,
nna namain seta,
se nguë shi pimëlu jazha ku miela dëli,
se ëli mölë shinke ëli pali mina.
21 Tadashi se nguë shi fë dösu jazha ku mainviva sai,
mandji se ëli ten mölë shin pali mina.
Se jö shime se ten shiga ku nguë shi fë tëishi.
22 Se jö shime se ten shiga ineñ seta seta ineñ se tudu,
se zhugan ineñ na pali minaf.
Se jabamentu se mooso se ten mölë.
23 Se ta ineñ ta ske lanta fo mölë,
¿kë nguë ske sa medu miela sai,
öshi ineñ seta seta tudu bi sa jazhadu ku miela sai?
24 Se Djisu kundji ineñ:
—¿Namsëdji tudu sa buiadu da jö sefa,
pakë namsëdji na jönsë Fa Nashianfa ñi pödë Nashian ua?
25 Ta nna nguë mölë bebezha tan ske lanta bi vida,
ineñ na tan ske ja jazhafa ñi a na tan ske da ineñ jazhamentuf,
shina ineñ ske sa shimafan nna anzhu ku sa ösë.
26 »Mandji se tëjantu ku nna nguë mölidu ineñ shi ku tan ske lanta bi vida,
¿namsëdji na lëë lavulu Moises ua,
dantu uan jamian tëjantu ku alba sarsa,
amea shi ku Nashiolo faa ëli:
“Amu se sa Nashian Abraam,
Nashian Isaak ku Nashian Jakob”?
27 Nashiolo na sa Nashian nna nguë möliduf,
shina dji nna nguë sa vivu.
Namsëdji tudu sa buiadu.
Mandamentu shi ngandji mashi
28 Se uan nguë dantu nna meeth dalë iaba ope dëneñ se tëndë amea shi ineñ bi ska pufia.
Se ta ëli bë amea shi Djisu bi ska kundji ineñ gavu,
se ëli pongota ëli:
—Fo mandamentu tudu,
¿kë i shi se ngandji mashi?
29 Se Djisu kundji ëli:
—Mandamentu shi pimëlu tudu sa:
“Tëndë,
Israel:
Shiölö Nashian no,
se sa ponodu shi sa Shiölö.
30 Se bo ske ngongo ku Shiölö shi sa Nashian bo ku kusan bo tudu,
ku alma bo,
ku miolo bo ku foshi bo tudu”.
31 Se i shi fë dösu sa:
“Ngongo ku pusumu bo shimafan amea shi bo ngongo ku tuludöguë bo”.
Na tan të utu mandamentu ngandji mashi ku ineñ sef.
32 Se meeth dalë faa ëli:
—Bo faa gavu,
Meeth,
jö se bo faa iai sa vedadji,
të uan ponodu Nashian soso,
se na tan të zhugan mashi ku ëlif.
33 Se ngongo ku ëli ku kusan tudu,
ku tëndëmentu tudu ku foshi tudu,
ku pa bo ten ngongo ku pusumu shimafan tuludöguë dëli me.
Se sa jö shi ngandji mashi ku ja kama kamadu ku saklifisu tudu.
34 *Se ta Djisu ba bë fa ëli kundji ëli ku tëndëmentu,
se ëli faa ëli:
—Bo na sa löndji ku gövöndölö Nashianf.
Se zhugan nguë na tan tividu pongota ëli zhugan ja mashif.
¿Kë nguë Kilitu sa mina dëli?
35 Se öshi Djisu bi sa dantu jadji Nashiolo ja shina nguë kuzhu,
se ëli faa ineñ:
«¿Jama fë nna meeth dalë ja ska faa Kilitu sa mina David?
36 Sa fa tuludöguë David amea Spitu Santu,
se ëli faa:
“Shiölö se faa Shiölö amu:
‘Tusan benda dëtu amu,
ba toja pa amu pë nna namigu bo
basu dope bo’”.
37 »Se tuludöguë David ja sama ëli “Shiölö”,
¿tadashi kë amea shi ëli paadji sa mina dëli?».
Se uan sapa möi pöjödölö se bi ska tëndë ëli ku vintadji.
38 Se dantu jö ineñ shi Djisu ja ska shina ineñ se ëli bi ska faa:
«Namsëdji ja ska pinchidu ku nna meeth dalë,
pakë ineñ ja ska ngongo ndanda ku bobolonda lanlan,
se ineñ ja ngongo pa ja da ineñ manten mete döluia,
39 pa ineñ ten ja tusan jamian dondolo dantu jadji Nashian nna judio.
Ineñ ja ngongo ku jamian dondolo dantu bankëtë.
40 Se ineñ ja futa jadji nna mainviva,
se ineñ ja ska fë lezha löngö löngö se ineñ ske ja ma kondena ineñ shi ngandji mashi».
Djiëlu shi mainviva da
41 Se Djisu bi tusan deenchi jamian shi alka shi a ja ta djiëlu pë,
se ëli bë amea shi pövu bi ska ta djiëlu pë alka dantu jadji Nashiolo.
Uan sapa nna liku bi ska ta uan sapa djiëlu pë dantu dëli.
La ofrenda de la viuda (Marcos 12.41-44)
42 Mandji se uan mainviva puvili ten bi,
se ëli ten ta ponodu djiëlu dösu pë,
ku na ja shivi monchi muntëf.
43 Tadashi se Djisu sama nna balë dëli,
se ëli faa ineñ:
«Anta vedadji se amu faa namsëdji fa,
puvili mainviva sai se ta djiëlu pë dantu alka mashi ku ineñ tudu.
44 Pakë nguë tudu da jö ineñ shi sovezha ineñ,
mandji se mainviva sai dantu puvili dëli,
se ëli ta jö ineñ shi sa ku ëli pa ëli ma bibe tudu pë».