Djisu ska lantela Jerusalen shimafan alë
11
Ta ineñ bi ska da lome Jerusalen,
se ineñ ba da loso loso Betfage ku Betania,
lome iki Olivos,
se Djisu manda nna balë dëli dösu.
2 Se ëli faa ineñ:
«Namsëdji ba loso se sa deenchi namsëdji iai,
se öshi öshi moso ku namsëdji ja lantela,
se namsëdji ske dajonta ku uan mina javalu kutu maladu ku jodo,
ku zhugan pöjödölö na sa vada liba dëli ie zhaf,
se namsëdji ja sota pa ma bi iai.
3 Se shi uan nguë ja faa namsëdji:
“¿Ja fë namsëdji ska fë jö sai?”,
se namsëdji ja faa ëli:
“Fë Shiölö fata,
se dandjian se ëli tan ske da ëli bi”».
4 Se ineñ ten bai,
se ineñ dajonta ku mina javalu kutu sai maladu ku jodo öluia,
lome böjö poto,
se ineñ ten sota ëli.
5 Tadashi se zhugan nna nguë ineñ shi bi sa ala iai pongota ineñ:
—¿Ja namsëdji ska fë ja sota mina javalu kutu sai?
6 Se ineñ ten kundji ineñ amea shi Djisu bi faa ineñ iai,
se a lega ineñ bai.
7 Se ineñ ten ma mina javalu kutu se ba da Djisu,
se ineñ pë panu dëneñ liba dëli,
se ëli ten vada liba dëli.
8 Se uan sapa nguë jomesa ja ta panu dëneñ pë jamangandji,
mandji se utu nguë bi ska pota alba matu,
se ineñ bi ska lela pë jamangandji.
9 Se nna nguë ineñ shi bi ska be deenchi dëli ku a shime nna nguë ineñ shi bi ska bi tashi dëli bi ska ta kidëlë:
—¡Osana!
¡Besa ja sa ku nguë shi ja bi a namu Shiölö!
10 ¡Besa ja sa gövöndölö pai no David ku tan ska bi!
¡Osana van liba mashi!
11 Se Djisu lantela Jerusalen,
se ëli ba jadji Nashiolo.
Se ëli pia jamian tudu se ëli bë amea shi ja tudu sa,
zha se ëli ma ja se ëli ba Betania ku nna balë dëli deshi ku dösu,
pakë nöchi bi ska ma bebezha.
Djisu ta öpa abada masan
12 Ta da amaian shi,
ta ineñ bi ska së fo Betania,
se faku da Djisu.
13 Se fo löndji se ëli bë uan ope döpa abada ku bi sa ku fadöpa,
se ëli iaba bai i shi ten ja të uan fuluta,
mandji se ëli na bë zhugan ja mashi ku fadöpaf,
pakë na ten bi sa tempu fuluta abadaf.
14 Tadashi se ëli faa öpa abada sai:
—¡Jabötu zhugan nguë na tan ske kumu fuluta bof!
Se nna balë dëli tëndë jö sai.
Djisu limpa jadji Nashiolo
15 Se ta ineñ ba da Jerusalen,
se Djisu lantela dantu jadji Nashian se ëli jomesa ja jölë nna nguë ineñ shi bi sa ala ja vëndë ku ja kumpa kuzhu fo ala.
Se ëli të mezha nna nguë ineñ shi bi ska tuka djiëlu të buka,
ku dji nna nguë ineñ shi bi ska vëndë löla iai,
16 se ëli na lega pa zhugan nguë ineñ shi ska gaga uan kuzhu pasa dantu jadji Nashianf.
17 Se ëli ten ska shina ineñ kuzhu,
ja faa:
«¿Na sa skividu:
“Jadji amu a ske ja sama ëli jadji lezha da tela tela tudu ua”?
¡Mandji se namsëdji të vla fë iöjö lapa nna futadölö!».
18 Se ta ineñ tëndë jö sai,
se nna jasa jasa padjil ku nna meeth dalë jomesa ja jua amea shi pa ineñ chila ëli vida folo,
pakë ineñ bi ska mendu ëli,
dajantu ku pövu bi ska leva amea shi ku ëli bi ska shina ineñ kuzhu.
19 Mandji se ta da tetadji,
se Djisu ku nna balë dëli së fo dantu palea.
Öpa abada shi a ta masan vla sojadu
20 Ta da pamasedu ku ineñ ska pasa lome ope döpa abada,
se ineñ toja öpa se sa sojadu fo leezha.
21 Tadashi se Pudul,
bi lambela,
se ëli faa Djisu:
—Rabi,
pia,
öpa abada shi bo ta masan iai la vla sojadu.
22 Se Djisu kundji ineñ:
—Namsëdji të jonfa ku Nashiolo.
23 *Pakë anta vedadji se amu faa namsëdji ja sa nguë shi ja faa iki sai:
“Së fo iai pa bo daua ba omali”,
pa bo na ja të butanja dantu kusan bof,
shina pa bo ja këlë fa ske fë amea shi bo fala.
24 Dajantu shi,
se amu faa namsëdji ja sa jö shi namsëdji ja pindji tudu ku lezha,
ku namsëdji ja këlë fa namsëdji ske të,
ske bi sa.
25 *Se ta namsëdji ja ska ta mdjadu ja lezha,
namsëdji ja ska pada namsëdji me,
shi namsëdji ja të uan ja tëjantu ku utu pöjödölö,
valadji pa Pai namsëdji ku sa ösë ten ja pada pekadu namsëdji.
26 Pakë shi namsëdji na ja pada nna pöjödölöf,
Pai namsëdji ku sa ösë na ten ske pada pekadu namsëdjif.*+
Pödë Djisu
27 Tadashi se ineñ tan vla Jerusalen;
se Djisu bi ska be ja nda dantu jadji Nashiolo,
se nna jasa jasa padjil,
ku nna meeth dalë ku nna jasa jasa pövu.
28 Se ineñ bi ska golo ëli:
—¿Ku pödë kë nguë bo ska fë jö ineñ sai?
¿Kë nguë da bo pödë se bo ska ma fë jö ineñ sai?
29 Se Djisu kundji ineñ:
—Amu ten ske pongota namsëdji uan kuzhu,
namsëdji ja kundji amu,
se amu ten ske da namsëdji lazhan ku kë pödë amu ten ska ma fë jö ineñ sai.
30 Bachizhamentu Zhuan,
¿bi sa ja fo ösë ö fo napai?
Namsëdji kundji amu.
31 Se ineñ ja pufia ku ineñ ineñ me;
ja faa:
«Shi no ja faa:
“Fo ösë”,
ëli ske faa:
“¿Jama fë namsëdji na këlë ëlif?”.
32 Mandji se shi no ja faa:
“Sa ja fo san tela”».
Sa fa ineñ bi ska mendu pövu,
pakë nguë tudu bi ska këlë fa Zhuan bi sa uan pantafala shishizhu.
33 Dajantu shi se ineñ kundji Djisu:
—No na sëbëf.
Tadashi se Djisu kundji ineñ:
—Dajantu shi se amu na ten ske faa namsëdji ku kë pödë amu ska fë jö ineñ sef.