Djisu ska shina nguë ja tëjantu ku kabajölöiö
10
Se Djisu së fo ala se ëli ba loso loso Judea ku benda benda sala lubela Jordan.
Se ala se möi pöjödölö tan zhunta ku ëli,
se ëli tan jomesa ja shina ineñ kuzhu amea kutumu dëli.
2 Se zhugan nna fariseo iaba lome dëli,
se valadji pa ineñ puva ëli se ineñ pongota ëli:
—¿Sa legadu pa uan medu ja baga ku miela dëli?
3 Se ëli kundji ineñ:
—¿Kë odji Moises da namsëdji?
4 *Se ineñ kundji ëli:
—Moises lega pa ja skëvë uan fejaata baga,
pa ja lega ëli pë.
5 Mandji se Djisu kundji ineñ:
—Dajantu kusan ödu shi sa ku namsëdji se ëli skëvë mandamentu sai da namsëdji.
6 Mandji fo jomesadu ku a mindji mundu,
“naamain ku napai se a mindji ineñ”.
7 “Dajantu shi se napai ske ja lega pai dëli ku main dëli pë,
se ëli ske zhunta ku miela dëli,
8 se ineñ dödösu ske sa uan ponodu öguë soso”.
Dajantu shi se ineñ na tan ja sa dösufa,
shina uan soso.
9 Pa amea sai,
jö shi Nashian ja zhunta,
pa nna pöjödölö na ja safaf.
10 Se ta ineñ ba jadji,
se nna balë dëli tan vlame pongota ëli tëjantu ku lazhan se me.
11 *Se ëli faa ineñ:
«Nguë shi ja baga ku miela dëli se ëli tan ja jazha ku utu mooso,
ëli ja kabajölöiö ku nguë shi pimëlu;
12 se shi mooso sai ten ja baga ku medu dëli se ëli ja zhunta ku utu napai,
ëli ten ja kabajölöiö».
Djisu ska da nna mina besa
13 Se a ma nna mina kichi kichi ba da Djisu,
valadji pa ëli fala ineñ ku pa ëli ten da ineñ besa;
mandji se nna balë sa fa ja lonja öiö da nna nguë ineñ shi ma ineñ bai.
14 Ta Djisu bë jö sai,
se mëtë pashian,
se ëli faa ineñ:
«Namsëdji lega pa nna mina kichi kichi bi toja amu,
na tan panta ineñf;
pakë nna nguë shimafan ineñ se ske sa dantu gövöndölö Nashiolo.
15 *Anta vedadji se amu faa namsëdji,
nguë shi na ja ma gövöndölö Nashiolo shimafan uan mina kichif,
na ske lantela dantu dëlif».
16 Se ëli ligui nna mina pë baasu dëli,
se ëli pë öma liba dëneñ,
se ëli da ineñ besa.
Uan liku ska faa ku Djisu
17 Ta Djisu bi ska ma ja pa ëli be deenchi ku vadji dëli,
se bi uan masebu ja jölë,
se bi deenchi dëli se dajözhöiö,
se ëli pongota ëli:
—Meeth gavu,
¿kë ja amu ja fo fë pa amu të vida chindadji?
18 Se Djisu kundji ëli:
—¿Jama fë bo ska sama amu nguë gavu?
Na të zhugan nguë gavuf shina Nashian moso se gavu.
19 Se bo jönsë mandamentu Nashian bebezha:
“Na ja chila nguë vida folof,
na ja kabajölöiöf,
na futaf,
na ja da fanchilaf,
na ja mucha da nguëf,
da pai bo ku main bo ondolo”.
20 Se masebu se faa ëli:
—Meetha,
ineñ se tudu amu gada bebezha fo mashivin amu.
21 Se Djisu pia ëli ku ngongo,
se ëli kundji ëli:
—Uan ja moso se fata pa bo fë,
bai,
pa bo vëndë jö ineñ shi sa ku bo tudu,
pa bo da nna puvili,
pa amea sai pa bo të gagavu ösë.
Zha pa bo bi pa bo lë amu.
22 Mandji se ta masebu se tëndë jö sai,
se ëli be modoia pakë ëli bi sa ku uan sapa gagavu.
23 Tadashi se Djisu pia lome dëli,
se ëli faa nna balë dëli:
«¡Ske kuta monchi muntë pa nna nguë liku lantela dantu gövöndölö Nashiolo!».
24 Se nna balë gua ku böjö betu dajantu faa ineñ sai;
mandji se Djisu tan vlame faa ineñ:
«Nna mina amu,
¡kë amea shi ja kuta monchi muntë pa lantela dantu gövöndölö Nashiolo!
25 Ja sa levu mashi pa uan javalu lömba pasa dantu uan fuladu guian mashi ku pa uan liku lantela dantu gövöndölö Nashiolo».
26 Se ta nna balë tëndë jö sai,
se ineñ tan gua ku böjö betu,
se ineñ pongota ineñ ineñ me:
—¿A kë nguë ske paadji sava?
27 Se Djisu vla öiö pia ineñ,
se kundji ineñ:
—Jö shi pöjödölö na ja fo fëf ai,
Nashian ja paadji fë,
pakë ëli paadji fë ja sa palea ie tudu.
28 Tadashi se Pudul jomesa ja faa ëli:
—Öseshi,
no lega jö ineñ shi bi sa ku no tudu pë,
se no lë bo.
29 Se Djisu kundji ëli:
—Anta vedadji se amu faa namsëdji,
na të zhugan nguë ku lega jadji dëli pë,
ö ku nna namain dëli,
ku nna namain dëli naamain,
main dëli ö pai dëli,
ö nna mina dëli ö san jadji,
dajantu amu ku dajantu nova gavu,
30 ëli ske të öseshi uan sentu ope mashi dantu tempu sai;
jadji,
nna namain napai,
nna namain naamain,
nna main,
nna mina,
ku san jadji,
benga zha pa ja pëtëpë ëli,
ëli ske të vida chindadji dantu tempu shi tan ska bi.
31 *Mandji se uan sapa nna nguë pimëlu ske sa jabamentu,
se nna nguë jabamentu ske ja sa pimëlu.
Djisu ska da lazhan ope shi fë tëishi amea shi ëli ske mölë
32 Se ineñ bi ska be jamangandji ja subili ba Jerusalen,
se Djisu bi ska be deenchi.
Se nna balë gua ku böjö betu,
se utu nna nguë ineñ shi bi ska lë ineñ iai bi ska mendu.
Se ëli tan vlame ma nna balë dëli deshi ku dösu ba apachi se ëli jomesa ja da ineñ lazhan jö ineñ shi ske shiga ëli.
33 «Se amea se namsëdji ska bë iai,
öseshi no ska subili ba Jerusalen,
jamian shi a ske vëndë Mina Napai Dösë da nna jasa jasa padjil ku nna meeth dalë.
Se ineñ ske kondena ëli pa ëli mölë,
se a ske ma ëli pa da nna nguë ineñ shi na sa judiof.
34 Se ëli ske vla pai li da ineñ,
se ineñ ske ta aböjö pë ëli,
se ineñ ske da ëli ku valasöchi,
se ineñ ske chila ëli vida folo,
mandji se ta ske pasa tëishi djia se ëli tan ske lanta bi vida».
Djisu kundji Sanchagu ku Zhuan
35 Tadashi se Sanchagu ku Zhuan,
nna mina Sebedeo,
iabi jamian dëli se ineñ faa ëli:
—Meetha,
no ngongo pa bo fë da no jö shi no ske pindji bo.
36 Se ëli pongota ineñ:
—¿A kë ja namsëdji ngongo pa amu fë da namsëdji?
37 Se ineñ kundji ëli:
—Lega no pa dantu gövöndölö gloria bo pa uan no tusan benda dëtu bo ku pa nguë shiki sa benda skedji bo.
38 *Se Djisu kundji ineñ:
—Namsëdji na sëbë jö shi namsëdji ska pindjif.
¿Namsëdji ske paadji bëbë fo pukulu ja manga shi amu ske bëbë,
ku klase bachizha shi a ske bachizha amu?
39 Se ineñ faa ëli:
—No paadji.
Se Djisu faa ineñ:
—Anta vedadji,
namsëdji ja paadji bëbë,
fo pukulu shi ku amu ja bëbë,
se fo bachizha shi a ja bachizha amu,
a ja paadji bachizha namsëdji,
40 mandji se pa namsëdji ske tusan benda dëtu amu ö benda skedji amu,
na sa ja amu se ja daf,
shina sa ja a ja da nna nguë ineñ shi a ja fë vadu.
41 Se ta utu nna uan deshi balë tëndë jö sai,
se jomesa ja mëtë ineñ pashian tëjantu ku Sanchagu ku Zhuan.
42 *Mandji se Djisu sama ineñ,
se faa ineñ:
«Amea shi namsëdji sëbë,
nna jasa jasa nna nguë ineñ shi na sa judiof ja sa liba pövu dëneñ ku foshi,
se nna feshali ja fë nguë machi ku pödë dëneñ.
43 *Mandji se dantu namsëdji na ta pa sa shif.
Ske sa patadu,
nguë shi ja ngongo sa nguë ngandji dantu namsëdji,
ske ta pa ëli se ja sa shividölö namsëdji,
44 se nguë shi dantu namsëdji ja ngongo sa pimëlu,
ëli ske sa sëlëva nguë tudu.
45 Pakë ñi Mina Napai Dösë na bi pa ja shivi ëlif,
shina pa ëli ja shivi nguë ku pa ëli ja da vida dëli dajantu pa ëli sava uan sapa dji nguë».
Djisu kula Bartimeo
46 Tadashi se ineñ ba da Jeriko;
se ta Djisu ku nna balë dëli ku uan sapa möi pöjödölö.
Se uan nguë pindji nguë kuzhu sebu ku a ja sama ëli Bartimeo,
mina Timeo,
ëli bi ska tusan lome jamangandji ja pindji kuzhu.
47 Se ta ëli tëndë fa sa Djisu nguë shi Nasaret,
se ëli jomesa ja ta kidëlë:
«¡Djisu,
Mina alë David,
të mindjikodji amu!».
48 Se nguë tudu bi ska faa ëli kuzhu valadji pa ëli jaböjö,
mandji se ëli tan bi ska ta kidëlë mashi:
«¡Mina David,
të mindjikodji amu!».
49 Tadashi se Djisu da ta mdjadu,
se ëli faa:
«Namsëdji sama ëli bi».
Se ineñ sama sebu se bi,
ja faa ëli:
«Ma añimu,
lanta,
ëli ska sama bo».
50 Tadashi se ëli,
zhuga bobolonda dëli ta,
se ëli sata se ëli ba toja Djisu.
51 Se Djisu pongota ëli:
—¿Ja bo ngongo pa amu fë da bo?
Se sebu se kundji ëli:
—Meetha,
amu tan ngongo bë kuzhu.
52 Se Djisu faa ëli:
—Bo paadji bai,
bo sa kuladu,
jonfa bo se bo kula.
Se öshi öshime se ëli tan të vita,
se ëli jomesa ja bai jamangandji ja lë Djisu.