9
Se ëli ten faa ineñ:
«Anta vedadji se amu faa namsëdji,
sa ku zhugan namsëdji ineñ se sa plesteñi öseshi iai ku na ske bë mölë shinke ineñ bë gövöndölö Nashian ska bi ku pödëf».
Djisu ku Elias ku Moises së ku supichi
2 *Ta pasa sëishi djia,
se Djisu ma Pudul,
ku Sanchagu ku Zhuan;
se ëli ma ineñ moso apachi ba uan iki atu.
Se ala,
se ëli vla tukadu deenchi dëneñ.
3 Se bitidu dëli ja chila blin,
se vla banku pepepe shimafan növu,
amea shi ku zhugan nguë na fo të vla banku mashi dantu telaf.
4 Se Elias ku Moises së ku supichi,
se ineñ bi ska da lazhan ku Djisu.
5 Tadashi se Pudul faa Djisu:
«Rabi,
¡ske sa gavu pa no mdja iai!
No paadji fë limada tëishi:
uan da bo,
uan da Moises,
ku uan me da Elias».
6 Mandji se ineñ na bi sëbë jö shi ineñ bi ska faaf,
pakë ineñ tudu bi ska mendu.
7 *Tadashi se bi uan növu se kubili ineñ,
se fo növu sai,
se a tëndë uan falagochi ku ska faa:
«Nguë sai se sa Mina kilidu amu.
¡Namsëdji tëndë ëli!».
8 Öshi öshi,
se ineñ pia lome dëneñ,
se ineñ na tan bë zhugan nguë mashif,
shina Djisu moso.
9 Se ta ineñ dësë fo iki,
se Djisu da ineñ odji pa ineñ na da zhugan nguë lazhan jö ineñ se ineñ bë ief,
ba toja pa Mina Napai Dösë tan lanta fo dantu nna nguë mölidu.
10 Se ineñ gada jö se pë kusan dëneñ,
mandji se ineñ bi ska pufia dantu ineñ ineñ me,
kë ja sa «tan lanta fo dantu nna nguë mölë bebezha».
11 *Se ineñ pongota ëli,
ja faa ëli:
—¿Jama fë nna meeth dalë ska faa ske fë fata pa Elias se bi pimëlu?
12 Se ëli kundji ineñ,
se faa ineñ:
—Sa vedadji fa Elias se ta pa bi pimëlu,
se ëli tan ske bi fë vadu ja tudu pë;
¿jama fë ske sa skividu fa Mina Napai Dösë,
ske ta pa padësë monchi se a ske naga ëli?
13 Mandji se amu faa namsëdji fa Elias bi bi bebezha,
se ineñ fë ëli jö ineñ shi ineñ bi ngongo tudu,
amea shi sa skividu tëjantu ku ëli.
Djisu kula uan namasebu ku bi sa ku spitu fëiu
14 Se ta ineñ ba da jamian shi utu nna balë bi sa,
se ineñ dajonta ku ineñ ludjadu ku uan sapa möi pöjödölö,
se nna meeth dalë bi ska pufia ku ineñ.
Muchacho con el espíritu impuro (Marcos 9.14-29)
15 Se i shi moso nguë tudu ba ku öiö ba bë Djisu,
se ineñ mdja ku böjö betu,
ja jölë ba toja ëli,
se ineñ da ëli manten.
16 Se ëli pongota ineñ:
—¿Kë pufia namsëdji ska të ku ineñ?
17 Se uan nguë dantu möi pöjödölö ineñ se,
faa ëli:
—Meetha,
amu ma mina amu bi da bo,
ku sa ku uan spitu fëiu ku na ja lega ëli pa ëli faa falaf.
18 Se ja sa jamian shi ja fala ëli tudu,
se ja ligui ëli da san,
se ëli ja jomesa ja chila kumba fo böjö,
se ja taja ëli denchi se ëli ja vla tezhadu.
Se amu pindji nna balë bo pa ineñ chila spitu se fo ëli,
mandji se ineñ na paadjif.
19 Se Djisu kundji ineñ:
«¡Ö nna zhenchi ku na ja këlëf!
¿Ba toja kë djia amu ske sa ku namsëdji?
¿Ba toja kë djia amu ske gaga namsëdji?
Ma ëli bi da amu».
20 Tadashi se a ma namasebu se ba deenchi Djisu.
Mandji se ta spitu fëiu se ba bë Djisu,
se öshi öshime se ëli sugudji namasebu se ku uan foshi ödu mashi ja ligui ëli da san,
ja chila ëli kumba fo böjö.
21 Se Djisu pongota pai dëli:
—¿Fo kë djia jö se ja fë ëli?
Se pai dëli kundji ëli:
—Fo djia shi ëli sa namina.
22 Se uan sapa vëdji se eli ja zhuga ëli ba fögö ku ba aua,
valadji pa ëli chila ëli vida folo.
Se shi bo ja paadji fë uan kuzhu,
të mindjikodji no pa bo zhuda no.
23 Se Djisu faa ëli:
—¿Kë ja sa shi amu paadji?
Da nna nguë ineñ shi ja këlë,
ja tudu ja fo fë.
24 Se öshi öshime se pai namasebu se ta kidëlë:
—Amu këlë.
¡Zhuda amu pa amu këlë mashi!
25 Se ta Djisu ba bë fa uan möi pöjödölö ska zhunta,
se ëli lonja öiö da spitu fëiu sai,
ja faa ëli:
«Spitu ku na ja lega nguë faa falaf ñi tëndë jaf,
amu da bo odji pa bo së fo ëli,
ku pa bo na tan lantela ëli mashif».
26 Tadashi se spitu fëiu se ta uan fala kidëlë,
se ëli tan sugudji ëli ku foshi,
se ëli së.
Se ëli vla shimafan nguë mölidu,
ku se fë ku uan sapa nguë bi ska faa:
«¡Ëli sa mölidu!».
27 Mandji se Djisu,
fala ëli öma se lanta ëli,
se ëli ten ta mdjadu.
28 Se ta Djisu lantela jadji,
se nna balë dëli pongota ëli apachi:
—¿Jama fë no na bi paadji chila ëli folof?
29 Se Djisu kundji ineñ:
—Klase spitu fëfëiu ineñ sai a ja paadji chila amea lezha ku zhedu böjö.
Djisu ska da lazhan ope shi fë dösu amea shi ëli ske mölë
30 Se ta ineñ së fo ala,
se ineñ bi ska bë ja pasa loso loso Galilea.
Mandji se Djisu na bi ngongo pa zhugan nguë sëbë fa ëli ska pasa alaf.
31 Pakë ëli bi ska shina nna balë dëli kuzhu.
Se ëli bi ska faa ineñ:
«A ske vëndë Mina Napai Dösë da nna pöjödölö.
Se ineñ ske chila ëli vida folo,
mandji se ta pasa tëishi djia se ëli tan ske lanta bi vida».
32 Mandji se ineñ na bi ska tëndë jö ineñ shi ëli bi ska faa ineñf,
se ineñ bi ska mendu pa ineñ pongota ëli.
¿Kë nguë sa nguë shi ngandji mashi?
33 Se ineñ ba da Kapernaum;
se ta ineñ sa dantu jadji,
se Djisu pongota ineñ:
«¿Kë ja namsëdji bi ska pufia jamangandji?».
34 *Mandji se ineñ na kundji ëlif,
pakë jamangandji ineñ bi ska pufia ku ineñ ineñ me,
ja pongota kë nguë ske sa nguë shi ngandji mashi.
35 *Tadashi se Djisu tusan,
se ëli sama nna balë dëli deshi ku dösu se ëli faa ineñ:
«Shi uan nguë ja ngongo sa pimëlu,
ske ta pa ëli se sa tashi nguë tudu,
pa ëli se ja sa shividölö nguë tudu».
36 Zha se ëli ma uan namina se ëli pë metadji dëneñ,
se ëli ligui ëli pë baasu dëli,
se ëli faa ineñ:
37 *«Nguë shi ja ma uan namina shimafan namina sai ku namu amu,
ëli ja ma amu;
se nguë shi ja ma amu,
ëli na ja amu na mosofa,
shina ëli ten ja ma nguë shi da amu bi».
Nna nguë ineñ shi sa pachi Djisu
38 Se Zhuan faa ëli:
—Meetha,
no bë uan nguë ku ja chila damono folo nguë ku namu bo,
se no na lega ëlif,
pakë ëli na sa nna nguë nof.
39 Se Djisu faa ineñ:
—Namsëdji na tan panta ëlif,
pakë na të zhugan nguë ku ja fë uan ja ngangandji ku namu amu,
zha pa ëli tan paadji faa zhugan ja fëiu tëjantu ku amuf.
40 *Pakë nguë shi na ja fë ja fëiu tëjantu ku nof,
ëli ja fë gavu ku no.
41 *Se ja sa nguë shi ja da namsëdji uan pochi daua këtë dajantu namu amu ku pakë namsëdji sa nna nguë Kilitu,
anta vedadji se amu faa namsëdji fa ëli na ske pëndë pagu dëlif.
Tentasan pa pono da pekadu
42 »Se ja sa nguë shi ja fë pa uan namina kichi kichi ku ja këlë amu da topu,
ske sa gavu mashi pa ëli mala uan jodo pë uan makuku budu mla kuzhu pë gochi dëli pa zhuga ëli ba domali.
43 *Shi öma bo ja fë pa pono da pekadu,
bo ja pota folo.
Pakë ske sa gavu mashi pa bo lantela dantu vida ku öma potadu,
mashi ku pa bo të öma dödösu ku pa bo ba dantu onfenu,
jamian shi fögö na ja pakaf,
44 jamian shi bisu dëneñ na ja mölëfa,
se fögö na ten ja pakaf.*+
45 Se shi ope bo ja fë pa bo pono da pekadu,
bo ja pota folo.
Pakë ske sa gavu mashi pa bo lantela dantu vida ojogo,
mashi ku ope dödösu ku pa ta bo ba onfenu,
46 jamian shi bisu dëneñ na ja mölëfa,
se fögö na ten ja pakaf.*+
47 *Se shi öiö bo ja fë pa bo pono da pekadu,
bo ja chila folo.
Pakë ske sa gavu mashi pa bo lantela dantu gövöndölö Nashian ku uan ponodu öiö,
mashi ku pa bo sa ku öiö dödösu ku pa zhuga bo ba onfenu,
48 jamian shi bisu dëneñ na ja mölëfa,
se fögö na ten ja pakaf.