Djisu da uan möi pöjödölö kumu
8
Dantu djia ineñ sala se tan zhunta uan möi pöjödölö,
se öshi ineñ na tan bi të ja pa ineñ kumuf,
se Djisu sama nna balë dëli se ëli faa ineñ:
2 —Amu ska të dölö nna nguë ineñ sai,
pakë sa tëishi djia ku ineñ sa iai ku amu se ineñ na sa ku ja pa ineñ kumuf.
3 Se shi amu ja faa ineñ pa ineñ ba jadji dëneñ shin kumu,
ineñ paadji pëndë añimu pa ineñ pono da san jamangandji,
pakë uan sapa ineñ bi fo jamian löndji löndji.
4 Se nna balë dëli kundji ëli:
—¿A kë amea shi no paadji da ineñ ampan pa ineñ kumu dantu uan jamian sölö sölö sai?
5 Se ëli pongota ineñ:
—¿Jantu ampan sa ku namsëdji?
Se ineñ kundji:
—Seta.
6 Tadashi se ëli manda pa möi pöjödölö ineñ se tusan san,
se ëli ma ampan seta ineñ sai,
se ëli da dezhupaga,
se ëli pachi nna balë dëli,
valadji pa ineñ pë deenchi möi pöjödölö ineñ sai.
7 Ineñ ten bi të zhugan ponodu mina pishi,
se ëli da Nashian dezhupaga,
se ëli manda ineñ pa ineñ ten pachi.
8 Se ineñ kumu ba toja ku ineñ shia chipa.
Zha se ineñ totolo dasu dasu ineñ shi sovezha,
ojali seta.
9 Nna nguë ineñ shi kumu bi sa zhugan milidji jatulu.
Se ëli lega ineñ bai,
10 se öshi öshi se ëli vada dantu batelu ku nna balë dëli se ineñ ba loso loso Dalmanuta.
Nna fariseo ska pindji shinali ngangandji
11 *Se nna fariseo bi se ineñ jomesa ja pufia ku Djisu.
Se valadji pa ineñ puva ëli,
se ineñ pindji ëli uan shinali fo ösë.
12 *Se ëli djimi fo spitu dëli,
se ëli faa:
«¿Jama fë zhenchi sai ska pindji uan shinali ja ngangandji?
Anta vedadji se amu faa namsëdji fa a na ske da ineñ zhugan shinalif».
13 Tadashi se Djisu lega ineñ pë ala,
se ëli tan vlame lantela batelu ba benda sala omali.
Levadura nna fariseo
14 Se nna balë bi kësë pa ineñ bi ku ampan,
se uan ponodu ampan moso se bi sa ku ineñ dantu batelu.
15 *Se ëli manda ineñ,
ja faa ineñ:
«Ja pia,
namsëdji ja ska pinchidu levadura nna fariseo ku dji Erodes».
16 Se ineñ bi ja pufia dantu dëneñ me,
ja faa:
«Sa dajantu ku no na bi ku ampanf».
17 Se ta Djisu ba tëndë ineñ,
se ëli faa ineñ:
—¿Ja fë namsëdji ska pufia,
dajantu namsëdji na të ampanf?
¿Namsëdji na ja tëndëfa ñi na ja da namsëdji ötëndëf?
¿Namsëdji ontolo sa ku kusan ödu?
18 *¿Namsëdji sa ku öiö se namsëdji na ja bë jaf,
se namsëdji të oleia se namsëdji na ja tëndë jaf?
¿Namsëdji na tan ja lambelaf?
19 Ta amu bi pachi ampan shinku da milidji shinku,
¿jantu ojali shia dasu dasu ampan ku namsëdji totolo?
Se ineñ kundji ëli:
—Deshi ku dösu.
20 —Se ta amu pachi ampan seta da milidji jatulu iai,
¿jantu ojali shia ampan ku namsëdji totolo?
Se ineñ kundji ëli:
—Seta.
21 Tadashi se ëli faa ineñ:
—¿Ontolo namsëdji na sa tëndëfa?
Djisu kula uan sebu dantu Betsaida
22 Ta ineñ ba da Betsaida,
se a ma uan sebu ba da ëli,
se ineñ luga ëli pa ëli fala ëli.
23 Tadashi,
se ëli ma öma masebu sebu sai,
se ëli chila ëli fo dantu loso.
Se ëli mala ëli öiö ku aböjö,
se ëli pë öma liba dëli,
se ëli pongota ëli:
—¿Bo ska bë zhugan kuzhu?
24 Se masebu se,
lanta öiö se ëli faa:
—Amu ska bë pöjödölö,
ineñ ska kë öpa ku ska nda.
25 Se Djisu tan vlame pë öma liba döiö dëli,
se ta masebu se tan pia gavu,
se ëli toja ëli kuladu,
pakë ëli jomesa bë ja tudu limpi pepepe.
26 Tadashi se Djisu manda ëli pa ëli ba jadji dëli,
se ëli faa ëli:
—Na tan vlame lantela dantu loso sef.
Pudul ska da lazhan fa Djisu se sa Kilitu
27 Se Djisu ku nna balë dëli së ba loso loso Sesarea dji Filipo.
Se jamangandji,
se ëli pongota nna balë dëli,
ja faa ineñ:
—¿Kë nguë nna nguë tudu ska faa sa amu?
28 *Se ineñ kundji ëli:
—Zhugan nguë ska faa bo sa Zhuan Bachita,
se utu nguë ja faa bo sa Elias,
se utu nguë ja faa uan nna pantafala.
29 *Se ëli pongota ineñ:
—A namsëdji,
¿kë nguë namsëdji ja faa sa amu?
Se Pudul kundji ëli:
—Bo se sa Kilitu.
30 Mandji se ëli da ineñ odji pa ineñ na da zhugan nguë lazhan jö sef.
Djisu ska da lazhan amea mölë dëli
31 Se ëli jomesa ja shina ineñ ja fa ske fë fata pa Mina Napai Dösë padësë monchi,
se nna jasa jasa pövu,
ku nna jasa jasa padjil ku nna meeth dalë ske naga ëli.
Se ëli ske mölë,
ta ja da tëishi djia se ëli tan ske lanta.
32 Se eli bi ska faa ineñ jö ineñ se tudu ntëlelele.
Tadashi se Pudul ma ëli ba a pachi se jomesa ja lonja öiö da ëli.
33 Mandji se ta ëli vla öiö ku ëli ba pia nna balë dëli se ëli lonja öiö da Pudul,
ja faa ëli:
«¡Ba tashi amu,
Satanas!,
pakë bo na ja pë jasa ja Nashianf,
shina dji nna pöjödölö».
34 *Tadashi se ëli sama nna pövu ku nna balë dëli,
se ëli faa ineñ:
«Shi uan nguë ja ngongo bi lë amu pa ëli sa balë amu,
ta pa ëli naga tuludöguë dëli,
pa ëli gaga kusu dëli,
pa ëli lë amu.
35 *Pakë ja sa nguë shi ngongo sava vida dëli,
ëli ske pëndë vida dëli;
mandji se ja sa nguë shi ja pëndë vida dëli dajantu amu ku evanjelio,
ëli ske sava vida dëli.
36 ¿A kë ja ku ja shivi pa uan pöjödölö ngana mundu nguintëlu nguintëlu mandji pa ëli pëndë vida dëli?
37 ¿Ö kë ja a ja paadji da pa ma tuka ku vida dëli?
38 Pakë ja sa nguë shi ja të govan amu ku nova amu deenchi zhenchi kabajölöiö ku ja sa pekadölö,
a shime Mina Napai Dösë ten ske të govan dëli ta ëli tan ske vlame bi ku gloria Pai dëli ku dji nna anzhu santu santu».