Jö ineñ shi ja sunzhu pöjödölö
7
Se nna fariseo ku zhugan nna meeth dalë ku ineñ bi së fo Jerusalen,
se ineñ zhunta pë lome Djisu.
2 Se ta ineñ ba bë fa zhugan nna balë Djisu ska kumu ku öma nozhodu,
ku sa fa ineñ na fë jö shi ku kutumu dëneñ shi a ja laba ömaf,
se ineñ sa fa ja lo ineñ mali.
3 Pakë nna fariseo ku nna judio tudu bi sa ku kutumu nna paipai dëneñ,
ku sa fa ineñ na ja kumu shinke ineñ laba ömaf.
4 Se fë ku ta ineñ ja së fo makëtë bi,
ineñ na ja kumu shinke ineñ ja laba ömaf.
Ku utu uan sapa kutumu mashi ku bi ta pa ineñ ja gada,
shimafan dji laba pukulu ku jalashi,
ku pochi jubil ku maka.
5 Se nna fariseo ku nna meeth dalë pongota ëli:
—¿Jama fë nna balë bo na ja lë amea kutumu nna paipai nof,
shina ineñ ja kumu ampan ku öma nozhodu?
6 Se ëli kundji ineñ:
—Isaias bi pantafala tëjantu ku namsëdji ta ëli bi faa namsëdji sa sochi,
amea shi sa skividu:
“Pövu sai ja da amu ondolo ku olaböjö,
mandji se kusan dëneñ ja sa löndji fo amu.
7 Pakë shipë shi se ineñ ja adola amu;
se shina ja dëneñ ja sa mandamentu dji nna pöjödölö”.
8 »Pakë namsëdji ja lega mandamentu Nashiolo pa namsëdji ja lë kutumu tela dji pöjödölö.
9 A shime ëli se tan faa ineñ:
—Namsëdji ja faa mandamentu Nashiolo na ja shivif valadji pa namsëdji ja gada kutumu namsëdji tudjia.
10 Pakë Moises faa:
“Da pai bo ku main bo ondolo” se “Nguë shi ja ta pai dëli ö main dëli masan,
a ske kondena ëli ba mölë”.
11 Mandji se namsëdji ja faa uan masebu paadji faa pai dëli ö main dëli:
“Amu na paadji zhuda bof,
pakë jö ineñ shi sa ku amu tudu sa ‘korban’” (ku sa faa:
jö shi a ja da Nashiolo).
12 Se namsëdji na ja lega pa ëli fë zhugan ja mashi da pai dëli ku main dëlif.
13 Da amea sai se namsëdji ja pota Fa Nashian sai ku kutumu tela namsëdji ku sa ja namsëdji ja pasa fo uan nguë ba utu nguë.
Se namsëdji tan ja fë uan sapa utu fidu jö ineñ shi ku jö ineñ shime.
14 Se ëli tan sama möi pöjödölö ineñ sai,
se ëli faa ineñ:
«Namsëdji tudu tëndë amu,
ku pa namsëdji tëndë jö sai:
15 Zhugan jö ineñ shi ja lantela fo öluia dantu uan pöjödölö na se sa jö shi ja paadji sunzhu ëlif,
mandji se jö shi ja së fo dantu pöjödölö se sa jö ineñ shi ku ja sunzhu ëli».
16 Shi uan nguë ja të olea,
pa ëli ja tëndë.*+
17 Se ta Djisu lega nna nguë tudu pë,
se ëli lantela dantu jadji,
se nna balë dëli pongota ëli amea jö ineñ se ëli bi ska shina ineñ dantu palavulu sai.
18 Se ëli faa ineñ:
«¿Se a shime namsëdji ten sa shin tëndëmentu?
¿Namsëdji na ja tëndë fa zhugan ja ku ja lantela uan pöjödölö fo öluia na ja fë pöjödölö se sunzhufa,
19 pakë ëli na ja lantela dantu kusanf,
shina dantu chipa,
zha se a ja chila fo chipa ua?».
Ku jö sai se ëli ska msa fa jö ineñ shi a ja kumu tudu sa ja limpadu.
20 Zha se ëli tan faa:
«Jö shi ja së folo dantu öguë uan pöjödölö,
se sa jö shi ja sunzhu pöjödölö.
21 Pakë fo dantu kusan nna pöjödölö,
se ja së mazhnamentu fëfëiu,
ja nda ölöluia,
futa,
chila nguë vida folo,
kabajölöiö,
22 dishia ja dji nguë,
ja fëfëiu,
fë nguë danadu,
visio tudu,
pashian,
da fanchila ku namu dji nguë,
subebu,
fata shizhu.
23 Ja fëfëiu ineñ se tudu sa ja ku ja së fo benda dantu se ja sunzhu pöjödölö».
Uan mooso ku na sa judiof ska jonfa Nashiolo
24 Se ta Djisu lanta fo ala,
se ëli ba uan pachi loso loso Tiro ku Sidon.
Se ëli lantela dantu uan jadji,
se ëli na bi ngongo pa zhugan sëbëf,
mandji se ëli na bi paadji jöndëf.
25 Mandji öshi öshi se uan mooso,
ku mina naamain dëli bi sa ku uan spitu fëiu,
se ta ëli tëndë fa Djisu sa ala,
se ëli ba ala se ëli dajözhöiö ope dëli.
26 Mooso sai bi sa griego,
uan nguë tela sirofenisia,
se ëli ska luga Djisu pa chila damono sai fo mina naamain dëli.
27 Mandji se Djisu faa ëli:
—Lega pa nna mina se kumu pimëlu,
pakë na sa gavu pa chila ampan fo nna mina pa da nna jösölöf.
28 Se mooso se kundji ëli:
—Shiën,
Shiölö,
mandji se ba toja nna mina jösölö ku ja sa basu mezha ja kumu fea fea jö ineñ shi ja pono fo nna mina.
29 Se Djisu faa ëli:
—Dajantu amea se ku bo faa iai,
bo ja be legadu.
Se damono sai së fo mina naamain bo bebezha.
30 Se ta mooso se ba da jadji dëli,
se ëli dajonta ku mina naamain dëli liba jaama.
Se damono bi së fo ëli bebezha.
Djisu kula uan masebu ku sa ku gagui ku na ja tëndë jaf
31 Zha se Djisu tan vlame së fo loso loso Tiro,
se ëli pasa ba Sidon,
se ëli ba da omali Galilea,
dantu loso loso Dekapolis.
32 Se ala se a ma uan nguë olea tapadu ku sa ku gagui se a pindji ëli pa ëli pë öma dëli liba dëli.
33 Se Djisu chila ëli fo dantu pöjödölö ba uan benda,
se ëli mëtë dëdöma dëli pë ëli dantu olea masebu sai,
zha se ëli ma aböjö dëli se ëli fala lunga dëli.
34 Se ëli vla öiö da ösë,
se ëli djimi,
se ëli faa:
«¡Efata!»,
ku sa faa:
«¡Bla pë betu!».
35 Se öshi öshi se olea dëli bla,
se lunga dëli ten sota,
se ëli jomesa ja faa fala gavu.