Djisu sa Nasaret
6
Se Djisu së fo ala se ëli ba tela dëli,
se nna balë dëli ten bi ska lë ëli.
2 Se ta da djasubudu,
se ëli jomesa ja shina nguë kuzhu,
dantu jadji Nashian nna judio.
Se uan sapa nguë,
bi ska tëndë ëli,
ku böjö betu ja pongota:
«¿A kë jamian ëli chila jö ineñ sai?
¿A kë jamian ëli chila tëndëmentu se sa ku ëli iai,
ku ja ngangandji ineñ se ku ëli ska fë ku öma dëli iai?
3 ¿Nguë sai na se sa jantëlu ua,
mina Malia,
namain Sanchagu,
ku dji Sandzhe,
Judas ku Shiman ua?
¿Se nna namain dëli naamain na ten ja ta iai ku no ua?».
Se ineñ zhono ëli.
4 *Mandji se Djisu faa ineñ:
«Jamian tudu a ja da pantafala ondolo,
tuludöguë tela dëli,
dantu zhenchi dëli ku jadji dëli moso se a na ja da ëli ondolof».
5 Se ëli na paadji fë zhugan ja ngangandji alaf,
jö shi moso ku ëli fë sa kula zhugan ponodu nna nguë ska danchi,
ja pë öma liba ineñ.
6 Se ëli gua ku böjö betu da amea shi ineñ na ja këlëf.
Djisu ska da nna balë dëli bai
Se Djisu bi ska be ja pasa dantu loso loso ineñ shi sa peetu ja shina nguë kuzhu.
7 Se ëli sama nna balë deshi ku dösu,
se ëli jomesa ja manda ineñ bai nguë dösu ku nguë dösu,
se ëli da ineñ pödë liba nna spitu fëfëiu.
8 Se ëli ten da ineñ odji pa ineñ na ma zhugan ja bai ku ineñ jamangandjif,
shina budan nda moso,
ñi bondëlëfa,
ñi ampanf,
ñi manchimentu ñi djiëluf.
9 Pa ineñ be ku ja mëtëpope,
mandji pa ineñ na be ku muda jaminzha dösuf.
10 Se ëli faa ineñ:
«Ta namsëdji ja lantela dantu uan jadji,
namsëdji ja mdja ala ba toja djia shi namsëdji tan ja së fo jamian sai.
11 **Se shi uan jamian a na ja ma namsëdji gavufa ñi a na ja ngongo tëndë namsëdjif,
namsëdji ja së fo jamian sala ja sugudji opo fo ope namsëdji,
valadji pa jö se ja da lazhan gavu tëjantu ku ineñ».
12 Tadashi se nna balë ten së ba faa nna nguë tudu pa ineñ lega pekadu dëneñ tudu pa ineñ tan vla ku ope tashi.
13 *Se a shime se ineñ ten chila uan sapa damono,
se ineñ ten kula uan sapa nguë ku bi ska danchi ja bolo ineñ zhëitë.
Mölë Zhuan Bachita
14 *Se ta alë Erodes ba tëndë nova gavu Djisu,
pakë namu dëli bi ska be ja panta panta,
se zhugan nna nguë bi ska faa:
«Zhuan Bachita se tan lanta fo dantu nna nguë mölidu,
se dajantu shi se ëli të pödë valadji pa ëli ja fë ja ngangandji».
15 Utu nguë bi ska faa:
«Ëli se sa pantafala Elias».
Se utu nguë bi ska faa:
«Ëli sa uan pantafala,
ö zhugan nna pantafala».
16 Se ta Erodes tëndë jö ineñ se,
se ëli faa:
«Nguë sai sa Zhuan,
nguë shi amu pota gochi iai,
se ëli tan vlame lanta».
17 *Pakë tuludöguë Erodes se bi manda pa të Zhuan,
se ëli mala ëli ku guian pë dantu djili dajantu Erodias,
miela Filipa,
ku bi sa namain dëli.
Pakë ëli bi ma ëli pa sa miela dëli.
18 Dajantu ku Zhuan bi ska faa Erodes:
«Alë na ja lega pa bo të moso namain bof».
19 Dajantu shi se Erodias bi ska të pashian dëli,
se ëli bi ngongo chila ëli vida folo,
mandji se ëli na bi paadjif,
20 pakë Erodes bi ska mendu Zhuan,
ja sëbë fa ëli sa uan masebu dëtu ku santu,
se ëli bi ska fë lazhan dëli.
Se ta ëli ja ska tëndë ëli se ëli ja mdja buiadu buiadu,
mandji se ëli bi ja tëndë ëli ku liguilia.
21 Se bi da djia ngandji dëli.
Pakë Erodes tëjantu ku djia bembe danu dëli,
se ëli da uan taba bankëtë da nna jasa jasa feshali,
ku nna jomandanchi ku nna nguë dondolo loso loso Galilea.
22 Se mina naamain Erodias lantela jamian shi a bi ska da bankëtë se ëli baia,
se jö se fë gavu da Erodes ku nna nguë ineñ shi ku ëli bi sa mezha,
se alë Erodes faa namooso sai:
«Pindji ja sa jö shi bo dishia tudu,
se amu ske da bo».
23 Se ëli fë julamentu sai uan sapa ope:
«Amu ske da bo ja sa jö shi bo ja pindji amu tudu,
benga zha pa sa metadji tela shi amu sa gövöndölö».
24 Se namooso se së ba pongota main dëli:
—¿Kë ja amu ske pindji?
Se ëli kundji ëli:
—Pindji ëli jasa Zhuan Bachita.
25 Se öshi öshi se namooso se lantela dandjian deenchi alë,
se ëli faa ëli:
—Da amu öseshi jasa Zhuan Bachita dantu uan patu batela.
26 Se alë vla modoia modoia,
mandji se dajantu julamentu shi ëli bi fë deenchi nna nguë ineñ shi tudu sa nguë fesa,
se ëli na paadji naga ëlif.
27 Se öshi öshi se alë manda uan shividölö ku odji pa bi ku jasa Zhuan Bachita.
Se masebu se bai se pota Zhuan gochi dantu djili,
28 se ëli ten bi ku jasa liba uan patu batela.
Se ëli da mina naamain sai,
se ëli da main dëli.
29 Se ta nna balë Zhuan ba tëndë jö sai,
se ineñ bai se ineñ ma mochi dëli se ineñ ma ba ntela pë spitula.
Djisu da uan möi pöjödölö kumu
30 Tadashi se nna apostol zhunta ku Djisu se ineñ da ëli lazhan jö ineñ shi ineñ fë ku jö ineñ shi ineñ ten shina nguë.
Jesús alimenta a los cinco mil (Marcos 6.30-44)
31 Se Djisu faa ineñ:
«Namsëdji bi,
pa no moso bai valadji pa no ba uan jamian gavu pa no ba djiskansa».
Pakë uan sapa nguë bi ska be ja bi ku ba toja ku ineñ na të tempu pa ineñ kumuf.
32 Se ineñ be dantu uan batelu ba uan jamian sölö sölö.
33 Mandji se uan sapa nguë bë öshi ineñ bi ska bai,
tadashi se nna nguë ineñ shi së fo loso loso tudu jölë ba ala,
se ineñ ba da ala pimëlu dëneñ.
34 *Se ta Djisu së se ëli bë uan sapa möi pöjödölö ineñ sai,
se ëli të dölö dëneñ,
pakë ineñ bi sa shimafan nna jabala shin ludjadölö;
se ëli jomesa ja shina ineñ uan sapa kuzhu.
35 Ta da tetadji kubidu,
se nna balë dëli iaba lome dëli se ineñ faa ëli:
—Jamian se sa dantu uan jamian sölö sölö,
se tetadji kubidu la ja ma bebezha.
36 Manda nna nguë ineñ se tudu pa ineñ bai,
valadji pa ineñ ba matu matu ku loso loso peetu ineñ sai pa ineñ ba kumpa ja pa ineñ kumu.
37 Mandji se Djisu kundji ineñ:
—Tuludöguë namsëdji da ineñ kumu.
Se ineñ kundji ëli:
—¡Jö sai ske sa pagu uan anu tabaia!
¿Bo ngongo pa no ba kumpa ku djiëlu se tudu,
valadji pa no paadji da ineñ kumu?
38 Se ëli pongota ineñ:
—¿Jantu ampan sa ku namsëdji?
Namsëdji ba ua.
Se ta ineñ ua,
se ineñ faa ëli:
—Shinku ku pishi dösu.
39 Tadashi se ëli manda pa nguë tudu tusan fë uachi uachi liba alba vëdji,
40 se ineñ tusan fë uachi uan dji sentu ku uan dji deshi shinku.
41 Se ëli ma ampan shinku ineñ se ku pishi dösu ineñ sai,
se ëli vla öiö da ösë,
se ëli da besa,
se ëli pachi ampan ineñ sai,
se ëli da nna balë dëli valadji pa ineñ pachi dantu nguë tudu.
Se ëli ten pachi pishi dösu ineñ se dantu nna nguë tudu.
42 Se ineñ tudu kumu,
se ineñ shia chipa.
43 Se ineñ totolo uan deshi ku dösu ojali shia ku dasu dasu ampan ku dji pishi.
44 Se nna nguë ineñ shi kumu ampan bi sa milidji shinku napai.
Djisu ska nda liba daua ku ope
45 Se öshi öshi,
se Djisu fë pa nna balë dëli lantela dantu batelu se ineñ be deenchi dëli benda sala bodo domali ba loso Betsaida,
se sa öshi ku ëli bi ska faa möi pöjödölö ineñ se be ku dezhu.
46 Se ta ëli faa ku ineñ jaba,
se ëli subili ba iki ba lezha.
47 Ta nöchi ma,
se ëli toja batelu bi sa metadji domali ja bai,
se ëli bi mdja san tela ëli moso,
48 se ëli bë amea shi ineñ bi ska laama ku foshi,
pakë oventu bi ska föfö lizhu fo pachi dovesa.
Se ta da mazhugadu,
se Djisu ba toja ineñ ja nda liba domali,
se ëli bi ngongo pasa ineñ ba deenchi.
49 Se ta ineñ bë ëli ska nda liba daua,
se ineñ mazhna fa ja fo sa uan lima;
se ineñ ten sa fa ja ta kidëlë;
50 pakë ineñ tudu bë ëli se mendu ma ineñ.
Mandji se öshi öshi se ëli faa ineñ:
«¡Namsëdji ma añimu.
Sa amu,
na menduf!».
51 Se ëli subili ba toja ineñ liba batelu,
se oventu ten manja,
se ineñ bi sombela amea ngandji,
se ineñ bi ska mdja ku böjö betu,
52 pakë ba toja öshi ineñ na bi tëndë ja ngandji shi ëli bi fë ku ampan ief,
dajantu ku ineñ bi sa kusan ödu.
Djisu ska kula nna nguë ineñ shi ska danchi Jenesaret
53 Se ta ineñ sata ba benda sala domali,
se ineñ ba da san tela Jenesaret se ineñ jaia pë ala.
54 Se ta ineñ dësë fo batelu moso,
se öshi öshi se pövu ba jönsë Djisu.
55 Se ineñ ja be ja jölë pasa loso loso ineñ se tudu,
se ja sa jamian shi ineñ ja be tudu,
se a ja ma nna nguë ska danchi tudu liba maka ba da ëli jamian shi ineñ ja tëndë fa ëli ja sa.
56 Se jamian shi ëli ja lantela tudu,
ja sa loso loso,
palea palea ö matu matu,
a ja pë nna nguë ineñ shi sa ku danchi tudu se a ja luga ëli pa sumanu pa ineñ paadji fala bodo bobolonda dëli;
se nna nguë ineñ shi ja fala ëli tudu ja kula.