Djisu kula uan masebu ku sa ku spitu fëiu
5
Se ineñ ten ba da benda sala domali,
san loso loso nna nguë gerasa.
2 Se i shi moso ku Djisu dësë fo batelu,
se bi da ope dëli uan masebu fo dantu spitula ku bi sa ku spitu fëiu.
Jesús expulsa unos demonios (Marcos 5.1-20)
3 Masebu se bi ska ta dantu spitula,
se zhugan nguë na bi paadji mala ëlifa,
ñi ku guianf.
4 Pakë uan sapa ope se a ja mala ëli öma ku ope tudu ku guian,
se olatuvëdji shi se ëli ja ska të pota,
se zhugan nguë na paadji mala ëli pë sanf.
5 Se ëli bi ska ndanda nöchi ku solo tudu liba spitula ku van iki iki,
ja ta kidëlë ku ten ja da öguë dëli ku budu.
6 Mandji se ta fo löndji ku ëli ba bë Djisu,
se ëli jölë ba ope dëli se ëli dajözhöiö deenchi dëli.
7 Se ëli ta uan fala kidëlë ku falagochi atu,
se ëli faa:
«¿Kë i shi sa dji bo ku amu,
Djisu,
Mina Nashian shi Atu mashi?
Amu jula tëjantu ku Nashiolo pa bo na tan tomenta amuf».
8 Pakë ëli bi ska faa ëli:
«¡Spitu fëiu,
së fo masebu sai!».
9 Se Djisu pongota ëli:
—¿Jama a ja sama bo?
Se ëli kundji:
—A ja sama amu Möi,
pakë no sa uan sapa.
10 Se ëli bi ska luga Djisu monchi pa na chila spitu fëfëiu ineñ se fo pachi loso loso ineñ sef.
11 Se bi sa ala lome van iki uan taba ögö pöjö ku bi sa ala ja kumu.
12 Se nna damono sa fa ja luga ëli:
«Da no ba da nna pöjö ineñ sai pa bo lega no lantela dantu dëneñ».
13 Se ëli lega ineñ,
se spitu fëfëiu ineñ se së fo masebu sai se tudu lantela dantu nna pöjö,
ku bi sa vala milidji dösu;
se ineñ jomesa ja jölë be basu ba toja ku ögö pono fo bonjo ba omali se ineñ mölë.
14 Se nna nguë ineñ shi bi ska fë lazhan pöjö ineñ se tudu jölë,
se ineñ da nna nguë palea ku nna nguë matu lazhan.
Se nguë tudu së ba ua jö shi shiga ala.
15 Se ta ineñ ba da jamian shi Djisu bi sa,
se ineñ bë masebu shi ku nna damono bi ska tomenta iai,
ku bi sa ku uan möi damono iai,
ja tusan,
bishidu,
ku miolo dëli sentadu.
Se mendu ma ineñ.
16 Se a da ineñ lazhan jö ineñ shi ku ineñ bë,
amea jö shi shiga nguë shi bi sa ku damono ku jö ineñ shi ten të ku nna pöjö.
17 Tadashi se ineñ jomesa ja luga ëli pa ëli së fo loso loso dëneñ.
18 Se ta Djisu bi ska lantela batelu,
se masebu shi bi sa ku damono iai bi ska luga ëli pa ëli lega pa ëli be ku ëli.
19 Mandji se Djisu na lega ëlif,
shina ëli faa ëli:
«Ba jadji bo,
ku nna namain bo,
pa bo da ineñ lazhan jö ineñ shi Shiölö fë da bo tudu,
ku amea shi ku ëli të mindjikodji ku bo».
20 Se masebu se ten bai,
se ëli ten jomesa ja ta lözhölö öluia dantu loso loso Dekapolis tudu,
ja ngangandji ineñ shi Djisu fë da ëli,
se nguë tudu gua ku böjö betu.
Mooso shi ska danchi ku mina naamain Jairo
21 Ta Djisu tan vla ku batelu ba benda bodo bodo benda sala,
se uan sapa möi pöjödölö tan zhunta pë lome dëli,
se ëli mdja bodo bodo domali.
22 Se bi uan nna jasa jasa jadji Nashian nna judio ku a ja sama ëli Jairo,
se ta ëli ba bë ëli,
se ëli dajözhöiö ope dëli,
23 se ëli luga ëli monchi,
ja faa:
«Mina naamain kichi amu ska mölë;
bi pa bo ba pë öma bo liba dëli valadji pa ëli kula ku pa ëli tan ngaia vida».
24 Se Djisu be ku ëli,
se uan sapa möi pöjödölö bi ska lë ëli,
se ineñ bi ska peta peta pë ëli.
25 Mandji se uan mooso ku amea deshi danu ku dösu ku ëli bi ska padësë ku sangui bukadu,
26 se ëli ma mavida monchi öma uan sapa nna babëlu,
se ëli da pagu ku jö ineñ shi bi sa ku ëli tudu,
mandji se na bi shivi da zhugan jaf.
Shina ëli bi ska sinchi öguë dëli fëiu mashi.
27 Ta ëli tëndë lazhan tëjantu ku Djisu,
se ëli iaba tashi dantu möi pöjödölö ineñ sai,
se ëli fala panu dëli.
28 Pakë ëli bi ska mazhna ja faa:
«Shi amu ja paadji fala panu dëli moso,
se amu ske sa kula».
29 Se öshi öshime se sangui bukadu dëli pota,
se ëli sinchi dantu döguë dëli fa ëli sa kuladu fo danchi sai.
30 Se öshi öshime se Djisu,
ku se jönsë pödë shi së fo tuludöguë dëli,
se ëli vla öiö da möi pöjödölö se ëli pongota:
«¿Kë nguë fala bitidu amu?».
31 Se nna balë dëli faa ëli:
«Bo ska bë fa nguë tudu ska peta peta pë bo,
se bo ska faa:
“¿Kë nguë fala amu?”».
32 Mandji se ëli bi ska pia lome dëli,
valadji pa ëli bë nguë shi fë jö sai.
33 Tadashi se mooso sai,
ku mendu ja timbla,
ku ba sëbë jö shi ku bi shiga ku ëli,
se ëli bi se ëli dajözhöiö deenchi dëli,
se ëli da Djisu lazhan vedadji tudu.
34 Se ëli faa ëli:
«Mina amu,
jonfa bo se kula bo.
Bai ku padji ku pa bo sa kuladu fo danchi bo».
35 Ontolo Djisu bi ska faa fala,
moso se bi zhugan nguë fo jadji jasa jasa jadji Nashian nna judio,
ja faa:
«Mina naamain bo sa san mölidu;
¿jama fë bo tan ska fonta Meeth?».
36 Mandji se Djisu,
ta ba tëndë jö shi a bi ska faa,
se ëli faa jasa jasa jadji Nashian nna judio:
«Na menduf,
këlë moso».
37 Se ëli na lega pa zhugan nguë lë ëlif,
shina Pudul,
Sanchagu,
ku Zhuan namain Sanchagu.
38 Se ta ëli ba da jadji jasa jasa jadji Nashian nna judio ku ëli bë amea shi a ska fë tomenta ku nguë tudu bi ska sula ja ta kidëlë,
39 se ëli lantela se ëli faa ineñ:
«¿Ja fë ku namsëdji ska fë sapa tomenta ineñ sai ja sula amea sai?
Mina sai na sa möliduf,
shina ëli ska djuni».
40 Se ineñ ska li Djisu,
mandji se ëli manda pa nguë tudu së ba öluia,
se ëli ma pai dëli ku main dëli,
ku nna nguë ineñ shi ku ëli bi bai,
se ëli lantela jamian shi mina se bi sa.
41 Se ëli fala öma mina naamain sai se faa ëli:
«Talita kum» (ku ja da ötëndë fa:
Namooso sai,
bo se amu ska faa ku ëli,
¡lanta!).
42 Se öshi öshime se namooso se ten lanta se jomesa ja nda,
ëli bi sa ku deshi danu ku dösu.
Se öshi öshime se nna nguë tudu gua ku böjö betu.
43 Mandji se Djisu da odji pa na da zhugan nguë lazhan jö shi fëf,
se ëli da odji pa da namooso sai kumu.