Palavulu shimadölö
4
*Se Djisu tan jomesa ja shina nguë ja bodo bodo domali.
Se uan sapa möi pöjödölö zhunta pë valadji pa ineñ bë ëli,
se ëli subili ba liba uan batelu ku bi sa bodo bodo domali,
se ëli tusan,
se nguë tudu ten ta mdjadu bodo lalea lome domali.
2 Se ëli bi ska shina ineñ amea palavulu uan sapa kuzhu,
shimafan pachi shina ja dëli,
se ëli faa ineñ:
3 «Namsëdji tëndë jö sai:
Uan shimadölö se së ba shimian kuzhu.
4 Se ta ëli shimian ja jaba,
se uan pachi shimenchi pono da lome jamangandji,
se nna bichili bi se kumu.
5 Se utu pachi pono da dantu budu budu,
uan jamian ku na të san dalea monchif,
se shimenchi se labenta dandjian,
pakë san na bi sa funduf;
6 mandji se ta solo së,
se dajantu ku ëli na bi të leezhaf,
se ëli soja.
7 Se utu pachi pono da dantu pian pian,
se ta pian pian këësë,
ku ineñ mölë,
se amea sai se ineñ na da fulutaf.
8 Mandji se utu pachi pono da san dalea matu gavu,
se ineñ da pali döpa,
se ineñ këësë,
se pali chirinta,
deshi sëishi;
ba toja uan sentu da unian».
9 Se ëli tan faa ineñ:
«Nguë shi ja të olea,
pa ëli ja tëndë».
Ja fë ëli ja faa fala ku palavulu
10 Se ta ëli sa ëli moso,
se nna balë deshi ku dösu ku nna nguë ineñ shi bi sa lome dëli se pongota ëli amea palavulu sai.
11 Se ëli kundji ineñ:
«Amu da namsëdji lazhan kumi jö ineñ shi të ku gövöndölö Nashiolo,
mandji se nna nguë ineñ shi sa nna nguë döluia,
se ineñ ja ma ja tudu amea palavulu,
12 valadji pa:
“Se benga zha pa ineñ ja ska bë ku öiö,
se ineñ na ja bë jaf;
se benga zha pa ineñ ja ska tëndë ku olea,
se ineñ na ja tëndëf;
valadji pa ineñ na tan ja vla ku ope tashif,
pa ja pada pekadu dëneñf”».
Djisu ska da ineñ ötëndë palavulu shimadölö
13 Se ëli faa ineñ:
«¿Namsëdji na ska tëndë palavulu sefa?
¿A kë amea shi namsëdji tan ske tëndë utu palavulu ineñ shiki?
14 Shimadölö se sa nguë shi ja shimian Fa Nashiolo.
15 Se shimenchi ineñ shi pono da jamangandji ska msa nna nguë ineñ shi tëndë fala,
mandji se i shi moso ineñ ja tëndë se öshi öshi se Satanas ja bi se ja chila fala shi a shimian pë dantu dëneñ folo.
16 Se utu nguë ja sa shimafan shimenchi ineñ shi a ja shimian pë san matu budu budu:
nna nguë ineñ shi ta ja tëndë fala ku öshi öshi se ineñ ja ma ku liguilia;
17 mandji se ta ineñ na ja ta leezha monchif,
se ineñ na ja paadji ta ope pë san,
dajantu shi se ta djisgalasa ja bi toja ineñ ö uan tempu fëiu ö a ja pëtëpë ineñ dajantu nova sai,
se dandjian se ineñ ja safa se ineñ ja fo ëli.
18 Utu ja sa ineñ shi a ja shimian pë dantu pian pian:
ineñ ja tëndë nova,
19 mandji se tave mundu sai,
ku ngongo ku gagavu ja ngaña ineñ,
se ineñ ja ngongo të ja tudu.
Se jö ineñ sai ku utu dishamentu fëfëiu mashi se ja lantela dantu dëneñ,
se ja fuka nova,
se na ja lega pa da pali döpaf.
20 Mandji se ineñ ku se a ja shimian pë san dalea matu gavu:
se sa nna nguë ineñ shi tëndë fala se ineñ ja ma,
se ineñ ja da fuluta ja da chirinta,
ku deshi sëishi,
ku uan sentu ku unian».
Palavulu fögö
21 *A shime ëli ten faa ineñ:
«¿Jativie a ja ma uan fögö pa pë basu uan kachabache ö pa pë basu uan jaama?
¿Na sa ja pa ja pë liba uan öpa jandjia ua?
22 *Pakë se ten sa amea shime,
ku na ten të zhugan ja jöndjidu ku a na ja sëbëf,
ñi zhugan ja jöndjidu ku a na ske bi bi jönsëf.
23 Shi uan nguë ja të olea,
pa ëli ja tëndë».
24 *Se ëli tan vlame faa ineñ:
«Namsëdji pia jö ineñ shi namsëdji ja ska tëndë,
pakë amea shi ku namsëdji ja mindji utu nguë,
se a ten ske ja mindji namsëdji,
se a tan ske ja mindji namsëdji mashi.
25 *Pakë ja sa nguë shi ja të,
se a tan ske da ëli mashi,
mandji se nguë shi na ja tëf,
ba toja fi jö shi sa ku ëli iai se a tan ske chila fo ëli».
Palavulu shimenchi shi ska këësë
26 Se Djisu tan faa ineñ:
«Se sa amea shi ten ja fë ku gövöndölö Nashiolo,
shimafan ta uan masebu ja shimian shimenchi pë san matu,
27 se benga zha pa ëli ska djuni ö pa ëli sa lantadu,
pa sa nöchi kubidu ö solomedjian,
shimenchi se ja ska labenta se ska këësë shinke ëli se amea shi ska këësë.
28 Pakë san matu se ja labenta ja tudu ku öma dëli,
pimëlu ëli ja së uan alba,
zha se ja bi öpa alba,
zha se jabamentu ja bi pali döpa ku ske shia öpa alba.
29 Se i shi moso ku fuluta ja sa bibidu se a ja mëtë faja joki,
pakë tempu totolo pali döpa da zha».
Palavulu shimenchi mostasa
30 Se Djisu tan faa ineñ:
«¿A kë ja ku ja sa shimafan gövöndölö Nashiolo,
ö kë palavulu shi no ja fo bë shimafan ja tan kë ëli?
31 Sa fidu uan shimenchi mostasa ku ta a ja shimian pë san dalea matu,
ku se sa shimenchi shi ja kichi mashi dantu mundu.
32 Mandji se ta a ja shimian ëli,
se ëli ja këësë se ëli se ja vla ngandji mashi dantu matu,
ku manga ngangandji ba toja ku nna paatu dösë tudu ja paadji fë jadji dëneñ pë basu sombolo dëli».
33 Se ku uan sapa palavulu shimafan ineñ sai se ëli bi ska shina nova,
amea shi pa ineñ paadji tëndë.
34 Mandji se ëli na bi ska faa ineñ zhugan ja shin palavuluf,
benga pa ëli ja da nna balë dëli lazhan ja tudu.
Djisu manja uan tavada
35 Ta da tetadji,
djia shime,
se Djisu faa nna balë dëli:
«No sapa ba benda sala».
Jesús calma la tormenta (Marcos 4.35-41)
36 Tadashi se ineñ lega möi pöjödölö ineñ sai pë ala,
se ineñ ma ëli amea shi ku ëli bi sa,
dantu batelu,
se tan bi të ku ëli utu batelu mashi.
37 Mandji se sota uan taba tavada ku uan oventu ödu ku bi ska fë ku pukulu domali bi ska ligui da batelu,
ba toja ku jomesa ja fundu.
38 Se ëli bi sa labu batelu ja djuni liba uan amiada.
Se ineñ lanta ëli se ineñ faa ëli:
«¡Meetha!
¿Bo na sa tave fa no ska mölëfa?».
39 Se eli lanta se ëli lonja öiö da oventu,
se ëli faa omali:
«¡Jaböjö!
¡Manja!».
Se oventu manja,
se ja tudu da masu.
40 Se eli faa ineñ:
«¿Jama fë namsëdji ska mendu amea sai?
¿Jama fë namsëdji na të jonfaf?».
41 Se mendu ngandji ma ineñ,
se ineñ sa fa ja pongota ineñ ineñ me:
«¿Kë nguë sa nguë sai,
ku ba toja oventu ku omali tudu ja tëndë ëli?».