Djisu kula uan nguë ska danchi uan djasubudu
3
Se Djisu tan vlame lantela dantu jadji Nashian nna judio,
se ala bi sa ku uan masebu ku bi sa ku uan öma danadu.
2 Se zhugan nguë bi ska supeta ëli ja pia i shi ëli ske kula masebu se djasubudu,
valadji pa ineñ paadji të ja tëjantu ku ëli.
3 Se ëli faa masebu se sa ku uan öma danadu iai:
«Lanta pa bo ta mdjadu metadji nguë tudu».
4 Zha se ëli pongota ineñ:
«¿Ja sa legadu pa paadji fë ja gavu ö ja fëiu uan djasubudu?
¿Sava uan vida ö chila uan vida folo?».
Mandji se ineñ da filili.
5 Tadashi se Djisu ta mdja ja pia ineñ ku pashian ku modoia,
da kusan ödu dëneñ,
se ëli faa masebu sai:
«Tezha öma bo».
Se ëli ten tezha öma dëli,
se öma dëli ten vla kuladu.
6 Mandji se i shi moso ku nna fariseo së fo ala,
se ineñ sa fa ja fë vadu ku pachidu nna nguë alë Erodes ja jua amea shi pa ineñ chila ëli vida folo.
Uan möi pöjödölö ska lë Djisu
7 Mandji se Djisu ma nna balë dëli se ineñ ba bodo domali,
se uan sapa möi pöjödölö fo Galilea bi ska lë ëli.
8 Se ta ineñ ba sëbë ja ngangandji ineñ shi ëli bi ska fë,
se a shime uan sapa nguë ten së fo Judea,
ku nna nguë ten së fo Jerusalen,
ku dji Idumea,
ku nna nguë benda benda sala lubela Jordan ku nna nguë loso loso Tiro ku Sidon.
9 *Dajantu shi,
se Djisu faa nna balë dëli pa ineñ fë vadu uan batelu pë,
valadji pa nna pövu na zhunta pa peta peta pë ëlif.
10 Pakë ëli bi kula uan sapa nguë bebezha,
mandji se ontolo bi të uan sapa dji nguë ku bi ska danchi se ineñ tudu bi ska jua amea shi pa ineñ fala ëli.
11 Se ta nna nguë ineñ shi sa ku spitu fëfëiu,
ja ku öiö ba bë ëli,
se ineñ ja dajözhöiö deenchi dëli ja faa fala ja ta kidëlë:
«Bo se sa Mina Nashiolo».
12 Mandji se ëli bi ska da ineñ odji ku foshi valadji pa ineñ na da lazhan nguë shi sa ëlif.
Djisu ska ma nna balë dëli deshi ku dösu
13 Se Djisu subili ba uan iki,
se ëli sama nna nguë ineñ shi ëli bi ngongo ma,
se ineñ zhunta ku ëli.
14 Se ëli ma nna deshi ku dösu,
se ëli sama ineñ apostol,*+
valadji pa ineñ be ku ëli ku pa ëli manda ineñ ba pegua,
15 ku pödë valadji pa ineñ ja kula danchi danchi*+ ku valadji pa ja chila damono fo nguë.
16 Se ineñ sai se sa deshi ku dösu ineñ shi ëli bi ma:
Shiman nguë shi ëli pë namu ja sama Pudul;
17 Sanchagu ku namain dëli Zhuan,
nna mina Sebedeo,
ku a ten pë ineñ namu ja sama Boanerges (ku sa:
«nna mina santababla»),
18 Andëlë,
Filipa,
Bartolome,
Matë,
Tomashi,
Sanchagu mina Alfeo,
Tadeo,
Shiman nguë shi sa nguë kanan,
19 Judas Iskariote nguë shi vëndë Djisu.
Pogogovan tëjantu ku Djisu
20 Zha se Djisu lantela dantu uan jadji,
se tan vlame zhunta uan sapa nguë,
ku fë ku ñi ëli na paadji kumu ku nna balë dëlif.
21 Se ta nna nguë jadji Djisu ba sëbë fa ëli sa ala,
se ineñ bai pa ineñ ba ma ëli bi ku ineñ,
pakë ineñ bi ska faa:
«Ëli sa ku miolo bukadu».
22 *Mandji se nna meeth dalë ku bi ba Jerusalen bi ska faa:
«¡Masebu sa ku Belsebu!
Ëli ja chila nna damono amea mina dalë nna damono».
23 Tadashi se Djisu sama ineñ se faa ineñ uan palavulu:
«¿Jama fë Satanas ja paadji chila Satanas fo öguë dëli me?
24 Shi uan gövöndölö ja sa pachidu tëjantu ku tuludöguë dëli me,
tili gövöndölö sai na ske paadji ta mdjaduf.
25 Se shi uan jadji ja sa pachidu tëjantu ku tuludöguë dëli me,
tili jadji sai na ske paadji ta mdjaduf.
26 Se shi Satanas ja pezha ku tuludöguë dëli me,
ëli ja sa pachidu,
ëli na ske paadji ta mdjaduf,
shina jabamentu dëli ska da bebezha.
27 Zhugan nguë na paadji lantela dantu jadji uan masebu ödu pa ëli futa gagavu dëli tudu afoshif,
shi ëli na ja mala ëli pimëluf,
se sa öshi moso ku ëli ja paadji futa gagavu dëli afoshi.
28 »Anta vedadji se amu faa namsëdji fa pekadu tudu ku fala zhogoveadu nna nguë tudu a ske pada ineñ amea shime:
29 *mandji se ja sa nguë shi ja faa fala zhogoveadu tëjantu ku Spitu Santu,
zhugan djia ëli na ske sa padaduf,
shina ëli ske sa ku kupa pekadu chindadji».
30 Djisu faa jö ineñ sai pakë ineñ bi ska faa ëli sa ku uan spitu fëiu.
Main Djisu ku nna namain dëli
31 Se ten sa öshi main ku nna namain Djisu ten bi ba ala,
mandji se ineñ mdja öluia se ineñ manda uan nguë pa ba sama ëli.
32 Se nna nguë ineñ shi bi sa ala ja tusan ku ludja ëli pë metadji se faa ëli:
«Main bo ku nna namain bo ku nna namain naamain bo sa öluia,
se ineñ ska jua bo».
33 Mandji se ëli kundji ineñ:
«¿Kë nna nguë sa main amu ku nna namain amu?».
34 Zha,
se ëli pia nna nguë ineñ shi bi ska tusan ludja ëli pë metadji,
se ëli tan faa:
«Nna nguë ineñ sai se sa nna main amu ku nna namain amu.
35 Pakë ja sa nguë shi ja fë vintadji Nashiolo nguë sai se sa namain amu,
namain naamain amu ku main amu».