Djisu kula uan masebu ku sa ojogo
2
Ta da zhugan djia,
se Djisu tan vlame lantela ba loso Kapernaum.
Se i shi moso ku a ba sëbë fa ëli bi sa jadji.
2 Se uan möi pöjödölö zhunta pë ala ku na tan bi të jamian deenchi böjö potof;
se ëli bi ska pegua nova gavu da ineñ.
3 Tadashi se bi napai jatulu ku bi ska gaga uan masebu ku bi sa ojogo.
4 Mandji se ta bi të uan möi pöjödölö ku bi ska fë pa ineñ na bi paadji iaba lome dëlif,
se ineñ lanja uan pachi van dötë jadji sai,
se ineñ fë uan bagadu se ineñ da ojogo se sa tovesadu liba maka iai ba basu.
5 Se ta Djisu ba bë amea jonfa dëneñ,
se ëli faa ojogo sai:
«Mina amu,
pekadu bo tudu sa padadu».
6 Se bi sa ala ja tusan zhugan nna meeth dalë,
se ineñ sa fa ja mazhna dantu kusan dëneñ:
7 «¿Jama fë nguë sai ska faa uan ja shi?
Ëli ska faa fala zhogoveadu.
¿Kë nguë paadji pada pekadu,
shina Nashian moso?».
8 Mandji se öshi öshime se Djisu dantu spitu dëli bi sëbë jö shi ineñ bi ska mazhna dantu kusan dëneñ,
se ëli pongota ineñ:
«¿Jama fë namsëdji ska mazhna amea sai dantu kusan namsëdji?
9 ¿Kë ja sa levu mashi,
pa faa ojogo sai:
“Pekadu bo tudu sa padadu” ö pa faa:
“Lanta,
ma maka bo pa bo nda”?
10 Mandji se valadji pa namsëdji sëbë fa Mina Napai Dösë të pödë liba tela sai valadji pa ëli pada pekadu tudu».
Tadashi se ëli faa masebu ojogo se:
11 «Bo se amu ska faa ku ëli,
lanta,
ma maka bo,
ku pa bo ba jadji bo».
12 Tadashi se ëli lanta,
se ëli ma maka dëli se ëli së fo ala,
deenchi nguë tudu.
Se dajantu shi,
se nguë tudu gua ku böjö betu ja da Nashian ilö,
ja faa:
«Zhugan djia no na sa bë zhugan ja shi ie zhaf».
Djisu ska sama Levi
13 Zha se Djisu tan vlame ba benda bodo domali,
se nguë tudu bi ska toja ëli,
se ëli bi ska shina ineñ kuzhu.
14 Se ta ëli pasa,
se ëli bë Levi mina Alfeo,
ku bi ska tusan liba uan banku ja ma tesu.
Se ëli faa ëli:
«Lë amu».
Se Levi lanta se lë ëli.
15 Se bi fë,
se Djisu bi sa dantu jadji Levi liba mezha ja kumu,
se uan sapa nna nguë ma tesu,
ku nna pekadölö,
se ineñ tudu ku Djisu ku nna balë dëli bi sa liba mezha,
pakë ten bi të uan sapa dji nguë ku bi ska lë ineñ.
16 Se ta nna meeth dalë ku nna fariseo,
ba bë fa ëli ska kumu ku nna nguë ma tesu ku nna pekadölö,
se ineñ pongota nna balë dëli:
«¿Jama fë meeth namsëdji ja kumu ku nna nguë tesu ku nna pekadölö?».
17 Se ta Djisu tëndë jö sai,
se ëli faa ineñ:
«Nna nguë ineñ shi ja sa lizhu na ja fë ineñ fata babëluf,
shina nna nguë ineñ shi ja ska danchi.
Amu na bi pa amu bi sama nna nguë dëtuf,
shina a nna pekadölö».
Pongota tëjantu ku zhedu böjö
18 Se ta ineñ bë nna balë Zhuan Bachita ku nna fariseo bi ska ta shin chila zhedu böjö,
se zhugan nguë ba bë Djisu se ineñ pongota ëli:
—¿Jama fë nna balë Zhuan ku nna fariseo ja ska ta shin chila zhedu böjö,
se nna balë bo ja ska chila zhedu böjöf?
19 Se Djisu kundji ineñ:
—¿Sa fa nna nguë ineñ shi pai jazhadu sama ba uan jazha,
ineñ paadji ta ku zhedu böjö öshi ontolo ëli sa ku ineñ?
Ineñ na paadji fë öshi ontolo pai jazhadu sa ku ineñf.
20 Mandji se ske da djia shi a ske ma pai jazhadu bai,
se djia sai se ineñ ske ta ku zhedu böjö.
21 »Zhugan nguë na ja ta uan menda ku dasu panu novu pë bitidu veiuf,
pakë panu shi novu ja të bitidu shi veiu të baga,
se bagadu dëli tan ja ngandji mashi.
22 Ñi zhugan nguë na ten ja ta vian novu pë dantu mataku peli veiuf,
pakë vian novu ja fë se peli ja labenta,
se vian ja buka se peli ten ja dana.
Dajantu shi se ta pa vian novu pa ja ta pë mataku peli novu.
Shiölö djasubudu
23 Uan djasubudu,
se Djisu ku nna balë dëli bi ska pasa dantu matu shimadu tulugu,
se nna balë dëli jomesa ja lanja zhugan ope jambabu tulugu.
24 Se nna fariseo pongota ëli:
—Ja pia,
¿jama fë nna balë bo ska fë uan ja ku a na ja lega pa fë uan djasubuduf?
25 Mandji se ëli faa ineñ:
—¿Zhugan djia namsëdji na sa lëë jö shi alë David fë ku nna jamada dëli,
ta ineñ bi të dishamentu ku ineñ ten bi sa ku faku ua?
26 Ta Abiatar se bi sa jasa jasa padjil,
se alë David lantela dantu jadji Nashiolo se ëli kumu ampan santu,
ku nna padjil moso se a ja lega pa kumu,
se ëli ten da nna nguë ineñ shi bi ska be ku ëli.
27 Se Djisu tan faa ineñ: