EVANJELIO KU
SAN MARKO
SKËVË
Zhuan Bachita fë vadu jamangandji
1
Jomesadu nova gavu Djisu ku se sa Kilitu,
Mina Nashiolo.
2 Amea shi sa skividu dantu lavulu pantafala Isaias:
«Amu ske manda nguë shi pa ma nova amu bai deenchi jala bo,
ku ëli se ske fë vadu jamangandji bo pë deenchi bo.
3 Sa falagochi uan nguë ku ja ta kidëlë dantu jamian sölö sölö:
“¡Ja ska fë vadu jamangandji da Shiölö!
¡Bla jamangandji dëtu dëli!”».
4 Se bi Zhuan Bachita dantu jamian sölö sölö,
se ëli bi ska pegua bachizha pa tan vla ku ope tashi valadji pa pada pekadu tudu.
Jesús es bautizado (Marcos 1.4-11)
5 Se nna nguë loso loso Judea tudu,
ku nna nguë palea Jerusalen tudu bi ska toja ëli;
se ta ineñ ja jonfesa pekadu dëneñ,
se ëli bi ska bachizha ineñ dantu lubela Jordan.
6 Zhuan bi sa bitidu ku peli javalu lömba,
se ëli bi sa ku uan boto peli pë jadela dëli,
se ëli bi ska kumu padjintena ku meli mematu.
7 Se ëli bi ska pegua,
ja faa:
«Tashi amu ska bi uan nguë ku të pödë mashi ku amu,
uan nguë ku amu na të ondolo shi pa amu kuia pa amu sota jodo ja mëtëpope dëlif.
8 Amu ska bachizha namsëdji ku aua,
mandji se ëli ske bachizha namsëdji ku Spitu Santu».
Zhuan ska bachizha Djisu
9 Se bi shiga dantu djia ineñ sai,
ku Djisu bi fo Nasaret dji loso loso Galilea,
se Zhuan bachizha ëli dantu lubela Jordan.
10 Se öshi moso,
ku ëli ska subili fo dantu daua,
se ëli bë ösë bi ska bla se Spitu shimafan uan löla,
se dësë ba liba dëli.
11 *Se a tëndë uan falagochi fo ösë ösë,
ku bi ska faa:
«Bo se sa Mina ngongodu amu,
pakë bo se ja fë amu të liguilia».
Djisu sa dantu jamian sölö sölö
12 Se öshi öshi se Spitu Santu ma Djisu ba dantu uan jamian sölö sölö.
13 Se ëli bi ska ta jamian sölö sölö deshi jatulu djia,
dantu nna limaia zhenchi,
se Satanas bi ska fë ëli tentasan,
se nna anzhu bi se ska shivi ëli.
Djisu jomesa sulvisu dëli
14 Se ta a mëtë Zhuan pë djili,
se Djisu ba Galilea pa ëli ba pegua nova gavu Nashiolo.
15 *Se ëli bi ska faa:
«Tempu kumpli bebezha.
Se gövöndölö Nashian sa peetu ku namsëdji bebezha,
namsëdji tan vla ku ope tashi,
pa namsëdji këlë nova gavu».
Djisu sama nna piskadölö jatulu
16 Se Djisu bi ska nda bodo bodo domali Galilea,
se ëli bë Shiman ku namain dëli Andëlë,
ku bi ska ta alëdë ba omali,
pakë ineñ bi sa piskadölö.
17 Se Djisu faa ineñ:
«Namsëdji lë amu,
se amu ske fë pa namsëdji sa piskadölö nna pöjödölö».
18 Se öshi öshi se ineñ lega alëdë pë,
se ineñ lë ëli.
19 Se uan fi ja be deenchi mashi,
se ëli bë Sanchagu ku namain dëli Zhuan,
nna mina Sebedeo,
ku ten bi sa dantu uan batelu ja jözhë alëdë pë.
20 Se öshi öshi se ëli sama ineñ,
se ineñ lega pai dëneñ Sebedeo pë dantu batelu ku nna tabaiadölö,
se ineñ lë ëli bai.
Uan masebu ku bi sa ku spitu fëiu
21 Se ineñ lantela dantu loso Kapernaum,
se ta da djasubudu,
se Djisu lantela dantu jadji Nashian nna judio se ëli jomesa ja shina nguë kuzhu.
22 *Se nguë tudu gua ku böjö betu amea shi ëli bi ska shina ineñ kuzhu,
pakë ëli bi ska fë ku pödë,
ku na sa shimafan nna meeth dalëf.
23 Se öshi öshime,
se dantu jadji Nashian nna judio bi sa ala uan masebu ku bi sa ku uan spitu fëiu,
se ëli jomesa ja ta kidëlë:
24 «¿Ja fë bo ska lantela dantu metadji no,
Djisu Nasaret?
¿Bo bi të no të fea fea?
No sëbë fa bo se sa Santu Nashiolo».
25 Mandji se Djisu lonja öiö da spitu fëiu sai,
ja faa ëli:
«¡Jaböjö!
¡Së folo masebu sai!».
26 Se spitu fëiu se sugudji masebu se ku amea buku buku,
se ëli së fo ëli ja ta kidëlë ku falagochi atu.
27 Se nguë tudu mdja ku böjö betu,
se amea sai se ineñ bi ska të pufia ku ineñ ineñ me,
ja faa:
«¿A kë i shi sa i sai?
¡Ëli ja shina nguë ja novu amea patadu,
ku pödë!
¡Se ba toja ku ëli ja da nna spitu fëfëiu odji se ineñ ja tëndë ëli!».
28 Se öshi öshi se monova gavu dëli panta panta pachi loso loso ineñ shi sa ludjadu Galilea tudu.
Djisu kula sogolo Shiman
29 Se ta ineñ dandjian së fo jadji Nashian nna judio,
se Djisu bai ku Sanchagu ku Zhuan ba jadji Shiman ku Andëlë.
30 Se sogolo Shiman bi sa tovesadu ku fibil,
se a da Djisu lazhan.
31 Se ëli iaba lome dëli,
se ëli fala ëli öma se ëli lanta ëli,
se öshi öshime se fibil se lega ëli,
se ëli jomesa ja shivi ineñ.
Djisu kula uan sapa nna nguë sa ku danchi
32 Se ta da tetadji,
öshi solo bi ska daua,
se a ma nna nguë bi ska danchi tudu ku nna nguë ku bi sa ku damono ba da Djisu,
33 se pövu nguintëlu nguintëlu zhunta pë böjö poto.
34 Se ëli kula uan sapa dji nguë ku bi ska danchi,
se ëli ten chila damono fo uan sapa dji nguë,
mandji se ëli na bi ska lega pa nna damono faa falaf,
pakë ineñ jönsë kë nguë sa ëli.
Djisu ja pegua nova dantu jadji Nashian nna judio
35 Ta da mazhugadu,
öshi ontolo jamian bi sa kulu,
se Djisu lanta se ëli së fo palea sai valadji pa ëli ba uan jamian pa ëli sa ëli moso pa ëli ba lezha.
36 Se Shiman ku nna jamada dëli bai pa ineñ ba jua ëli;
37 se ta ineñ dajonta ku ëli se ineñ faa ëli:
—Nguë tudu ska jua bo.
38 Se ëli kundji ineñ:
—No bai utu loso loso ineñ shi peetu,
valadji pa amu ten ba pegua ala,
pakë dajantu jö sai se amu bi.
39 *Se amea sai se ëli ja bai loso loso Galilea tudu,
ja pegua nova gavu dantu jadji Nashian nna judio ku ten ja chila nna damono fo nguë.
Djisu kula uan masebu ku sa ku lepla
40 Uan masebu ku bi sa ku lepla se iabi lome Djisu,
se ëli dajözhöiö se ja luga ëli:
—Shi bo ja ngongo,
bo paadji limpa amu.
41 Se ëli të mindjikodji dëli,
se tezha öma dëli se fala ëli,
ja faa ëli:
—Shiën,
amu ngongo,
¡vla limpadu!
42 Se öshi öshime se lepla se ten së fo ëli,
se masebu se ten vla limpi pepepe.
43 Se ëli faa ëli pa ëli bai ku dezhu ku uan odji ödu,
se ëli faa ëli:
44 —Ja pia,
bo na ja da zhugan nguë lazhanf,
shina bo ja bai pa bo msa padjil öguë bo,
ku pa bo da ja gavu shi ku alë Moises manda pa ja da tëjantu ku limpa öguë,
valadji pa sa lazhan gavu da ineñ.
45 Mandji se masebu se be se jomesa ja ta lözhölö öluia da jö shi shiga ëli.
Dajantu shi se Djisu na tan bi paadji lantela dantu zhugan loso ineñ se legaduf,
tadashi se ëli ja mdja öluia,
jamian shi na ja të zhugan nguëf.
Mandji se nguë tudu bi ska së fo jamian tudu pa bi bë ëli.