Evanjelio shi ku San Marko skëvë, pimëlu pachi jö shi sa skividu ja msa no jö shi ten sa dantu dëli: Jomesadu nova gavu Djisu, Kilitu, Mina Nashiolo (1:1). Se öshime se ëli ja msa Zhuan Bachita shimafan nguë shi ske bi fë vadu jamangandji pë da ëli (1:2-3). Skëvëdölö evanjelio sai ja ngongo msa uan nova gavu da nguë tudu. Nova gavu Djisu sai sa ku sinchidu dösu: pakë tuludöguë Djisu se jomesa ja pegua nova sai, se ta nna nguë ineñ shi Djisu manda pa ba pegua tudu, bi ska faa fala tëjantu ku ëli.

Dantu evanjelio sai, Marko ja ngongo msa Djisu shimafan uan masebu cheche amea fidu ja dëli, valadji pa fidu ja dëli ja da nguë öiö tëndë kë nguë sa ëli. Jativie dajantu shi se ëli na ja da lazhan amea shi a pali Djisuf, shina fo djia bachizha dëli (1:9-13). Marko ja msa fa, vida ku mölë Djisu se ja da lazhan fa ëli bi valadji pa ëli shivi utu nguë ku valadji pa ëli fë pa nna nguë shi sa sëlëva pekadu ja sa legadu, benga zha pa sa fa jö sai bi ske ma ëli ba mölë (10:45). Marko ja msa no fa, benga zha pa Djisu da pövu tela dëli shinali tudu, na ja sa ineñf, shina uan nguë utu tela patadu, uan sodadji nna nguë roma, se ja da lazhan ntëlelele faa: «Anta vedadji masebu sai se bi sa Mina Nashiolo» (15:39).