1 Ta pasa djasubudu,

pamasedu pimëlu djia sumanu,

se Malia Magdalena ku Malia shiki ba ua spitula.

2 Se bi të uan san vlamëtë ödu,

pakë uan anzhu Shiölö bi dësë fo ösë se bi,

se vla budu se folo,

se tusan liba dëli.

3 Fesan anzhu sai bi sa shimafan dji uan lali,

se bitidu dëli bi sa banku pepepe shimafan növu.

4 Se mendu ma nna guada dajantu dëli ba toja ku ineñ jomesa ja timbla se ineñ tudu vla shimafan mochi.

5 Se anzhu se faa nna naamain ineñ sai:

«Namsëdji na menduf,

pakë amu sëbë fa namsëdji ska jua Djisu,

nguë shi a bi da pë kusu iai.

6 Ëli na sa ief,

pakë ëli tan lanta,

amea shi ku ëli bi faa iai.

Namsëdji bi,

pa bë jamian shi a bi pë ëli.

7 Namsëdji bai dandjian pa ba faa nna balë dëli:

“Ëli lanta fo dantu nna nguë mölidu,

ja pia ëli sa deenchi namsëdji ja be Galilea.

Ala se namsëdji ske bë ëli”.

Ja pia,

amu faa namsëdji bebezha».

8 Se amea sai se nna mooso ineñ sai jölë dandjian fo spitula,

ku mendu mandji ku liguilia,

se ineñ jölë pa ineñ ba da nna balë nova sai.

9 Se sa öshime ku Djisu së bi toja ineñ se ëli da ineñ manten.

Se ineñ ten iaba ba toja ëli,

se ineñ ablasa ëli ope se ineñ adola ëli.

10 Se Djisu faa ineñ:

«Namsëdji na menduf.

Namsëdji bai pa ba faa nna namain amu fa pa ineñ ba Galilea,

se ala se ineñ ske bë amu».

11 Se öshi ontolo ineñ sa jamangandji ja bai,

se zhugan nna sodadji ku bi sa guada lantela dantu palea se ineñ da nna jasa jasa padjil lazhan jö ineñ bi shiga ala tudu.

12 Tadashi se nna jasa jasa padjil ku nna jasa jasa pövu zhunta pa ineñ sa ku uan fala soso,

se ineñ da nna sodadji uan sapa djiëlu,

13 se ineñ faa ineñ:

«Namsëdji ja faa nna balë Djisu bi bi nöchi sai,

öshi ontolo namsëdji bi ska djuni,

se ineñ futa öguë dëli.

14 Se shi gövöndölö ja tëndë jö sai,

no ske kundji da pachi namsëdji se no ske panta ja sa djisgalasa shi ske shiga iai».

15 Se amea sai se nna sodadji ma djiëlu se ineñ fë amea shi a bi bi faa ineñ.

Lazhan sai se sa jö shi a ja faa da amea shi ja bi bi shiga bi toja ödjai dantu nna judio.

16 ^*Se nna balë deshi ku unian ba Galilea,

ba van iki shi Djisu bi bi msa ineñ iai.

17 Ta ineñ bë ëli,

se ineñ adola ëli;

mandji se zhugan ineñ bi ska të butanja.

18 Tadashi se Djisu iaba jamian shi ineñ sa se ëli faa ineñ:

«A da amu pödë tudu liba dösë ku san tela.

19 ^*Dajantu shi,

namsëdji ja bai pa namsëdji ja fë nna balë tela tela tudu,

ja bachizha ineñ a namu Pai ku dji Mina ku dji Spitu Santu,

20 ja shina ineñ pa ineñ ja tëndë jö ineñ shi amu manda namsëdji tudu.

Anta vedadji se amu faa namsëdji fa amu ske sa ku namsëdji pa sempele,

ba toja jabamentu mundu».