1 Ta da pamasedu,

se nna jasa jasa padjil ku nna jasa jasa pövu mazhna pa ineñ kondena Djisu pa ëli mölë.

2 Se ineñ mala ëli,

se ineñ ma ëli ba da Pilatu,

ku bi sa gövöndölö.

3 ^*Se ta Judas,

nguë bi vëndë ëli iai,

ta ëli ba bë fa ineñ kondena ëli,

se ëli da pekadu,

se ëli tan vlame da nna jasa jasa padjil ku nna jasa jasa pövu deshi tëishi djiëlu plata dëneñ.

Se ëli faa ineñ:

4 —Amu fë pekadu,

pakë amu da sangui nasenchi.

Se ineñ kundji ëli:

—¿Se kë ja no sa tave jö sai?

¡Aia bo!

5 Tadashi se Judas zhuga djiëlu ineñ se ta pë dantu jadji Nashiolo se ëli së fo ala.

Zha se ëli bai se ëli pindja öguë dëli.

6 Se nna jasa jasa padjil totolo djiëlu ineñ sai se ineñ faa:

«Alë na ja lega pa ta djiëlu ineñ se ba dantu bakisi jadji Nashianf,

pakë sa pagu sangui».

7 Se amea sai se ineñ tudu faa pa ku djiëlu sai pa kumpa uan san ku a ja jönsë shimafan Matu Pai Iguia,

valadji pa ala se a ja ntela nna nguë utu tela patadu pë.

8 Dajantu shi se bi toja ödjai a ja sama matu sai «Matu Sangui».

9 Se amea sai se kumpli ku jö shi pantafala Jeremias bi bi faa:

11 Ta a ma Djisu ba deenchi gövöndölö,

se ëli pongota ëli:

—¿Bo se sa alë nna judio?

Se Djisu kundji ëli:

—Bo se fala.

12 Se dajantu ku nna jasa jasa padjil ku nna jasa jasa pövu bi ska mucha da ëli,

se ëli na kundji ineñ zhugan jaf.

13 Tadashi se Pilatu faa ëli:

—¿Bo na ska tëndë jö ineñ shi a ska faa tëjantu ku bofa?

14 Mandji se ëli na kundji zhugan ponodu fala shi tëjantu ku ëlif,

dajantu shi se gövöndölö mdja ku böjö betu ngandji.

15 Dantu djia fesa,

se bi sa ku kutumu pa gövöndölö ja sota uan djilima da pövu,

ja sa nguë shi ineñ ja ngongo iai.

16 Se ineñ bi sa ku uan djilima jönshidu ku a ja sama ëli Barabas.

17-18 Se fë ku ta Pilatu zhunta ku möi pöjödölö ineñ sai,

ku se ëli bi sëbë fa a ma Djisu bi da ëli dajantu pashian,

se ëli pongota ineñ:

«¿Kë nguë namsëdji ngongo pa amu chila fo djili:

Barabas ö Djisu,

nguë shi namsëdji ja sama Kilitu iai?».

19 Se öshi Pilatu bi ska tusan liba töli djustishi,

se miela dëli da uan lazhan bi da ëli,

ja faa ëli amea sai:

«Na mëtë öguë bo ku masebu dëtu sef,

pakë dajantu dëli,

se ödjai se amu suian uan suian fëiu ku amu ma mavida monchi dantu suian sai».

20 Mandji se nna jasa jasa padjil ku nna jasa jasa pövu ma möi pöjödölö ineñ sai ku fala gagavu valadji pa ineñ pindji Pilatu pa sota Barabas ku pa chila Djisu vida folo.

21 Se gövöndölö kundji ineñ,

se faa ineñ:

—¿A kë nguë dantu ineñ dödösu ineñ sai ku namsëdji ngongo pa amu sota da namsëdji?

Se ineñ faa:

—A Barabas.

22 Se Pilatu faa ineñ:

—¿Se kë ja amu ske fë ku Djisu,

nguë shi a ja sama Kilitu iai?

Se nguë tudu kundji ëli:

—¡Da ëli pë kusu!

23 Se Pilatu kundji ineñ:

—¿Pakë?

¿Kë ja fëiu shi ku ëli fë?

Mandji se ineñ tan ja ta kidëlë mashi:

—¡Da ëli pë kusu!

24 Se ta Pilatu bë fa ëli na paadji fë zhugan jaf,

shina se sa öshi a tan ska fë tomenta mashi,

se ëli pindji pa ma aua bi da ëli se ëli laba öma deenchi nguë tudu.

Se ëli faa:

—Amu sa nasenchi da sangui masebu sai.

¡Aia namsëdji!

25 Se pövu tudu kundji:

—¡Pa sangui dëli pono da liba no ku dji nna mina no!

26 Tadashi se ëli sota Barabas;

mandji se ëli manda pa da Djisu ku valasöchi,

se ëli da ineñ ëli valadji pa ineñ da ëli pë kusu.

27 Se nna sodadji gövöndölö ma Djisu ba dantu jadji dalë se ineñ tudu zhunta ludja ëli pë metadji.

28 Se ineñ chila ëli bitidu se ineñ pë ëli uan taba bobolonda böbö.

29 Zha se ineñ fë uan jölöiö pian pian se ineñ bishi ëli pë ëli jasa dëli,

se ineñ pë uan öpa anjana öma dëtu dëli.

Se ineñ ja dajözhöiö deenchi dëli,

ja li ëli ja faa:

«¡Ilö,

alë nna judio!».

30 Se ineñ ja ta aböjö pë ëli,

se ineñ ja da ëli ku öpa anjana jasa dëli.

31 Ta ineñ li ëli jaba,

se ineñ chila bobolonda fo ëli,

se ineñ tan bishi ëli bitidu dëli,

se ineñ ma ëli bai,

valadji pa ba da ëli pë kusu.

32 Se ta ineñ bi ska së,

se ineñ dajonta ku uan masebu ku sa nguë loso loso Sirene ku a ja sama ëli Shiman,

se a fë ëli afoshi pa ëli gaga kusu.

33 Se ineñ ba da uan jamian ku a ja sama Golgota (ku a ten ja sama «Jamian Oso Jasa»).

34 Ala se a da ëli vian ku bi sa zhuntadu ku feli;

mandji se ta ëli ba puva,

se ëli na ngongo bëbëf.

35 Se a da ëli pë kusu se a pachi bitidu dëli ja jua suleta,

valadji pa kumpli jö shi pantafala bi faa iai:

«Se ineñ pachi bitidu amu dantu ineñ ineñ me,

se ineñ jua suleta liba bitidu amu».^*+

36 Se ineñ tusan pa ineñ ludja ëli.

37 Se liba van jasa dëli se ineñ pë uan skividu ja da lazhan jö shi fë ku a kondena ëli:

«Nguë sai se sa Djisu,

Alë nna judio».

38 Ku ëli ten bi sa dadu pë kusu nna futadölö dösu,

uan nguë benda dëtu se nguë shiki benda skedji.

39 Se nna nguë ineñ shi bi ska pasa ala ja sugudji jasa ja faa fala zhogoveadu tëjantu ku ëli:

40 ^*«Bo,

ku ja të jadji Nashiolo të lolo ku tan ja vlame fë dantu tëishi djia,

¡sava tuludöguë bo me!

¡Shi bo ja sa Mina Nashiolo,

dësë fo van kusu!».

41 Se ten sa amea shime ku nna jasa jasa padjil bi ska li ëli,

zhuntadu ku nna meeth dalë ku nna jasa jasa pövu.

42 Se ineñ bi ska faa:

«Ëli sava utu nguë,

¡mandji se ëli na paadji sava tuludöguë dëlif!

¡Pa Kilitu sai,

Alë Israel,

ten dësë öseshi fo van kusu,

valadji pa no këlë ëli!

43 Ëli jonfa Nashiolo;

pa Nashian sava ëli öseshi,

shi anta vedadji se ëli ngongo ku ëli.

¿Ëli na se bi faa:

“Amu sa Mina Nashian ua”?».

44 Se sa amea shime ku nna futadölö ineñ shi ku bi sa dadu pë kusu ku ëli iai ten bi ska suta ëli.

45 Se fo solomedjian ba toja tetadji se liba tela tudu vla kulu kulu.

46 Amea la tëishi tadji,

se Djisu ta kidëlë ku falagochi atu:

«Eli,

Eli,

¿lama sabaktani?»,

ku sa ku sinchidu:

«Nashian amu,

Nashian amu,

¿jama fë bo lega amu moso pë?».

47 Ta ineñ tëndë ëli,

se zhugan nna nguë ineñ bi sa ala mdjadu faa:

«Ëli ska sama pantafala Elias».

48 Se öshi öshi se uan ineñ jölë ba jua uan sapu.

Se ëli mala ku viniligui,

se ku uan öpa anjana se ëli da ëli valadji pa ëli bëbë.

49 Se utu nguë bi ska faa:

«Namsëdji lega ëli,

pa no bë i shi Elias ske bi sava ëli».

50 Tadashi se Djisu tan vlame ta kidëlë ku uan falagochi atu,

se ëli da spitu dëli bai.

51 Ja pia,

panu dantu jadji Nashiolo baga fë dösu fo liba bi basu.

Se san tela timbla se lapa lapa baga baga.

52 Se spitula tudu bla,

se uan sapa öguë nna santu santu ku tudu bi mölë bebezha tan lanta bi vida.

53 Se ineñ tudu së fo spitula se,

ta Djisu lanta fo mölë,

se ineñ lantela dantu palea santu se ineñ së uan sapa dji nguë ku supichi.

54 Ta feshali sodadji roma ku nna nguë ineñ shi bi ska ludja Djisu bë amea shi san vlamëtë ku jö ineñ shi bi shiga,

se mendu ma ineñ se ineñ faa:

«¡Anta vedadji nguë sai se bi sa Mina Nashiolo!».

55 ^*Bi sa ala uan sapa naamain ku bi ska pia fo löndji,

ineñ bi lë Djisu fo Galilea valadji pa ineñ bi ja shivi ëli.

56 Dantu ineñ bi sa ku Malia Magdalena,

Malia main Sanchagu ku Sandzhe,

ku main nna mina Sebedeo.

57 Se ta da tetadji,

se uan masebu liku loso Arimatea,

ku a ja sama ëli Sandzhe,

ku ten bi bi vla fë balë Djisu.

58 Se ëli ba deenchi Pilatu valadji pa ëli ba pindji ëli mochi Djisu,

se Pilatu da odji pa da ëli.

59 Se Sandzhe ma mochi,

se ëli boshia ku sabana limpi,

60 se ëli pë ëli dantu uan spitula novu ku bi sa ja dëli ku a bi jobo pë dantu lapa.

Zha se ëli tapa böjö poto ku uan taba budu,

se ëli bai.

61 Malia Magdalena ku utu Malia bi sa ala,

ja tusan deenchi spitula.

62 Se ta da amaian shi,

öshi da djasubudu djia fë vadu jaba,

se nna jasa jasa padjil ku nna fariseo ba deenchi Pilatu.

63 ^*Se ineñ faa ëli:

—Shiöla,

no lambela fa ta ontolo masebu shi bi ska ngaña nguë bi sa vivu,

ëli bi faa:

“Ta ja da tëishi djia se amu tan bi ske lanta fo mölë”.

64 Dajantu shi,

ta pa bo da uan odji pa da uan sëiu pë spitula dëli ba toja ta ja pasa tëishi djia,

pa na sa fa nna balë dëli,

bi bi futa öguë dëli pa ineñ faa pövu ëli lanta fo mölë.

Fanchila sai se ske fëiu mashi ku i shi pimëlu.

65 Se Pilatu da ineñ odji:

—Namsëdji ma guada nna sodadji bai,

pa ba sugula spitula amea shi ja sa gavu da namsëdji mashi iai.

66 Se amea sai se ineñ bai,

se ineñ tapa spitula ku uan taba budu,

se ineñ da sëiu pë;

se ineñ pë guada nna sodadji ala.