26
Lazhan jöndjidu tëjantu ku Djisu
1 Se ta ëli da lazhan jö ineñ se tudu jaba,
se Djisu faa nna balë dëli:
2 «Amea shi namsëdji bi sëbë,
ska fata dösu djia pa da Paskua,
se a ske të Mina Napai Dösë pa da ëli pë kusu».
3 Se tadashi se nna jasa jasa padjil ku nna jasa jasa pövu dantu jadji dalë jasa padjil Kaifas,
4 se ineñ bi ska laama lasu ja jua amea shi pa ineñ të Djisu valadji pa ineñ chila ëli vida folo.
5 Se ineñ bi ska faa:
«Mandji pa na sa dantu djia fesaf,
valadji pa pövu na fë kesaf».
Uan mooso ta adjimiolo pë liba jasa Djisu
6 Se Djisu bi sa loso Betania,
dantu jadji Shiman,
nguë shi ku a ja sama ëli nguë bi sa ku lepla,
7 *se iabi toja ëli uan mooso ku bi sa ku uan mina galafa alabastro ku bi sa ku uan adjimiolo ku ja kuta monchi,
se ëli buka pë liba jasa dëli,
öshi ontolo ëli bi ska tusan liba mezha.
8 Se ta ineñ bë jö sai,
se mëtë nna balë pashian.
Se ineñ bi ska faa:
«¿Jama fë a ska zhuga jö ineñ se patanta?
9 Pakë a bi paadji vëndë da uan sapa djiëlu valadji pa da nna puvili».
10 Se Djisu ku bi ska tëndë ineñ,
se ëli faa:
«¿Ja fë namsëdji ska fonta mooso sai?
Ëli fë uan fidu ja fumözhö ku amu.
11 Pakë olatuvëdji shi namsëdji ske ja të nna puvili dantu namsëdji,
mandji se namsëdji na ske sa ku amu olatuvëdjif.
12 Pakë ta ëli buka adjimiolo sai pë liba döguë amu,
ëli ja fë amu vadu da spitula.
13 Anta vedadji se amu faa namsëdji fa ja sa jamian shi mundu se ku a ske ja pegua evanjelio sai,
a ske ja da lazhan jö shi ëli fë,
dajantu pa ja lambela ëli».
Judas ska fë vadu pa ëli ba vëndë Djisu
14 Se uan nna deshi ku dösu,
nguë shi a ja sama Judas Iskariote,
se ëli ba bë nna jasa jasa padjil.
15 «¿Jantu namsëdji ske da amu,
pa amu vëndë Djisu da namsëdji?»,
se ëli pongota ineñ.
Se ineñ tudu faa pa ineñ da ëli chirinta djiëlu plata.
16 Se fo djia sai se Judas sa fa ja jua fölöshö jamian valadji pa ëli ba vëndë ëli.
Mezha Shiölö
17 Se pimëlu djia fesa Ampan shin levadura,
se nna balë iaba toja Djisu se ineñ pongota ëli:
—¿Kë jamian bo ngongo pa no ba fë vadu valadji pa no kumu Paskua?
18 Se ëli kundji ineñ fa pa ineñ ba palea,
jadji uan masebu,
pa ineñ faa ëli:
«Meeth faa:
“Tempu amu sa peetu.
Amu ska fë fesa Paskua ku nna balë amu jadji bo”».
19 Se nna balë fë amea shi ku Djisu bi manda ineñ,
se ineñ ten fë vadu kumu Paskua.
20 Ta nöchi kubili,
se Djisu ku nna deshi ku dösu tusan mezha.
21 Se öshi ontolo ineñ ska kumu,
se Djisu faa:
—Anta vedadji se amu faa namsëdji,
fa uan namsëdji ske vëndë amu.
22 Se ineñ tudu vla modoia amea ngandji muntë,
se unian unian ineñ jomesa ja faa ëli:
—¿Shiöla,
jativie ske sa amu?
23 Se Djisu kundji ineñ:
—Nguë shi ske mëtë öma dëli pë dantu patu se ku amu se sa nguë shi ske vëndë amu.
24 Anta vedadji se Mina Napai Dösë ske bai,
amea shi sa skividu tëjantu ku ëli.
¡Mandji puvili da nguë shi ske vëndë ëli!
Bi ske sa gavu da masebu sai mashi pa a na bi pali ëlif.
25 Tadashi se Judas,
nguë shi bi ske vëndë ëli iai,
faa ëli:
—¿Rabi,
jativie ske sa amu?
Se ëli kundji ëli:
—Bo se fala.
26 Se öshi ontolo ineñ bi ska kumu,
se Djisu ma ampan se ëli da dezhupaga.
Zha se ëli pachi se ëli da nna balë dëli,
ja faa:
«Namsëdji ma pa namsëdji kumu,
jö sai se sa öguë amu».
27 Zha se ëli ten ma pukulu,
se ëli da dezhupaga,
se ëli da ineñ ja faa:
«Namsëdji tudu bëbë fo pukulu sai.
28 Se jö sai se sa sangui amu da bechi shi novu,
ku se a jölë da uan sapa dji nguë,
valadji pa pada pekadu dëneñ.
29 Amu faa namsëdji fa fo öseshi amu na tan ske bëbë fo fuluta pali döpa uvaf ba toja djia shi ku amu tan ske bëbë ku namsëdji vian shi novu dantu gövöndölö Pai amu».
30 Ta ineñ janta salmos jaba,
se ineñ së ba iki Olivos.
Djisu ska da lazhan fa Pudul ske naga ëli
31 Se Djisu faa ineñ:
«Dantu nöchi se me se namsëdji tudu ske chama jonfa amu.
Amea shi sa skividu:
“Amu ske da ludjadölö jabala ku kuzhu,
se ögö jabala tudu ske panta panta”.
32 *»Mandji se ta amu tan ja lanta bi vida,
se amu tan ske bai deenchi namsëdji ba Galilea».
33 Se Pudul faa:
—Benga pa nguë tudu lega bo pë,
zhugan djia amu na ske lega bo pëf.
34 Se Djisu kundji ëli:
—Anta vedadji se amu sugula bo fa nöchi se me,
anta pa galu ngañia janta,
se bo ske naga amu ope tëishi.
35 Se Pudul tan vlame kundji ëli:
—Benga pa amu ske mölë ku bo,
amu na ske naga bof.
Se a shime nna balë tudu bi ska faa jö shime.
Djisu ska lezha dantu Jetsemani
36 Zha se Djisu ku nna balë dëli ba uan jamian ku a ja sama Jetsemani,
se ëli faa ineñ:
«Namsëdji tusan iai pa amu ba benda sala ba lezha».
37 Se ëli ma Pudul ku nna mina Sebedeo dödösu ku ëli bai,
se ëli jomesa ja sinchi fëiu monchi ku uan modoia ngandji.
38 Tadashi se ëli faa ineñ:
«Amu ska sinchi alma amu ku modoia ngandji ba toja mölë.
Namsëdji mdja iai,
pa namsëdji sa vatu».
39 Se ëli bai deenchi uan fi ja mashi,
se ëli tovesa pë liba fesan dëli se ëli lezha:
«Pai amu,
shi bo ja paadji bo na ja lega amu bëbë pukulu ja manga sef;
mandji pa na sa dishia amuf,
shina jö shi bo ja dishia».
40 Zha se ëli tan vlame ba jamian shi nna balë dëli bi sa se ëli dajonta ku ineñ tudu ska djuni.
Se ëli faa Pudul:
«¿Namsëdji na paadji sa öiö betu ku amu ñi uan ponodu olafa?
41 Namsëdji sa vatu ku pa lezha,
valadji pa namsëdji na pono da tentasanf.
Pakë anta vedadji spitu ja sa plesteñi mandji se jañi döguë ja sa levu».
42 Se ëli tan vlame ba lezha ope shi fë dösu:
«Pai amu,
shi pukulu sai na ja paadji pasa,
shinke amu bëbë fo ëlif,
mandji pa fë vintadji bo».
43 Se ta ëli tan vlame bi,
se ëli tan dajonta ku nna balë dëli tan ska djuni me,
pakë öiö dëneñ bi sa shia ku djuni.
44 Se amea sai se ëli tan lega ineñ pë,
se ëli tan vlame ba lezha ope shi fë tëishi,
ja faa jö shime.
45 Tadashi se ëli tan vlame bi toja nna balë dëli se ëli faa ineñ:
«¿Ontolo namsëdji ska djuni ja djiskansa?
Ja pia,
a la ja vëndë Mina Napai Dösë da nna pekadölö.
46 ¡Namsëdji lanta!
¡No bai!
Ja pia,
¡nguë shi ske vëndë amu la ja bi!».
A të Djisu
47 Ontolo Djisu bi ska faa fala,
ja pia,
se bi Judas,
uan ineñ dantu nna deshi ku dösu.
Se bi ska bai ku ëli uan sapa möi pöjödölö ku jatana ku öpa,
ku nna jasa jasa padjil ku jasa jasa pövu se manda ineñ bai.
48 Se nguë shi bi ske vëndë ëli iai,
bi da ineñ uan shinali,
ja faa ineñ:
«Nguë shi amu ja da uan beso,
nguë sai se sa nguë shi,
se a ja të ëli».
49 Se öshi öshi se ëli iaba lome Djisu se ëli da ëli manten.
Se ëli faa ëli:
—¡Rabi!
Se ëli da ëli uan beso.
50 Se Djisu kundji ëli:
—Jamada,
¿a kë ja bo bi fë?
Tadashi se ineñ iabi se ineñ ta öma ba Djisu,
se ineñ të ëli.
51 Mandji se,
uan nna nguë ineñ shi bi sa ala ku Djisu chila uan jatana se pota uan nna shividölö jasa jasa padjil uan olea.
52 Tadashi se Djisu faa ëli:
«¡Tan gada jatana bo pë jamian dëli!,
pakë nna nguë ineñ shi tudu ja fala jatana,
ku jatana se ineñ ten ske mölë.
53 ¿Bo këlë fa amu na paadji luga da Pai amuf,
se öseshi öseshi se ëli ske pë basu amu milidji milidji nna anzhu mashi ua?
54 Mandji tadashi,
¿kë amea shi ske kumpli jö ineñ shi Fa Nashiolo bi faa bebezha fa ske bi ta pa shiga amea sai iai?».
55 *Se ola sala se Djisu faa möi pöjödölö ineñ sai:
«¿Sa fa amu sa uan futadölö,
valadji pa namsëdji bi të amu ku jatana ku budan?
Djia tudu amu bi sa ku namsëdji ja tusan ja shina namsëdji kuzhu dantu jadji Nashiolo,
se namsëdji na të amuf.
56 Mandji se jö ineñ se tudu shiga amea sai valadji pa kumpli jö ineñ shi nna pantafala bi bi skëvë iai».
Tadashi se nna balë lega ëli moso pë se ineñ tudu jölë.
Djisu sa deenchi Zhunta shi Ngandji
57 Nna nguë ineñ shi ba të Djisu,
se ma ëli ba deenchi Kaifas,
ku se bi sa jasa jasa padjil,
ala se nna meeth dalë ku nna jasa jasa pövu bi sa zhuntadu.
58 Mandji se Pudul bi ska lë ëli fo löndji löndji ba toja mete balandia jadji jasa jasa padjil.
Se ëli lantela se ëli tusan ku nna guada jadji Nashiolo,
valadji pa ëli bë amea shi jö sai ske jaba pë.
59 Se nna jasa jasa padjil ku nna nguë Zhunta shi Ngandji bi ska jua uan lazhan fanchila tëjantu ku Djisu,
valadji pa ineñ paadji kondena ëli pa chila ëli vida folo.
60 Mandji se ineñ na bi ska bëf,
benga zha pa uan sapa dji nguë bi ska da lazhan fanchila se bi bi.
Se jabamentu se bi nguë dösu,
61 *ku faa:
«Masebu se bi faa:
“Amu paadji të jadji Nashiolo sai të lolo pa amu tan vlame fë dantu tëishi djia”».
62 Se ta jasa jasa padjil lanta mdjadu metadji nguë tudu,
se ëli faa ëli:
«¿Bo na ja kundji zhugan jafa?
¿Kë jö ineñ se a ska faa ku tëjantu ku bo iai?».
63 Mandji se Djisu bi jaböjö.
Se amea sai se jasa jasa padjil tan vlame faa ëli:
—Amu da bo odji a namu Nashiolo shi sa vivu pa bo da no lazhan shi bo se sa Kilitu,
Mina Nashiolo.
64 Se Djisu kundji:
—Bo se fala.
Mandji se amu faa namsëdji tudu:
Fo öseshi be deenchi namsëdji ske bë Mina Napai Dösë ska tusan benda dëtu nguë shi sa Pödë Tudu,
ja ska bi fo liba növu növu dösë.
65 Se jasa jasa padjil ja të jaminzha dëli të baga baga,
ja ta kidëlë:
«¡Ëli faa fala zhogoveadu!
¿Ja tan fë fata pa utu nguë tan faa uan kuzhu?
¡Ja pia,
namsëdji tudu öseshi tëndë fala zhogoveadu dëli!
66 ¿Kë ja namsëdji mazhna da jö sai?».
Se ineñ tudu kundji ëli:
—¡Ëli mësë pa ëli mölë!
67 Tadashi se zhugan nguë ta aböjö pë ëli jala se a da ëli ku doki.
Se utu nguë da ëli ku butada.
68 Se ineñ bi ska faa:
«¡Pantafala ua!
Kilitu,
¿kë nguë da bo ku kuzhu?».
Pudul naga fa ëli na jönsë Djisuf
69 Öshi ontolo Pudul bi sa öluia ja tusan,
mete balandia jadji,
se uan namina miela shividölö iaba jamian shi ëli bi sa.
Se faa ëli:
—A shime bo ten bi sa ku Djisu Galilea.
70 Mandji se ëli naga deenchi nguë tudu,
ja faa:
—Amu na sëbë jö shi bo ska faaf.
71 Zha se ëli së ba böjö poto,
se utu pöjödölö bë ëli,
se faa utu nna nguë ineñ shi ku bi sa ala:
«A shime nguë sai ten bi sa ku Djisu Nasaret».
72 Mandji se ëli tan vlame naga ku julamentu:
«¡Amu na jönsë masebu sef!».
73 Anta olola se zhugan nguë ku bi sa ala iaba lome Pudul se ineñ faa ëli:
—Anta vedadji ku bo ten sa uan nguë dëneñ;
pakë amea faa fala bo se a ja paadji sëbë.
74 Tadashi se ëli jomesa ja ta masan,
ku ja jula:
—¡Amu na jönsë masebu sef!
Se öshi öshime se galu ngañia janta.
75 Tadashi se Pudul lambela jö shi Djisu bi bi faa ëli:
«Anta pa galu ngañia janta,
bo ske naga amu ope tëishi».
Se ta ëli së fo ala,
se ëli sula ku moga.