25
Palavulu uan deshi nna mina miela vidjin
1 *»Gövöndölö dösë ske sa shimafan uan deshi nna mina miela vidjin ku ma lapanta dëneñ,
se ineñ së ba ma medu.
2 Ineñ shinku bi sa buiadu se shinku bi sa jotadu.
3 Se ineñ shi buiadu bi ma lapanta dëneñ shin zhëitë batanchi bai ku ineñ;
4 mandji se,
ineñ shi jotadu bi ma lapanta dëneñ ku mamuda zhëitë ku ten bai ku ineñ.
5 Se,
öshi medu bi ska ma tave bi,
se djuni ma ineñ tudu.
6 »Se ta da mete nöchi se a tëndë uan fala kidëlë:
“¡Medu la ja bi!
¡Namsëdji së bi ma ëli!”.
7 »Tadashi se nna mina miela vidjin ineñ se tudu lanta se ineñ jomesa ja fë vadu lapanta dëneñ.
8 Se ineñ shi buiadu faa nna mina miela ineñ shi jotadu:
“Da no uan fi zhëitë namsëdji këtë,
pakë lapanta no la ja paka”.
9 »Se ineñ shi jotadu kundji ineñ:
“Na,
pakë amea sai se zhëitë no na ten ske dagoli ku no fa ñi ku namsëdjif.
Ske sa gavu mashi pa namsëdji ba jua nna nguë ineñ shi ku ja vëndë zhëitë,
pa namsëdji kumpa da öguë namsëdji”.
10 »Mandji se öshi ineñ bi ska kumpa zhëitë,
se medu bi,
se nna mina miela ineñ shi bi sa vadu pë iai lantela ku ëli ba dantu bankëtë jazha.
Se a tanja poto.
11 *Zha se ten bi utu nna mina miela vidjin ineñ sala.
Se ineñ bi ska luga:
“¡Shiöla!
¡Shiöla!
¡Bla poto da no!”.
12 »Se ëli kundji ineñ:
“¡Na,
anta vedadji amu na jönsë namsëdjif!”.
13 »Dajantu shi,
ja sa vatu,
pakë namsëdji na sëbë ñi djia shi ñi ola shif.
Palavulu djiëlu oro
14 *»Gövöndölö dösë ten ske sa shimafan uan masebu ku,
ta ëli bi ska fë uan vadji,
se ëli sama nna shividölö dëli tudu se ëli da ineñ gagavu dëli valadji pa ineñ fë lazhan.
15 Se ëli da uan nguë milidji shinku djiëlu oro,
se utu ineñ se ëli da milidji dösu se ëli da utu ineñ uan milidji moso,
ëli da ineñ tudu amea tëndëmentu dëneñ.
Zha se ëli ba vadji.
16 »Nguë shi ma milidji shinku djiëlu oro iai öshi öshi se ëli bai se ëli fë nongosu ku djiëlu sai se ëli ngana utu milidji shinku mashi.
17 Se amea shime,
se nguë shi të milidji dösu sai ten ngana utu milidji dösu mashi.
18 Mandji se nguë shi bi bi ma uan milidji iai,
bai se ëli jobo uan jobo pë san tela se ëli jöndë djiëlu shiölö dëli pë.
19 »Se ta pasa uan tempu löngö se shiölö nna shividölö ineñ se tan vlame bi se ëli bi jözhë kuenta pë ku ineñ.
20 Se nguë shi bi ma milidji shinku djiëlu iai bi ngana utu milidji shinku mashi.
Se ëli faa:
“Shiöla,
bo bi da amu milidji shinku djiëlu.
Ja pia,
amu tan ngana utu milidji shinku mashi”.
21 »Se shiölö dëli kundji ëli:
“¡Bo fë gavu,
shividölö gavu ku jonfadu!
Liba uan fi kuzhu se bo sa jonfadu,
se liba uan sapa mashi se amu ske pë bo.
¡Bi pa bo bi djogo liguilia ku shiölö bo!”.
22 »Se nguë shi bi bi ma milidji dösu iai ten bi.
Se ëli da lazhan:
“Shiöla,
bo bi da amu milidji dösu djiëlu.
Ja pia,
amu tan ngana utu milidji dösu mashi pë liba”.
23 »Se shiölö dëli kundji ëli:
“¡Bo fë gavu,
shividölö gavu ku jonfadu!
Liba uan fi kuzhu se bo sa jonfadu,
se liba uan sapa mashi se amu ske pë bo.
¡Bi pa bo bi djogo liguilia ku shiölö bo!”.
24 »Zha se bi bi nguë shi bi ma uan ponodu milidji djiëlu moso iai.
Se ëli da lazhan:
“Shiöla,
amu sëbë fa bo sa uan masebu ödu,
fa bo ja totolo jamian shi ku bo na ja shimianf se bo ja zhunta jamian shi ku bo na panta pantaf.
25 Dajantu shi se mendu ma amu,
se amu bai se amu jöndë djiëlu bo pë basu san dalea.
Ja pia,
jö shi sa ja bo sa i sai”.
26 »Mandji se shiölö dëli kundji ëli:
“¡Shividölö fëiu ku pisközhu!
¿Se sa fa bo sëbë fa amu ja totolo jamian shi ku amu na ja shimianf se amu zhunta jamian shi ku amu na panta pantaf?
27 Pakë bo bi paadji gada djiëlu amu pë banki,
valadji pa ta amu ja bi pa amu paadji tan të bembe mashi”.
28 »“Namsëdji chila milidji djiëlu fo ëli pa namsëdji da nguë shi sa ku uan deshi milidji iai.
29 *Pakë nguë shi ja të,
se a tan ske da ëli mashi,
se ëli ske sa ku batanchi.
Se nguë shi na ja tëf se a tan ske chila fo ëli ba toja jö shi ja sa ku ëli iai.
30 *Se ku shividölö se ku na shivif sai namsëdji chila ëli ba öluia,
ba dantu jamian kulu kulu,
jamian shi ske sa ku böjö sula ku kumu denchi”.
Nna jabala ku nna jabala kutu
31 *»Ta Mina Napai Dösë ske bi dantu gloria dëli,
ku nna anzhu dëli tudu,
se ëli ske tusan liba töli gloria dëli.
32 Se ëli ske zhunta nna tela tela tudu pë deenchi dëli,
se ëli ske safa uan nguë fo utu nguë,
amea shi uan ludjadölö jabala ja safa jabala fo jabala kutu.
33 Ëli ske pë jabala benda dëtu dëli,
se nna jabala kutu ske sa benda skedji dëli.
34 »Tadashi se Alë ske faa nna nguë ineñ shi sa benda dëtu dëli iai:
“Namsëdji bi,
nna nguë ineñ shi Pai amu da besa,
namsëdji ma gagavu dëli,
gövöndölö shi a fë vadu da namsëdji fo djia shi a mindji mundu.
35 Pakë amu bi sa ku faku,
se namsëdji da amu kumu,
amu bi sa ku fomu daua,
se namsëdji da amu ja daua;
amu bi sa uali se namsëdji ma amu jadji namsëdji;
36 amu bi sa gödödji,
se namsëdji da amu bitidu;
amu bi ska danchi,
se namsëdji fë lazhan amu;
amu bi sa djili se namsëdji bi bi ua amu”.
37 »Se nna nguë dëtu kundji ëli:
“Shiöla,
¿a kë djia no bë bo ku faku se no da bo kumu,
ö ku fomu daua se no da bo ja daua?
38 ¿Se kë djia no bë bo uali se no ma bo jadji no ö kë djia bi fë bo fata bitidu se no bishi bo ku bitidu?
39 ¿Kë djia no bë bo ska danchi ö dantu djili ku no bi bi ua bo?”.
40 »Se Alë ske kundji ineñ:
“Anta vedadji se amu faa namsëdji ja sa jö shi namsëdji ja fë da uan namain amu,
ba toja nguë shi ja kichi mashi,
ja sa ja namsëdji fë da amu”.
41 »Zha se ëli ske faa nna nguë ineñ shi sa benda skedji dëli:
“Safa fo amu,
nna nguë masan masan,
pa namsëdji ba dantu fögö chindadji shi a fë vadu da djiabu ku nna anzhu dëli.
42 Pakë amu bi sa ku faku,
se namsëdji na da amu zhugan ja pa amu kumuf;
amu bi sa ku fomu daua,
se namsëdji na ja da amu ja daua këtë pa amu bëbëf;
43 amu bi sa uali,
se namsëdji na da amu jadji pa amu loma öguë pëf;
bi fë amu fata bitidu;
se namsëdji na bishi amu bitiduf;
amu bi ska danchi se amu bi sa djili,
se namsëdji na fë lazhan amuf”.
44 »Se ineñ ten kundji ëli:
“Shiöla,
¿a kë djia no bë bo ku faku ö ku fomu daua,
ö uali,
ö ku dishamentu bitidu,
ö ska danchi,
ö dantu djili,
se no na zhuda bof?”.
45 »Se ëli ske kundji ineñ:
“Anta vedadji se amu faa namsëdji jö ineñ shi namsëdji na fë ku nna namain amu ineñ shi kichi kichi mashif,
namsëdji na fë da amuf”.
46 »Se nna nguë ineñ sala ske të jatigu chindadji,
se nna nguë dëtu ske të vida chindadji.