1 Se Djisu së fo dantu jadji Nashiolo,

se öshi ontolo ëli bi ska nda ja bai,

se nna balë dëli iabi lome dëli se ineñ msa ëli jadji jadji ngandji Nashiolo.

2 Mandji se ëli faa ineñ:

«¿Namsëdji ska bë jö ineñ se tudu ua?

Anta vedadji se amu faa namsëdji fa na tan ske mdja budu pë liba buduf,

ku a na ske të lolof».

3 Tadji mashi se Djisu bi ska tusan lome jamian iki Olivos,

se ta nna balë bi se ineñ pongota ëli apachi:

—¿Kë djia jö ineñ se ske shiga?

¿Se kë shinali ske sa dji ta bo tan ske bi ku dji jabamentu mundu?

4 Se Djisu kundji ineñ:

—Namsëdji ja pinchidu pa zhugan nguë na ja ngaña namsëdjif.

5 Pakë ske bi uan sapa nguë ku namu amu,

ja faa:

“Amu se sa Kilitu”.

Se ineñ ske ngaña uan sapa dji nguë.

6 Se ta namsëdji ja tëndë ja tëjantu ku guela guela,

ku monova ku ja të ku guela guela iai,

namsëdji na ja kabela kusanf.

Pakë ske fë fata pa jö ineñ se tudu shiga,

mandji ontolo na ske sa da jabamentuf.

7 Pakë se ske ja lanta tela ku utu tela,

se gövöndölö ske ja lanta ku utu gövöndölö.

Se ske të danchi fëfëiu,

ku fomu,

se san tela ske ja vlamëtë jamian tudu.

8 Mandji se jö ineñ se tudu,

se ske jomesadu duadu.

9 ^*»Tadashi se a ske ja ma namsëdji ba da nna jasa jasa tela valadji pa ineñ ja pëtëpë namsëdji ku pa ineñ ja chila namsëdji vida folo,

se a ske ja të pashian namsëdji tela tela tudu tëjantu ku namu amu.

10 Se dantu tempu sai se uan sapa dji nguë na tan ske këlë amuf;

se uan nguë ske ja vëndë utu nguë,

se uan nguë ske ja të pashian utu dji nguë;

11 se ske lanta uan namolo ngandji nna pantafala fanchila ku ske ja ngaña uan sapa dji nguë.

12 Se ja fëfëiu ske vla fë monchi amea shi ku ngongo uan sapa dji nguë ske ja vla fiiu.

13 ^*Mandji se nguë shi ske mdja dëtu ba toja jabamentu,

se ske sava.

14 Se evanjelio gövöndölö sai a ske ja pegua dantu mundu nguintëlu nguintëlu,

valadji pa sa lazhan gavu da tela tela tudu,

se tadashi se öshi ske bi jabamentu.

15 »Se sa amea shi ta namsëdji ja bë dantu jamian shi santu “ja nozho nozhodu fëfëiu”,

ineñ shi pantafala Daniel bi faa bebezha iai (nguë shi ja lëë,

pa ëli tëndë),

16 tadashi se nna nguë ineñ shi ja ta Judea,

ja jölë ba jöndë pë van iki.

17 ^*Nguë shi ja sa van dötë jadji,

pa ëli na ja dësëf,

ñi pa ëli na ja lantela ba ma zhugan ja fo jadji dëlif.

18 Se nguë shi ja sa dantu matu,

pa ëli na tan ja bi ku tashi pa bi ma bobolonda dëlif.

19 ¡Puvili nna naamain ineñ shi ske sa pañia ö ku ska da nna mina mama djia ineñ sa ala!

20 Namsëdji ja ska lezha,

pakë,

pa djia jölë namsëdji na ja shiga tenduafa ñi djasubuduf.

21 ^*Pakë ske sa tempu mavida ngandji ku na sa të ie zhaf fo jomesadu mundu bi toja öseshi,

ñi na tan ske vlame tëf.

22 Se shi na bi kuta tempu sef,

zhugan nguë na bi ske sa savaduf,

mandji se dajantu nna nguë ineñ shi ku ëli ma,

se tempu sai ske bi sa kutadu.

23 »Tadashi shi uan nguë ja faa namsëdji:

“Namsëdji pia,

Kilitu sa iai” ö,

“Ëli sa ala”,

na ja këlë ineñf.

24 Pakë ske lanta zhugan kilitu fanchila ku pantafala fanchila,

se ineñ ske fë shinali ngandji ku ja ngangandji,

valadji pa ineñ ja fë nguë danadu,

shi ja paadji fë,

ba toja nna nguë ineñ shi ku ëli se ma.

25 Namsëdji ja pia pakë amu bi faa namsëdji bebezha.

26 ^*»Dajantu shi,

shi a ja faa namsëdji:

“¡Ja pia ëli sa dantu jamian sölö sölö!”,

namsëdji na ja solof;

ö:

“¡Ja pia,

ëli sa dantu jadji!”,

namsëdji na ja këlëf.

27 Pakë amea shi ku lali ja së fo benda dëtu se a ja bë ëli benda skedji,

se sa amea shi ske sa,

ta Mina Napai Dösë tan ske vlame bi.

28 ^*Jamian shi ja sa ku uan mochi,

se paatu kumu mochi tudu ja zhunta pë.

29 ^*»Se öshi öshi ta ku ske shiga mavida ngandji dantu tempu sai bebezha,

32 »Namsëdji shina ja fo öpa abada.

Ta namsëdji ja bë manga dëli ska vla mongo mongo,

se ska labenta fadöpa;

se namsëdji ja sëbë fa goleme ske da jalima.

33 Se ten sa amea shime ku ta namsëdji ja bë jö ineñ se tudu,

namsëdji ja sëbë fa tempu sai sa peetu,

sa lome böjö poto.

34 Anta vedadji se amu faa namsëdji,

zhenchi sai na ske pasaf anta pa jö ineñ sai tudu shiga.

35 Se ösë ku tela tudu ske pasa,

mandji se fala amu jabötu na ske pasaf.

36 »Mandji se tëjantu ku djia sai ku tempu shi ske sa,

zhugan nguë na sëbëf,

ñi nna anzhu dösë,

ñi tuludöguë Mina,

shina Pai moso se sëbë.

37 »Amea shi bi shiga tempu Noe,

se ske sa ta Mina Napai Dösë ten ske bi.

38 Pakë anta pa fadaua ngandji jomesa,

nna nguë tudu bi ska kumu ja bëbë,

ja jazha ku ja ma nguë ba jazha,

ba toja djia shi Noe lantela dantu alka;

39 se ineñ na bi sëbë zhugan jö ineñ shi bi ske bi shigaf ba toja ku fadaua ngandji jomesa ja da se ma ineñ tudu bai.

Se sa amea shi ske sa djia shi Mina Napai Dösë tan ske vlame bi.

40 »Napai dösu ske ja sa matu:

se a ske ma unian se a ske lega nguë shiki pë.

41 Naamain dösu ske ja mla kuzhu jamian budu mla kuzhu,

se a ske ma unian se a ske lega nguë shiki pë.

42 »Dajantu shi,

namsëdji ja sa vatu,

pakë namsëdji na sëbë djia shi Shiölö namsëdji ske bif.

43 ^*Mandji pa namsëdji sa suguladu da jö sai:

Shi uan shiölö jadji ja së ola öshi futadölö ske bi bi,

ëli ske sa öiö betu,

valadji pa ëli na lega pa ëli lantela jadji dëli afoshif.

44 Dajantu shi,

ta pa namsëdji ten ja sa vadu pë,

pakë Mina Napai Dösë tan ske bi ola shi ku namsëdji na ska mazhnaf.

45 »¿Kë nguë ja sa shividölö shi jonfadu ku tëndëmentu,

ku se shiölö dëli ja lega ëli pa ëli sa jasa nna shividölö tudu valadji pa ëli ja pachi ineñ kumu ta ja da tempu dëneñ?

46 Besa se ske sa ku shividölö shi ku ta shiölö dëli tan ja vlame bi,

ku ja dajonta ku ëli ja kumpli sulvisu dëli.

47 Anta vedadji se amu faa namsëdji fa ëli ske pë ëli liba gagavu dëli tudu.

48 Mandji se shi shividölö shi fëiu sai ske ja faa dantu kusan dëli:

“Shiölö amu ska tada pa ëli bi”,

49 se ëli ja jomesa ja da shividölö ineñ sala ku kuzhu,

ja kumu ku ja bëbë ku nna bedadölö.

50 Se djia shi ku shividölö se na ske ja gadafa ku ola shi ëli na ske ja mazhnaf,

se shiölö tan ske vlame bi.

51 Se ëli ske da ëli jatigu ödu ödu se ëli ske kondena ëli jamian shime ku nna sochi.

Se ala ske sa ku sula ku kumu denchi.