22
Palavulu bankëtë jazha
1 Se Djisu tan vlame faa ineñ ku palavulu,
se ëli faa:
2 «Gövöndölö dösë sa shimafan uan alë ku fë vadu uan bankëtë jazha da mina dëli.
3 Se ëli manda nna shividölö dëli pa ba sama nguë bi bankëtë ia,
mandji se nna nguë ineñ sai naga pa ineñ ba bankëtë.
4 »Zha se ëli tan vlame manda utu nna shividölö se ëli da ineñ odji sai:
“Faa nna nguë ineñ shi a sama bi bankëtë fa a fë vadu kumu pë bebezha:
Amu da odji pa mata kau ku limaia gödö gödö amu,
se ja tudu sa plesteñi bebezha.
Pa ineñ bi bankëtë”.
5 Mandji se ineñ na sa tave nna tabaiadölö dëlif,
se ineñ bai:
uan ineñ ba matu dëli,
se utu ineñ ba fë nongosu dëli.
6 Se utu nna nguë fala nna shividölö,
se ineñ da ineñ ku kuzhu se ineñ chila ineñ vida folo.
7 »Se jö se mëtë alë pashian.
Se ëli manda nna sodadji dëli pa ba të nna nguë ineñ shi ja chila nguë vida folo iai të fea fea ku pa ten ta fögö pë palea dëneñ.
8 Tadashi se ëli faa nna shividölö dëli:
“Bankëtë jazha sa vadu pë bebezha,
mandji se nna nguë ineñ amu sama bi bankëtë ineñ na mësë pa ineñ bif.
9 Dajantu shi,
namsëdji ba jamian shi jamangandji ja zhunta pa namsëdji sama nna nguë ineñ shi namsëdji ja dajonta tudu”.
10 Se amea sai se nna shividölö së ba jamangandji tudu se ineñ zhunta nna nguë ineñ shi ineñ paadji dajonta tudu,
nna nguë gagavu ku nna nguë fëfëiu,
se ineñ shia jamian jazha ku nna nguë tudu.
11 »Ta alë lantela pa ëli ba bë nna nguë ineñ shi bi dantu bankëtë jazha,
se ëli bë uan masebu ala ku na bi sa ku bishidu ku bitidu jazhaf.
12 Se ëli faa ëli:
“Jamada,
¿jama fë bo lantela iai shin bitidu jazha?”.
Se masebu da filili.
13 *Tadashi se alë faa nna shividölö:
“Namsëdji mali ëli öma ku ope,
pa ta ëli ba öluia,
jamian kulu,
jamian shi ske të sula ku kumu denchi”.
14 »Pakë uan sapa nna nguë se a sama bi,
mandji se zhugan ponodu moso se a ma».
Pagu tesu da Sesar
15 Tadashi se nna fariseo së bai se ineñ ba da lazhan amea shi pa ineñ pë Djisu uan lasu ku tuludöguë fala dëli.
16 Se ineñ manda zhugan nna balë dëneñ zhuntadu ku pachidu nna nguë alë Erodes ba da ëli,
se ineñ faa ëli:
—Meetha,
no sëbë fa bo sa uan masebu ku vedadji se bo ja shina nguë ja ku vedadji jamangandji Nashiolo.
Se bo na ja sa tave zhugan nguëf pakë bo na ja pia benda döluiaf.
17 Dajantu shi,
da no shizhu bo:
¿Sa legadu pa no da pagu tesu Sesar ö na?
18 Mandji se Djisu,
ku jönsë shizhu fëfëiu dëneñ,
se faa ineñ:
—¡Nna sochi!
¿Jama fë namsëdji ska pë amu lasu?
19 Msa amu uan djiëlu roma ineñ shi a ja da pagu tesu ua.
—¿Kë nguë të fesan ku namu shi sa skividu?
21 Se ineñ kundji:
—Dji Sesar.
Se Djisu faa ineñ:
—Tadashi namsëdji da Sesar jö shi sa ja Sesar,
pa da Nashian jö shi sa ja Nashiolo.
22 Ta ineñ tëndë jö sai,
se ineñ leva amea kundji dëli.
Se amea sai se ineñ lega ëli pë se ineñ bai.
Pongota tëjantu ku nna nguë lanta fo mölë
23 *Se djia sala se bi toja Djisu nna saduseo,
ku ja ska faa nna nguë mölë bebezha na tan ske lanta bi vidaf,
se ineñ pongota ëli:
24 —Meetha,
Moises faa:
“Ja faa shi namain uan nguë ja mölë shin pali nna minaf,
pa namain dëli jazha ku mainviva dëli,
pa ëli lanta minadjimina da namain dëli”.
25 Sa fa,
bi të,
nna namain seta dantu no.
Se nguë shi pimëlu jazha se ëli mölë,
se dajantu ku ëli na pali minaf,
se ëli lega miela dëli da namain dëli.
26 Se jö shime se ten shiga ku nguë shi fë dösu ku namain shi fë tëishi,
se amea sai,
se fë ba toja nguë shi fë seta.
27 Se ta da jabamentu ja tudu,
se mooso se mölë.
28 Se öseshi,
ta a tan ske lanta fo mölë,
¿kë nguë ske sa medu miela sai,
öshi ineñ seta seta tudu bi sa jazhadu ku miela sai?
29 Se Djisu kundji ineñ:
—Namsëdji sa buiadu,
pakë namsëdji na jönsë Fa Nashianfa ñi pödë Nashianf.
30 Pakë dantu nna nguë ineñ shi ku lanta bi vida,
nna pöjödölö na tan ske ja jazhafa ñi a na tan ske da ineñ jazhamentuf,
shina ineñ ske sa shimafan nna anzhu ku sa ösë.
31 »Mandji se tëjantu ku nna nguë ineñ shi tudu tan ske lanta fo mölë,
¿namsëdji na bi lëë jö shi Nashian faa namsëdjif:
32 “Amu se sa Nashian Abraam,
Nashian Isaak ku Nashian Jakob”?
Nashiolo na sa Nashian nna nguë möliduf,
shina dji nna nguë sa vivu.
33 Ta ineñ tëndë jö sai,
se nna nguë tudu gua ku böjö betu da amea shina dëli.
Mandamentu shi ngandji mashi
34 Tadashi se nna fariseo të uan zhunta ta ineñ ba tëndë fa Djisu sua nna saduseo böjö.
35 Se uan ineñ,
ku sa meeth dalë,
se pë ëli uan lasu ja pongota ëli jö sai:
36 —Meetha,
¿kë mandamentu shi ngandji mashi dantu dalë?
37 Se ëli kundji ineñ:
—“Se bo ske ngongo ku Shiölö shi sa Nashian bo ku kusan bo tudu,
ku alma bo tudu ku miolo bo tudu”.
38 Se sa pimëlu mandamentu ku se sa i shi ngandji mashi fo mandamentu tudu.
39 Se i shi ja fë dösu sa shimafan i sai:
“Ngongo ku pusumu bo shimafan tuludöguë bo”.
40 *Se fo mandamentu dösu dösu ineñ sai se ja së alë tudu ku nna pantafala tudu.
¿Kilitu sa mina kë nguë?
41 Se ta nna fariseo bi sa zhuntadu,
se Djisu pongota ineñ:
42 —¿Kë ja namsëdji ja mazhna tëjantu ku Kilitu?
¿Ëli sa mina kë nguë?
Se ineñ kundji ëli:
—Ëli sa mina David.
43 Se Djisu kundji ineñ:
—Tadashi,
¿jama fë alë David,
ska faa amea Spitu Santu,
se ëli ja sama Kilitu “Shiölö”?
44 “Se Shiölö faa Shiölö amu:
‘Tusan benda dëtu amu,
ba toja pa amu pë nna namigu bo
basu dope bo’”.
45 »Shi dajantu shi se David ja sama ëli “Shiölö”,
¿kë amea shi ëli paadji sa mina dëli?
46 Se zhugan nguë na paadji kundji ëli uan ponodu falaf,
se fo djia sai se zhugan nguë na tan tividu pongota ëli zhugan ja mashif.