21
Djisu ska lantela dantu Jerusalen
1 Ta ineñ bi ska da lome Jerusalen se ineñ ba da loso Betfage,
lome iki Olivos,
se Djisu manda nna balë dösu,
2 se ëli da ineñ odji sai:
«Namsëdji ba loso se sa deenchi namsëdji iai,
se öshi öshi se namsëdji ske dajonta ku uan javalu kutu maladu,
ku uan mina javalu kutu.
Namsëdji ja sota ineñ pa ma ineñ bi da amu.
3 Shi uan nguë ja faa namsëdji uan kuzhu,
namsëdji ja kundji ëli fa fë Shiölö fata,
mandji se dandjian se ëli tan ske da ineñ bi».
4 Jö sai shiga valadji pa kumpli jö shi pantafala bi bi faa:
5 «Namsëdji ja faa mina naamain Sion:
“Ja pia,
Alë bo la ja bi toja bo,
masu,
ku vadadu liba uan javalu kutu,
uan mina javalu kutu,
mina uan limaia gaga jalga”».
6 Se nna balë bai se ineñ fë amea shi Djisu bi manda ineñ.
7 Se a ma javalu kutu sai ku mina javalu kutu dëli,
se ineñ pë panu dëneñ liba dëneñ,
se ëli ten vada liba dëli.
8 Bi të uan sapa nna nguë ku bi ska ta panu dëneñ pë jamangandji;
se utu nguë pota manga döpa se ineñ bi ska lela pë jamangandji.
9 Se nna nguë ineñ shi bi ska be deenchi dëli ku nna nguë ineñ shi bi ska bi tashi dëli bi ska ta kidëlë:
«¡Osana da Mina alë David!
¡Besa ja sa ku nguë shi ja bi a namu Shiölö!
¡Osana van liba mashi!».
10 Ta ëli bi ska lantela Jerusalen,
se palea se sugudji,
se a bi ska pongota:
«¿Kë nguë sa nguë sai?».
11 Se möi pöjödölö bi ska faa:
«Nguë sai se sa pantafala Djisu,
ku fo loso Nasaret dji Galilea».
Djisu sa dantu jadji Nashian nna judio
12 Se Djisu lantela dantu jadji Nashiolo se ëli jölë nna nguë ineñ shi bi ska vëndë ku ja kumpa kuzhu tudu fo ala.
Se ëli të mezha nna nguë ineñ shi bi ska tuka djiëlu tudu të buka ku dji nna nguë ineñ shi bi ska vëndë löla iai.
13 Se ëli faa ineñ:
«Sa skividu:
“Jadji amu a ske ja sama jadji lezha”.
¡Mandji se namsëdji të vla fë iöjö lapa nna futadölö!».
14 Se zhugan nna nguë sebu,
ku nna ojogo iaba lome Djisu dantu jadji Nashian nna judio,
se ëli kula ineñ.
15 Mandji se ta nna jasa jasa padjil ku nna meeth dalë bë fa ëli ska fë ja fumözhö fumözhö,
se nna mina bi ska ta kidëlë dantu jadji Nashian nna judio:
«¡Osana da Mina alë David!»,
se mëtë ineñ pashian.
16 Se ineñ faa ëli:
—¿Bo ska tëndë jö shi ineñ se ska fala?
Se Djisu kundji ineñ:
—Shiën,
amu ska tëndë.
¿Namsëdji na sa lëë zhugan djia ie zhaf:
“Fo olaböjö nna nguë kichi kichi
ku dji nna mina a ska da mama
se bo pë janta shi fumözhö ua”?
17 Tadashi se ëli lega ineñ pë ala se,
ëli së fo palea sai,
se ëli ba loso Betania se ala se ëli pasa nöchi.
Öpa abada ska soja
18 Se ta pamasedu bla,
ta ëli tan vlame ba palea,
se faku da Djisu.
19 Se ta ëli bë uan ope döpa abada lome jamangandji,
se ëli iaba ope dëli,
mandji se ëli na bë zhugan ja mashi ku fadöpa abadaf.
Se ëli faa:
«¡Jabötu bo na tan ske da fuluta mashif!».
Se öshi öshi se ope abada se soja.
20 Se ta nna balë bë jö sai se ineñ mdja ku böjö betu.
Se ineñ ska faa:
—¿Jama fë ku ope abada se soja dandjian shi?
21 *Se Djisu kundji ineñ:
—Anta vedadji se amu faa namsëdji fa,
shi namsëdji ja sa ku jonfa,
se namsëdji na ja të butanjaf,
namsëdji na ske fë jö se ku amu fë ku ope abada se iai mosof,
shina namsëdji ske paadji faa iki sai:
“¡Së fo iai pa bo daua ba omali!”,
se amea sai se ske fë.
22 Se ja jö shi namsëdji ja pindji ku lezha,
se namsëdji ja këlë,
namsëdji ske të.
Butanja da pödë Djisu
23 Se Djisu lantela dantu jadji Nashian nna judio,
se öshi ontolo ëli bi ska shina nguë kuzhu,
se nna jasa jasa padjil ku nna jasa jasa pövu iaba lome dëli.
Se ineñ bi ska golo ëli:
—¿Ku kë pödë bo ska fë jö ineñ sai?
¿Kë nguë da bo pödë sai?
24 Se Djisu kundji ineñ:
—Amu ten ske pongota namsëdji uan kuzhu.
Shi namsëdji ja kundji amu,
amu ten ske da namsëdji lazhan ku kë pödë amu ten ska ma fë jö ineñ sai.
25 Bachizhamentu Zhuan,
¿kë jama së folo?
¿Ja fo ösë ö fo napai?
Se ineñ sa fa ja pufia ku ineñ ineñ me;
ja faa:
«Shi no ja faa:
“Fo ösë”,
ëli ske faa no:
“¿Jama fë namsëdji na këlë ëlif?”.
26 Mandji se shi no ja faa:
“Sa ja fo san tela”,
no ska mendu pövu,
pakë nguë tudu bi ska bë fa Zhuan bi sa uan pantafala».
27 Se shi se ineñ kundji Djisu:
—No na sëbëf.
Se Djisu kundji ineñ:
—Dajantu shi se amu na ten ske faa namsëdji ku kë pödë amu ska fë jö ineñ sef.
Palavulu nna mina dösu
28 Se Djisu tan faa ineñ:
—¿Kë amea shi namsëdji bë?
Bi sa ku uan masebu ku bi të nna mina dösu.
Se ëli iaba nguë shi pimëlu se ëli da ëli odji:
“Mina amu iai,
bai pa bo ba tabaia matu uva amu”.
29 “Amu na ska bef”,
se ëli kundji,
mandji se ta ëli ba mazhna gavu,
se ëli bai.
30 Zha se pai sai ten iaba utu mina dëli se ëli ten da ëli odji shime.
Se nguë sai kundji ëli:
“Shiën,
shiölö,
amu ske bai”;
mandji se ëli na bef.
31 ¿Kë ineñ dödösu ineñ sai ku fë jö shi pai dëneñ dishia?
Se ineñ kundji ëli:
—Nguë shi pimëlu.
Se Djisu faa ineñ:
—Anta vedadji se amu faa namsëdji,
nna nguë ma tesu ku nna naamain dölöluia ske lantela deenchi namsëdji dantu gövöndölö Nashiolo.
32 *Pakë a da Zhuan bi da namsëdji valadji pa ëli msa namsëdji jamangandji djustishi,
se namsëdji na këlë ëlif,
mandji se nna nguë ma tesu,
ku nna naamain dölöluia se këlë dëli.
Se benga zha pa namsëdji bë jö ineñ sai,
se namsëdji na tan vla ku ope tashif.
Palavulu nna tabaiadölö malvadu
33 »Namsëdji tan tëndë utu palavulu:
Bi të uan shiölö ku bi shimian uan matu uva.
Se ëli fë uan ögö pë,
se ëli jobo uan jamian valadji pa ëli ja fë vian se ëli ten fë uan mina jadji van pa ja ludjila.
Zha se ëli da zhugan nna tabaiadölö matu dëli zha,
se ëli ba vadji.
34 Ta da tempu totolo uva,
se ëli manda nna shividölö dëli ba toja nna tabaiadölö matu uva valadji pa ineñ ba ma fo nna nguë ineñ sai jö shi sa pachi dji dëli.
35 Se nna tabaiadölö matu fala nna shividölö dëli;
se ineñ da uan ineñ ku kuzhu,
se ineñ chila uan ineñ vida folo,
se ineñ da nguë shi fë tëishi ku budu.
36 Zha se ëli tan da utu nna shividölö bai,
uan namolo ngandji mashi ku dji pimëlu vëdji,
se ineñ ten fë ku ineñ jö shime.
37 »Se jabamentu,
se ëli manda tuludöguë mina dëli,
ja faa:
“¡Ineñ ske da mina amu ondolo!”.
38 »Mandji se ta nna tabaiadölö ba bë mina dëli,
se ineñ faa ineñ ineñ me:
“Nguë sai se ske mdja ku gagavu tudu,
namsëdji bi,
pa no chila ëli vida folo,
valadji pa no mdja ku gagavu dëli”.
39 Se amea sai se ineñ fala ëli,
se ineñ chila ëli fo matu uva,
se ineñ chila ëli vida folo.
40 »Se öseshi,
ta shiölö matu se tan ske vlame bi,
¿kë ja ëli ske fë ku nna tabaiadölö ineñ sai?
41 Se ineñ kundji ëli:
—Ëli ske fë pa nna tabaiadölö malvadu ineñ sai të uan jabamentu ödu,
se ëli ske da matu uva dëli zha da utu nna tabaiadölö ku ske da ëli jö shi ske sa dji dëli ta ske da tempu pa totolo uva.
42 Se Djisu pongota ineñ:
—¿Namsëdji na bi lëë dantu Fa Nashian zhugan djia fa:
“Budu shi nna nguë fë jadji zhuga ta iai,
se ba vla fë jasa budu.
Jö sai se sa tabaia Shiölö,
se na ja lega no ku böjö betu ua”?
43 »Dajantu shi se amu ska faa namsëdji fa a ske chila gövöndölö Nashiolo fo namsëdji,
se a ske da uan pövu ku se ja da fuluta.
44 Se nguë shi ja pono da liba budu sai ske fea fea,
mandji nguë shi budu se ja pono da liba dëli,
ske të ëli të vla opo.