1 »Se sa amea shime ku gövöndölö dösë ja sa shimafan uan shiölö ku bi ska së mazhugadu pa ëli ba jua tabaiadölö da matu uva dëli.

2 Se ëli ku ineñ da lazhan pagu uan djia tabaia se ëli da ineñ ba matu uva dëli.

3 »Se ta da la novu pamasedu,

se ëli së se ëli bë utu nna nguë ku bi sa mete döluia ku na bi ska fë zhugan jaf.

4 Se ëli faa ineñ:

“Namsëdji ten ba tabaia matu uva amu,

se amu ske da namsëdji pagu shi dëtu”.

5 Se ineñ ten bai.

Se ëli tan vlame së ola solomedjian ku ola tetadji,

se ëli tan fë jö shime.

6 »Se vala ola shinku tadji,

se ëli tan së se ëli dajonta ku utu nguë mashi ku ten bi sa shin tabaia.

Se ëli pongota ineñ:

“¿Jama fë ku namsëdji sa iai shin fë zhugan kuzhu uan djia ntëlelele?”.

7 »Se ineñ kundji ëli:

“Pakë zhugan nguë na ma no tabaiaf”.

»Se ëli faa ineñ:

“Namsëdji ten ba matu uva amu ba tabaia”.

8 »Se ta da tetadji,

se shiölö matu uva da mötölö dëli odji:

“Sama nna tabaiadölö tudu pa bo da ineñ pagu tabaia dëneñ,

bo ja jomesa fo nna nguë ineñ shi bo ma jabamentu zha pa bo da nna pimëlu pimëlu”.

9 Se nna tabaiadölö ineñ shi ku a bi ma la shinku tadji iai,

se unian unian ineñ ma pagu tabaia uan djia.

10 Dajantu shi se ta nna nguë ineñ shi a bi ma tabaia pimëlu iai,

ineñ bi ska gada pa ineñ ma pagu mashi.

Mandji se unian unian ineñ ten ma pagu tabaia uan djia.

11 Se ta ineñ ma djiëlu sai,

se ineñ jomesa ja da fëiu shiölö matu uva.

12 Se ineñ faa:

“Nna nguë ineñ se sa nna nguë ineñ shi a ma tabaia uan ponodu ola,

se bo fë ku ineñ jö shime ku no,

ku gaga tabaia shi pizhadu ku kenchi uan djia ntëlelele”.

13 »Mandji se ëli kundji uan ineñ:

“Jamada,

amu na ska fë ja shin dëtu ku bof.

¿Na sa dajantu pagu sai se bo bi ma tabaia sefa?

14 Ma pagu shi sa dji bo pa bo bai,

mandji se amu ngongo da jabamentu tabaiadölö sai,

jö shime ku amu bi da bo.

15 ¿Sa fa amu na sa ku dëtu pa amu fë jö shi amu ja ngongo fë ku djiëlu amufa?

¿Ö ja mëtë bo pashian dajantu ku amu sa ku öma betu?”.

16 ^*»Tadashi,

se nna nguë pimëlu ske sa jabamentu,

se nna nguë jabamentu ske ja sa pimëlu;

pakë uan sapa nguë se a ja sama,

mandji se zhugan ponodu nguë se a ja ma.

17 Se ta Djisu bi ska subili ja Jerusalen,

se ëli ma nna balë dëli deshi ku dösu ba apachi se ëli faa ineñ:

18 «Se amea se namsëdji ska bë iai,

öseshi no ska subili ba Jerusalen,

jamian shi a ske vëndë Mina Napai Dösë da nna jasa jasa padjil ku nna meeth dalë.

Se ineñ ske kondena ëli pa ëli mölë,

19 se a ske ma ëli pa da nna nguë ineñ shi na sa judiof.

Se ëli ske vla pai li da ineñ,

se ineñ ske ta aböjö pë ëli,

se ineñ ske da ëli ku valasöchi,

se ineñ ske da ëli pë kusu,

mandji se ta ske da tëishi djia se ëli tan ske lanta bi vida».

20 Tadashi se main nna mina Sebedeo,

ku nna mina dëli,

se ëli iaba lome Djisu,

se ëli dajözhöiö deenchi dëli,

ja pindji ëli uan kuzhu.

21 Se ëli pongota ëli:

—¿Kë ja bo dishia?

Se ëli kundji ëli:

—Da odji pa dantu gövöndölö bo pa uan nna mina amu dösu dösu ineñ sai tusan uan nguë benda dëtu bo ku pa nguë shiki sa benda skedji bo.

22 Se Djisu kundji ineñ:

—Namsëdji na sëbë jö shi namsëdji ska pindjif.

¿Namsëdji paadji bëbë fo pukulu shi amu ske bëbë?

Se ineñ faa ëli:

—Shiën,

no paadji.

23 Se ëli faa ineñ:

—Anta vedadji namsëdji ske bëbë fo pukulu amu,

mandji pa namsëdji tusan uan nguë benda dëtu amu ö benda skedji,

jö sai na ja ku ja të ku amuf.

Jö sai sa ja Pai amu fë vadu.

24 Se ta utu nna uan deshi balë tëndë jö sai,

se jomesa ja mëtë ineñ pashian tëjantu ku nna namain dödösu ineñ sai.

25 ^*Se Djisu sama ineñ se faa ineñ:

«Amea shi namsëdji sëbë,

nna gövöndölö nna nguë ineñ shi na sa judiof ja sa liba pövu dëneñ ku foshi,

se nna feshali ja fë nguë machi ku pödë dëneñ.

26 ^*Mandji se dantu namsëdji na ta pa sa shif.

Ske sa patadu,

nguë shi ja ngongo sa nguë ngandji dantu namsëdji,

ske ta pa ëli se ja sa shividölö namsëdji,

27 se nguë shi dantu namsëdji ja ngongo sa pimëlu,

ëli ske sa sëlëva namsëdji;

28 se amea shi ku Mina Napai Dösë na bi pa ja shivi ëlif,

shina pa ëli ja shivi nguë ku pa ëli ja da vida dëli dajantu pa ëli sava uan sapa dji nguë».

29 Se uan sapa möi pöjödölö bi ska lë Djisu ta ëli bi ska së fo Jeriko ku nna balë dëli.

30 Se nna nguë sebu dösu ku bi ska tusan lome jamangandji,

ta ineñ ba tëndë fa Djisu bi ska pasa,

se ineñ jomesa ja ta kidëlë:

«¡Të mindjikodji no,

Shiölö,

Mina alë David!».

31 Se uan möi pöjödölö bi ska faa ineñ kuzhu valadji pa ineñ jaböjö,

mandji se ineñ bi ska ta kidëlë ku foshi mashi:

—¡Shiöla,

Mina alë David,

të mindjikodji no!

32 Se Djisu da ta mdjadu se sama ineñ,

se faa ineñ:

—¿Kë ja namsëdji ngongo pa amu fë da namsëdji?

33 Se ineñ faa ëli:

—Shiöla,

no ngongo pa bo tan bla no öiö.

34 Se Djisu të dölö dëneñ se ëli fala ineñ öiö.

Se öshi öshime se ineñ tan të vita se ineñ bi ska lë ëli.