19
Baga jazha
1 Ta Djisu faa jö ineñ sai jaba,
se ëli së fo loso loso Galilea se ëli ba loso loso Judea ku benda benda sala lubela Jordan.
2 Se uan sapa möi pöjödölö bi ska lë ëli,
se ala se ëli kula ineñ.
3 Se zhugan nna fariseo iaba lome dëli,
se valadji pa ineñ puva ëli,
se ineñ pongota ëli:
—¿Sa legadu pa uan napai ja baga ku miela dëli dajantu uan ja shipë?
4 Se ëli kundji,
se ëli faa ineñ:
—¿Namsëdji na lëë fa fo jomesadu ku a mindji mundu,
“naamain ku napai se a mindji ineñ”.
5 Se ëli faa:
“Dajantu shi se napai ske ja lega pai dëli ku main dëli pë,
se ëli ske zhunta ku miela dëli,
se ineñ dödösu ske sa uan ponodu öguë soso”?
6 Dajantu shi se ineñ na tan ja sa dösufa,
shina uan soso.
Pa amea sai,
jö shi Nashian ja zhunta,
pa nna pöjödölö na ja safaf.
7 Se ineñ tan pongota ëli:
—¿Tadashi,
jama fë,
ku Moises da odji pa da fejaata baga,
ku pa lega ëli pë?
8 Se ëli kundji ineñ:
—Dajantu kusan ödu shi sa ku namsëdji se Moises lega pa namsëdji ja baga ku nna miela namsëdji.
Mandji se fo jomesadu na bi sa shif.
9 Mandji se amu faa fa,
pa na sa dajantu ku ja fëfëiu tëjantu ku nda ölöluiaf,
nguë shi ja baga ku miela dëli,
se ëli tan ja jazha ku utu mooso,
ëli ja kabajölöiö.
10 Se nna balë dëli faa:
—Shi amea sai se sa jö shi ja sa dantu medu ku miela,
ske gavu mashi pa na jazhaf.
11 Se Djisu kundji ineñ:
—Na sa nguë tudu se ja paadji tëndë jö sef,
shina nna nguë ineñ moso ku a lega ineñ pa ineñ ja tëndë.
12 Pakë zhugan nna nguë ku na ja jazhaf dajantu ku a pali ineñ amea sai pa ineñ na ja jazhaf;
se utu ineñ a ja fë ineñ shi dajantu gövöndölö dösë.
Nguë shi ja ngongo ma jö sai,
pa ëli ja ma.
Djisu da nna mina besa
13 Tadashi se a ma nna mina kichi kichi ba da Djisu,
valadji pa ëli pë öma dëli liba dëneñ ku pa ëli ten lezha da ineñ;
mandji se nna balë sa fa ja lonja öiö da nna nguë ineñ shi ma ineñ bai.
14 Se Djisu faa ineñ:
«Namsëdji lega pa nna mina kichi kichi bi toja amu,
na tan panta ineñf;
pakë nna nguë shimafan ineñ se ske sa dantu gövöndölö dösë».
15 Se ta ëli pë öma liba dëneñ,
se ëli së fo ala.
Mashivin liku
16 Tadashi se uan masebu iaba lome Djisu se ëli pongota ëli:
—Meetha,
¿kë ja gavu ku amu ja fo fë pa amu të vida chindadji?
17 Se Djisu kundji ëli:
—¿Jama fë bo ska pongota amu jö shi sa ja gavu?
Uan nguë moso se gavu.
Shi bo ja ngongo lantela dantu vida chindadji,
ta pa bo gada mandamentu tudu.
18 Se masebu pongota ëli:
—¿Kë ineñ shi sa?
Se Djisu kundji ëli:
—“Na ja chila nguë vida folof,
na ja kabajölöiöf,
na ja futaf,
na ja da fanchila tëjantu ku utu nguëf,
19 da pai bo ku main bo ondolo”,
ku “Ngongo ku pusumu bo shimafan tuludöguë bo”.
20 Se mashivin se faa ëli:
—Jö ineñ se tudu amu kumpli bebezha.
¿Kë ja tan fë amu fata mashi?
21 Se Djisu faa ëli:
—Shi bo ja ngongo sa uan nguë dëtu,
bai,
pa bo vëndë jö ineñ shi sa ku bo tudu,
pa bo da nna puvili,
pa amea sai pa bo të gagavu ösë.
Zha pa bo bi pa bo lë amu.
22 Se ta mashivin se tëndë jö sai,
se ëli be modoia pakë ëli bi sa ku uan sapa gagavu.
23 Se Djisu faa nna balë dëli:
—Anta vedadji se amu faa namsëdji ja kuta monchi muntë pa uan liku lantela dantu gövöndölö dösë.
24 Amu tan ja vlame faa namsëdji fa,
ja sa levu mashi pa uan javalu lömba pasa dantu uan fuladu guian mashi ku pa uan liku lantela dantu gövöndölö Nashiolo.
25 Se ta nna balë ba tëndë jö sai,
se ineñ gua ku böjö betu ja faa:
—Amea se ¿kë nguë ske paadji sava?
26 Se Djisu vla öiö pia ineñ,
se kundji ineñ:
—Jö shi pöjödölö na ja fo fëf ai,
Nashian ja paadji fë,
pakë ëli paadji fë ja sa palea ie tudu.
27 Se Pudul kundji ëli:
—¡Pia,
no lega ja tudu pë valadji pa no lë bo!
¿Se kë ja no ja ngana ku jö sai?
28 *Se Djisu kundji ineñ:
—Anta vedadji se amu faa namsëdji fa ta a tan ske vlame fë ja tudu novu iai,
ta Mina Napai Dösë ske tusan liba töli gloria dëli,
namsëdji ineñ se lë amu iai ten ske vlame tusan liba deshi ku dösu töli valadji pa namsëdji se juzhga nna deshi ku dösu zhenchi Israel.
29 Se ja sa nguë shi dajantu amu se ëli lega jadji dëli,
namain,
namain naamain,
pai,
main,
nna mina ö san jadji pë;
ëli ske të uan sentu ope mashi se ëli ten ske të vida chindadji.
30 *Mandji se uan sapa nna nguë pimëlu ske sa jabamentu,
se nna nguë jabamentu ske ja sa pimëlu.