18
Nguë shi se ngandji ngandji mashi dantu gövöndölö dösë
1 *Se dantu tempu sala,
se nna balë iaba lome Djisu se ineñ pongota ëli:
—¿Kë nguë ske sa nguë shi ngandji mashi dantu gövöndölö dösë?
—Anta vedadji se amu faa namsëdji shi namsëdji na ja tuka pa namsëdji tan vlame fë shimafan nna minaf,
namsëdji na ske lantela dantu gövöndölö dösëf.
4 Dajantu shi,
nguë shi ja pë öguë dëli basu shimafan namina sai se ske sa nguë shi sa ngandji ngandji mashi dantu gövöndölö dösë.
5 »Se ja sa nguë shi ja ma uan namina shimafan namina sai ku namu amu,
ëli ja ma amu.
6 Se ja sa nguë shi ja fë pa uan namina kichi kichi ku këlë amu da topu,
ske sa gavu mashi pa ëli mala uan jodo pë uan makuku budu mla kuzhu pë gochi dëli pa zhuga ëli ba fundu domali.
7 »¡Puvili mundu sai dajantu topu ineñ shi a ja da!,
pakë ja fë fata pa topu ja bi,
¡mandji puvili da pöjödölö shi ja fë pa ja da topu!
8 Shi öma bo ö ope bo ja fë pa bo pono da pekadu,
bo ja pota folo se bo ja zhuga ta.
Pakë ske sa gavu mashi pa bo lantela dantu vida ojogo ö ku öma potadu ku pa zhuga bo ta ku öma dödösu ku ope dödösu ba dantu fögö chindadji.*
9 *Se shi öiö bo ja fë pa bo pono da pekadu,
bo ja chila folo pa bo zhuga ta.
Sa gavu mashi pa bo lantela dantu vida ku uan öiö ku pa bo lantela ku öiö dödösu ku pa zhuga bo ba fögö donfenu.
Palavulu jabala pindjidu
10 »Ja pia pa namsëdji na ja nozho zhugan nna mina kichi kichi ineñ sef.
Pakë amu faa namsëdji fa,
nna anzhu dëneñ ineñ shi sa ösë ja sa olatuvëdji ja pia fesan Pai amu shi sa ösë.
11 *Pakë Mina Napai Dösë bi pa ëli bi jua ku pa ëli ten bi sava nna nguë ineñ shi bi sa pindjidu.*+
12 »¿Kë amea shi namsëdji bë?
Shi uan nguë ja sa ku uan sentu jabala se uan ineñ ja pëndë,
¿ëli na ske lega deshi novu ku novu pë pa ëli ba van iki iki pa ëli ba jua i shi pëndë ua?
13 Se shi ëli ja dajonta ku ëli,
anta vedadji se amu faa namsëdji fa ëli ske sa ku liguilia mashi da ponodu jabala sai mashi ku deshi novu ku novu shi na bi pëndëf ai.
14 Se ten sa amea shime,
ku Pai namsëdji shi ku sa ösë na ten ngongo pa zhugan ponodu nna mina kichi kichi ineñ se ten pëndëf.
Namain shi ja fë pekadu tëjantu ku bo
15 *»Shi namain bo ja fë pekadu tëjantu ku bo,
bo ja toja ëli bo moso se bo ja msa ëli fata dëli.
Shi ëli ja tëndë bo,
bo ngana namain bo.
16 Mandji se shi ëli na ja tëndë bof,
bo ja ma uan nguë ö nguë dösu bai ku bo,
“valadji pa ja jözhë ja tudu pë amea böjö nguë dösu ö nguë tëishi”.
17 Se shi ëli ja naga pa ëli tëndë ineñ,
se bo ja da guëzha lazhan;
se shi ëli na ja tëndë ñi guëzhaf,
se bo ja ma ëli shimafan nguë na ja këlë Nashianfa ö nguë ja shivi nna nguë ma tesu.
18 *»Anta vedadji se amu faa namsëdji fa ja sa jö ineñ shi namsëdji ja mala pë san tela tudu ten ske sa maladu pë ösë,
se ja sa jö ineñ shi namsëdji ja sota pë san tela tudu ten ske sa sotadu pë ösë.
19 »A shime,
anta vedadji se amu faa namsëdji fa,
shi namsëdji dösu ja da uan lazhan liba ja sa jö shi san tela iai pa namsëdji pindji,
Pai amu shi ösë ske da namsëdji.
20 Pakë ja sa jamian shi namsëdji dösu ö tëishi ja zhunta ku namu amu,
amu ske sa ala metadji namsëdji.
Palavulu shividölö shi fëiu
21 *Tadashi se Pudul iaba lome Djisu se ëli faa ëli:
—Shiöla,
¿jantu ope ta pa amu pada namain amu ku fë pekadu tëjantu ku amu?
¿Uan sapa vëdji ba toja ope seta?
22 Se Djisu kundji ëli:
—Amu na ja faa bo uan sapa vëdji ba toja ope setaf,
shina ba toja ope deshi seta ku seta.
23 »Dajantu shi gövöndölö dösë ja sa shimafan uan alë ku bi ngongo golo kuenta ku nna shividölö dëli.
24 Se ta ëli jomesa ja fë,
se uan ineñ bi toja ëli ku bi ska fala ëli milidji ku milidji djiëlu oro.
25 Se ta ëli na të jö shi ku pa ëli ma da paguf,
se shiölö da odji pa vëndë ëli,
ku miela ku nna mina dëli,
ku jö ineñ shi sa ku ëli tudu,
valadji pa ëli da pagu deuda dëli.
26 »Se shividölö se dajözhöiö deenchi dëli.
Se ëli luga ëli:
“Të pashiensa ku amu,
amu ske da bo pagu bo tudu”.
27 Tadashi se shiölö të dölö shividölö dëli sai,
se ëli pada ëli deuda dëli tudu se ëli lega pa ëli bai legadu.
28 »Se ta ëli së fo ala,
se sëlëva se dajonta ku utu jamada ope tabaia dëli ku bi ska fala ëli uan sentu djiëlu denario.
Se ëli fala ëli gochi se ëli jomesa ja ia ëli gochi.
“¡Da amu pagu jö shi ku bo fala amu!”,
se ëli pindji ëli.
29 »Se jamada dëli dajözhöiö deenchi dëli.
Se ëli luga ëli:
“Të pashiensa ku amu,
amu ske bi bi paga bo”.
30 Mandji se ëli naga ëli.
Shina ëli bai se ëli mëtë ëli pë djili ba toja pa ëli paga ëli deuda dëli.
31 »Se ta utu nna shividölö bë jö shi shiga ala,
se ineñ vla modoia se ineñ bai se ineñ ba da shiölö dëneñ lazhan jö shi ku shividölö sai fë.
32 Tadashi se shiölö manda pa ba sama shividölö sai.
Se shiölö faa ëli:
“¡Shividölö masan!
Amu pada bo deuda bo pakë bo luga amu.
33 ¿Na bi ta pa bo ten të dölö jamada bo,
amea shi amu të dölö bofa?”.
34 Tadashi se shiölö dëli,
ku pashian se,
ma ëli se da nna ludjadölö djili valadji pa da ëli jatigu ba toja pa ëli da pagu tudu jö shi ku ëli fala ëli iai tudu.
35 »Se ten sa amea shime ku Pai amu shi sa ösë ske fë ku namsëdji,
shi namsëdji na ja pada nna namain namsëdji fo kusanf.