17
Djisu ku Moises ku Elias së ku supichi
1 Ta pasa sëishi djia,
se Djisu ma Pudul ku nna namain dösu Sanchagu ku Zhuan;
se ëli ma ineñ moso apachi ba uan iki atu.
2 Se ala,
se ëli vla tukadu deenchi dëneñ,
se fesan dëli tuka amea shi ku jala dëli bi ska dëdë shimafan solo,
se bitidu dëli bi vla banku shimafan fögö djidjidu.
La transfiguración (Mateo 17.1-13)
4 Se Pudul faa Djisu:
«Shiöla,
¡ske sa gavu pa no mdja iai!
Shi bo ja ngongo no ja fë limada tëishi:
uan da bo,
uan da Moises,
ku uan me da Elias».
5 **Öshi ontolo ineñ ska faa fala,
se bi uan növu djidjidu se kubili ineñ,
se fo dantu növu sai se a tëndë uan falagochi ku ska faa:
«Nguë sai se sa Mina kilidu amu,
se ëli se ja fë amu të liguilia.
¡Namsëdji tëndë ëli!».
6 Ta ineñ tëndë jö sai,
se nna balë dajözhöiö ku fesan dëneñ pë san,
pakë mendu ma ineñ.
7 Mandji se Djisu iaba toja ineñ se da ineñ ku öma.
Se ëli faa ineñ:
«Namsëdji lanta Namsëdji na menduf».
8 Se ta ineñ lanta öiö,
se ineñ na tan bë zhugan nguë mashif,
shina Djisu moso.
9 Se ta ineñ dësë fo iki,
se Djisu da ineñ odji,
ja faa ineñ:
«Namsëdji na ja da zhugan nguë lazhan jö shi namsëdji bëf,
ba toja pa Mina Napai Dösë tan lanta fo dantu nna nguë mölidu».
10 Tadashi se nna balë pongota ëli,
ja faa ëli:
—¿Jama fë nna meeth dalë ske ja faa ske fë fata pa Elias se bi pimëlu?
11 Se ëli kundji ineñ,
se ëli faa ineñ:
—Sa vedadji fa Elias ske bi pimëlu se ëli ske bi fë vadu ja tudu pë.
12 *Mandji se amu faa namsëdji Elias bi bi bebezha,
se ineñ na bi jönsë ëlif,
shina ineñ fë ëli jö ineñ shi ineñ bi ngongo tudu.
Se sa amea shime ku Mina Napai Dösë ten ske padësë öma dëneñ.
13 Tadashi se da nna balë ötëndë fa ëli ska faa ineñ tëjantu ku Zhuan Bachita.
Djisu kula uan namasebu ku sa ku spitu fëiu
14 Se ta ineñ ba da jamian möi pöjödölö,
se uan masebu bi se dajözhöiö deenchi Djisu,
15 ja faa:
«Shiöla,
të mindjikodji mina amu.
Ëli sa ku uan danchi ku ja ligui ëli da san se ëli ska padësë monchi.
Pakë uan sapa vëdji se ëli ja pono da fögö se uan sapa vëdji se ëli ten ja pono da aua.
16 Se amu ma ëli ba da nna balë bo,
se ineñ na paadji kula ëlif».
17 Se Djisu kundji:
«¡Ö nna zhenchi masan masan ku na ja këlëf!
¿Ba toja kë djia shi amu ske ta ku namsëdji?
¿Ba toja kë djia shi amu ske gaga namsëdji?
Ma ëli bi da amu iai».
18 Se Djisu lonja öiö da damono sai,
se ëli së fo namasebu sai,
se ëli vla kuladu fo ola sala.
19 Se tadashi ku nna balë bi toja Djisu,
apachi,
se ineñ faa:
—¿Jama fë no na bi paadji chila ëli folof?
20 *Se Djisu faa ineñ:
—Namsëdji na sa ku uan fi jonfaf.
Anta vedadji se amu faa namsëdji fa,
shi namsëdji ja paadji të uan fi jonfa,
shimafan uan mina iku mostasa,
namsëdji paadji faa iki sai:
“Së fo iai pa bo ba ala”,
se ëli ske bai,
se na ske të zhugan ja ku namsëdji na ske ja paadji fëf.
21 Mandji se klase jö ineñ na ja së shina ku lezha ku zhedu böjöf.*+
Djisu tan ska vlame da lazhan mölë dëli
22 Zha se,
ta ineñ bi sa zhuntadu dantu Galilea,
se Djisu faa ineñ:
«A ske vëndë Mina Napai Dösë da nna pöjödölö.
23 Se ineñ ske chila ëli vida folo,
mandji se ta ske da tëishi djia se ëli tan ske lanta bi vida».
Se nna balë tudu tan vla modoia mashi.
Tesu jadji Nashiolo
24 Ta Djisu ku nna balë dëli ba da loso Kapernaum,
se nna nguë ineñ shi ja ma pagu tesu jadji Nashiolo iaba jamian Pudul se ineñ pongota ëli:
—¿Meeth bo na ja da pagu tesu jadji Nashianfa?
25 Se Pudul kundji ineñ:
—Shiën,
ëli ja da pagu.
Se ta Pudul lantela dantu jadji,
se Djisu pasa la ba pongota ëli:
—¿Kë amea shi bo bë,
Shiman?
Nna alë san tela,
¿da kë nguë ineñ ja ma pagu ku ja ma tesu da:
da nna nguë dëneñ ö da utu dji nguë?
26 Se Pudul kundji:
—Da utu dji nguë.
Se Djisu faa: