1 ^*Se nna fariseo ku nna saduseo iaba lome Djisu se,

valadji pa ineñ puva ëli,

se ineñ pindji ëli pa ëli msa ineñ uan shinali fo ösë.

2 Se ëli kundji ineñ:

«Namsëdji jönsë ta a ja faa:

“Ta tadji ja ma,

namsëdji ja faa ske fë tempu gavu pakë ösë sa böbö,

3 se pamasedu,

ske da tavada pakë ösë sa ku növu kulu”.

Namsëdji ja jönsë amea shi a ja bë ösë,

mandji se namsëdji na ja paadji jönsë shinali tempuf.

4 ^*Zhenchi nna nguë malvadu ku nna nguë kabajölöiö ineñ sai ska pindji uan shinali ja ngangandji.

Mandji se a na ske da ineñ utu shinali mashi ku dji Jonasf».

Tadashi se ëli lega ineñ pë ala se ma ja se ëli bai.

5 Se ineñ sata ba benda sala,

mandji se nna balë bi kësë pa ineñ be ku ampan.

6 Se Djisu faa ineñ:

^*«Ja pia,

namsëdji ja ska pinchidu levadura nna fariseo ku dji nna saduseo».

7 Se ineñ bi ja pufia dantu dëneñ me,

ja faa:

«Sa dajantu ku no na bi ku ampanf».

8 Se ta Djisu ba tëndë ineñ,

se ëli faa ineñ:

«¿Ja fë namsëdji ska pufia,

napai ku sa ku fi jonfa,

sa fa namsëdji na sa ku ampanfa?

9 ^*¿Namsëdji ontolo na ska tëndëfa,

namsëdji na ska lambela ampan shinku ku a pachi milidji shinku,

se jantu ojali ku namsëdji tan bi totolo?

10 ^*¿Ñi ampan seta da milidji jatulu iai,

jantu ojali namsëdji totolo?

11 ¿Jama fë namsëdji na ja tëndë fa amu na ska faa ja tëjantu ku ampanf,

shina pa namsëdji ja pinchidu levadura nna fariseo ku dji nna saduseof?».

12 Tadashi se sa öshi ineñ ba tëndë fa ëli na ska faa ineñ pa ineñ ja pinchidu levadura ampanf,

shina fo jö ineñ shi nna fariseo ku nna saduseo ja ska shina nguë.

13 Se Djisu ku nna balë dëli ba loso loso Sesarea dji Filipo.

Se jamangandji,

se ëli pongota nna balë dëli,

ja faa ineñ:

—¿Kë nguë nna nguë tudu ska faa sa Mina Napai Dösë?

14 ^*Se ineñ kundji ëli:

—Zhugan nguë ska faa bo sa Zhuan Bachita,

se utu nguë ja faa pantafala Elias,

se utu nguë ja faa pantafala Jeremias ö utu uan pantafala.

15 —A namsëdji,

¿kë nguë namsëdji faa sa amu?

16 ^*Se Shiman Pudul kundji se faa ëli:

—Bo se sa Kilitu,

Mina Nashian shi sa vivu.

17 Se Djisu faa ëli:

—Besa ja sa ku bo,

Shiman,

mina Jonas,

pakë jö sai na sa ja zhugan pöjödölö ku ja mölë da bo lazhanf,

shina Pai amu shi ku sa ösë.

18 Se amu ja faa bo fa bo se sa Pudul,

se liba budu sai se amu ske fë guëzha amu pë,

se poto Ades na ske paadji ngana ëlif.

19 ^*Amu ske da bo sevu sevu gövöndölö dösë;

se jö ineñ shi bo ja mala pë san tela tudu ten ske sa maladu pë ösë,

se ja sa jö ineñ shi bo ja sota pë san tela tudu ten ske sa sotadu pë ösë.

20 Tadashi se ëli manda nna balë dëli pa na da zhugan nguë lazhan fa ëli se sa Kilituf.

21 Tadashi se fo djia sai se Djisu jomesa ja da nna balë dëli lazhan fa ske fë fata pa ëli ba Jerusalen pa ëli padësë monchi öma nna jasa jasa pövu,

ku nna jasa jasa padjil ku nna meeth dalë,

fa ske fë fata pa chila ëli vida folo mandji se ëli tan ske lanta bi vida ta ja da tëishi djia.

22 Se Pudul ma ëli ba a pachi se jomesa ja lonja öiö da ëli,

ja faa ëli:

—¡Shiöla,

të dölö bo!

¡Jabötu jö sai na ske shiga bof!

23 Se Djisu da voto se faa Pudul,

ja faa ëli:

—¡Ba tashi amu,

Satanas!,

bo ja fë amu da topu,

pakë bo na ja pë jasa ja Nashianf,

shina dji nna pöjödölö.

24 ^*Zha se Djisu faa nna balë dëli:

«Shi uan nguë ja ngongo bi lë amu pa ëli sa balë amu,

ta pa ëli naga tuludöguë dëli,

pa ëli gaga kusu dëli,

pa ëli lë amu.

25 ^*Pakë nguë shi ja ngongo sava vida dëli,

ëli ske pëndë vida dëli,

mandji se nguë shi ja pëndë vida dëli dajantu amu,

ëli ske sava vida dëli.

26 ¿A kë ja ku ja shivi pa uan pöjödölö ngana mundu nguintëlu nguintëlu mandji pa ëli pëndë vida dëli?

¿Ö kë ja a ja paadji da pa ma tuka ku vida dëli?

27 ^*Pakë Mina Napai Dösë ske ta pa tan bi dantu gloria Pai dëli ku nna anzhu dëli,

pa se sa öshi ëli ske da nguë tudu jö shi a ja mësë amea jö shi a bi bi fë.

28 Anta vedadji se amu faa namsëdji,

sa ku zhugan namsëdji ineñ se sa plesteñi öseshi iai ku na ske bë mölë shinke bë Mina Napai Dösë tan ske vlame bi dantu gövöndölö dëlif».