15
Jö shi ja sunzhu spitu pöjödölö
1 Se zhugan nna fariseo ku nna meeth dalë ku bi së fo Jerusalen,
se ineñ zhunta pë lome Djisu,
se ineñ pongota ëli:
2 —¿Jama fë nna balë bo na ja lë amea kutumu nna paipai nof?
¡Ineñ ja kumu shin kumpli pimëlu kutumu ku sa laba öma!
3 Se ëli kundji ineñ:
—¿Se jama fë namsëdji ja kabela mandamentu Nashiolo dajantu kutumu namsëdji tudjia?
4 Nashian faa:
“Da pai bo ku main bo ondolo”,
a shime:
“Nguë shi ja ta pai dëli ö main dëli masan a ske kondena ëli ba mölë”.
5 Mandji se namsëdji ja shina fa uan nguë paadji faa pai dëli ö main dëli:
“Ja sa zhuda shi ta pa amu paadji da bo iai,
amu da Nashiolo bebezha”.
6 Se amea sai,
tili mina sai na da pai dëli ondolof.
Se namsëdji chila mandamentu Fa Nashiolo folo dajantu kutumu namsëdji.
7 ¡Nna sochi!
Pantafala Isaias të dëtu ta ëli pantafala tëjantu ku namsëdji iai:
8 “Pövu sai ja da amu ondolo ku olaböjö,
mandji se kusan dëneñ ja sa löndji fo amu.
9 Pakë shipë shi se ineñ ja adola amu;
se shina ja dëneñ ja sa mandamentu dji nna pöjödölö”.
10 Se ëli sama möi pöjödölö ineñ sai se ëli faa ineñ:
—Namsëdji tëndë amu ku pa namsëdji tëndë jö sai.
11 Jö shi ku ja sunzhu uan pöjödölö na sa jö shi ja lantela dantu böjöf,
shina jö shi ja së fo böjö,
se sa jö ineñ shi ku ja sunzhu ëli.
12 Tadashi se nna balë dëli iaba toja ëli se ineñ faa ëli:
—¿Bo sëbë fa nna fariseo ja sinchi pogogovan ta ineñ ja tëndë jö ineñ sai?
13 Se ëli kundji ineñ:
—Ope döpa tudu ineñ shi Pai amu dösë na se shimianf a ske lanja fo leezha.
14 *Namsëdji lega ineñ pë,
ineñ sa nna nguë sebu ku ja ska ma nna nguë sebu bai.
Se shi uan nguë sebu ja ma utu nguë sebu bai,
ineñ dödösu ske pono da jobo.
15 Se Pudul pindji ëli:
—Da no lazhan palavulu sai.
16 Se Djisu faa ineñ:
—¿Se a shime namsëdji ten sa ontolo shin tëndëmentu?
17 ¿Namsëdji na ja tëndë fa jö ineñ shi ja lantela dantu böjö ja bai dantu chipa,
zha se a ja chila fo chipa ua?
18 *Mandji se jö shi ja së fo böjö sa ja ku ja bi fo kusan se sa jö shi ja sunzhu pöjödölö.
19 Pakë fo dantu kusan se ja së mazhnamentu fëfëiu,
chila nguë vida folo,
kabajölöiö,
ja nda ölöluia,
futa,
mucha da nguë,
da fanchila ku namu dji nguë.
20 Jö ineñ sai se sa jö ineñ shi ja sunzhu pöjödölö,
mandji ku na ja tëjantu ku kumu shin laba öma na ja sunzhu pöjödölöf.
Jonfa uan mooso ku na sa judiof
21 Se ta Djisu bi ska së fo ala,
se ëli ba loso loso Tiro ku Sidon.
22 Se uan mooso ku sa nguë kanan pachi loso loso sai se së bi toja ëli ja ta kidëlë,
ja faa ëli:
«¡Shiöla,
Mina alë David,
të mindjikodji amu!
Mina naamain amu ska ma uan mavida ödu dajantu ku ëli sa ku damono».
23 Se Djisu na kundji ëlif.
Tadashi se nna balë dëli iaba toja ëli se luga ëli:
«Jölë mooso sai pa ëli bai,
pakë ëli sa tashi no ja bi ja ta kidëlë».
24 Se Djisu kundji:
—Amu na bi da nna jabala pindjidu pövu Israelf.
25 Mandji se mooso sai iaba toja ëli se,
dajözhöiö deenchi dëli,
se luga ëli:
—¡Shiöla,
zhuda amu!
26 Se ëli kundji ëli:
—Na sa gavu pa chila ampan fo nna mina pa da nna jösölöf.
27 Se mooso se kundji ëli:
—Shiën,
Shiölö;
mandji se ba toja nna mina jösölö ja kumu fea fea jö ineñ shi ja pono fo mezha nna shiölö dëneñ.
28 Se Djisu kundji ëli:
—¡Ö mooso sai,
jonfa ngandji se sa ku bo!
Pa kumpli jö shi ku bo dishia.
Se öshi öshime se mina naamain dëli kula.
Djisu kula uan sapa dji nguë
29 Se Djisu së fo ala se ëli ba da bodo bodo domali Galilea.
Zha se ëli subili ba van iki se ëli tusan.
30 Se uan möi pöjödölö se iaba toja ëli ku nna nguë ku sa ojogo,
nna nguë sebu,
nna nguë ope lezhadu,
nna nguë ku na ja faa falaf ku uan sapa nna nguë ku bi ska danchi,
se a pë ineñ tudu ope dëli;
se ëli kula ineñ.
31 Se amea sai se nna möi pöjödölö ineñ se tudu gua ku böjö betu öshi ineñ bë nna nguë ku na ja faa falaf ska faa fala,
nna nguë lezhadu sa kuladu,
nna ojogo ja nda,
se nna sebu ska bë kuzhu.
Se ineñ jomesa ja alaba Nashian Israel.
Djisu da uan möi pöjödölö kumu
32 Se Djisu sama nna balë dëli se ëli faa ineñ:
—Amu ska të dölö nna nguë ineñ sai,
pakë sa tëishi djia ku ineñ sa iai ku amu,
se ineñ na sa ku ja pa ineñ kumuf.
Amu na ngongo lega ineñ bai shin kumuf,
pa na sa fa ineñ ja pëndë añimu pa ineñ ja pono da san jamangandjif.
33 Tadashi se nna balë faa ëli:
—¿A kë amea shi no paadji da sapa möi pöjödölö ineñ sai ampan pa ineñ kumu dantu jamian sölö sölö sai?
34 Se Djisu pongota ineñ:
—¿Jantu ampan sa ku namsëdji?
Se ineñ kundji:
—Seta,
ku zhugan fi ponodu pishi.
35 Se ëli manda pa möi pöjödölö ineñ se tusan san.
36 Se ëli ma ampan seta ineñ sai ku pishi,
se ëli da dezhupaga,
se ëli pachi nna balë dëli,
valadji pa ineñ pë deenchi möi pöjödölö ineñ sai.
37 Se ineñ tudu kumu ba toja ku ineñ shia chipa.
Zha se ineñ totolo dasu dasu ineñ shi sovezha,
se a shia ojali seta.
38 Se nna nguë ineñ shi kumu bi sa milidji napai jatulu,
shin jonta ku naamain ku nna mina.
39 Zha se ëli lega nna nguë ineñ sai tudu bai,
se ëli subili batelu se ëli ba loso loso Magadan.