14
Mölë Zhuan Bachita
1 Dantu tempu sala se Erodes shi se bi sa gövöndölö shi fë jatulu,
tëndë nova gavu Djisu,
2 se ëli faa nna shividölö dëli:
«¡Nguë sai se sa Zhuan Bachita se tan lanta fo dantu nna nguë mölidu!
Se dajantu shi se ëli të pödë valadji pa ëli ja fë ja ngangandji».
3 *Pakë Erodes se bi të Zhuan,
se ëli mala ëli ku guian pë dantu djili dajantu Erodias,
miela Filipa,
ku bi sa namain dëli.
4 Dajantu ku Zhuan bi ska faa Erodes:
«Alë na ja lega pa bo të ëlif».
5 Se Erodes bi ngongo chila ëli vida folo,
mandji se ëli bi ska mendu pövu,
pakë ineñ bi ska bë Zhuan shimafan uan pantafala.
6 Ta a bi ska fë fesa bembe danu Erodes,
se mina naamain Erodias bi bi baia deenchi nna nguë tudu;
se fë gavu da Erodes,
7 dajantu shi se ëli bi plomëtë basu julamentu fa ëli ske da ëli ja sa jö shi ëli ja pindji ëli tudu.
8 Se ëli,
ku shizhu shi main dëli bi da ëli iai,
se ëli faa ëli:
«Da amu jasa Zhuan Bachita dantu uan patu batela».
9 Se alë vla modoia modoia,
mandji se dajantu julamentu shi ëli bi fë deenchi nna nguë ineñ shi tudu sa nguë fesa,
se ëli da odji pa da ëli,
10 se ëli da odji pa pota Zhuan gochi dantu djili.
11 Se ëli ten bi ku jasa liba uan patu batela.
Se ëli da mina naamain sai,
se ëli da main dëli.
12 Zha se tadji mashi,
se nna balë Zhuan bi,
se ineñ bai se ineñ ma mochi dëli se ineñ ma ba ntela.
Zha se ineñ bai se ineñ ba da Djisu lazhan.
Djisu da uan möi pöjödölö kumu
13 Ta Djisu tëndë nova sai,
se ëli safa ëli moso dantu uan batelu ba uan jamian sölö sölö.
Se ta möi pöjödölö tëndë se ineñ lë ëli ku ope fo loso loso tudu.
14 Se ta ëli ba jaia se ëli bë uan sapa möi pöjödölö ineñ sai,
se ëli të dölö dëneñ,
se ëli kula nna nguë ineñ shi bi ska danchi.
15 Ta da tetadji kubidu,
se nna balë dëli iaba lome dëli se ineñ faa ëli:
—Jamian se sa dantu uan jamian sölö sölö,
se tetadji kubidu la ja ma bebezha.
Manda nna nguë ineñ se tudu pa ineñ bai,
valadji pa ineñ ba loso loso ineñ sai pa ineñ ba kumpa kumu.
16 Se Djisu kundji ineñ:
—Na ta pa ineñ baif.
Tuludöguë namsëdji da ineñ kumu.
17 Se ineñ kundji ëli:
—Iai no na të zhugan ja mashi ku ampan shinku ku pishi dösuf.
18 Se Djisu faa ineñ:
—Namsëdji ma bi da amu iai.
19 Se ëli manda nguë tudu pa tusan liba alba.
Se ëli ma ampan shinku ineñ se ku pishi dösu ineñ sai,
se ëli vla öiö da ösë,
se ëli da besa.
Zha ëli pachi ampan ineñ sai se ëli da nna balë dëli,
se ineñ se pachi möi pöjödölö ineñ sai.
20 Se ineñ tudu kumu,
se ineñ shia chipa,
se ineñ totolo dasu dasu ineñ shi sovezha iai,
se a shia uan deshi ku dösu ojali.
21 Se nna nguë ineñ shi kumu bi sa vala milidji shinku napai,
shinke a jonta nna naamain ku nna namina.
Djisu ska nda liba daua
22 Se öshi öshi se Djisu fë pa nna balë dëli lantela dantu batelu se ineñ be deenchi dëli benda sala bodo domali,
se sa öshi ku ëli bi ska faa möi pöjödölö ineñ se be ku dezhu.
23 Se ta ëli lega nna möi pöjödölö,
se ëli subili ba iki pa ëli ba lezha ëli moso.
Se ta nöchi ska ma,
se ëli bi sa ala ëli moso,
24 se batelu bi sa fundu löndji fo san tela bebezha,
se pukulu domali bi ska ligui da batelu,
pakë oventu bi ska föfö lizhu fo pachi dovesa.
25 Se ta da mazhugadu,
se Djisu iaba lome dëneñ ja nda liba domali.
26 Se ta nna balë bë ëli ska nda liba daua,
se mendu ma ineñ.
Se ineñ ta kidëlë ku mendu:
«¡Sa uan lima!».
27 Mandji se öshi öshi se Djisu faa ineñ:
—¡Namsëdji ma añimu.
Sa amu,
na menduf!
28 Se Pudul kundji ëli:
—Shiöla,
shi ja sa bo,
manda amu pa amu ba toja bo liba daua.
29 Se Djisu faa ëli:
—¡Bi!
Se Pudul dësë fo dantu batelu se ëli nda liba daua ja bai dëtu Djisu.
30 Mandji se ta ëli sinchi amea shi oventu lizhu bi ska föfö,
se mendu ma ëli se ëli jomesa ja fundu.
Tadashi se ëli ta kidëlë:
—¡Shiöla,
sava amu!
31 Se öshi öshi se Djisu da ëli öma,
se ëli faa ëli:
—¡Napai ku uan fi jonfa!
¿Jama fë bo të butanja?
32 Se ta ineñ subili ba dantu batelu,
se oventu manja.
33 Se nna nguë ineñ shi bi sa dantu batelu adola ëli ja faa:
«Anta vedadji bo se sa Mina Nashiolo».
34 Se ta ineñ sata ba benda sala domali,
se ineñ ba da san tela Jenesaret.
35 Se ta nna nguë ineñ shi ja ta jamian sala ba jönsë ëli se ineñ panta panta monova ludja loso loso ineñ sala tudu.
Se a ma nna nguë ineñ shi ska danchi tudu ba da ëli,
36 se ineñ bi ska luga ëli pa sumanu pa ineñ paadji fala bodo bobolonda dëli;
se nna nguë ineñ shi ja fala ëli tudu ja sa kuladu ntëlelele.
Jesús camina sobre el agua (Mateo 14.22-36)