12
Shiölö djasubudu
1 Dantu tempu sai se Djisu bi ska be ja pasa dantu matu shimadu tulugu se bi sa uan djasubudu.
Se nna balë dëli bi sa ku faku,
se amea sai se ineñ jomesa ja lanja zhugan ope jambabu tulugu se ineñ bi ska kumu.
2 Se ta nna fariseo bë ineñ,
se faa ëli:
—¡Ja pia!
Nna balë bo ska fë uan ja ku a na ja lega pa fë uan djasubuduf.
3 Se ëli kundji ineñ:
—¿Namsëdji na lëë jö shi alë David fë,
ta ëli ku nna jamada dëli bi sa ku faku ua?
4 Ëli lantela dantu jadji Nashiolo,
se ëli ku nna jamada dëli kumu ampan santu,
ja ku a na ja lega ñi pa ëli ñi pa nna jamada dëli kumuf,
shina nna padjil moso.
5 ¿Ö namsëdji na lëë dantu alë Moises,
fa nna padjil dantu jadji Nashiolo se ineñ ja fë ja nozhodu djasubudu shinke ineñ ja sa tave fa ineñ sa kupa ua?
6 Pakë amu ska faa namsëdji fa,
iai sa ku uan nguë ku se ngandji mashi ku jadji Nashiolo.
7 *Shi ja da namsëdji ötëndë sinchidu jö sai:
“Jö shi amu ska pindji namsëdji sa mindjikodji na sa saklifisuf”,
amu na ske kondena nna nguë ineñ shi na sa nasenchif.
8 Pakë Mina Napai Dösë se sa Shiölö liba djasubudu.
Djisu kula uan masebu ku sa ku öma danadu uan djasubudu
9 Ta Djisu bi ska pasa ala,
se ëli lantela ba jadji Nashian nna judio.
10 Se ala bi sa ku uan masebu ku bi sa ku uan öma danadu.
Se valadji pa ineñ paadji të ja tëjantu ku ëli,
se ineñ pongota ëli:
—¿Ja sa legadu pa kula nguë djasubudu?
11 *Se ëli kundji ineñ:
—Shi uan namsëdji ja sa ku uan jabala se uan djasubudu se ja pono da uan poso,
¿ëli na ske fala ëli se ëli ske chila ëli ua?
12 ¡Kë ja ja shivi mashi,
uan masebu ö uan jabala!
Dajantu shi,
sa legadu pa fë ja gavu uan djasubudu.
13 Tadashi se ëli faa masebu sai:
«Tezha öma bo».
Se ëli ten tezha öma dëli,
se öma dëli ten vla kuladu,
shimafan öma shiki.
14 Mandji se nna fariseo së fo ala se ineñ sa fa ja jua amea shi pa ineñ chila ëli vida folo.
Shividölö shi Nashiolo se ma
15 Se dajantu ku Djisu bi së jö ineñ se tudu,
se ëli safa fo ala.
Se uan sapa möi pöjödölö lë ëli,
se ëli kula nguë tudu,
16 mandji se ëli bi ska da ineñ odji valadji pa ineñ na da lazhan nguë shi sa ëlif.
17 Jö ineñ se tudu sa ja valadji pa kumpli ku ineñ shi pantafala Isaias bi bi faa bebezha:
18 «Nguë sai se sa shividölö amu,
nguë amu se ma,
nguë amu ngongo ku ëli,
nguë shi ja dëli ja fë gavu da amu,
liba dëli se amu ske pë Spitu amu,
se amu ske pegua djustishi da nna nguë ineñ shi na ja këlë Nashianf.
19 Ëli na ske pufiafa ñi ta kidëlëf;
zhugan nguë na ske tëndë fala dëli mete döluiaf.
20 Ontolo a na ske sa chama kabela öpa anjanaf
ñi a na ske paka öpa fögö shi ku ontolo sa ku igögöf,
ba toja pa ëli fë pa djustishi dëli ngana.
21 Se ku namu dëli se nna nguë ineñ shi na ja këlë Nashianf tudu ske sa ku alagada».
Djisu ku Belsebu
22 Uan djia se a ma uan masebu ku sa ku damono ku sa sebu ku na ja faa falaf,
se Djisu kula ëli,
se amea sai se ëli paadji bë kuzhu ku faa fala.
23 Se nguë tudu gua ku böjö betu se ineñ bi ska faa:
«¿Nguë sai na se ske sa Mina alë David ua?».
24 *Mandji se ta nna fariseo tëndë jö ineñ sai,
se ineñ bi ska faa:
«Nguë sai na ja chila nna damonof shina ku amea pödë Belsebu,
ku se sa mina dalë nna damono».
25 Mandji se Djisu bi jönsë mazhnamentu dëneñ,
se ëli faa ineñ:
«Gövöndölö tudu ku ja sa pachidu tëjantu ku tuludöguë dëli me,
ske fea fea,
se palea ö jadji shi ja sa pachidu tëjantu ku tuludöguë dëli me,
na ske paadji ta mdjaduf.
26 Se shi Satanas ja chila Satanas folo ba öluia,
ëli sa pachidu ku tuludöguë dëli me.
¿Kë amea shi gövöndölö dëli ske paadji ta mdjadu?
27 Se shi amu ja chila nna damono amea Belsebu,
¿ku kë amea kë nguë nna balë namsëdji ten ska ma chila?
Dajantu shi se ineñ ske sa jues liba namsëdji.
28 Mandji se shi amu ten ja ska chila nna damono amea Spitu Nashiolo,
tadashi gövöndölö Nashian bi toja namsëdji bebezha.
29 Pakë,
¿kë amea shi zhugan nguë paadji lantela dantu jadji uan masebu ödu pa ëli futa gagavu dëli tudu afoshi,
shi ëli na ja mala ëli pimëluf?
Se sa öshi moso ku ëli ja paadji futa gagavu dëli afoshi.
30 *»Nguë shi na ja sa pachi amuf,
ëli ja sa tëjantu ku amu;
se nguë shi ku amu na ja totolof,
ëli ja të panta panta.
31 »Dajantu shi se amu faa namsëdji fa nguë tudu a ske paadji pada pekadu tudu ku fala zhogoveadu tudu,
mandji se fala zhogoveadu tëjantu ku Spitu Nashiolo a na ske pada zhugan nguëf.
32 *Ja sa nguë shi ja faa uan fala tëjantu ku Mina Napai Dösë a ske pada ëli;
mandji se nguë shi ja faa uan ponodu fala ku tëjantu ku Spitu Santu,
ëli na ske pada ëli ñi mundu se fa ñi mundu shi tan ske bi bif.
33 *»Shi namsëdji ja të uan ope döpa gavu,
fuluta dëli ja sa gavu,
shi namsëdji ja sa ku uan ope döpa fëiu,
fuluta dëli ske sa fëiu.
Fo uan ope döpa se a ja jönsë fuluta dëli.
34 *¡Zhenchi nna jobolomatu!
¿Kë amea shi namsëdji ku sa nna nguë fëfëiu paadji faa uan ja gavu?
Pakë fo jö shi ku ja sa batanchi dantu kusan se böjö ja fala.
35 Nguë shi ja sa nguë gavu,
fo gavu dëli ku sa gadadu dantu kusan se ëli ja chila ja gagavu,
mandji se nguë shi ja sa nguë fëiu,
fo kusan fëiu dëli se ëli a chila ja fëfëiu.
36 Mandji se amu faa namsëdji fa djia juisio nguë tudu ske ta pa da lazhan fala danadu ku ëli chila fo böjö dëli.
37 Pakë fo fala bo se a ske ma pada bo,
se fo fala bo se a ske ma kondena bo».
Shinali Jonas
38 *Se zhugan nna meeth dalë ku nna fariseo faa ëli:
—Meetha,
no ngongo bë zhugan shinali fo pachi bo.
39 *Se ëli kundji ineñ:
—¡Zhenchi nna nguë malvadu ku nna nguë kabajölöiö ineñ sai ska pindji uan shinali ja ngangandji!
Mandji se a na ske da ineñ utu shinali mashi ku dji pantafala Jonasf.
40 Pakë amea shi Jonas bi sa tëishi djia ku nöchi tëishi dantu chipa uan taba pishi,
se ten ske sa tëishi djia ku nöchi tëishi shi ku Mina Napai Dösë ske sa dantu chipa chipa san dalea.
41 »A shime nna pöjödölö Ninive ten ske lanta djia juisio,
ta a ske juzhga zhenchi sai pa kondena ineñ,
pakë ineñ tëndë pegua Jonas se ineñ tan vla ku ope tashi,
se iai namsëdji sa ku uan nguë ngandji mashi ku Jonas.
42 Se main dalë Bosai ske bi lanta dantu djia juisio pa kondena zhenchi sai;
pakë ëli bi fo jabamentu tela valadji pa ëli bi tëndë tëndëmentu alë Salomon,
se iai namsëdji sa ku uan nguë ngandji mashi ku alë Salomon.
43 »Ta uan spitu fëiu ja së fo uan pöjödölö,
ëli ja bai ja ndanda jamian ineñ shi seku seku ja jua uan jamian pa ëli paadji djiskansa,
se ëli na ja bëf.
44 Tadashi se ëli ja faa:
“Amu tan ske vlame ba jadji amu jamian shi ku amu bi së folo”.
Ta ëli ja da,
se ëli ja toja dödji,
balidu ku jözhidu pë.
45 Tadashi se ëli ja bai se ëli ja ma utu spitu seta fëfëiu mashi ku ëli,
se ineñ ja lantela se ineñ ja bibe ala.
Se jabamentu vida masebu sai tan ja fëiu mashi ku fo jomesadu.
Se ten sa amea shi ten ske pasa ku zhenchi fëfëiu sai.
Main Djisu ku nna namain dëli
46 Se öshi ontolo Djisu bi ska faa ku nna möi pöjödölö,
ja pia,
se main dëli ku nna namain dëli bi ba ala.
Se ineñ mdja öluia,
se ineñ bi ska dishia pa ineñ faa ku ëli.
47 Se uan nguë faa ëli:
—Main bo ku nna namain bo sa öluia se ineñ ngongo faa ku bo.
48 Se Djisu tan vlame faa ineñ:
—¿Kë nguë sa main amu,
se kë nguë sa nna namain amu?
49 Ja msa nna balë dëli,
se ëli tan faa: