11
Djisu ska da monova Zhuan Bachita
1 Ta Djisu da nna deshi ku dösu balë dëli lazhan jö shi pa ineñ fë jaba,
se ëli së fo ala pa ëli ba shina nguë kuzhu ku pa ëli ten pegua utu loso loso.
2 Zhuan Bachita bi sa djili;
se ta ëli tëndë jö ineñ shi Kilitu bi ska fë,
se ëli manda nna balë dëli,
3 valadji pa ineñ pongota ëli:
—¿Bo se sa nguë shi ta pa bi iai,
ö ta pa no tan gada utu nguë?
4 Se Djisu kundji ineñ:
—Namsëdji bai pa namsëdji da Zhuan lazhan jö ineñ shi namsëdji ska tëndë ku namsëdji ska bë:
5 Nna nguë sebu ska bë kuzhu,
nna ojogo ska nda,
nna nguë ineñ shi sa ku lepla sa kuladu,
nna nguë ku sa ku olea tapadu ska tëndë kuzhu,
nna mochi tan ska lanta bi vida,
se a ska pegua nova gavu da nna puvili.
6 Besa se ja sa ku nguë shi na ja da topu dajantu amuf.
7 Se öshi nna balë Zhuan bi ska bai,
se Djisu jomesa ja faa nna moi pöjödölö ineñ sai ja tëjantu ku Zhuan:
«¿A kë ja namsëdji së ba jua dantu jamian sölö sölö?
¿Uan ope anjana ku oventu ja sugudji?
8 Shi na,
¿ja namsëdji së ba ua?
¿Uan pöjödölö bishidu ku bitidu lanlan?
Ja pia,
nna nguë ineñ shi ja bishi bitidu lanlan ja ta dantu jadji dalë.
9 Tadashi,
¿a kë ja namsëdji së ba ua?
¿Uan pantafala?
Shiën,
amu faa namsëdji,
ëli sa mashi ku uan pantafala.
10 Nguë sai se sa nguë shi dantu Fa Nashiolo sa skividu fa:
“Amu ske manda nguë shi pa ma nova amu bai deenchi jala bo,
ku ëli se ske fë vadu jamangandji bo pë deenchi bo”.
11 »Anta vedadji se amu faa namsëdji fa,
fo dantu nna nguë ineñ shi a pali fo naamain,
a na sa lanta zhugan nguë ngandji mashi ku Zhuan Bachitaf;
mandji se nguë shi kichi mashi dantu gövöndölö dösë,
se ja sa ngandji mashi ku ëli.
12 *Fo djia ineñ shi Zhuan Bachita bi sa,
bi toja öseshi,
gövöndölö dösë ja ska ma mavida ku buku buku,
se nna nguë buku buku se ja ma ëli.
13 Pakë nna pantafala ku alë Moises tudu ineñ pantafala ba toja tempu Zhuan.
14 *Se shi namsëdji ja ngongo ma fala amu,
Zhuan se sa pantafala Elias shi bi ske ta pa bi bi.
15 Nguë shi ja të olea,
pa ëli ja tëndë.
16 »¿Kë ja amu paadji bë fo dantu fidu ja zhenchi sai?
Ineñ ja sa fidu nna mina napai ku ja tusan mete döluia ja ta kidëlë da nna jamada dëneñ,
ja faa:
17 “No da fala pitu,
se namsëdji na baiaf.
No janta da nna nguë mölidu,
se namsëdji na sulaf”.
18 »Pakë bi Zhuan,
ku na ja kumufa ñi bëbëf,
se ineñ ja faa:
“Ëli sa ku damono”.
19 Se bi Mina Napai Dösë,
ku ja kumu ku ja bëbë,
se ineñ ja faa:
“Ja pia,
nguë sai sa uan fochi ku uan bëbëdölö vian,
jamada nna nguë ma tesu ku nna pekadölö”.
Mandji se tëndëmentu ja msa dëtu amea fidu ja dëli».
Puvili palea ineñ shi na tan vla Nashiolof
20 Tadashi se Djisu jomesa ja da fëiu palea ineñ shi ëli bi fë fidu ja ngangandji mashi,
pakë ineñ na tan vla ku ope tashif.
21 «¡Puvili bo,
loso Korasin!
¡Puvili bo,
loso Betsaida!,
pakë shi ja pa sa ja a bi bi fë dantu Tiro ku Sidon fidu ja ngangandji ineñ shi a fë metadji namsëdji iai,
bi ske sa tempu löngö ku namsëdji tan vla ku ope tashi ku uan sapa dödö.
22 Mandji se amu faa namsëdji fa,
djia juisio jatigu Tiro ku Sidon ske sa levu mashi ku dji namsëdji.
23 »Se bo,
Kapernaum,
¿bo këlë fa a ske lanta bo ba toja ösë?
Na,
shina bo ska dësë ba toja Ades.
Shi fidu ja ngangandji ku a fë ku bo iai bi sa ja a fë palea Sodoma,
ba toja ödjai djia ontolo ëli bi ske sa.
24 *Mandji se amu faa namsëdji,
djia juisio jatigu loso loso Sodoma ske sa levu mashi dji bo».
Djiskansa da nna nguë jansadu
25 Se dantu tempu sala se Djisu faa:
«Amu ja alaba bo,
Pai,
Shiölö liba dösë ku dji tela,
pakë bo na lega pa nna sëbëdölö ku nna nguë sëbë kuzhu jönsë jö ineñ sef,
se bo msa nna nguë shipë shipë.
26 Shiën,
Pai,
pakë se bi sa vintadji gavu bo.
27 *»Ja tudu sa ja Pai amu da amu.
Se zhugan nguë na jönsë Minaf shina Pai,
se zhugan nguë na jönsë Paif shina Mina ku nguë shi ku Mina ja ngongo msa ëli.