10
Djisu manda uan deshi ku dösu nna apostol bai
1 Tadashi se ëli sama nna balë deshi ku dösu dëli se ëli da ineñ pödë liba nna spitu fëfëiu,
valadji pa ineñ ja chila ineñ ba öluia,
ku pa ineñ ja kula klase danchi ku klase duadu tudu.
2 Namu deshi ku dösu nna apostol bi sa:
Pimëlu sa Shiman,
ku a ten ja sama ëli Pudul,
ku namain dëli Andëlë,
Sanchagu ku namain dëli Zhuan,
nna mina Sebedeo,
3 Filipa,
Bartolome,
Tomashi,
Matë nguë ma tesu,
Sanchagu mina Alfeo,
Tadeo,
4 Shiman nguë shi sa nguë kanan,
Judas Iskariote nguë shi vëndë Djisu.
5 Se Djisu manda nna deshi ku dösu ineñ sai ku amea odji ineñ sai:
«Namsëdji na ja ska be dantu jamangandji nna nguë ku na sa judiofa,
ñi pa namsëdji na ja bai ja lantela palea nna nguë samariaf.
6 Shina namsëdji ja ska be ku nna jabala pindjidu pövu Israel.
7 Ja sa jamian shi namsëdji ja bai,
ja pegua nova sai:
“Djia shi Nashiolo ske sa gövöndölö dösë sa peetu bebezha”.
8 Ja kula nna nguë ineñ shi ska danchi,
ja lanta nna nguë mölidu bi vida,
ja limpa danchi se fo nna nguë ineñ shi sa ku lepla,
ja chila damono fo nguë.
Jö ineñ shi a ja da namsëdji dödji,
ten ja da nguë dödji limpi pepepe.
9 »Namsëdji na ja ma oro ñi plata ñi boto jubil namsëdjif,
10 *ñi bondëlë da jamangandjif,
ñi jaminzha dösu pa ja tukaf,
ñi ja mëtëpopef,
ñi budanfa;
pakë tabaiadölö ja mësë pa ja da ëli manchimentu.
11 »Ta namsëdji ja lantela dantu uan palea ö uan loso,
namsëdji ja jua uan pöjödölö ku ja mësë pa ma namsëdji jadji dëli,
se namsëdji ja mdja jadji dëli ba toja ta namsëdji ja së fo jamian sai.
12 Ta namsëdji ja lantela dantu uan jadji;
ja da manten.
13 Shi jadji sai ja mësë ondolo,
padji namsëdji ske ba liba dëli;
mandji se shi ineñ na ja mësë ondolof,
se padji namsëdji tan ske vla ba toja namsëdji.
14 *Shi uan nguë na ja ma namsëdji gavu ñi tëndë fala namsëdjif,
namsëdji ja së fo jadji sai ö loso sai,
se namsëdji ja sugudji opo fo ope namsëdji.
15 **Anta vedadji se amu faa namsëdji fa djia juisio jatigu loso loso Sodoma ku Gomora ske sa levu mashi ku dji loso sai.
16 *»Amu ska da namsëdji bai shimafan jabala metadji nna jösölö djiga.
Dajantu shi,
namsëdji ja sa supetu shimafan jobolomatu,
mandji pa namsëdji ja sa masu shimafan löla.
17 *Ja ska pindjidu nna pöjödölö,
pakë ineñ ske ma namsëdji ba deenchi zhunta nna jasa jasa pövu se a ske da namsëdji ku valasöchi dantu jadji Nashian nna judio.
18 Se tëjantu ku amu se a ske ma namsëdji ba deenchi nna gövöndölö ku nna alë,
valadji pa namsëdji paadji da ineñ lazhan gavu ku nna nguë ineñ shi na ja këlë Nashianf.
19 Mandji se ta a ja të namsëdji,
namsëdji na ja sa tave da jö shi namsëdji ske faafa ö kë amea shi namsëdji ske faaf,
pakë ola shime se a ske da namsëdji jö ineñ shi pa namsëdji faa ineñ.
20 Pakë na sa namsëdji se ske ja faa falaf,
shina Spitu Pai namsëdji se ske ja faa fala amea namsëdji.
21 *»Uan namain ske ja ma namain dëli ba da mölë,
se pai ske ja da mina dëli.
Se nna mina ske vla subebu ku pai dëneñ se ineñ ske ja chila ineñ vida folo.
22 *Se mundu nguintëlu nguintëlu ske ja të pashian namsëdji dajantu namu amu,
mandji se ja sa nguë shi ja mdja dëtu ba toja jabamentu se ëli ske sava.
23 Ta a ja pëtëpë namsëdji dantu uan palea,
namsëdji ja jölë ba utu palea:
pakë anta vedadji se amu faa namsëdji fa,
namsëdji na ske sa chama jölë ludja palea Israel tuduf anta pa Mina Napai Dösë tan vlame bi.
24 *»Zhugan balë na ja sa supiölö meeth dëlif,
ñi zhugan shividölö na ja sa supiölö shiölö dëlif.
25 *Ja dagoli öshi balë ja sa shimafan meeth dëli,
pa shividölö ja sa shimafan shiölö dëli.
Se shi mötölö jadji a sama ëli Belsebu,
¡jantu mashi nna nguë jadji dëli!
26 *»Dajantu shi pa namsëdji na ja mendu ineñf,
pakë na të zhugan ja jöndjidu ku a na ja paadji sëbëf,
ñi zhugan ja jöndjidu ku a na ja paadji jönsëf.
27 Jö ineñ shi amu ja faa namsëdji dantu jamian kulu,
namsëdji ja faa dantu jamian fögö djidjidu;
se jö shi namsëdji ja tëndë ku bodo oleia,
ja pegua fo van dötë dötë jadji.
28 »Namsëdji na ja mendu nna nguë ineñ shi ja mata öguëf,
pakë ineñ na ja paadji mata almaf.
Namsëdji ja mendu nguë shi ja paadji të alma ku öguë të fea fea dantu onfenu.
29 ¿A na ja vëndë bichili dösu da uan djiëlu ua?
Mandji se zhugan ineñ na ja pono da san shi Pai namsëdji na ja legaf.
30 Pakë ba toja jabelu jasa namsëdji tudu sa jontadu.
31 Dajantu shi namsëdji na ja menduf,
pakë namsëdji se shivi mashi ku uan sapa bichili.
32 »Ja sa nguë shi ja jönsë amu deenchi nna pöjödölö,
amu ten ske jönsë ëli deenchi Pai amu ku sa ösë.
33 *Mandji se ja sa nguë shi na ja jönsë amu deenchi nna pöjödölöf,
amu na ten ske jönsë ëli deenchi Pai amu ku sa ösëf.
34 »Namsëdji na ja mazhna fa amu ma padji bi telaf.
Amu na ma padji bif,
shina jatana.
35 “Pakë amu bi pa amu bi fë kesa
pöjödölö ske ja pezha ku pai dëli,
mina naamain ske ja pezha ku main dëli,
sogolo ske ja pezha ku main sogolo dëli.
36 ¡Nna namigu uan pöjödölö
ske sa nna nguë jadji dëli!”.
37 »Nguë shi ja ngongo ku pai dëli ö main dëli mashi ku amu ëli na mësë pa ëli sa nguë amuf;
nguë shi ja ngongo ku mina dëli ö mina naamain dëli mashi ku amu,
ëli na mësë pa ëli sa nguë amuf;
38 *se nguë shi na ja ma kusu dëli pa ëli lë amuf,
ëli na mësë pa ëli sa nguë amuf.
39 *Nguë shi ja ngongo sava vida dëli,
ëli ske pëndë vida dëli;
mandji se nguë shi ja paadji da vida dëli dajantu amu,
ëli ske sava vida dëli.
40 *»Nguë shi ja ma namsëdji,
nguë se ten ja ma amu;
se nguë shi ja ma amu,
se ten ja ma nguë shi se da amu bi.
41 Ja sa nguë shi ja ma uan pantafala dajantu ku sa pantafala ske të ja pagu uan pantafala;
se nguë shi ja ma uan nguë dëtu dajantu ku sa nguë dëtu ske të ja pagu nna nguë dëtu.
42 Se nguë shi ja da uan pochi daua fesku a uan nguë kichi kichi ineñ sai dajantu ku ineñ sa uan nna balë amu,
anta vedadji se amu faa namsëdji fa ëli na ske pëndë pagu dëlif».